Riyaziyyat İnstitutu PHŞ

08/06/2026

Azərbaycanlı alimin məqaləsi Oksford jurnalında ən çox istinad olunan iş seçilib

Azərbaycan Respublikası Elm və Təhsil Nazirliyi Riyaziyyat İnstitutunun “Riyazi analiz” laboratoriyasının aparıcı elmi işçisi Namiq Quliyevin 2023-cü ildə dərc olunmuş məqaləsi Oksford Universitetinin “The Quarterly Journal of Mathematics” jurnalında son beş il ərzində dərc olunmuş elmi işlər arasında ən çox istinad olunan məqalə olub.

Bu barədə məlumat jurnalın rəsmi internet səhifəsində yer alıb. academic.oup.com

Tədqiqat nəticəsində məlum olub ki, sərhəd şərtlərində spektral parametr olan məsələlərə dair hər hansı bir nəticə dərhal Bessel tipli (tərs kvadratik) sinqulyarlığı olan məsələlər üçün də tətbiq edilə bilir və əksinə. Bu isə riyaziyyat sahəsində yeni tədqiqat imkanları açır və mövcud anlayışları birləşdirir.

Qeyd edək ki, 1930-cu ildən fəaliyyət göstərən və XIX əsrdən etibarən Kembricdə mövcud olmuş iki riyaziyyat jurnalının birləşməsi nəticəsində yaradılmış bu jurnal, bu günə qədər dünyanın ən görkəmli alimlərinin əsərlərinə ev sahibliyi edir.

Məqalənin tam mətni ilə tanış olmaq üçün bu linkə keçid edin:

https://academic.oup.com/qjmath/article/74/3/889/7048784?utm_source=authortollfreelink&utm_campaign=qjmath&utm_medium=email&guestAccessKey=47e092b9-032d-4c78-a02b-9b8bd31791bb

İmath.az

07/06/2026

05/06/2026

Doktorantura və fəlsəfə doktoru imtahanlarının qrafiki müəyyənləşib

Doktoranturaya qəbul olmaq istəyən namizədlər və doktoranturada oxuyan iddiaçıların xarici dillər üzrə imtahana, həmçinin əcnəbilər üçün Azərbaycan dili imtahanına qeydiyyat Dövlət İmtahan Mərkəzinin (DİM) saytı vasitəsilə iyunun 11-14-də aparılacaq.

İmtahan qrafikinə əsasən əcnəbi və vətəndaşlığı olmayan iddiaçıların Azərbaycan dili üzrə fəlsəfə doktoru imtahanı bütün bloklar üzrə iyunun 16-da keçiriləcək. Doktoranturaya qəbul olmaq istəyən namizəd və doktoranturada oxuyan iddiaçıların danışıq bloku imtahanı iyunun 17-19-da təşkil olunacaq. Danışıq bloku üzrə qiymətləndirilmə şifahi formada kompüter proqramı vasitəsilə aparılır.

İyunun 25-də isə imtahanın dinləyib-anlama, oxuyub-anlama, dildən istifadə (leksik-qrammatik tapşırıqlar) və yazı blokları keçiriləcək.

Xarici dil üzrə qəbul imtahanında bloklar üzrə müvafiq bal məhdudiyyəti (2 bal) nəzərə alınmaqla keçid balını (25 bal) toplamış namizədlər fəlsəfə, sonra isə ixtisas fənnindən imtahana buraxılırlar. Qəbul imtahanında 30 və daha çox bal toplayan namizədlər dissertasiyalarını həmin imtahanı verdikləri tarixdən beş il müddətində ilkin müzakirəyə təqdim etdikləri təqdirdə xarici dil üzrə fəlsəfə doktoru imtahanından azad olunurlar.

