Քաղաքացիական ծառայության գրասենյակ

30/03/2026

📌 Սույն թվականի մարտի 27-ին ՀՀ վարչապետի աշխատակազմի քաղաքացիական ծառայության գրասենյակում հանդիպում կայացավ Արժույթի միջազգային հիմնադրամի (ԱՄՀ) աջակցությամբ իրականացվող՝ Սթենդ-Բայ Համաձայնագրի 1-ին վերանայման նպատակով Հայաստանում գտնվող ԱՄՀ առաքելության ներկայացուցիչների հետ։

🔹Հանդիպման ընթացքում ԱՄՀ առաքելության անդամներին է ներկայացվել աշխատավարձի և աշխատավարձի ֆոնդից վճարվող այլ վճարների վերաբերյալ տվյալների հավաքագրման, աշխատուժի պլանավորման գործընթացները, ինչպես նաև պետական մարմիններում առկա թափուր աշխատատեղերի խնդիրներին, աշխատավարձի համակարգի բարեփոխումների վերաբերող Կառավարության կողմից քննարկվող հայեցակարգերը։

23/03/2026

📌 Այսօր ավարտվեցին ՀՀ վարչապետի աշխատակազմի քաղաքացիական ծառայության գրասենյակում սույն թվականի մարտի 9-ին մեկնարկած վարկանիշային ցուցակը համալրելու համար անցկացվող հերթական թեստավորումները, որի արդյունքում ներկայացած 374 մասնակիցներից 137-ն ընդգրկվեցին վարկանիշային ցուցակում։

18/03/2026

📌 Սույն թվականի մարտի 9-13-ը ՀՀ վարչապետի աշխատակազմի, Քաղաքացիական ծառայության գրասենյակի, ինչպես նաև ՀՀ ԱԺ աշխատակազմի ներկայացուցիչները մասնակցել են Գերմանիայի միջազգային համագործակցության ընկերության (GIZ) «Արևելյան գործընկերության տարածաշրջանային ծրագիր հանրային կառավարման բարեփոխումների տարածաշրջանային ծրագիր III»-ի համատեքստում Գերմանիայի տնտեսական համագործակցության և զարգացման դաշնային նախարարության պատվիրմամբ և OECD/EU SIGMA ծրագրի հետ համագործակցությամբ Ֆրանսիայի Հանրապետության Փարիզ քաղաքում անցկացվող GIZ-SIGMA Արևելյան գործընկերության կին առաջնորդների համաժողովին։

🔹 Համաժողովի ընթացքում ՀՀ ներկայացուցիչները հանդես են եկել ՀՀ ներկայիս գենդերային քաղաքականությունն արտացոլող շնորհանդեսով, այդ համատեքստում քննարկվել են Արևելյան գործընկերության տարածաշրջանում հանրային կառավարման ոլորտում կանանց և տղամարդկանց հավասար հնարավորությունների խթանմանն ու ներառմանն ուղղված ներկայիս քաղաքականությունը, ինչպես նաև դրանց իրականացման ընթացքում առաջացող հիմնական խոչընդոտներն ու մարտահրավերները։

GIZ Eastern Partnership Regional Project for Public Administration Reform
GIZ Armenia
OECD

17/03/2026

📌Մարտի 17-ին ՀՀ վարչապետի աշխատակազմի քաղաքացիական ծառայության գրասենյակում Աշխատանքի և սոցիալական հարցերի նախարարության Աշխատանքի և սոցիալական հետազոտությունների ազգային ինստիտուտի տնօրենի տեղակալ Գառնիկ Նալբանդյանը անցկացրեց վերապատրաստում «Զբաղմունքների, պաշտոնների և կարողությունների (կոմպետենցիաների) ազգային դասակարգիչ» և «Հայաստանի Հանրապետության մասնագիտական կրթության և ուսուցման ոլորտում որակավորումների ոլորտային շրջանակների և դրանց բաղադրիչների ձևավորման մեթոդաբանություն» թեմաներով։

