What are the opening hours?

Monday 09:00 - 17:00 Tuesday 09:00 - 17:00 Wednesday 09:00 - 17:00 Thursday 09:00 - 17:00 Friday 09:00 - 17:00 Saturday 09:00 - 15:00

https://www.facebook.com/103487399279726/

Səməndər Nihan Meyxana, Səməndər_Nihan

26/06/2026

Müzəffər Azərbaycan Ordusu
Azərbaycan Silahlı Qüvvələrinin yaranmasından 108 il ötür.
1918-ci il iyunun 26-da Azərbaycan Xalq Cümhuriyyəti Nazirlər Şurasının qərarı ilə ilk müntəzəm hərbi hissə - Əlahiddə Azərbaycan Korpusu yaradıldı və həmin il avqustun 1-də Azərbaycanın Hərbi Nazirliyi təsis olundu.
Ulu Öndər Heydər Əliyevin 22 may 1998-ci il tarixli Fərmanına əsasən Əlahiddə Azərbaycan Korpusunun yarandığı gün – 26 iyun Azərbaycan Respublikasının Silahlı Qüvvələri Günü elan olundu və hər il bu tarix rəsmi dövlət bayramı kimi qeyd edilir.
Çar Rusiyası dövründə azərbaycanlılar hərbi xidmətə çağrılmırdılar, çünki azərbaycanlıların hərb sənətinin sirlərinə yiyələnməsini istəmirdi. Azərbaycan Xalq Cümhuriyyəti dövründə qeyd etdiyimiz kimi Əlahiddə Azərbaycan Korpusunun, həmçinin Hərbi Nazirliyin yaradılması, ilk dəfə səfərbərliyin elan edilməsi Azərbaycan Ordusunun yaradılması istiqamətində atılmış addımlar olsa da, Cümhuriyyətin süqutu ilə bu işlər yarımçıq qaldı. Sovet dövründə azərbaycanlı gənclər hərbi xidmətə çağrılsalar da, onlar əsasən döyüş üçün nəzərdə tutulmuş hərbi hissələrdə yox, köməkçi batalyonlarda xidmət edirdilər. Məqsəd yenə aydın idi. Yalnız Ulu Öndər Heydər Əliyevin 1969-cu ildə rəhbərliyə gəlişindən sonra onun müstəsna xidmətləri sayəsində ölkəmizdə ordu quruculuğu prosesinə başlanıldı. Ümummilli Lider sovet Azərbaycanına rəhbərlik etdiyi dövrdə ölkəmizdə milli hərbi kadr hazırlığı, hərb sənətinin güclənməsi, hərbi kadrların hazırlanması, zəngin hərb tarixinin öyrənilməsi, gənclərin qəhrəmanlıq ənənələri əsasında tərbiyə edilməsi məsələlərini daim diqqət mərkəzində saxladı. Onun rəhbərliyi ilə ordu quruculuğu sahəsində aparılan hərbi işlər respublikamızda mütəşəkkil, qüdrətli ordu yaratmağa imkan verdi və onun gələcəkdə daha da möhkəmlənməsi üçün əsaslı zəmin yaratdı. 1971-ci ildə Heydər Əliyevin səyləri nəticəsində Azərbaycanda hərbi kadrlar hazırlayan məktəbin – görkəmli sərkərdə Cəmşid Naxçıvanskinin adını daşıyan hərbi liseyin yaradılmasına nail olundu. Bu mühüm addım Azərbaycanda hərb sənətinə marağın güclənməsinə, azərbaycanlı zabit kadrların hazırlanmasına gətirib çıxardı. Ulu Öndər Heydər Əliyevin sayəsində azərbaycanlı gənclərin Bakı Ali Birləşmiş Komandanlıq və Bakı Ali Hərbi Dənizçilik məktəblərində oxuması, eləcə də SSRİ-nin digər hərbi məktəblərinə güzəştli şərtlərlə qəbul olunması mümkün oldu.
Müstəqillik dönəmində bu proses – Ümummilli Lider Heydər Əliyevin 1993-cü ildə hakimiyyətə yenidən qayıdışından sonra da əsas prioritet məsələlərdən oldu. 1994-cü ildə əldə olunan atəşkəsdən sonra ordu quruculuğu prosesi yeni mərhələyə qədəm qoydu. Silahlı Qüvvələrin maddi-texniki bazası möhkəmləndirildi, döyüş hazırlığı artırıldı, peşəkar zabit heyətinin yetişdirilməsi istiqamətində ardıcıl tədbirlər həyata keçirildi. Bu sahədə əsaslı dönüş nöqtəsi isə Ulu Öndər Heydər Əliyevin təşəbbüsü ilə 1999-cu il fevralın 20-də Hərbi Akademiyanın