01/06/2026
Գյումրու քաղաքապետարանի հունիսմեկյան ուղերձը. առաջնահերթությունը մանուկների լուսավոր ապագան է
Երեխաների պաշտպանության միջազգային օրը Գյումրիում նշվում է համաքաղաքային լայնածավալ միջոցառումներով, որոնց հիմքում մեկ գլխավոր գաղափար է՝ կերտել մանուկների հուսալի ու բարեկեցիկ ապագան։ Գյումրու քաղաքապետարանի որդեգրած քաղաքականության մեջ երեխաների հանդեպ հոգածությունն ու նրանց զարգացման համար պայմանների ստեղծումն ունի հատուկ ուղղվածություն։ Այսօր մեկնարկած տոնական ծրագրերն այդ ռազմավարության լավագույն արտահայտությունն են, որտեղ ամեն մի դետալ մտածված է բացառապես փոքրիկների համար։
Տոնական օրվա սկիզբը կենդանի երաժշտությամբ ազդարարեց Գյումրու պետական փողային նվագախումբը։ Աբովյան փողոցում հնչող մանկական մեղեդիները ստիպեցին կանգ առնել ոչ միայն փոքրիկներին, այլև մեծահասակներին, ովքեր մեծ սիրով միացան հունիսմեկյան ռիթմերին։
Մեղեդիներին հաջորդեց հեքիաթային հերոսների շքերթը. տասնյակ սիրված տիկնիկներ տարբեր կերպարներով մուտք գործեցին քաղաքի կենտրոն՝ էլ ավելի թեժացնելով տոնական մթնոլորտը։
Փոքրիկների տոնը կատարյալ դարձնելու գործին միացել էին նաև այլ կազմակերպություններ։ Բոլորի նպատակն էր մեկտեղել ջանքերը երեխաներին անսահման ուրախություն պարգևելու համար, ինչի վառ ապացույցը դարձավ նաև երեխաների կողմից այդքան սիրված պղպջակների շոուն։
Գյումրու քաղաքապետարանի մշակույթի բաժնի պետ Լիլիթ Թովմասյանի խոսքով, քաղաքապետարանի տարեկան ծրագրերի մեջ հունիսմեկյան միջոցառումներն ամենալուսավորն ու դրականն են, քանի որ դրանցով է սկսվում ամառը։
Հունիսմեկյան ավանդական միջոցառումների շարքում Գեղագիտական կենտրոնի հետ կազմակերպված մեծ կտավների նկարչությունն էր, որտեղ երեխաները թղթին հանձնեցին հայրենիքի իրենց պատկերացումները։
Այս օրը քաղաքապետարանի համար առանձնակի կարևոր է նաև կրթամշակութային բաղադրիչը։ Ասլամազյան քույրերի պատկերասրահում, Երևանի թատրոնի և կինոյի պետական ինստիտուտի Գյումրու մասնաճյուղի ուսանողների հետ համատեղ, ներկայացվեց Վիլյամ Սարոյանի պատմվածքների հիման վրա բեմադրված «Ով ըլլալդ չպիտի ուրանաս» թատերախաղը։ Այստեղ հրավիրված էին ավագ դպրոցականները։ Լիլիթ Թովմասյանը կարևորում է, որ երեխաները ճանաչեն Սարոյանին և հասկանան, թե ինչպես պետք է հայրենասիրությունն ու հայապահպանությունը սերնդեսերունդ փոխանցվի։
Հատուկ ուշադրություն է դարձվել սոցիալական հավասարությանը. քաղաքապետարանն ապահովել է, որ ֆինանսական հնարավորությունները որևէ երեխայի չզրկեն տոնից։
Գյումրու տիկնիկային թատրոնի «Գնդիկ բոքոնիկը» ներկայացման համար քաղաքապետարանն այս տարի ևս անվճար տոմսեր է հատկացրել սոցիալապես անապահով ընտանիքների երեխաներին։
«Գյումրին սոցիալական քաղաք է, և միջոցառումների հասանելիությունը մեզ համար սկզբունքային է»,- ասում է Լիլիթ Թովմասյանը։
Փոքրիկների տոնական օրը կամփոփվի ժամը 20․00 Վարդանանց հրապարակում՝ անվճար բացօթյա կրկեսային ծրագրով։ Սա եզակի իրադարձություն է, քանի որ քաղաքում երկար ժամանակ բացօթյա կրկես չէր եղել։ Քաղաքապետարանը սպասում է հարյուրավոր փոքրիկների, որպեսզի հրապարակում ևս մեկ անգամ նրանց շնորհավորեն, մաղթեն խաղաղ երկինք, ստեղծագործական ընթացք և ընտանեկան ջերմություն։»
Միջոցառումների աշխարհագրությունը դուրս էր եկել կենտրոնից՝ ընդգրկելով նաև քաղաքի տարբեր թաղամասերը, որտեղ ևս ելույթ ունեցան տարբեր պարախմբեր։
Իսկ ծնողների ու երեխաների անկեղծ հույզերն ու տպավորությունները փաստում են՝ հունիսմեկյան տոնը Գյումրիում ստացված է։