🔹Վերապատրաստման ընթացքում ներկայացվեցին և քննարկվեցին որակավորումների ոլորտային շրջանակների նկարագիրը, դրանց կառուցվածքը, ՀՀ էկոնոմիկայի նախարարի 2026 թվականի հունվարի 30-ի թիվ 182-Ն որոշմամբ (ուժի մեջ է մտնելու 2026 թվականի մարտի 19-ին) հաստատված «Զբաղմունքների, պաշտոնների և կարողունակությունների (կոմպետենցիաների) ազգային դասակարգիչը» և կիրառության նպատակը, շրջանակն ու կառուցվածքը, սերտ կապը քաղաքացիական ծառայության պաշտոնների, ինչպես նաև ժամանակակից աշխատաշուկայի մշտապես փոփոխվող պահանջների հետ։

12/03/2026

📌 Մարտի 12-ին համապատասխան մարմինների անձնակազմի կառավարման ստորաբաժանման աշխատակիցները ՀՀ վարչապետի աշխատակազմի քաղաքացիական ծառայության գրասենյակում մասնակցել են Գրասենյակի և «Սմարթիմփայեր» ՍՊԸ-ի հետ համատեղ կազմակերպված վերապատրաստման դասընթացին։

🔹Վերապատրաստումը նվիրված էր ժամկետային աշխատանքային պայմանագրով քաղաքացիական ծառայության պաշտոն զբաղեցնելու գործընթացներին՝ նպատակ ունենալով համապատասխան մարմինների անձնակազմի կառավարման ստորաբաժանումներին իրազեկել քաղաքացիական ծառայության տեղեկատվական հարթակով նշված գործընթացի իրականացման թվային գործիքակազմերին։

11/03/2026

📌 Սույն թվականի մարտի 11-ին ՀՀ վարչապետի աշխատակազմի քաղաքացիական ծառայության գրասենյակում «Կամուրջներ» հասարակական զարգացման միջազգային կենտրոնի նախագահ, Executive & Team MCC ICF քոուչ Նարինե Կարսլյանը (Наринэ Карслян) հանդես է եկել դասախոսությամբ՝ «Հուզական ինտելեկտ» խորագրով։ Հանդիպման ընթացքում ներկայացվել և քննարկվել են հուզական ինտելեկտի (EI) պահանջարկի, արհեստական բանականության և հուզական ինտելեկտի հակադրությունների վերաբերյալ մի շարք հարցեր, ինչպես նաև անդրադարձ է կատարվել տարբեր ոլորտներում, այդ թվում՝ առաջնորդության մեջ EI գործիքների կարևորությանն ու կիրառությանը, աշխատավայրում EI հիմնական կարողությունների և արդյունավետ հաղորդակցության դրսևորման առանձնահատկություններին։

10/03/2026

📌 ՀՀ վարչապետի աշխատակազմի քաղաքացիական ծառայության գրասենյակը դեռևս 2025 թվականի ապրիլից պաշտոնապես մեկնարկել էր Եվրոպայի պետական հատվածի հաստատությունների համար մշակված Գնահատման ընդհանուր շրջանակի (CAF)՝ որակի կառավարման գործիքի կիրառման գործընթացը, որի նպատակն է նպաստել Հայաստանի՝ հանրային կառավարման ոլորտում ԵՄ որակի կառավարման չափանիշներին համապատասխանեցմանը։ 🇪🇺

🤝Կարևորելով իր միջազգային գործընկերների (GIZ, OECD/SIGMA, EIPA) հետ համագործակցությունը՝ Գրասենյակը պատրաստակամություն հայտնեց զարգացնելու, բարելավելու և կատարելագործելու իր աշխատակազմի կարողությունները և ներդնելու CAF մոդելը։

📊 Գրասենյակը, հետամուտ լինելով CAF մեթոդաբանությանն ու հստակ չափորոշիչներին, սկսեց ինքնագնահատման գործընթացը, որի արդյունքում մշակվեց Գրասենյակի ինքնագնահատման զեկույցը, որից բխեցվեցին առաջնահերթությունները և դուրս բերվեց երկամյա գործողությունների պլանը։