yaradılması oldu. Akademiyanın təsis olunması hərb sahəsində milli kadr ehtiyatının formalaşması prosesinin keyfiyyət etibarı ilə yeni inkişaf mərhələsi idi. 2001-ci ildə imzalanmış digər mühüm Fərman ilə Silahlı Qüvvələr üçün kadr hazırlığının təkmilləşdirilməsi məqsədilə Müdafiə Nazirliyi sistemində fəaliyyət göstərən məktəblər müvafiq olaraq Azərbaycan Ali Hərbi Məktəbi, Azərbaycan Hərbi Dənizçilik Məktəbi və Azərbaycan Ali Hərbi Təyyarəçilik Məktəbi kimi yenidən təşkil olundu və daha peşəkar tədris strukturuna çevrildi. Azərbaycanın NATO ilə əməkdaşlığının genişləndirilməsi, “Sülh naminə tərəfdaşlıq” proqramına qoşulması və beynəlxalq sülhməramlı əməliyyatlarda iştirakı Silahlı Qüvvələrimizin müasir standartlara uyğunlaşdırılmasında mühüm rol oynadı.
Ulu Öndərin əsasını qoyduğu ordu quruculuğu siyasəti Prezident, Müzəffər Ali Baş Komandan İlham Əliyev tərəfindən davam etdirilərək Azərbaycan Silahlı Qüvvələrinin dünyanın ən güclü və peşəkar ordularından birinə çevirdi. Silahlı Qüvvələrin maddi-texniki bazasının möhkəmləndirilməsi, ən müasir silah və texnikaların alınması, hərbi hissələrin yenidən qurulması, hərbi infrastrukturun müasirləşdirilməsi istiqamətində ardıcıl olaraq mühüm tədbirlər həyata keçirildi. Ordu quruculuğu prosesi beynəlxalq standartlara uyğunlaşdırılmış, müasir idarəetmə mexanizmləri tətbiq edilmiş, silahlı qüvvələrin döyüş hazırlığı keyfiyyətcə yeni mərhələyə yüksəlmişdir. Hərbi büdcənin davamlı şəkildə artırılması, hərbi sənaye komplekslərinin yaradılması, peşəkar hazırlığın yüksəldilməsi istiqamətində həyata keçirilən məqsədyönlü tədbirlər qısa bir müddətdə öz nəticələrini verdi. Tarixi Zəfərlərimiz, ərazi bütövlüyümüzün və suverenliyimizin tam bərpası bütün bu məqamları özündə ehtiva edir. 2016-cı ilin Aprel döyüşləri, 2018-ci il Günnüt zəfəri, həmin nailiyyətlərin davamı olaraq 2020-ci ildə Vətən müharibəsindəki tarixi Qələbə, 2023-cü il antiterror tədbirləri Azərbaycan Ordusunun dünyaya səs salan gücünün, qüdrətinin nümayişi oldu. Bu əməliyyatlar bir daha göstərdi ki, Azərbaycan Ordusu ən müasir döyüş təcrübəsinə malik, yüksək hazırlıqlı və çevik hərbi gücdür. İkinci Qarabağ müharibəsində Azərbaycan Ordusunun nümayiş etdirdiyi yüksək vətənpərvərlik ruhu təkcə hərbi uğurun deyil, eyni zamanda milli birliyin və dövlətçilik prinsiplərinə bağlılığın təcəssümü idi.
Bu gün Azərbaycan Ordusu xalqımızın qürur mənbəyi, dövlətimizin, müstəqilliyinin, ərazi bütövlüyünün, suverenliyinin etibarlı təminatçısıdır. 108 ildə qazanılan təcrübə, zəfərlər gələcəyə daha inamla addımlamağa stimul verir. Azərbaycanın keçdiyi inkişaf yolu təsdiqləyir ki, milli maraqların qorunması, təhlükəsizliyin təmin olunması və əldə edilmiş tarixi nailiyyətlərin qorunub saxlanması qüdrətli silahlı qüvvələrə əsaslanır.
Xalqımız artıq bir neçə ildir ki, tarixi Zəfərlərimizin fonunda 26 iyun Silahlı Qüvvələr Gününü böyük qürur və minnətdarlıq hissi ilə qeyd edir. Bu əlamətdar gündə Vətənimizin keşiyində ayıq-sayıq dayanan hərbi qulluqçularımıza dərin ehtiramımızı ifadə edir, Azərbaycanın suverenliyi, ərazi bütövlüyü uğrunda canlarını fəda etmiş qəhrəman şəhidlərimizin əziz xatirəsini sonsuz hörmət və rəhmətlə anırıq.

