15/05/2026
“Şəhərsalma və Arxitektura İli” çərçivəsində Yeni Azərbaycan Partiyası Səbail rayon təşkilatının təşkilatçılığı ilə gənclər arasında hərbi-vətənpərvərlik tərbiyəsinin yüksəldilməsi mövzusunda tədbir keçirilib.
Yeni Azərbaycan Partiyası Səbail rayon təşkilatının qərargahında baş tutan tədbirdə qazilər, partiya fəalları və gənclər iştirak ediblər.
Əvvəlcə tədbir iştirakçıları Ulu Öndər Heydər Əliyevin abidəsi önünə əklil qoyublar. Daha sonra Ulu Öndər Heydər Əliyevin və Azərbaycanın ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Tədbiri giriş sözü ilə açan Yeni Azərbaycan Partiyası Səbail rayon təşkilatının sədri Muxtar Nağıyev çıxışında bildirib ki, dövlətçilik ənənələrinin, milli-mənəvi dəyərlərin və vətənpərvərlik ruhunun gənc nəslə aşılanması bu gün dövlət siyasətinin əsas istiqamətlərindən biridir. O vurğulayıb ki, Ulu Öndər Heydər Əliyevin müəyyən etdiyi siyasi kurs Prezident İlham Əliyev tərəfindən uğurla davam etdirilir və Azərbaycanın güclü dövlətə çevrilməsində milli birlik, ordu quruculuğu və vətənə bağlılıq mühüm rol oynayır.
Muxtar Nağıyev qeyd edib ki, Ulu Öndər Heydər Əliyevin “Vətəni qorumaq hər bir insanın müqəddəs borcudur” fikri bu gün də öz aktuallığını qoruyur və gənclərin vətənpərvərlik ruhunda formalaşdırılmasında mühüm ideoloji əsas kimi çıxış edir. O bildirib ki, Azərbaycanın qazandığı tarixi Zəfər xalqımızın milli həmrəyliyinin, güclü siyasi iradənin və müzəffər ordumuzun qəhrəmanlığının nəticəsidir.
Çıxış zamanı Prezident, Silahlı Qüvvələrin Ali Baş Komandanı İlham Əliyevin “Biz öz torpaqlarımızda döyüşürdük, haqq uğrunda mübarizə aparırdıq və bu Zəfəri Azərbaycan xalqı öz qanı, canı hesabına qazandı” fikrini xatırladan Muxtar Nağıyev bildirib ki, Vətən müharibəsində qazanılan şanlı Qələbə gələcək nəsillər üçün böyük qürur mənbəyidir.
Daha sonra çıxış edən Vətən Müharibəsi Qəhrəmanı Zaur Hüseynov gənclərlə səmimi fikir mübadiləsi apararaq Vətən müharibəsində keçdiyi döyüş yolundan danışıb. O qeyd edib ki, Azərbaycan Ordusunun şəxsi heyəti döyüşlər zamanı böyük əzm, yüksək döyüş ruhu və Vətən sevgisi nümayiş etdirib. Şuşa istiqamətində gedən ağır döyüşlərdən bəhs edən Zaur Hüseynov bildirib ki, hər bir hərbçi torpaqlarımızın azadlığı uğrunda sonadək mübarizə aparmağa hazır idi.
O vurğulayıb ki, gənclərin milli ruhda yetişməsi və dövlətə bağlı olması Azərbaycanın gələcəyi baxımından xüsusi əhəmiyyət daşıyır. “Biz döyüş meydanında yalnız silahla deyil, həm də vətən sevgisi ilə qalib gəldik”, — deyə Zaur Hüseynov bildirib.
Tədbirdə çıxış edən ehtiyatda olan mayor Anar Quliyev qeyd edib ki, Azərbaycan Ordusunun qazandığı uğurlar uzun illər ərzində həyata keçirilən uğurlu ordu quruculuğu siyasətinin nəticəsidir. O bildirib ki, Aprel döyüşləri, Vətən müharibəsi və “Qisas” əməliyyatı zamanı Azərbaycan hərbçisi yüksək peşəkarlıq və qəhrəmanlıq nümayiş etdirib.
Anar Quliyev çıxışında ideoloji iş və mənəvi-psixoloji təminatın döyüş şəraitində mühüm rol oynadığını vurğulayıb. O qeyd edib ki, döyüşçülərin mənəvi hazırlığı, dövlətə və xalqa bağlılığı ordumuzun gücünü daha da artırıb. Anar Quliyev bildirib ki, Azərbaycan əsgəri hər zaman böyük ruh yüksəkliyi ilə irəli atılıb və qarşıya qoyulan bütün tapşırıqları uğurla yerinə yetirib.
“Bu gün gənclərimiz qalib ölkənin vətəndaşlarıdır. Onlar Azərbaycanın qəhrəmanlıq tarixini bilməli, şəhidlərimizin göstərdiyi fədakarlığı heç zaman unutmamalıdırlar”, — deyə Anar Quliyev vurğulayıb.
Tədbirdə çıxış edən Vətən müharibəsi qazisi, ehtiyatda olan gizir Ramin Şirinov da döyüş xatirələrini iştirakçılarla bölüşüb. O bildirib ki, Şuşa əməliyyatı Azərbaycan hərb tarixinin ən şanlı səhifələrindən biridir. Şuşaya daxil olan dörd tankdan birinin komandiri olduğunu qeyd edən Ramin Şirinov döyüşlər zamanı ordumuzun nümayiş etdirdiyi birlik və peşəkarlıqdan danışıb.
Ramin Şirinov çıxışında qeyd edib ki, Azərbaycan əsgəri Prezident, Ali Baş Komandan İlham Əliyevin rəhbərliyi altında torpaqlarımızı işğaldan azad edərək xalqımıza böyük Zəfər yaşatdı. O bildirib ki, şəhidlərimizin qəhrəmanlığı və qazilərimizin fədakarlığı hər zaman böyük ehtiramla yad olunmalıdır.
Gəncləri maraqlandıran suallar Milli Qəhrəman və qazilər tərəfindən cavablandırılıb, gənclərlə fikir mübadiləsi aparılıb və xatirə şəkilləri çəkdirilib.
Tədbirin sonunda Yeni Azərbaycan Partiyasının himni dinlənilib