🏆 Արդյունքում, CAF մոդելը պատշաճ ներդնելու և ամբողջ գործընթացը հաջողելու համար սույն թվականի մարտի 5-ին Եվրոպական CAF ռեսուրս կենտրոնի ղեկավարի կողմից Գրասենյակին շնորհվեց «CAF արդյունավետ օգտագործող» (ECU) հավաստագիրը։

10/03/2026

📌 Սույն թվականի մարտի 3-6-ը ՀՀ վարչապետի աշխատակազմի քաղաքացիական ծառայության գրասենյակի ներկայացուցիչները մասնակցել են «Արևելյան գործընկերության հանրային կառավարման բարեփոխումների տարածաշրջանային ծրագիր III»-ի համատեքստում OECD/SIGMA-ի, GIZ Արևելյան գործընկերության հանրային կառավարման բարեփոխումների (PAR) բարելավման ծրագրի և EIPA-ի (Հանրային կառավարման եվրոպական ինստիտուտի) կողմից CAF «Ընդհանուր գնահատման համակարգի» շրջանակում Նիդերլանդների Թագավորության Մաստրիխտ քաղաքում կայացած CAF գործընթացը վարողների և վերապատրաստողների վերապատրաստման (TOT) ծրագրին։ Եռօրյա ինտենսիվ վերապատրաստումների ընթացքում մասնակիցներն իրականացրել են CAF ինքնագնահատման գործընթացի փորձի փոխանակում, հզորացրել են գործողությունների պլանավորման մեթոդաբանությունը, ձևավորել են Արևելյան գործընկերության CAF վերապատրաստողների ավելի ամուր համայնք: Ծրագրի ավարտին GIZ-ի, OECD/SIGMA-ի և EIPA-ի կողմից մասնակիցներին տրվել են հավաստագրեր՝ ծրագիրը հաջողությամբ ավարտելու համար։

GIZ Eastern Partnership Regional Project for Public Administration Reform
GIZ Armenia
European Institute of Public Administration (EIPA)
OECD

09/03/2026

02/03/2026

📌 Փետրվարի 27-ին ՀՀ վարչապետի աշխատակազմի քաղաքացիական ծառայության գրասենյակի աշխատակիցները ներկայացրել են «Արևելյան գործընկերության հանրային կառավարման բարեփոխումների տարածաշրջանային ծրագիր III»-ի համատեքստում՝ Գերմանիայի տնտեսական համագործակցության և զարգացման դաշնային նախարարության և GIZ-ի կողմից Նիդերլանդների Թագավորության Հաագա քաղաքում «Էթիկական առաջնորդությունը քաղաքացիական ծառայության մեջ» թեմայով կայացած վերապատրաստման ծրագրի շրջանակներում ձեռք բերված գիտելիքներն ու փորձը։ Հանդիպման ընթացքում անդրադարձ է կատարվել էթիկական առաջնորդության ներդրման ճանապարհային քարտեզին, այդ թվում՝ բարեվարքության կառավարման հիմնական բաղադրիչներին, կառավարման մոդելին և հիմնարար սկզբունքներին։

04/02/2026

📌 Հայաստանի Հանրապետության վարչապետի աշխատակազմի քաղաքացիական ծառայության գրասենյակը հայտարարել է քաղաքացիական ծառայության մասնագիտական պաշտոնների 6-րդ, 7-րդ և 8-րդ ենթախմբերի պաշտոններն զբաղեցնելու համար վարկանիշային ցուցակ կազմելու համար անցկացվող թեստավորում: Մանրամասներին ծանոթանալու համար անցնել հետևյալ հղումով՝

26/12/2025

Ավանդույթի համաձայն՝ Քաղաքացիական ծառայության գրասենյակը զարդարեց ամանորյա տոնածառը։
Ցանկանում ենք այս տոնական տրամադրությունը կիսել մեր բոլոր գործընկերների և քաղաքացիների հետ՝ շնորհավորելով գալիք Ամանորն ու Սուրբ Ծնունդը և մաղթելով բոլորին խաղաղությամբ, բարությամբ, հաջողություններով ու ձեռքբերումներով լի տարի։✨️