24/06/2026

Türkmənistan prezidentinin Azərbaycana səfəri

Azərbaycanın xarici siyasətinin prioritet istiqamətlərindən biri Mərkəzi Asiya ölkələri ilə münasibətlərin yüksələn xətlə inkişafıdır. İyunun 22-də Türkmənistan Prezidenti Sərdar Berdiməhəmmədovun dövlət səfəri bir daha Azərbaycanla Mərkəzi Asiya ölkələri, ümumilikdə türk dünyası ilə əlaqələrin inkişafına mühüm töhfə vermək baxımından əhəmiyyət kəsb etdi. Səfər çərçivəsində keçirilən görüşlər, imzalanan sənədlər, verilən mesajlar göstərir ki, Bakı ilə Aşqabad arasında əməkdaşlıq artıq yeni inkişaf mərhələsinə daxil olur.
Prezident İlham Əliyevin mətbuata bəyanatında səsləndirdiyi fikirlər bu münasibətlərin mahiyyətini aydın şəkildə ifadə edir. Dövlət başçısının nitqində vurğulandığı kimi iki ölkə arasında münasibətlər möhkəm təməl – tarixi bağlar, mədəni və mənəvi əlaqələr üzərində qurulub. Azərbaycan-Türkmənistan əlaqələrinin bugünkü səviyyəsini məhz bu amillər şərtləndirir. Xalqlarımızı ortaq etnik köklər, dil yaxınlığı və əsrlər boyu formalaşmış mənəvi bağlılıq birləşdirir. Həmçinin qarşılıqlı səfərlərin dinamikliyi fonunda ortaq tarixdən strateji tərəfdaşlığa və regional güc mərkəzinə doğru irəliləyən Azərbaycan-Türkmənistan münasibətlərinin gələcəyi üçün yeni imkanlar yaranır. Bu gün rəsmi Bakı və Aşqabad arasında mövcud olan qardaşlıq bağları həm güclü liderlərin siyasi iradəsi, həm də Trans-Xəzər nəqliyyat və enerji layihələrinin səmərələliyi baxımından nümunəvi inkişaf modelini nümayiş etdirir.
Bakıda keçirilən təkbətək və geniş tərkibli görüşlər zamanı danışıqların əsas istiqamətlərini təşkil edən mövzularda siyasi əlaqələrlə yanaşı, ticari-iqtisadi əməkdaşlıq, enerji, nəqliyyat, logistika, kənd təsərrüfatı, sənaye, humanitar sahələr, həmçinin beynəlxalq təşkilatlar çərçivəsində qarşılıqlı fəaliyyət istiqamətləri təşkil etdi. Prezident İlham Əliyev mətbuata bəyanatla çıxışı zamanı bu məqamlara bir daha diqqət çəkdi, xüsusilə nəqliyyat və logistika əməkdaşlığının uzunmüddətli xarakter daşıdığını vurğulayaraq Azərbaycan və Türkmənistanın Şərq-Qərb marşrutlarının inkişafında mühüm rol oynadığını bir daha səsləndirdi. Dövlət başçısının çıxışında digər əsas diqqət çəkən məqamlardan biri Qarabağın bərpasına Türkmənistanın verdiyi dəstəyin yüksək qiymətləndirilməsi oldu. Prezident İlham Əliyev vurğuladı ki, Türkmənistanın Ümummilli Lideri Qurbanqulu Berdiməhəmmədovun təşəbbüsü ilə Füzulidə məscid tikilir və artıq layihənin icrasına başlanılıb. Bu təkcə humanitar yardım deyil, işğaldan azad edilmiş torpaqlarda həyatın bərpasına qardaş dəstəyinin simvoludur.
