02/08/2026
Müsavat Partiyasının başqanı İsa Qəmbər partiya veteranı, tanınmış müsavatçı Həbibulla Manaflını 75 illik yubileyi münasibətilə təbrik edib.
Təbrikdə deyilir:
Hörmətli Həbibulla bəy!
75 illik yubileyiniz münasibətilə Sizi səmimi qəlbdən təbrik edir, möhkəm cansağlığı, uzun ömür, ailə səadəti və gələcək fəaliyyətinizdə davamlı uğurlar arzulayıram.
Siz Azərbaycan Xalq Hərəkatının ilk günlərindən etibarən ölkəmizin müstəqilliyi, milli azadlığı və ərazi bütövlüyü uğrunda mübarizəyə qoşulmuş, azad və demokratik cəmiyyət idealları naminə yorulmadan çalışan öncül şəxsiyyətlərdən biri olmusunuz. AXC-nin Şəki şöbəsinin fəallarından biri kimi göstərdiyiniz fəaliyyət cəsarətin, vətənpərvərliyin və ziyalılığın parlaq nümunəsi kimi dəyərləndirilir.
Milli hakimiyyət dövründə Şəki Şəhər İcra Hakimiyyəti başçısının müavini vəzifəsində çalışaraq xalqa vicdanla xidmətin, məsuliyyətli idarəçiliyin və vətəndaşa yaxın münasibətin nümunəsini yaratmısınız.
Sonrakı illərdə Müsavat Partiyasının Şəki rayon təşkilatının bərpa bürosunun üzvü, daha sonra isə uzun illər təşkilatın sədri kimi fəaliyyət göstərərək partiyanın Şəkidə təşkilatlanmasında, ideoloji xəttinin təbliğində, demokratik dəyərlərin müdafiəsində və sıralarının genişlənməsində mühüm xidmətlər göstərmisiniz. Bu gün də Şəki təşkilatında siyasi fəaliyyətinizi fəallıqla davam etdirməyiniz xüsusi təqdirə layiqdir.
2000-ci il parlament seçkilərinin saxtalaşdırılmış nəticələrinə etiraz etdiyiniz üçün həbs olunmağınız, sonrakı illərdə isə müxtəlif təzyiq və məhrumiyyətlərlə üzləşməyinizə baxmayaraq, siyasi mübarizədə əqidənizə, prinsipial mövqeyinizə və demokratik dəyərlərə sadiq qalmağınız Sizə cəmiyyət arasında böyük nüfuz və dərin hörmət qazandırmışdır.
Siz eyni zamanda Azərbaycan Dövlət Pedaqoji Universitetinin Şəki filialında uzun illər baş müəllim kimi səmərəli pedaqoji fəaliyyət göstərərək gənc nəslin maariflənməsinə, savadlı, milli düşüncəli və vətənpərvər vətəndaşların yetişməsinə sanballı töhfələr vermisiniz. Müəllimlik kimi şərəfli peşəni yüksək ləyaqətlə icra etməyiniz Sizin zəngin mənəvi dünyanızın, yüksək ziyalılıq keyfiyyətlərinizin və ictimai məsuliyyət hissinizin bariz ifadəsidir.
Araşdırmaçı alim və publisist kimi fəaliyyətiniz də xüsusi qeyd olunmalıdır. “Şəki üsyanı”, “Tarixə qayıdış”, “Öyünc və güvənc qaynağı” və digər əsərləriniz milli tariximizin araşdırılması, tarixi yaddaşın qorunması və gələcək nəsillərə çatdırılması baxımından dəyərli töhfələrdir. Elmi və publisistik yaradıcılığınız Şəkinin və ümumən Azərbaycanın ictimai-siyasi tarixinin öyrənilməsində mühüm mənbələrdən biri kimi qiymətləndirilir.
Sizin fəal həyat mövqeyiniz, işgüzarlığınız, prinsipiallığınız, təvazökarlığınız və insanlara səmimi münasibətiniz həm partiyadaşlarınız, həm də Sizi tanıyan hər kəs tərəfindən yüksək qiymətləndirilir və böyük ehtiramla qarşılanır. Müsavat dəyərlərinə sadiqliyiniz, milli-demokratik ideallara bağlılığınız və uzun illər davam edən fədakar fəaliyyətiniz gənc nəsil üçün örnəkdir.
Hörmətli Həbibulla bəy!
Bir daha yubileyinizi ürəkdən təbrik edir, Sizə möhkəm cansağlığı, uzun və mənalı ömür, ailənizlə birlikdə xoşbəxt günlər, ictimai, elmi və siyasi fəaliyyətinizdə yeni uğurlar arzulayıram.
