https://www.facebook.com/219063266192266/

Zəngilan rayon 8 nömrəli tam orta məktəb, İ. Hidayetzade 166, Baku (2026)

04/09/2026

04.09 2026 cı il tarixdə məktəbimizdə Pedaqoji Şura iclası keçirildi.
Pedaqoji Şurada 2025 - 2026 cı tədris ilində keçirilmiş VI - VI və IX -XI siniflərin imtahan nəticələri kollektivə çatdırıldı.Yeni tədris ilində görüləcək işlərlə bağlı qərarlar qəbul edildi.

27/08/2026

Qarşılıqlı etimad mühiti Azərbaycan-Özbəkistan əlaqələrinin sürətli inkişafına təkan verir
Azərbaycan ilə Özbəkistan arasında münasibətlərin yüksək səviyyəsi özünü yalnız siyasi bəyanatlarda və dövlət başçılarının görüşlərində deyil, həm də konkret layihələrdə, investisiyalarda və regionlararası əməkdaşlıqda göstərir. Prezident İlham Əliyevin avqustun 23-də Özbəkistana dövlət səfəri bu baxımdan mühüm nəticələrlə yadda qaldı. Səfər çərçivəsində bir sıra layihələrin açılışının və təməlinin qoyulması, regionlararası əməkdaşlığın müzakirəsi və gələcək fəaliyyət planlarının müəyyənləşdirilməsi iki ölkə arasında tərəfdaşlığın artıq praktiki mərhələdə inkişaf etdiyini nümayiş etdirdi.
Səfər çərçivəsində keçirilən görüşlər zamanı iqtisadi əməkdaşlığın daha da genişləndirilməsi xüsusi vurğulandı. Qeyd olundu ki, həyata keçirilən təşəbbüslər təkcə iqtisadi göstəricilərin artmasına deyil, həm də iki ölkənin sahibkarları arasında işgüzar əlaqələrin güclənməsinə şərait yaradır. Kənd təsərrüfatı və emal sənayesindən tutmuş avtomobil və tekstil sənayesinə qədər geniş bir istiqamətdə əməkdaşlıq aparılır. Neft-qaz və geoloji kəşfiyyat sahəsindəki layihələrə diqqət yetirilməsi əlaqələrin daha yeni müstəviyə keçdiyini göstərir. Azərbaycanın Özbəkistan bazarında satış şəbəkəsinin genişləndirilməsi iqtisadi münasibətlərin dərinləşməsinə xidmət edir.
Avqustun 23-də Daşkənddə Azərbaycan Respublikasının Prezidenti İlham Əliyev və Özbəkistan Respublikasının Prezidenti Şavkat Mirziyoyev Azərbaycanın Özbəkistanda həyata keçirdiyi layihələrin açılış və təməlqoyma mərasimində onlayn formada iştirak etdilər. Tədbir çərçivəsində “Davr Bank” (AR Beynəlxalq Bankı), Gips zavodu (“Matanat-A”), “Landau” adına STEAM (Science, Technology, Engineering, and Mathematics) iki məktəb (“Landau Education Group”) layihələrinin açılışı olub. Həmçinin SOCAR-ın beş yeni yanacaqdoldurma məntəqəsinin, “Sea Breeze Uzbekistan” yaşayış və istirahət kompleksinin (“Agalarov Development”), “Baku City” yaşayış kompleksinin (“TuranAZ”), Gümüş tərkibli filizin emalı üzrə zənginləşdirmə fabrikinin (“Sur Gold and Silver Project”) və Meyvə bağlarının (“Gold Fresh Fruits”) layihələrinin təməliqoyma mərasimi keçirilib.
Azərbaycan və Özbəkistanı birləşdirən əsas amillərdən biri xalqlarımızın tarixi və mədəni yaxınlığıdır. Həmçinin, dövlət başçılarının qarşılıqlı etimad mühiti əlaqələrin sürətli inkişafına təkan verir.
Xüsusi qeyd etməyə dəyər ki, Prezident Şavkat Mirziyoyevin Qarabağın bərpasına göstərdiyi diqqət olduqca dəyərlidir. Füzuli şəhərində inşa olunan 960 şagird yerlik məktəb və Xankəndidə yaradılan tikiş fabriki iki ölkə arasındakı dostluğun sözdə deyil, əməldə olduğunun sübutudur. Belə layihələr işğaldan azad edilmiş ərazilərin yenidən qurulmasına verilən mühüm dəstəkdir.
Prezident İlham Əliyevin səfəri çərçivəsində Azərbaycan və Özbəkistan Ali Dövlətlərarası Şurasının 3-cü iclasının keçirilməsi münasibətlərin strateji xarakter daşıdığını bir daha təsdiqlədi və bu format gələcək hədəflərin müəyyənləşdirilməsi və görülən işlərin əlaqələndirilməsi baxımından mühüm əhəmiyyət daşıyır.
Digər yaddaqalan məqam isə dövlət başçılarının qarşılıqlı təltifləri oldu. Prezident İlham Əliyevə Özbəkistanın ali dərəcəli “Dostluq” ordeninin verilməsi, eləcə də Özbəkistan liderinə “Heydər Əliyev” ordeninin təqdim edilməsi qarşılıqlı hörmətin rəmzi ifadəsidir.
Lalə Qafarova