Prezident İlham Əliyevin bəyanatında diqqət çəkən digər mühüm məqam Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv edilməsində Türkmənistanın göstərdiyi dəstəyə görə təşəkkür etməsi oldu. Dövlət başçısı bunu tarixi hadisə adlandırdı və bu yanaşma heç də təsadüfi deyildi. Ölkə başçısının nitqində qeyd olunduğu kimi coğrafi olaraq Mərkəzi Asiyanın bir hissəsi olmasaq da, mədəni və tarixi abidələrimiz, həmçinin regional qarşılıqlı əlaqə və nəqliyyat və logistika problemləri ilə bağlı konkret məsələlər təbii olaraq böyük Mərkəzi Asiyanın vahid geosiyasi və geoiqtisadi bölgə kimi qəbul edilməsi üçün ilkin şərtlər yaradır. Bu gün bu əlaqələr qarşılıqlı səfərlərin dinamikliyi fonunda yüksələn xətlə daha da möhkəmlənir.
Danışıqların məzmununda həmçinin humanitar əməkdaşlıq məsələləri də xüsusi yer tuturdu. Təhsil, səhiyyə, idman, mədəniyyət sahələrində imzalanan sənədlər xalqlarımız arasında əlaqələrin daha da dərinləşdirilməsinə xidmət edir. Türkmənistan Prezidentinin çıxışında bu istiqamətdə məqamlara toxunuldu, Azərbaycan-Türkmənistan xalqlarını əsrlər boyu formalaşmış dostluq, qohumluq və ortaq dəyərlərin birləşdirdiyi vurğulandı. Ali qonaq Türkmənistanın Azərbaycanla əməkdaşlığın daha da inkişafına böyük əhəmiyyət verdiyini deyərək, ölkələrimizi və xalqlarımızı əsrlər boyu mehriban qonşuluq əlaqələri, ortaq tarix, mədəniyyət, dil və mənəvi dəyərlərin birləşdirdiyini bildirdi.
Beləliklə 22 iyun 2026-cı il tarixli Bakı görüşü Azərbaycan-Türkmənistan münasibətlərində yeni strateji mərhələnin başlanğıcı kimi yadda qaldı. İmzalanmış sənədlərin miqyası, müzakirə olunan məsələlərin geniş spektri və dövlət başçılarının verdiyi mesajlar bir daha göstərdi ki, tərəflər münasibətləri daha yüksək səviyyəyə qaldırmaq əzmindədirlər. Ümumilikdə Azərbaycan və Türkmənistanın formalaşdırdığı strateji xətt isə təkcə iki ölkənin deyil, bütövlükdə Trans-Xəzər regionunun təhlükəsizlik, nəqliyyat və enerji xəritəsini yenidən formalaşdırır.