science.gov.az

03/06/2026

“mygov” platformasına yeni təhsil xidmətləri inteqrasiya olunub

“mygov” rəqəmsal hökumət platformasında vətəndaşlara təqdim olunan xidmətlərin sayı artırılıb. Elm və Təhsil Nazirliyinə aid bir sıra xidmətlər artıq platformaya inteqrasiya edilib və onların ümumi illik istifadə sayı 320 mini ötür.
Technote.az xəbər verir ki, yeni xidmətlər arasında ali təhsil müəssisələrinin bakalavriat səviyyəsinə qəbul olunanların qeydiyyatı da yer alır. Bu xidmət üzrə illik istifadəçi sayının 60 min nəfərə qədər olması gözlənilir.
Platformaya magistratura və rezidentura səviyyələri üzrə qeydiyyat xidmətləri də əlavə olunub. Bu xidmətlərin illik istifadəçi sayı müvafiq olaraq 14 min və 600 nəfərə qədərdir.
Eyni zamanda, orta ixtisas təhsili müəssisələrinə qəbul olunan abituriyentlərin qeydiyyatı və məktəbəqədər təhsil müəssisələrinə elektron sənəd qəbulu xidmətləri istifadəyə verilib. Bu xidmətlər üzrə illik istifadəçi sayı müvafiq olaraq 24 min və 225 min nəfərə qədərdir.
Yeni xidmətlərdən növbəti tədris ili üçün qəbul və qeydiyyat proseslərində istifadə olunacaq. Vətəndaşlar xidmətlərə my.gov.az portalının “Xidmətlər” bölməsi üzərindən çıxış əldə edə bilərlər.

technote.az

03/06/2026

Riyaziyyat İnstitutunda “İnsan Hüquqları Aylığı” çərçivəsində maarifləndirici tədbir keçiriləcək

Azərbaycan Respublikası Elm və Təhsil Nazirliyinin Riyaziyyat İnstitutunda 09 iyun 2026-cı il tarixində saat 12:00-da “İnsan Hüquqları Aylığı” çərçivəsində maarifləndirici tədbir keçiriləcək.

Tədbirdə Qərbi Azərbaycan İcmasının İdarə Heyətinin üzvü, Hüquq Komissiyasının sədri, Bakı Dövlət Universitetinin Hüquq fakültəsinin dekan vəzifəsini icra edən, hüquq elmləri doktoru, professor Zahid Cəfərov iştirak edəcək.

İnstitutun bütün əməkdaşları tədbirdə iştirak etməyə dəvət olunurlar.

Tədbir Riyaziyyat İnstitutunun akt zalında (5-ci mərtəbə) keçiriləcək.

imath.az

03/06/2026

Professor Ramin Rzayev CBC kanalında Azərbaycanın enerji diplomatiyası və Orta Dəhlizin perspektivlərini şərh edib

Azərbaycan Respublikası Elm və Təhsil Nazirliyi Riyaziyyat İnstitutunun "İdarəetmədə süni intellekt üsullarının tətbiqi" laboratoriyasının müdiri t.e.d., professor Ramin Rzayev "CBC" kanalına müsahibə verib.
Müsahibədə Cənub Qaz Dəhlizinin regional və qlobal enerji təhlükəsizliyinin təmin edilməsindəki rolu, Azərbaycanın enerji diplomatiyasının əldə etdiyi nəticələr və ölkənin Avrasiya nəqliyyat-logistika sistemində artan əhəmiyyəti şərh edilmişdir. Eyni zamanda, yaşıl enerji, Orta Dəhlizin inkişaf perspektivləri və Azərbaycanın beynəlxalq enerji əməkdaşlığının gələcək istiqamətləri ilə bağlı ekspert rəyləri səsləndirilmişdir

https://youtu.be/b3TcTYRrNaA?si=T2w5R1O2BgMNz25K

03/06/2026

Elmi işçilərin nəzərinə! Azərbaycanda fəaliyyət göstərən elmi müəssisələrin əməkdaşları üçün “Cambridge University Press” (CUP) tərəfindən təqdim olunan nəşr imkanları haqqında məlumat