27/08/2026

Azərbaycan və Özbəkistan qardaşlığı
Azərbaycan Respublikasının Prezidenti İlham Əliyevin 2026-cı il avqustun 23-də Özbəkistana həyata keçirdiyi dövlət səfəri iki qardaş ölkə arasındakı strateji tərəfdaşlığın və dostluq əlaqələrinin ən yüksək zirvədə olduğunu bir daha nümayiş etdirdi. Səfər çərçivəsində mətbuata verilən bəyanatlar və imzalanan sənədlər Azərbaycan-Özbəkistan münasibətlərinin sadəcə sözdə deyil, konkret və irimiqyaslı layihələrlə daha da gücləndiyini sübut edir. Prezident İlham Əliyev öz çıxışında Özbəkistanın, xüsusən də paytaxt Daşkəndin hazırda böyük bir yüksəliş dövrü yaşadığını xüsusi vurğulayaraq, bu inkişafın Prezident Şavkat Mirziyoyevin uzaqgörən siyasətinin nəticəsi olduğunu bildirdi. Dövlətimizin başçısı qeyd etdi ki, vaxtilə iqtisadi əsasların sıfırdan formalaşdırıldığı bir ölkə bu gün sənayesi şaxələndirilmiş, investisiya cəlbediciliyi yüksək olan və dünya birliyində böyük hörmətə malik güclü bir dövlətə çevrilib.
İki ölkə arasında iqtisadi əməkdaşlıq görünməmiş bir sürətlə inkişaf edir. Əvvəllər birgə layihələrin olmamasına baxmayaraq, hazırda Azərbaycan və Özbəkistan bir milyard dollarlıq ticarət dövriyyəsi hədəfinə doğru inamla irəliləyir və bu hədəf artıq uzaq xəyal deyil, yaxın gələcəyin reallığı kimi dəyərləndirilir. Azərbaycanın Mərkəzi Asiya ölkələri ilə əməkdaşlıq formatına fəal qoşulması regionun geoiqtisadi potensialını daha da artırıb və bu gün Mərkəzi Asiya ilə Azərbaycan vahid, böyük inkişaf imkanlarına malik geoiqtisadi məkana çevrilib. Ölkələrimiz hazırda energetika, nəqliyyat, turizm, kənd təsərrüfatı, dağ-mədən, avtomobil sənayesi və bank sektorunda sıx əməkdaşlıq edir. Aparıcı Azərbaycan bankının və SOCAR-ın Özbəkistan bazarına daxil olması, o cümlədən neft-qaz kəşfiyyatı sahəsindəki birgə layihələrin son mərhələyə qədəm qoyması bu əlaqələrin miqyasını açıq şəkildə göstərir.
Münasibətlərimizin əsasında dayanan ən mühüm amillərdən biri də qarşılıqlı mənəvi dəstək və sarsılmaz qardaşlıq telləridir. Prezident İlham Əliyev Özbəkistanın işğaldan azad edilmiş Azərbaycan ərazilərində, xüsusən də Qarabağda bərpa işlərinə verdiyi töhfələri böyük minnətdarlıqla qeyd etdi. Füzuli şəhərində Mirzə Uluqbəy adına 960 şagird yerlik məktəbin tikintisi və Xankəndidə tikiş fabrikinin fəaliyyətə başlaması Özbəkistanın qardaşlıq dəstəyinin bariz nümunəsidir. Səfər çərçivəsində təşkil olunan regionlararası əməkdaşlıq forumu da tərəflər arasında səylərin birləşdirilməsi və yeni sinerjilərin yaradılması baxımından mühüm əhəmiyyət kəsb etdi.
Dövlət səfərinin ən yaddaqalan məqamlarından biri də Daşkənddə Azərbaycan və Özbəkistan Ali Dövlətlərarası Şurasının 3-cü iclasının keçirilməsi və əməkdaşlığın bütün spektrini əhatə edən yeni sənədlərin imzalanması oldu. Həmçinin, dövlət başçılarının qarşılıqlı olaraq ali ordenlərlə təltif edilməsi mərasimi baş tutdu. Prezident Şavkat Mirziyoyev Azərbaycan Prezidentinə ali dərəcəli "Dostluq" ordenini, Prezident İlham Əliyev isə özbəkistanlı həmkarına "Heydər Əliyev" ordenini təqdim etdi. Bu, iki xalq və dövlət rəhbərləri arasındakı dərin ehtiramın rəmzi idi. Sonda Prezident İlham Əliyevin qardaş ölkə rəhbərini Azərbaycana dövlət səfərinə dəvət etməsi, gələcəkdə bu strateji və sarsılmaz birliyin daha da dərinləşəcəyinin əsas təminatıdır.
Günel Mustafayeva