25/05/2026

Müstəqillik günü
Mayın 28-də Şərqin ilk demokratik respublikası olan Azərbaycan Xalq Cümhuriyyətinin yaranmasından 108 il ötür. Azərbaycan Xalq Cümhuriyyətinin yaradılması beş min illik dövlətçilik tariximizin şanlı səhifələrindən olmaqla yanaşı, xalqımızın milli azadlıq mücadiləsinin məntiqi nəticəsi olaraq tariximizə mühüm hadisə kimi daxil oldu. 1813 və 1828-ci illərdə baş tutan işğal faktından sonra Azərbaycan xalqı öz müstəqilliyini itirmişdi. Çar Rusiyasının tərkibində müstəmləkə olmaqla çoxsaylı deqredasiya və represiyalara məruz qalmışdı. Bu mərhələdə həmçinin Azərbaycanda elmin, təhsilin, müstəqil iqtisadi siyasətin inkişafı üçün hər hansı bir şərait olmamış, hətta xalqımızın qarşısına müxtəlif maneələr çıxarılmışdır. Belə olan halda təqribən 90 il sonra yeni əsrin çağırışlarına – yeni dövrün tələblərinə uyğun olaraq yeni bir dövlət qurmaq zərurəti meydana çıxmışdır. Beləliklə Azərbaycan Xalq Cümhuriyyəti yaradılmışdır. Şübhəsiz ki, AXC-nin yaradılması Azərbaycanın dövlətçilik tarixinin xüsusi bir səhifəsidir. Qısa bir dövr ərzində Azərbaycanın ilk parlamenti, hökuməti yaradılmış, dövlət atributları təsis edilmiş, dövlət quruculuğu sahəsində mühüm tədbirlər həyata keçirilmiş, Cümhuriyyətin beynəlxalq münasibətlər sistemində tanınması, diplomatik müstəvidə milli maraqların qorunması istiqamətində mühüm addımlar atılmışdır. Mövcudluğun ilk günlərindən xalq hakimiyyəti və insanların bərabərliyi prinsiplərinə əsaslanan AXC bütün ölkə vətəndaşlarına eyni hüquqlar verərək irqi, milli, dini, sinfi bərabərsizlik ortadan qaldırıldı. Eyni zamanda olduqca mütərəqqi sayılan müddəaları özündə əks etdirən çoxsaylı qanunlar qəbul olunmuşdur.
1918-ci il mayın 28-də Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla Azərbaycanın müstəqilliyini dünyaya bəyan etmiş, xalqımızın çoxəsrlik dövlətçilik ənənələrini davam etdirmişdir. Müstəqil, azad, demokratik dövlət qurmaq məqsədini qarşıya qoyan demokratik cümhuriyyət öz müqəddaratını təyin etməyə qadir olduğunu nümayiş etdirdi. AXC hökumətinin xarici siyasətinin başlıca məqsədi yeni yaradılmış dövləti dünyaya tanıtmaq idi. Paris Sülh Konfransında, dünyanın siyasi nizamının yenidən quruluş aldığı bir zamanda müttəfiq dövlətlər tərəfindən Cümhuriyyətin tanınmasını, habelə dünyanın aparıcı dövlətləri ilə diplomatik əlaqələrin yaradılmasını təmin etmək idi. Dünya birliyi tərəfindən tanınan Xalq Cümhuriyyətinin fəaliyyəti sayəsində ölkəmizin beynəlxalq hüququn subyekti olması 1920-ci ilin aprel ayında bolşevik işğalından sonra Azərbaycanın bir dövlət kimi dünyanın siyasi xəritəsindən silinməsinin qarşısını aldı.
Tarixi proseslər və hadisələr deməyə əsas verir ki, müstəqilliyin əldə edilməsi nə qədər mürəkkəb proses olsa da, onu qoruyub saxlamaq daha çətin və məsuliyyətli vəzifədir. XX əsrin sonlarında yenidən müstəqilliyinə qovuşan Azərbaycan suverenliyini qoruyub saxlamağı bacardı. Çətin siyasi-iqtisadi dövrdə hakimiyyətə qayıdan Ulu öndər Heydər Əliyev Azərbaycan dövlətçiliyinin qorunması üçün qətiyyətli tədbirlər gördü, ölkədə davamlı ictimai-siyasi sabitliyi bərqərar etdi. Həmin dövrdə Ermənistanın Azərbaycan torpaqlarına təcavüzü bir tərəfdən, digər tərəfdən daxili münaqişələr, ölkədə hökm sürən xaos, anarxiya çətin durum