10/09/2026
“Riyaziyyat və Mexanikanın Müasir Problemləri” XIII Beynəlxalq Elmi Konfransı işə başlayıb
Sentyabrın 9-da Azərbaycan Respublikası Elm və Təhsil Nazirliyinin Riyaziyyat İnstitutunun təşkilatçılığı ilə “Riyaziyyat və mexanikanın müasir problemləri” XIII Beynəlxalq Elmi Konfransının açılış mərasimi keçirilib.istiqamətlərinin
Konfrans Azərbaycan Respublikasının Dövlət Himninin səsləndirilməsi ilə başlayıb.
Üç gün davam edəcək beynəlxalq elmi konfrans riyaziyyat və mexanika sahəsində müasir elmi yanaşmaların, aktual tədqiqat istiqamətlərinin və yeni elmi nəticələrin müzakirəsi, eləcə də beynəlxalq əməkdaşlığın genişləndirilməsi baxımından əhəmiyyət daşıyır. Konfrans Azərbaycan Respublikası Elm və Təhsil Nazirliyinin Riyaziyyat İnstitutu, Bakı Dövlət Universiteti, Mirzə Uluqbek adına Özbəkistan Milli Universiteti, Vasyl Stefanyk adına Karpat Milli Universiteti (Ukrayna) və İnformasiya Texnologiyaları İnstitutunun təşkilatçılığı ilə keçirilir.
Açılış mərasimində Riyaziyyat İnstitutunun direktor vəzifəsini icra edən, direktor müavini, t.e.d., dosent Elxan Səbziyev çıxış edərək konfrans iştirakçılarını salamlayıb. O, “Riyaziyyat və mexanikanın müasir problemləri” XIII Beynəlxalq Elmi Konfransının artıq ənənəvi elmi platformaya çevrildiyini və müxtəlif ölkələrdən olan alim və tədqiqatçıları bir araya gətirdiyini bildirib. Elxan Səbziyev konfransın əsas məqsədlərindən birinin riyaziyyat və mexanika sahəsində aparılan aktual tədqiqatların nəticələrinin paylaşılması, yeni elmi ideyaların müzakirəsi və müxtəlif elmi məktəblər arasında əlaqələrin inkişaf etdirilməsi olduğunu qeyd edib. O vurğulayıb ki, belə beynəlxalq elmi tədbirlər alimlərə yalnız öz tədqiqat nəticələrini təqdim etmək deyil, həm də həmkarlarının elmi yanaşmaları ilə tanış olmaq, fikir mübadiləsi aparmaq və gələcək birgə tədqiqatlar üçün yeni imkanlar yaratmaq baxımından mühüm əhəmiyyət daşıyır.Elxan Səbziyev konfrans çərçivəsində aparılacaq müzakirələrin yeni elmi nəticələrin əldə olunmasına və beynəlxalq elmi əməkdaşlığın daha da genişlənməsinə töhfə verəcəyinə əminliyini ifadə edib.
Konfransda Elm və Ali Təhsil üzrə Dövlət Agentliyinin direktor müavini,AMEA -nin müxbir üzvi Əminağa Sadıqov çıxışında müasir elmin qarşısında duran yeni çağırışlar fonunda fundamental tədqiqatların əhəmiyyətini vurğulayıb. O bildirib ki, süni intellekt, böyük verilənlər və rəqəmsal texnologiyaların sürətli inkişafı riyazi metodlara və modelləşdirməyə olan ehtiyacı daha da artırır. Bu texnologiyaların yaradılmasının bünövrəsində riyaziyyat, riyazi düşüncə, bütün mühəndis həllərində isə mexanika elminin dayandığını qeyd edən Əminağa Sadıqov bu baxımdan konfransın digər elmi konfranslar sırasında çox mühüm yer tutduğunu və bu istiqamətdə beynəlxalq elmi əməkdaşlığın gücləndirilməsinin, gənc tədqiqatçıların dəstəklənməsinin və fundamental elmlə tətbiqi tədqiqatlar arasında əlaqələrin genişləndirilməsinin vacibliyini diqqətə çatdırıb.