26/08/2026

Laçının yeni inkişaf salnaməsi: Zəfərdən dirçəlişə
Laçın Azərbaycan tarixində yalnız coğrafi məkan olmaqla yanaşı, həm də milli yaddaşın, strateji iradənin və Böyük Qayıdışın rəmzlərindən biridir. Bu gün Laçın haqqında danışarkən söhbət yalnız işğaldan azad edilmiş bir şəhərin bərpasından getmir. Burada Azərbaycanın postmüharibə dövründə formalaşdırdığı yeni inkişaf modelinin – təhlükəsizlik, məskunlaşma, infrastruktur, yaşıl enerji, sənayeləşmə, turizm və regional bağlantıların vahid məkanda birləşdirildiyi kompleks siyasətin nəticələrini görmək mümkündür.
Bir vaxtlar işğalın ağır nəticələri ilə üzləşmiş Laçın artıq tamamilə fərqli mənzərə yaradır. Şəhərin küçələrində yeni həyat canlanır, yaşayış məhəllələri salınır, sosial obyektlər istifadəyə verilir, istehsal müəssisələri yaradılır, enerji infrastrukturu inkişaf etdirilir. Ən mühümü isə illərlə doğma yurd həsrəti çəkən insanlar öz evlərinə qayıdırlar. Laçının bugünkü dirçəlişi Azərbaycanın Zəfərdən sonra qarşıya qoyduğu əsas məqsədlərdən birinin – işğaldan azad edilmiş ərazilərin bərpası və insanların öz doğma torpaqlarına qaytarılması məqsədinin ardıcıl şəkildə həyata keçirildiyini nümayiş etdirir.
Laçın Azərbaycanın qədim yaşayış məskənlərindən biri olmaqla zəngin tarixə və özünəməxsus təbii-coğrafi xüsusiyyətlərə malikdir. 1923-cü ildə Abdallar kənd yaşayış məntəqəsinin Laçın adlandırılması və şəhər statusu alması ilə şəhərin müasir inzibati tarixində yeni mərhələ başlayıb. 1930-cu il avqustun 8-də Laçın rayonunun yaradılması ilə şəhər rayonun inzibati mərkəzinə çevrilib. Laçının coğrafi mövqeyi onun tarix boyu əhəmiyyətini müəyyənləşdirən əsas amillərdən biri olub. Rayonun dağlıq ərazisi, zəngin meşələri, yaylaqları, çayları və təbii ehtiyatları həm iqtisadi, həm də strateji baxımdan böyük potensiala malikdir.
Laçının tarixində yeni səhifə 2020-ci ildə yazıldı, Vətən müharibəsində Azərbaycan Ordusunun əldə etdiyi tarixi Zəfər işğalın sona çatmasına və ölkəmizin ərazi bütövlüyünün bərpasına doğru həlledici addımların atılmasına imkan verdi. 2020-ci il dekabrın 1-də Laçın rayonu üçtərəfli Bəyanata əsasən Azərbaycana qaytarıldı. 2022-ci il avqustun 26-da isə Laçın şəhəri, Zabux və Sus kəndləri Azərbaycanın nəzarətinə keçdi. Beləliklə, uzun illər davam edən işğal dövrü başa çatdı və Laçının qarşısında tamamilə yeni inkişaf perspektivləri yarandı.
Laçının azad olunması uğrunda döyüşlərdə iştirak edən hərbi qulluqçuların şücaəti dövlət tərəfindən yüksək qiymətləndirilib. 8418 hərbi qulluqçunun “Laçının azad olunmasına görə” medalı ilə təltif edilməsi həmin Zəfərin arxasında dayanan qəhrəmanlığın dövlət səviyyəsində qiymətləndirilməsinin ifadəsidir.
26 avqustun Laçın Şəhəri Günü kimi təsis edilməsi Zəfər tariximizin mühüm səhifəsidir. Prezident İlham Əliyevin 31 iyul 2023-cü il tarixli Sərəncamı ilə işğaldan azad edilmiş ərazilərdə şəhər günlərinin təsis edilməsi həmin ərazilərin tarixi yaddaşının və yeni inkişaf mərhələsinin dövlət səviyyəsində qeyd olunmasına xidmət edir.
Laçının bərpasının əsas məqsəd insanları doğma torpaqlarına qaytarmaq və burada təhlükəsiz, rahat və layiqli həyat şəraiti yaratmaqdır. 31 il ərzində doğma şəhərindən ayrı düşmüş insanların yenidən Laçında məskunlaşması Böyük Qayıdışın ən təsirli nümunələrindən biridir. 2026-cı ilin iyuluna qədər Laçın şəhərinə 614 ailənin, yəni 2264 nəfərin daimi məskunlaşması təmin edilib. Zabux, Sus və Bəylik kəndlərinə də yüzlərlə ailənin köçürülməsi həyata keçirilib. Bu rəqəmlərin arxasında ayrı-ayrı ailələrin, insanların və nəsillərin uzun illər davam edən yurd həsrətinin sona çatması dayanır.
Laçının təbii gözəllikləri onun gələcək turizm inkişafı üçün böyük potensiala malik olduğunu göstərir. Rayonda hotellərin, istirahət komplekslərinin, bulvarların və digər turizm obyektlərinin yaradılması bu istiqamətdə atılan addımlardandır. Laçın Beynəlxalq Hava Limanı, Kəlbəcər-Laçın avtomobil yolu, enerji layihələri və “Həkəriçay” su anbarı kimi layihələr rayonun regional əhəmiyyətini artırır.
26 Avqust – Laçın Şəhəri Günü Azərbaycan xalqının Zəfər iradəsinin, tarixi ədalətin bərpasının və Böyük Qayıdışın təcəssümüdür. Laçın bu gün öz tarixini yenidən yazır. Bu tarixin əsas amilləri isə Zəfər, qayıdış, quruculuq, inkişaf və gələcəkdir. Laçının dağlarında yenidən həyatın canlanması, doğma evlərin işıqlarının yanması və sakinlərin öz yurdlarında gələcəyə planlar qurması Azərbaycanın Qarabağ və Şərqi Zəngəzurda həyata keçirdiyi böyük tarixi missiyanın ən aydın göstəricilərindəndir.
Hüseyinova Turan