yaratmışdı. Məhz belə bir şəraitdə xalqın təkidi ilə hakimiyyətə gələn Ulu Öndər dövlətimizin və dövlətçiliyimizin xilaskarı oldu. Çıxışlarında müstəqil Azərbaycan Respublikasını Azərbaycan Xalq Cümhuriyyətinin qanuni varisi olduğunu dəfələrlə vurğulayan Ümummilli Lider demokratik Cümhuriyyətin yaranması gününü əziz tutaraq həmin günü Respublika Günü elan etmiş və bu bizim milli bayramımızdır – deyə qeyd edirdi: Müsəlman Şərqində ilk demokratik cümhuriyyətin məhz Azərbaycan torpağında yaranması xalqımızın o dövrdə və o illər ərəfəsində – XIX əsrin sonunda və XX əsrin əvvəllərində milli müstəqillik, azadlıq duyğuları ilə yaşaması ilə bağlıdır. O illərdə xalqımızın qabaqcıl şəxsiyyətləri, mütəfəkkir adamları, ziyalıları xalqımızda milli azadlıq, milli müstəqillik duyğularını gücləndirmiş, milli dirçəliş, milli oyanış əhval-ruhiyyəsi yaymış və bunların hamısı məntiqi olaraq Azərbaycan Xalq Cümhuriyyətinin yaranmasına gətirib çıxarmışdır. Biz ilk Demokratik Cümhuriyyətin yaranması gününü əziz tutaraq, onu Azərbaycanın dövlət müstəqilliyi günü – Respublika Günü elan etmişik və bu, bizim milli bayramımızdır.
Ulu Öndər Heydər Əliyev və Prezident İlham Əliyev tərəfindən həyata keçirilən çoxsaylı sərəncam və tədbirlər Şərqdə ilk parlamentli respublikanın əhəmiyyətinin hər zaman uca tutulduğunun, eləcə də dövlətçilik ənənələrinə böyük dəyər verildiyinin sübutudur. Azərbaycan Xalq Cümhuriyyətinin 80 illiyinin keçirilməsi haqqında sərəncamlar, Bakı şəhərinin İstiqlaliyyət küçəsində Azərbaycan Xalq Cümhuriyyətinin şərəfinə ucaldılmış İstiqlal bəyannaməsi abidəsinin açılış mərasimin keçirilməsi, Azərbaycan Xalq Cümhuriyyətinin 90 illik yubileyi, həmçinin Cümhuriyyətin 100 illik yubileyinin keçirilməsi haqqında sərəncamlar, 2018-ci ilin ölkəmizdə “Azərbaycan Xalq Cümhuriyyəti İli” elan edilməsi, “Azərbaycan Xalq Cümhuriyyətinin 100 illiyi (1918-2018)” yubiley medalı” təsis olunması xüsusi qeyd olunan məqamlardandır.
Müasir Azərbaycan dövləti 1918-ci ildə yaranmış Azərbaycan Xalq Cümhuriyyətinin varisidir. Təsadüfi deyil ki, 2021-ci ilin oktyabr ayının 15-dən sonra Müstəqillik Günümüzü də məhz AXC-nin yaranması tarixi yəni 28 may 1918-ci il tarixindən hesablanır. Belə ki, 2021-ci il 15 oktyabr tarixində “Müstəqillik günü haqqında” Azərbaycan Respublikasının Qanunu qəbul olmuşdur. Sözügedən Qanunla 28 May Müstəqillik Günü, oktyabrın 18-i isə Müstəqilliyin Bərpası Günü elan edilmişdir. Bunlar özlüyündə milli yaddaşın bərpası, milli özünüdərkin təşviqi olmaqla yanaşı, həm də Cümhuriyyət dəyərlərinə, onun qurucularına olan hörmət və ehtiramın nümunəsidir. Ötən illər ərzində atılmış hər bir addım və qəbul olunmuş hər bir qərar doğma Azərbaycan torpaqlarının işğaldan azad olunmasına xidmət edib. Prezident İlham Əliyevin Müzəffər Ali Baş komandan kimi gərgin əməyi, Şanlı Ordumuzun rəşadəti sayəsində Azərbaycan ərazi bütövlüyünə qovuşdu, xalqımız dünyada mübariz, döyüşkən və müzəffər xalq kimi tanındı. 2020-ci ilin 44 günlük Vətən müharibəsi, 2023-cü ilin Şanlı Zəfərləri nəticəsində Azərbaycan müasir tarixinin ən parlaq və qürurverici səhifələrini yazdı. Azərbaycan xalqı bu gün öz tarixindən və keçmişindən ilhamlanaraq qalib, müzəffər bir dövlətin vətəndaşı kimi bütöv və azad Vətəndə yaşamağın qüruru içərisindədir.

