06/05/2026
6 may 2026-cı il tarixdə Yeni Azərbaycan Partiyası Babək rayon təşkilatı, Babək Rayon İcra Hakimiyyəti və Babək Rayon Təhsil Şöbəsinin birgə təşkilatçılığı ilə Ümummilli lider Heydər Əliyevin anadan olmasının 103-cü ildönümünə həsr olunmuş “Ömrünü xalqa həsr edən dahi lider – Heydər Əliyev” adlı tədbir keçirilib.
Əvvəlcə Babək şəhərinin mərkəzində yerləşən Ulu Öndərin abidəsi ziyarət edilərək önünə gül dəstələri qoyulub, dahi şəxsiyyətin əziz xatirəsinə dərin ehtiram ifadə olunub.
Tədbir Babək rayon Mədəniyyət idarəsində davam edib. Tədbirin əvvəlində Ümummilli Lider Heydər Əliyevin və Azərbaycanın ərazi bütövlüyü uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilib, ardınca Azərbaycan Respublikasının Dövlət Himni səsləndirilib.
Tədbirdə ilk olara çıxış edən Yeni Azərbaycan Partiyasının sədri İsa Məmmədov Ümummilli lider Heydər Əliyevin Azərbaycan dövlətçiliyinin formalaşması və möhkəmləndirilməsində müstəsna xidmətlərindən bəhs edib. O bildirib ki, ölkəmizin müstəqilliyinin qorunub saxlanılması, siyasi sabitliyin təmin olunması və milli birliyin gücləndirilməsi məhz Ulu Öndərin uzaqgörən siyasətinin nəticəsidir. Heydər Əliyevin müəyyən etdiyi inkişaf strategiyası bu gün də uğurla davam etdirilir və Azərbaycan regionda söz sahibi olan güclü dövlətə çevrilib. İsa Məmmədov vurğulayıb ki, Yeni Azərbaycan Partiyası dahi liderin siyasi kursunu layiqincə davam etdirərək ölkənin ictimai-siyasi həyatında aparıcı rol oynayır.
Ardınca çıxış edən Babək rayon İcra Hakimiyyəti başçısının müavini Səbinə Abbasova Heydər Əliyevin dövlət quruculuğu sahəsindəki əvəzsiz xidmətlərini xüsusi qeyd edib. O bildirib ki, Ulu öndərin rəhbərliyi ilə Azərbaycan mürəkkəb və çətin dövrdən çıxaraq sabitlik və inkişaf mərhələsinə qədəm qoyub. Müstəqil dövlətin iqtisadi əsaslarının yaradılması, hüquqi dövlət quruculuğu və sosial rifahın yüksəldilməsi istiqamətində atılan addımlar bu gün də öz bəhrəsini verir. Hazırda ölkədə həyata keçirilən uğurlu sosial-iqtisadi siyasət Heydər Əliyev ideyalarına əsaslanır və regionların inkişafına mühüm töhfə verir.
Sonra çıxış edən Babək rayon Təhsil Şöbəsinin müdiri Sahil Əlizadə Ümummilli liderin təhsilə və gənclərə göstərdiyi diqqət və qayğıdan bəhs edib. O qeyd edib ki, Heydər Əliyev hər zaman təhsili dövlət siyasətinin prioritet istiqamətlərindən biri kimi qiymətləndirib və bu sahənin inkişafı üçün mühüm addımlar atıb. Bildirilib ki, bu gün Azərbaycanda müasir təhsil sisteminin formalaşması, gənclərin bilikli, vətənpərvər və milli-mənəvi dəyərlərə bağlı yetişməsi məhz bu siyasətin nəticəsidir. Sahil Əlizadə qeyd edib ki, müəllimlər və təhsil işçiləri Ulu öndərin ideyalarına sadiq qalaraq gələcək nəslin yetişdirilməsində üzərlərinə düşən məsuliyyəti layiqincə yerinə yetirirlər.
Tədbirin davamında Yeni Azərbaycan Partiyasına yeni üzv olan şəxslərə üzvlük vəsiqələri təqdim edilib və daha sonra Ümummilli Lider Heydər Əliyevin həyat və fəaliyyətinə həsr olunmuş film nümayiş etdirilib.
Tədbirin sonunda iştirakçılarla birlikdə xatirə fotosu çəkdirilib.