26/08/2026

26 Avqust - Laçın Şəhəri Günü
26 avqust Azərbaycan xalqının yaddaşında xüsusi məna daşıyan günlərdən biridir. Bu tarix 2022-ci ildən etibarən Laçının öz doğma sakinlərinə qovuşmasının, Azərbaycan bayrağının bu qədim torpaqlarda yenidən dalğalanmasının və üç onillikdən artıq davam edən həsrətin sona çatmasının rəmzi kimi tariximizə daxil olub. Azərbaycan Prezidentinin 31 iyul 2023-cü il tarixli Sərəncamı ilə 26 avqust Laçın Şəhəri Günü elan edilib.
2020-ci ildə əldə olunan Zəfər Laçının taleyində də köklü dönüş yaratdı. Həmin ilin dekabrın 1-də Laçın rayonu Azərbaycana qaytarıldı. 2022-ci il avqustun 26-da isə Laçın şəhəri, Zabux və Sus kəndləri Azərbaycanın nəzarətinə keçdi. Bununla Laçının tarixində tamamilə yeni bir mərhələ başladı. 26 Avqustun Laçın Şəhəri Günü kimi qeyd olunması da məhz bu tarixi dönüşün əhəmiyyətindən irəli gəlir. Bu gün işğaldan azad edilmiş ərazilərdə həyatın yenidən qurulmasının, yeni tarixin formalaşmasının və gələcəyə doğru atılan addımların rəmzlərindən biri kimi qəbul olunur.
Bu gün Laçına gələn insan tamamilə yenilənmiş bir mənzərə ilə qarşılaşır. Dağların arasında yeni yaşayış binaları və fərdi evlər yüksəlir, küçələr salınır, məktəblər fəaliyyət göstərir, uşaqlar yenidən Laçın torpağında təhsil alırlar. Həyətlərdə həyat canlanır, Həkəri çayının sahilində istirahət məkanları və bulvar yaradılır, yeni müəssisələr fəaliyyətə başlayır. Şəhər sanki uzun illər davam edən sükutdan sonra yenidən həyata qovuşur. Lakin burada baş verənlər sadəcə tikinti və abadlıq işləri deyil. Bu, illərlə yaddaşlarda qorunan həyatın yenidən gerçəkliyə çevrilməsidir. Laçında inşa edilən hər evin arxasında ayrıca bir ailənin taleyi dayanır. Hər yeni mənzil illərlə gözlənilən doğma yurda qayıdış arzusunun gerçəkləşməsidir.
Rayonun nəqliyyat imkanları da sürətlə yenilənir. Laçın Beynəlxalq Hava Limanının istifadəyə verilməsi şəhərin ölkənin digər bölgələri və xarici məkanlarla əlaqəsini genişləndirir. Kəlbəcər-Laçın avtomobil yolunda yeni tunellərin və körpülərin inşası isə rayonun quru nəqliyyatı baxımından əlçatanlığını artırır. Bu layihələr Laçını həm Azərbaycanın müxtəlif bölgələri ilə, həm də daha geniş regional və beynəlxalq əlaqələr sistemi ilə birləşdirir.
Laçının iqtisadi həyatında da ciddi canlanma müşahidə olunur. Mebel fabriki, tikiş və ayaqqabı istehsalı müəssisələri, aqro-sənaye parkı, balıqçılıq təsərrüfatı və digər layihələrin həyata keçirilməsi göstərir ki, rayon yalnız yaşayış üçün deyil, həm də əmək fəaliyyəti və istehsal üçün yenidən qurulur. Bu məsələ Böyük Qayıdışın davamlılığı baxımından xüsusi əhəmiyyət daşıyır. Çünki insanın doğma torpağına qayıtması yalnız evlə təmin olunması demək deyil. Davamlı həyat üçün iş yeri, gəlir mənbəyi, məktəb, sosial xidmətlər, mədəni mühit və rahat yaşayış şəraiti də mövcud olmalıdır. Laçının bərpa siyasətində bütün bu amillərin kompleks şəkildə nəzərə alınması diqqət çəkir.
Bu gün Laçının küçələrində yalnız yeni binalar, yollar və abadlıq elementləri görünmür. Burada Azərbaycanın Zəfərdən sonrakı yeni həyatının mənzərəsi formalaşır. Vaxtilə məcburi köçkün kimi yaşayan insanlar artıq Laçının daimi sakinlərinə çevrilirlər. Dağıdılmış məktəblərin yerində uşaqların səsi eşidilir, işğal illərində Azərbaycan bayrağının görünmədiyi torpaqlarda bu gün üçrəngli bayraq dalğalanır. Bir vaxtlar yalnız xatirələrdə qorunan küçələr indi yenidən insanlarla canlanır. Laçının ən böyük uğuru da məhz budur. Çünki torpağın azad edilməsi böyük Zəfərdirsə, həmin torpaqda həyatı yenidən qurmaq, insanları geri qaytarmaq və gələcəyi burada formalaşdırmaq Zəfərin davamıdır. Laçın hazırda bu davamlı quruculuğun ən canlı nümunələrindən biridir.
Cəmalə Əliyeva