Elm və Təhsil Nazirliyi (ETN) və Böyük Britaniyanın nüfuzlu Kembric Universitetinin “Cambridge University Press” nəşriyyatı arasında əldə edilmiş razılığa əsasən, Azərbaycanın elmi və ali təhsil müəssisələrində fəaliyyət göstərən bütün müəlliflər növbəti 3 il ərzində “Cambridge Press” tərəfindən nəşr edilən 423 yüksək impakt faktorlu, hibrid və “gold” açıq əlyetərli (Open Access) jurnallarda limitsiz sayda məqalə dərc etmək imkanı əldə etmişdir.

“Web of Science” və “Scopus”da indekslənən bu “Open Access” jurnallarda bir məqalə dərcinin qiyməti (Article Processing Charge) minlərlə manat dəyərində ölçülür. Lakin, sözügedən razılıq əsasında alimlər bu ödənişi etmədən öz məqalələrini Kembric Universiteti nəşriyyatının jurnallarında dərc edə bilər. Razılaşma, eyni zamanda ölkənin 140 elmi və ali təhsil müəssisəsinə “Cambridge Press” nəşriyyatının jurnallarından müddətsiz istifədə imkanı təqdim edir. Müqavilə müddətində yeni yaradılacaq müəssisələr də bu siyahıya daxil edilərək nəşr və istifadə imkanı əldə edəcəklər.

Xidmətdən istifadə etmək istəyən müəlliflər, “Cambridge Core” platformasına daxil olaraq müvafiq qaydada yararlana bilərlər.

Əlavə suallar yarandığı tədqirdə [email protected] email ünvanına müraciət edə bilərsiz

03/06/2026

Riyaziyyat İnstitutunda növbəti Ümuminstitut seminarı keçirildi

03.06.2026-cı il tarixində Azərbaycan Respublikası Elm və Təhsil Nazirliyi Riyaziyyat İnstitutunun növbəti Ümuminstitut seminarı keçirildi. Seminarda Milli Aviasiya Akademiyasının Ali riyaziyyat kafedrasının professoru, r.e.d., Amanov Rabil Amanulla oğlu «Uyğun Sobolev fəzasında bir model qeyri-xətti məsələ haqqında» mövzusunda məruzə ilə çıxış etdi.

Məruzədə bir qeyri - xətti məsələ anizotrop Sobolev fəzasında araşdırılır. Məsələnin qeyri-xətti göstəricisi üçün yeni dəqiq qiymət tapılır. Aşağı və yuxarı həll anlayışlarının köməyi ilə qoyulmuş məsələnin uyğun Sobolev fəzasında həllinin varlığı isbat edilir.

imath.az

02/06/2026

Azərbaycanda yeni qurum yaradıldı - FƏRMAN

Azərbaycan Respublikasının Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidmətinin əsasında Azərbaycan Respublikası Rəqəmsal İnkişaf və Nəqliyyat Nazirliyinin tabeliyində “Milli Kibertəhlükəsizlik Agentliyi” publik hüquqi şəxs yaradılıb.

"Azərbaycan müəllimi" xəbər verir ki, Prezident İlham Əliyev bu barədə Fərman imzalayıb.

