02/06/2026
Azərbaycan Respublikasının Serbiya Respublikasındakı Səfirliyi tərəfindən 28 May – Müstəqillik Günü münasibətilə Belqrad şəhərində rəsmi qəbul keçirilib.
Tədbirdə Serbiya Respublikasının mədəniyyət naziri, Azərbaycan ilə Serbiya arasında Ticarət və İqtisadi Əməkdaşlıq üzrə Hökumətlərarası Komissiyanın həmsədri Nikola Selakoviç əsas qonaq qismində iştirak edib. Bundan əlavə, idman naziri Zoran Qayiç, ailə rifahı və demoqrafiya naziri Yelena Jariç Kovaceviç, tikinti, nəqliyyat və infrastruktur naziri Aleksandra Sofroniyeviç, ədliyyə naziri Nenad Vuyiç, turizm və gənclər naziri Huseyin Memiç, ətraf mühitin mühafizəsi naziri Sara Pavkov, dövlət idarəetmə və yerli özünüidarəetmə naziri Snejana Paunoviç, Gender bərabərliyi, qadınlara qarşı zorakılığın qarşısının alınması və qadınların iqtisadi və siyasi cəhətdən gücləndirilməsi məsələləri üzrə portfelsiz nazir Tatyana Matsura, XİN-in dövlət katibi Nevena Yovanoviç, Serbiya Milli Assambleyasının sədr müavini Yovan Yanyiç, Serbiya-Azərbaycan parlamentlerarası dostluq qrupunun rəhbəri Duşan Mariç və üzvləri, digər yüksək rütbəli dövlət və hökumət rəsmiləri, elm, incəsənət və din xadimləri, diplomatik korpusun nümayəndələri, Belqradda fəaliyyət göstərən Azərbaycan Mədəniyyət Mərkəzinin, Serbiyada yaşayan, çalışan və təhsil alan həmvətənlərimiz tədbirdə iştirak ediblər.
Belqraddakı Azərbaycan Mədəniyyət Mərkəzinin direktoru, eyni zamanda, Serbiya Opera və Balet Teatrının prima sopranosu Yasmina Trumbetaş Azərbaycanın və Serbiyanın dövlət himnləri ifa edib.
Daha sonra çıxış edən səfir Kamil Xasiyev 1918-ci ildə yaradılmış Azərbaycan Demokratik Respublikasının Şərqdə ilk dünyəvi və demokratik parlament respublikası olduğunu vurğulayaraq, qadınlara seçki hüququnun verilməsi və bütün vətəndaşların bərabərliyinin təmin edilməsinin həmin dövr üçün mühüm tarixi nailiyyətlər olduğunu qeyd edib. Səfir, həmçinin Azərbaycanın müstəqilliyini bərpa etdikdən sonra əldə etdiyi inkişafdan, ərazilərinin işğaldan azad edilməsindən və hazırda azad edilmiş ərazilərdə həyata keçirilən genişmiqyaslı yenidənqurma işlərindən danışıb.
Çıxışda Azərbaycan və Ermənistan arasında normallaşma prosesinə toxunularaq regionda davamlı sülh və əməkdaşlıq perspektivlərinin gücləndiyi bildirilib. Eyni zamanda Bakıda keçirilmiş WUF13 tədbirinin uğurla başa çatdığı və Azərbaycanın münaqişədən sonrakı bərpa təcrübəsinin beynəlxalq səviyyədə yüksək qiymətləndirildiyi qeyd olunub. Səfir Azərbaycan ilə Serbiya arasında strateji tərəfdaşlığın uğurla inkişaf etdiyini vurğulayaraq, Prezident İlham Əliyev və Prezident Aleksandar Vuçiçin münasibətlərin möhkəmlənməsinə xüsusi töhfə verdiklərini bildirib. Həmçinin bu ilin may ayında Bakı ilə Belqrad arasında birbaşa uçuşların açılmasının ikitərəfli əlaqələrin inkişafına əlavə təkan verəcəyi qeyd olunub.
Tədbir çərçivəsində Belqraddakı Azərbaycan Mədəniyyət Mərkəzinin direktoru, eyni zamanda, Serbiya Opera və Balet Teatrının prima sopranosu Yasmina Trumbetaş dahi bəstəkar Üzeyir Hacıbəylinin müəllifi olduğu “Koroğlu” operasından Nigarın ariyasını səsləndirib. Sonra Katarina Nenadoviç skripkada və Mina Ristiç Yoniçin pianoda müşayiəti ilə “Sarı gəlin” xalq mahnısı ifa edilib. Yekunda 120 illik yubileyi qeyd olunan Xalq şairi Səməd Vurğunun "Azərbaycan" şeiri Belqrad Universitetinin Filologiya fakültəsinin Türkologiya kafedrasının üçüncü kurs tələbələri - Tara Kontsuliç və Mariya Boroyeviç tərəfindən Azərbaycan və serb dillərində səsləndirilib
Tədbir qonaqların şərəfinə verilmiş rəsmi ziyafətlə başa çatıb.
🔽English version is in comments🔽