26/08/2026

Azad edilmiş Laçının müasir inkişaf mərhələsi
26 avqust tarixi ölkəmizin həyatında ən əlamətdar günlərdən biri – Laçın şəhəri günü kimi qeyd olunur. 1923-cü ildə şəhər, 1930-cu ildə isə inzibati ərazi vahidi statusu alan Laçın uzun illər özünün zəngin təbiəti, meşə massivləri və strateji əhəmiyyəti ilə seçilib. Təəssüf ki, 1992-ci ilin may ayında Ermənistan tərəfindən işğal edilən bu ərazi böyük dağıntılara, tarixi abidələrin, məktəblərin və səhiyyə ocaqlarının məhvinə, əhalinin isə etnik təmizləməyə məruz qalmasına səbəb oldu. İşğal dövründə qeyri-qanuni məskunlaşma və təbii sərvətlərin talanması kimi cinayətlər törədilsə də, 2020-ci ildə Vətən müharibəsində qazanılan qələbə nəticəsində ədalət bərpa olundu. 2022-ci il avqustun 26-da Laçın şəhəri, eləcə də Zabux və Sus kəndləri tam nəzarətə götürüldü və məhz bu tarixi hadisəyə əsasən, bu gün Laçın şəhəri günü kimi təsis edildi.
Bu gün Laçın tamamilə yeni və müasir inkişaf dövrünü yaşayır. Ən önəmlisi odur ki, laçınlılar 30 ildən çox davam edən həsrətdən sonra öz doğma yurdlarına qayıdırlar. Həyata keçirilən Böyük Qayıdış proqramı çərçivəsində Laçın şəhəri ilə yanaşı, Zabux, Sus və Bəylik kəndlərində yüzlərlə ailənin daimi məskunlaşması təmin edilib. Ümumilikdə rayonda 1000-dən çox ev tikilib və ya bərpa edilib, sakinlərin rahat yaşaması üçün məktəblər, uşaq bağçaları və digər sosial obyektlər istifadəyə verilib. Laçın şəhərinin 2040-cı ilədək inkişafını nəzərdə tutan Baş Plan “15 dəqiqəlik şəhər” prinsipi əsasında hazırlanıb ki, bu da insanların gündəlik tələbatlarını evlərinə yaxın məsafədə, rahat şəkildə ödəməsinə imkan yaradır.
Bərpa prosesində ekoloji mühitin qorunması və iqtisadi dirçəliş əsas hədəflərdəndir. Hazırda Laçının elektrik enerjisinə olan tələbatı tamamilə yaşıl enerji hesabına ödənilir. Həkəri, Hoçaz və Zabux çayları üzərində qurulan və müasir SCADA sisteminə inteqrasiya olunan çoxsaylı su elektrik stansiyaları həm rayonu işıqlandırır, həm də ölkənin ümumi enerji sisteminə öz töhfəsini verir. Paralel olaraq, bölgədə yeni iş yerləri yaradan sənaye və kənd təsərrüfatı müəssisələri fəaliyyətə başlayıb. “Laçın Aqro-Sənaye Parkı”nda yerləşən mebel, ayaqqabı və tikiş fabrikləri, eləcə də Qarabağda ilk nərəyetişdirmə təsərrüfatı olan “Həkəri Balıq Təsərrüfatı” yerli əhalinin daimi məşğulluğunu təmin edir.
Rayonun yol və nəqliyyat infrastrukturu da sürətlə yenilənir və genişləndirilir. Çoxsaylı tunelləri olan yeni Kəlbəcər-Laçın yolu və dəniz səviyyəsindən ən hündürdə yerləşən, 2025-ci ilin mayında istifadəyə verilmiş Laçın Beynəlxalq Hava Limanı bölgənin gələcək turizm və logistika imkanlarını xeyli artırır. Artıq turistlərin və yerli sakinlərin istirahəti üçün Zerti kəndində “Laçın” İstirahət Kompleksi, Həkəri çayı kənarında bulvar və asma körpü yaradılıb, kanat yolunun isə təməli qoyulub. Mədəni həyatın canlanması da diqqətdən kənarda qalmayıb. Bölgənin tarixini və təbiətini tərənnüm edəcək “Hoçazfilm” yaradıcılıq studiyası fəaliyyətə başlayıb və 2025-ci ildə Laçının “MDB-nin mədəniyyət paytaxtı” kimi qonaqları qəbul etməsi şəhərin mədəni əhəmiyyətini beynəlxalq səviyyəyə qaldırıb.
Bütün bu genişmiqyaslı işlər Prezident İlham Əliyevin birbaşa diqqəti və mütəmadi səfərləri sayəsində reallaşır. Dövlət başçısının 2021-ci ildən başlayaraq 2026-cı ilin iyul ayına qədər Laçına etdiyi hər bir səfər yeni infrastruktur layihələrinin, təhsil, səhiyyə, sənaye obyektlərinin və 700 min nəfəri içməli su ilə təmin edəcək "Həkəriçay" su anbarı kimi strateji təyinatlı mərkəzlərin təməlqoyma və ya açılış mərasimləri ilə yadda qalıb. Bu gün Laçın sadəcə keçmişin izlərini silmir, həm də gələcəyə hesablanmış, dayanıqlı və müasir bir şəhər kimi yenidən doğulur.
Tutu Kamalqızı