Fərmanla müəyyən edilib ki, Milli Kibertəhlükəsizlik Agentliyi ölkədə kibertəhlükəsizlik sahəsində tənzimləmənin və nəzarətin (kritik informasiya infrastrukturlarına, dövlət orqanlarına (qurumlarına) məxsus olan informasiya infrastrukturlarına münasibətdə yalnız məlumat mübadiləsinin) həyata keçirilməsini, həmçinin dayanıqlılığın artırılmasını, o cümlədən informasiya infrastrukturu subyektlərinin fəaliyyətinin koordinasiyasını, informasiya infrastrukturlarının kibertəhlükəsizliyinin pozulmasına yönəldilmiş hərəkətləri aşkarlamaq, araşdırmaq və qarşısını almaq üçün preventiv tədbirlərin görülməsini (dövlət orqanlarına (qurumlarına) məxsus olan informasiya infrastrukturları, eləcə də kritik informasiya infrastrukturları istisna olmaqla), mövcud və yarana biləcək kibertəhlükələr barədə ölkə səviyyəsində məlumatlandırmanı, əhalinin, dövlət və qeyri-dövlət qurumlarının kibertəhlükəsizlik sahəsində maarifləndirilməsini və onlara metodiki dəstək göstərilməsini təmin edən (ali kateqoriya dövlət orqanlarına, mühafizə olunan şəxslərə, qorunan və strateji obyektlərə, habelə dövlət orqanlarına (qurumlarına) məxsus olan informasiya infrastrukturlarına münasibətdə aidiyyəti səlahiyyətli orqan vasitəsilə, kritik informasiya infrastrukturunun təhlükəsizliyinə münasibətdə kritik informasiya infrastrukturunun təhlükəsizliyinin təmin edilməsi sahəsində səlahiyyətli orqan vasitəsilə), habelə yayılması qadağan edilən informasiyanın internet informasiya ehtiyatlarında yerləşdirilməsinə qarşı tədbirlər görən və fərdi məlumatların mühafizəsi sahəsində fəaliyyət göstərən publik hüquqi şəxsdir.

Agentlik qeyd edilən dövlət orqanının hüquqi varisidir, onun bütün hüquq və öhdəlikləri, habelə əmlakı Agentliyə keçir.

Agentliyin nizamnamə fondunun məbləği 442 498,00 (dörd yüz qırx iki min dörd yüz doxsan səkkiz) manatdır.

Agentliyin fəaliyyətinin təşkili və təmin edilməsi xərcləri fəaliyyətindən, o cümlədən göstərdiyi xidmətlərdən əldə olunan vəsait və qanunla qadağan edilməyən digər mənbələr hesabına maliyyələşdirilir.

Agentliyin fəaliyyətinə ümumi rəhbərliyi və nəzarəti həyata keçirmək üçün 4 (dörd) üzvdən – sədr və onun 3 (üç) müavinindən ibarət İdarə Heyəti yaradılır.

Fərmanla Agentliyin təsisçisinin səlahiyyətlərinin həyata keçirilməsi aşağıdakılara həvalə edilir:

Azərbaycan Respublikasının Prezidentinə:

Agentliyin nizamnaməsinin təsdiqi və nizamnamə fondunun miqdarının müəyyən edilməsi, onlarda dəyişiklik edilməsi;

Agentliyin idarəetmə orqanlarının yaradılması;

Agentliyin yenidən təşkili və ləğvi;

Rəqəmsal İnkişaf və Nəqliyyat Nazirliyinə publik hüquqi şəxsin təsisçisinin səlahiyyətlərinə aid edilmiş digər məsələlərin həlli, Azərbaycan Respublikasının Nazirlər Kabinetinə Agentlik dövlət qeydiyyatına alındığı gündən 1 (bir) ay müddətində bu Fərmanda nəzərdə tutulan dövlət orqanının balansındakı əmlakın Agentliyin balansına verilməsini təmin etmək və Agentliyin maddi-texniki təminatının yaxşılaşdırılması ilə bağlı təkliflərini hazırlayıb Azərbaycan Respublikasının Prezidentinə təqdim etmək həvalə edilir.

Fərmana əsasən, nazirlik Agentliyin dövlət qeydiyyatına alınması üçün bu Fərman qüvvəyə mindiyi tarixdən 3 (üç) gün müddətində “Hüquqi şəxslərin dövlət qeydiyyatı və dövlət reyestri haqqında” Azərbaycan Respublikasının Qanununa uyğun olaraq tədbirlər görməli, bu Fərmandan irəli gələn digər məsələlərin həlli üçün zəruri tədbirlər görməlidir.

muallim.edu.az