AMEA-nın vitse-prezidenti, akademik Rasim Əliquliyev riyaziyyatın müasir elmi-texnoloji inkişafda rolundan danışaraq, bu elmin süni intellekt, informasiya texnologiyaları, iqtisadiyyat və mühəndislik daxil olmaqla müxtəlif sahələrdə geniş tətbiq olunduğunu bildirib. Rasim Əliquliyev Prezident İlham Əliyevin rəhbərliyi ilə ölkədə rəqəmsallaşdırma və rəqəmsal transformasiya istiqamətində həyata keçirilən ardıcıl tədbirlərdən danışıb. Bildirib ki, son illərdə ölkədə rəqəmsal texnologiyaların tətbiqinin genişləndirilməsi, elektron xidmətlərin inkişaf etdirilməsi sahəsində mühüm addımlar atılıb. Akademik rəqəmsallaşma proseslərinin yaratdığı imkan və çağırışlara toxunaraq, yüksək ixtisaslı kadrların hazırlanmasının və riyazi təfəkkürün inkişaf etdirilməsinin əhəmiyyətini vurğulayıb.
Sonra AMEA-nın müxbir üzvü, professor Misir Mərdanov geniş məruzə ilə çıxış edərək riyaziyyat və mexanikanın müasir elm və texnologiyaların inkişafındakı roluna diqqət çəkib. O, riyaziyyatın mürəkkəb sistemlərin anlaşılması, proqnozlaşdırılması və idarə olunmasının əsas vasitələrindən biri olduğunu qeyd edib.
Professor son illərdə süni intellektin sürətli inkişafının riyaziyyatın rolunu daha aydın göstərdiyini vurğulayıb. O bildirib ki, süni intellekt sistemlərinin əsasında xətti cəbr, ehtimal nəzəriyyəsi, statistika, optimallaşdırma, diferensial hesabı və yüksəkölçülü fəzalarda aparılan mürəkkəb riyazi əməliyyatlar dayanır.
Alim bugünkü konfransın beynəlxalq xarakter daşımasının da xüsusi məna kəsb etdiyini bildirib. Onun sözlərinə görə, elmin dili universaldır. Riyazi teorem, fiziki qanun və ya mexaniki model milli sərhədlərlə məhdudlaşmır. Elmi ideyaların bölüşdükcə zənginləşdiyini, müzakirə olunduqca dəqiqləşdiyini qeyd edən professor fərqli elmi məktəblərin qarşılıqlı əlaqəsi nəticəsində yeni tədqiqat istiqamətlərinin meydana çıxdığını diqqətə çatdırıb.
M. Mərdanov qeyd edib ki, konfransların ən böyük elmi dəyəri bəzən yalnız proqramda göstərilən məruzələrdə deyil, həmin məruzələrdən sonra verilən bir sualda, aparılan qısa müzakirədə və ya iki tədqiqatçı arasında yaranan yeni əməkdaşlıq ideyasında özünü göstərir. Misir Mərdanov çıxışının sonunda qeyd edib ki, elmin gələcəyi yalnız yeni teoremlərdən və yeni texnologiyalardan deyil, həm də bu elmi mədəniyyətin gələcək nəsillərə ötürülməsindən asılıdır.
Konfransın açılışında Mirzə Uluqbek adına Özbəkistan Milli Universitetindən Mersaid Aripov və Vasyl Stefanyk adına Karpat Milli Universitetindən Roman Dmytryshyn də çıxış edərək riyaziyyat elminin müasir çağırışları, innovativ tədqiqatlar və beynəlxalq elmi əməkdaşlığın perspektivləri barədə fikirlərini bölüşüblər.
Beynəlxalq konfrans öz işini plenar sessiyalarla davam etdirib.
İmath.az
Eatda.edu.az