25/08/2026

Azərbaycan-Özbəkistan münasibətlərinin yeni zirvəsi
Tarixi rəğbət və qardaşlıq telləri üzərində qurulan Azərbaycan-Özbəkistan əlaqələri bu gün keyfiyyətcə yeni müttəfiqlik və strateji tərəfdaşlıq mərhələsini yaşayır. İki ölkə liderinin siyasi iradəsi, artan iqtisadi kooperasiya və regional inteqrasiya layihələri Bakı və Daşkəndi Türk dünyasının və Avrasiya məkanının əsas güc mərkəzlərindən birinə çevirir.
Prezident İlham Əliyevin 21 avqust 2026-cı ildə Özbəkistanın Milli İnformasiya Agentliyinə verdiyi müsahibə Azərbaycan–Özbəkistan münasibətlərinin nə qədər dərin və çoxşaxəli xarakter aldığını aydın şəkildə ortaya qoydu. Müsahibədə səslənən fikirlərdən görünür ki, iki ölkə arasında münasibətlər yalnız tarixi və mədəni yaxınlıqla məhdudlaşmır, artıq siyasi müttəfiqlik, iqtisadi inteqrasiya və regional əməkdaşlıq kimi mühüm istiqamətləri əhatə edən strateji xarakter daşıyır.
Azərbaycan və Özbəkistanı birləşdirən bağların gücü onların ortaq tarixindən və mənəvi yaxınlığından qaynaqlanır. Bu münasibətlər zamanın sınağından keçərək bu gün dövlətlərarası müttəfiqlik səviyyəsinə yüksəlib. Prezident İlham Əliyevin müsahibəsində Özbəkistan Prezidenti Şavkat Mirziyoyevlə qarşılıqlı dostluq və etimad münasibətlərinin xüsusi qeyd olunması da təsadüfi deyil. Liderlər arasında formalaşmış siyasi dialoq iki ölkənin strateji əməkdaşlığının əsas hərəkətverici qüvvələrindən biridir.
İki ölkə arasındakı əməkdaşlıq artıq ənənəvi iqtisadi sahələri də aşaraq yüksək texnologiya, enerji, nəqliyyat və logistika kimi strateji istiqamətlərə yayılır. Yaşıl enerji dəhlizinin yaradılması təşəbbüsü Azərbaycan, Özbəkistan və Qazaxıstanın enerji potensiallarının əlaqələndirilməsi baxımından xüsusi əhəmiyyət daşıyır. Bərpaolunan enerjinin istehsalı və ixracı gələcəkdə regionun iqtisadi xəritəsini dəyişdirə biləcək mühüm amillərdən biri kimi çıxış edir.
Nəqliyyat və logistika sahəsi isə Azərbaycan–Özbəkistan tərəfdaşlığının ən perspektivli istiqamətlərindəndir. Azərbaycanın Cənubi Qafqazda, Özbəkistanın isə Mərkəzi Asiyada strateji mövqeyi onları Şərqlə Qərbi birləşdirən marşrutlarda təbii tərəfdaşlara çevirir. Orta Dəhliz, TRIPP və Çin–Qırğızıstan–Özbəkistan dəmir yolu kimi layihələrin bir-biri ilə əlaqələndirilməsi Avrasiyanın nəqliyyat xəritəsində yeni imkanlar yarada bilər.
Müsahibənin diqqət çəkən məqamlarından biri də mədəni diplomatiyaya verilən yüksək qiymətdir. Azərbaycan və Özbəkistanın mədəniyyət günləri keçirməsi, təhsil sahəsində əməkdaşlığı genişləndirməsi, media və QHT forumları təşkil etməsi xalqlar arasında münasibətlərin yalnız dövlətlər səviyyəsində deyil, cəmiyyətlər səviyyəsində də inkişaf etdiyini göstərir. Füzuli şəhərində Mirzə Uluqbəy adına məktəbin fəaliyyət göstərməsi, Bakıda “Özbəkistan” parkının yaradılması, şəhərlər arasında qardaşlaşma münasibətlərinin genişlənməsi bu dostluğun rəmzi ifadələridir. Bu layihələr siyasi sənədlərdən daha artıq məna daşıyır: onlar xalqların bir-birinə olan ehtiramının və gələcəyə yönəlmiş əməkdaşlığın real təzahürləridir.
Azərbaycan–Özbəkistan əməkdaşlığının regional ölçüsü də getdikcə genişlənir. Türk Dövlətləri Təşkilatı çərçivəsində iki ölkənin fəal mövqeyi türk dünyasının inteqrasiyasının dərinləşməsinə xidmət edir. Azərbaycanın Mərkəzi Asiya Dövlət Başçılarının Məşvərət görüşlərində tamhüquqlu iştirakı isə Azərbaycanı Mərkəzi Asiya ilə Cənubi Qafqaz arasında daha sıx əlaqələrin qurulmasında mühüm aktora çevirir. Prezident İlham Əliyevin qeyd etdiyi kimi, “C5” formatının faktiki olaraq “C6” formatına çevrilməsi regional əməkdaşlığa yeni məzmun qazandırır.
Bütün bunlar göstərir ki, Azərbaycan və Özbəkistanın münasibətləri yalnız bu günün reallıqları ilə məhdudlaşmır. Bu əlaqələr gələcək üçün uzunmüddətli strateji baxış üzərində qurulur. Siyasi sabitlik, iqtisadi qarşılıqlı fayda, nəqliyyat imkanları, enerji potensialı və ortaq türk-mədəni irsi birləşdirən bu əməkdaşlıq modeli daha geniş regional tərəfdaşlıq üçün nümunə təşkil edir.
Prezident İlham Əliyevin müsahibəsi Azərbaycan–Özbəkistan münasibətlərinin mahiyyətini bir daha ortaya qoydu: bu, sadəcə iki dövlət arasında əməkdaşlıq deyil, ortaq tarixdən güc alan, bu günün strateji maraqları ilə möhkəmlənən və gələcəyin böyük imkanlarına hesablanan qardaşlıq və müttəfiqlik münasibətləridir. Qarşıdakı dövrdə Azərbaycan və Özbəkistanın birgə təşəbbüslərinin daha da artacağı, iki ölkənin regional proseslərdə rolunun güclənəcəyi və qardaş xalqlar arasında əlaqələrin yeni, daha yüksək mərhələyə yüksələcəyi şübhəsizdir.
Fahirə Qasımova

25/08/2026

Özbəkistan-Azərbaycan münasibətləri möhkəmlənməkdədir
Prezident İlham Əliyevin 21 avqust 2026-cı ildə Özbəkistanın Milli İnformasiya Agentliyinə (UzA) verdiyi müsahibə də iki ölkə arasındakı əlaqələrin dərinliyini, qarşılıqlı etimadın möhkəmliyini və gələcək əməkdaşlığın geniş perspektivlərini əks etdirən mühüm siyasi məzmun daşıyır.
Dövlət başçısının müsahibəsində Azərbaycan–Özbəkistan münasibətlərinin əsas xüsusiyyətlərindən biri kimi ortaq tarix, mədəniyyət, dil, mənəvi dəyərlər və xalqlarımız arasında əsrlər boyu formalaşmış qarşılıqlı rəğbət önə çəkilir. Bu amillər iki dövlət arasında münasibətlərin yalnız diplomatik və siyasi maraqlara deyil, daha dərin tarixi və mənəvi təməllərə söykəndiyini göstərir. Məhz bu möhkəm təməl üzərində Azərbaycan və Özbəkistan münasibətləri son illərdə yeni məzmun qazanaraq müttəfiqlik mərhələsinə çatıb.
Prezident İlham Əliyev müsahibəsində Özbəkistan Prezidenti Şavkat Mirziyoyevlə münasibətlərin dövlətlərarası əlaqələrin inkişafında mühüm rol oynadığını xüsusi vurğulayıb. Dövlət başçıları arasında qarşılıqlı hörmət, səmimi dostluq və etimad iki ölkənin strateji tərəfdaşlığının möhkəmlənməsinə mühüm siyasi zəmin yaradıb.
Azərbaycan–Özbəkistan münasibətlərinin hüquqi-siyasi bazasının möhkəmləndirilməsi də xüsusi diqqətəlayiqdir. 2024-cü ildə Azərbaycan Prezidentinin Özbəkistana dövlət səfəri, 2025-ci ildə isə Özbəkistan Prezidentinin Azərbaycana dövlət səfəri zamanı imzalanmış mühüm sənədlər, o cümlədən “Strateji tərəfdaşlığın dərinləşdirilməsi haqqında Bəyannamə” və “Müttəfiqlik münasibətləri haqqında Müqavilə” iki ölkə arasındakı münasibətlərin gələcək istiqamətini müəyyənləşdirən mühüm siyasi sənədlərə çevrilib.
Bu gün Azərbaycan–Özbəkistan əməkdaşlığı siyasi münasibətlərlə məhdudlaşmır. İqtisadiyyat, investisiya, nəqliyyat, enerji, təhsil, mədəniyyət, media, turizm, idman və digər sahələrdə əlaqələrin genişləndirilməsi iki ölkənin qarşılıqlı maraqlarının getdikcə daha çox istiqamətdə uzlaşdığını göstərir. İqtisadi əməkdaşlığın genişləndirilməsi üçün yaradılan mexanizmlər, birgə layihələr və investisiya imkanları qarşıdakı illərdə ikitərəfli əlaqələrin praktiki nəticələrinin daha da artmasına şərait yaradır.
Münasibətlərin xüsusi istiqamətlərindən biri humanitar əməkdaşlıqdır. Azərbaycan və Özbəkistanın ortaq mədəni irsi xalqlarımızı birləşdirən ən mühüm mənəvi körpülərdən biridir. Mədəniyyət və incəsənət sahəsində keçirilən tədbirlər, elm və təhsil müəssisələri arasında əlaqələr, şəhərlərarası əməkdaşlıq bu tarixi bağların müasir dövrdə daha da möhkəmlənməsinə xidmət edir.
Təhsil sahəsində mövcud göstəricilər də əlaqələrin real məzmununu ortaya qoyur. 2025–2026-cı tədris ilində Özbəkistanın 67 vətəndaşının Azərbaycanda, Azərbaycanın isə 176 vətəndaşının Özbəkistanda təhsil alması iki ölkə arasında gənclər və təhsil mühitində əlaqələrin genişləndiyini göstərir. Füzuli şəhərində Özbəkistanın təşəbbüsü ilə inşa edilmiş Mirzə Uluqbəy adına orta məktəb isə qardaş ölkənin Azərbaycanın işğaldan azad edilmiş ərazilərinin bərpasına və gələcəyinə verdiyi dəstəyin rəmzi nümunələrindəndir.
Azərbaycan və Özbəkistan arasında media sahəsində əməkdaşlığın inkişafı da diqqət çəkən istiqamətlərdəndir. Daşkənddə və Bakıda Azərbaycan–Özbəkistan media forumlarının keçirilməsi jurnalistlər və media qurumları arasında peşəkar əlaqələrin genişlənməsinə imkan yaradıb. Bu əməkdaşlıq iki ölkə haqqında obyektiv və dolğun informasiyanın ictimaiyyətə çatdırılması, qarşılıqlı informasiya mübadiləsinin gücləndirilməsi baxımından mühüm əhəmiyyət daşıyır. Prezident İlham Əliyevin məhz Özbəkistanın Milli İnformasiya Agentliyinə müsahibəsi də bu baxımdan xüsusi məna kəsb edir.
Müsahibədə Azərbaycanla Mərkəzi Asiya ölkələri arasında əməkdaşlığın perspektivləri də önəmli yer tutur. Azərbaycanın Mərkəzi Asiya dövlətləri ilə əlaqələrinin genişlənməsi həm tarixi və mədəni yaxınlıq, həm də qarşılıqlı iqtisadi və strateji maraqlar baxımından mühüm əhəmiyyətə malikdir. Xüsusilə Türk Dövlətləri Təşkilatı çərçivəsində əməkdaşlığın inkişafı türk dünyasının birlik və həmrəyliyinin möhkəmlənməsinə mühüm töhfə verir.
Müsahibədə regionlararası əməkdaşlığın inkişafı da xüsusi vurğulanır. Bakı və Daşkənddən başlayaraq müxtəlif Azərbaycan və Özbəkistan şəhərləri arasında qardaşlaşma və tərəfdaşlıq münasibətlərinin qurulması xalqlar arasında əlaqələrin yalnız paytaxtlar səviyyəsində deyil, regionlar və şəhərlər səviyyəsində də dərinləşdiyini göstərir. Şuşa ilə Xivə, Lənkəran ilə Buxara, Şəki ilə Kokənd, Quba ilə Cizak, Füzuli ilə Gülüstan və digər şəhərlər arasında qurulan əlaqələr bu baxımdan mühüm əhəmiyyət daşıyır. Yaxın perspektivdə Naxçıvan ilə Ürgənc arasında qardaşlaşmış şəhər münasibətlərinin yaradılmasının planlaşdırılması da əlaqələrin coğrafiyasının daha da genişləndiyini göstərir.
Prezident İlham Əliyevin müsahibəsində Özbəkistan xalqına dövlət müstəqilliyinin 35-ci ildönümü münasibətilə ünvanladığı səmimi təbrik və xoş arzular da iki xalq arasında münasibətlərin ruhunu əks etdirir. Sülh, əmin-amanlıq, tərəqqi və yeni nailiyyətlər arzusu Azərbaycan xalqının qardaş Özbəkistan xalqına olan münasibətinin ifadəsidir.
Nəticə etibarilə, Prezident İlham Əliyevin Özbəkistanın Milli İnformasiya Agentliyinə verdiyi müsahibə Azərbaycan–Özbəkistan münasibətlərinin mövcud inkişaf səviyyəsini və qarşıdakı dövr üçün əsas hədəfləri aydın şəkildə ortaya qoyur. Bu münasibətlərin təməlində tarix, mədəniyyət və mənəvi yaxınlıq, inkişafında isə güclü siyasi iradə və qarşılıqlı etimad dayanır.
Aidə Həsənova

25/08/2026

Beynəlxalq münasibətlərdə etibarlı tərəfdaşlıq
Cənab Prezident İlham Əliyevin Özbəkistanın Milli İnformasiya Agentliyinə verdiyi müsahibədə səsləndirdiyi fikirlər Azərbaycan–Özbəkistan əlaqələrinin hazırkı mərhələsini xarakterizə etmək baxımından xüsusi əhəmiyyət daşıyır. Dövlətimizin başçısının vurğuladığı kimi, ölkələrimiz arasında siyasi dialoq çox yüksək səviyyədədir. Son illərdə qarşılıqlı səfərlərin və yüksək səviyyəli təmasların intensivləşməsi də münasibətlərin təsadüfi deyil, ardıcıl və məqsədyönlü şəkildə inkişaf etdiyini göstərir.
Prezident İlham Əliyevin müsahibəsində son beş il ərzində ən yüksək səviyyədə qarşılıqlı səfərin həyata keçirilməsini qeyd etməsi Azərbaycan və Özbəkistan arasında siyasi münasibətlərin dinamik xarakterini göstərən mühüm faktordur. Bu intensiv təmaslar iki ölkə rəhbərləri arasında qarşılıqlı etimadın və səmimi münasibətlərin möhkəm əsasını formalaşdırır.
Burada diqqətçəkən digər məqam qarşılıqlı münasibətlərdə mövcud olan səmimiyyət və qardaşlıq atmosferidir. Diplomatik münasibətlərin möhkəm olması üçün siyasi maraqlar mühüm olsa da, xalqlar arasında qarşılıqlı rəğbət və etimad olmadıqda bu münasibətlərin uzunmüddətli inkişafı çətinləşir. Azərbaycan və Özbəkistan nümunəsində isə dövlətlərarası münasibətlər xalqlarımızın tarixi və mənəvi yaxınlığı ilə tamamlanır.
Prezident İlham Əliyevin müsahibəsində Özbəkistanın son illərdə əldə etdiyi sosial-iqtisadi nailiyyətlərə xüsusi diqqət yetirməsi də təsadüfi deyil. Özbəkistan böyük əhali potensialına, geniş əraziyə, zəngin təbii və insan resurslarına malik Mərkəzi Asiyanın aparıcı dövlətlərindən biridir.
Son illərdə Özbəkistanda iqtisadiyyatın şaxələndirilməsi, müasir şəhər infrastrukturunun yaradılması, nəqliyyat imkanlarının genişləndirilməsi, sahibkarlığın inkişafı, elm və təhsilə diqqətin artırılması istiqamətində mühüm addımlar atılır. Prezident İlham Əliyev də müsahibəsində müasir şəhərlərin salınmasını, genişmiqyaslı infrastruktur layihələrinin həyata keçirilməsini, elmə, təhsilə, mədəniyyətə və idmana göstərilən diqqəti ölkənin inkişaf tempinin mühüm göstəriciləri kimi qeyd edir.
Özbəkistanın inkişafında dövlət idarəçiliyində həyata keçirilən islahatların da xüsusi rolu vardır. Prezident Şavkat Mirziyoyevin rəhbərliyi ilə aparılan islahatlar ölkənin iqtisadi və sosial həyatında yeni mərhələnin başlanmasına səbəb olmuşdur. Azərbaycan Prezidentinin müsahibəsində Özbəkistanın inkişafını onun rəhbərliyinin düşünülmüş siyasəti və strateji baxışı ilə əlaqələndirməsi iki ölkə rəhbərləri arasında yüksək qarşılıqlı hörmətin daha bir ifadəsidir.
Məsələyə bir qədər geniş yanaşdıqda görürük ki, Azərbaycan və Özbəkistanın inkişaf proseslərində müəyyən oxşar cəhətlər də vardır. Hər iki ölkə milli maraqlara əsaslanan müstəqil siyasət yürüdür, iqtisadiyyatın şaxələndirilməsinə, nəqliyyat və logistika imkanlarının genişləndirilməsinə, insan kapitalının inkişafına və beynəlxalq əməkdaşlığın artırılmasına xüsusi əhəmiyyət verir.
Azərbaycan və Özbəkistan münasibətlərinin gücünü yalnız dövlətlərarası sənədlərlə izah etmək mümkün deyil. Bu əlaqələrin arxasında əsrlər boyu formalaşmış ümumi türk mədəniyyəti dayanır.
Xalqlarımızın ədəbiyyatında, musiqisində, folklorunda və milli adət-ənənələrində çoxsaylı oxşarlıqlar mövcuddur. Nizami Gəncəvi, Əlişir Nəvai kimi böyük söz ustadlarının yaradıcılığı Azərbaycan və Özbəkistan ədəbi-mədəni əlaqələrinin tarixinin nə qədər dərin köklərə malik olduğunu göstərir.

Azərbaycan və Özbəkistanın türk dünyasının iki mühüm dövləti kimi müxtəlif sahələrdə birgə təşəbbüslərlə çıxış etməsi ortaq tarixi və mədəni irsin müasir siyasi və iqtisadi əməkdaşlıq üçün möhkəm baza olduğunu göstərir.
Prezident İlham Əliyevin müsahibəsində diqqəti cəlb edən əsas məqamlardan biri Azərbaycan–Özbəkistan münasibətlərinin yalnız mövcud səviyyəsi ilə kifayətlənməmək, onun gələcək perspektivlərini də görməkdir.
Prezident İlham Əliyevin Özbəkistanın Milli İnformasiya Agentliyinə verdiyi müsahibə Azərbaycan–Özbəkistan münasibətlərinin bugünkü mənzərəsini anlamaq baxımından mühüm mənbə kimi qiymətləndirilə bilər. Müsahibədə səsləndirilən fikirlərdən aydın olur ki, iki ölkə arasında münasibətlər tarixi və mənəvi yaxınlıqdan başlayaraq müasir dövrdə çoxşaxəli və dinamik dövlətlərarası tərəfdaşlığa çevrilmişdir.
Natiq Orucov

Zəngilan rayon 8 nömrəli tam orta məktəb

04/09/2026

27/08/2026

27/08/2026

26/08/2026

26/08/2026

26/08/2026

25/08/2026

25/08/2026

25/08/2026

Address

Telephone

Website

Alerts

Contact The Organization

Shortcuts

Share

Category

Listing takedown request