05/05/2026

Avropa Siyasi Birliyi”nin 8-ci Zirvə toplantısı keçirilib.

Mayın 4-də Ermənistanın paytaxtı İrəvan şəhərində “Avropa Siyasi Birliyi”nin 8-ci Zirvə toplantısı keçirilib. Azərbaycan Respublikasının Prezidenti İlham Əliyev tədbirdə videobağlantı formatında çıxış edib.
Ölkə başçısının çıxışı sülh gündəliyi, Avropa Parlamenti ilə bağlı verilmiş qərar və digər məsələləri əhatə edib. Prezident İlham Əliyevin çıxışında Azərbaycanla Ermənistan arasında normallaşma prosesi çərçivəsində atılan addımlar, keçən ilin avqust ayında Vaşinqtonda baş tutan sülh sammiti, o cümlədən sülhün bərqərar olması istiqamətində ölkəmizin təşəbbüsləri geniş şəkildə şərh olunub. Ölkə başçısının istər müxtəlif beynəlxalq platformalarda, istərsə də yerli və xarici mediaya müsahibələrində olduğu kimi “Avropa Siyasi Birliyi”nin 8-ci Zirvə toplantısında çıxışı da Azərbaycanın milli maraqlara cavab verən praqmatik xarici siyasət kursunu və qətiyyətli mövqeyini bir daha nümayiş etdirdi.
Bu çıxış regionumuzda sülh, sabitlik və inkişafın təmin edilməsi üçün zəruri addımlar barədə bir ismarıc və çağırış olmaqla yanaşı eyni zamanda AŞPA və Avropa Parlamenti kimi Avropa təsisatlarının ölkəmizə qarşı uzun illər ərzində nümayiş etdirdiyi ikili standart və qərəzli yanaşmanın, sülh və əməkdaşlığa xələl gətirən mövqenin ifşası idi. Dövlət başçısının Avropa Parlamenti və Avropa Şurası Parlament Assambleyasına yönəlmiş iradları faktlara və konkret siyasi hadisələrə əsaslanırdı. Prezidentin vurğuladığı kimi hər bir ölkənin ərazi bütövlüyü eyni dəyərə malikdir və bu sahədə ikili standartların tətbiqi qəbuledilməzdir. Bu, beynəlxalq münasibətlər sistemində obyektivlik və ədalət prinsiplərinin qorunmasının vacibliyini bir daha gündəmə gətirir. Prezidentin nitqində Azərbaycanın ərazi bütövlüyü ilə bağlı səsləndirilən prinsipial mövqe dövlət siyasətinin dəyişməz xəttini bir daha əks etdirir.
Dövlət başçısı ikili standartların bu gün AŞPA-nın sanki iş təlimatına çevrildiyini və Azərbaycanın ərazi bütövlüyünün istənilən digər ölkənin ərazi bütövlüyü qədər eyni dəyərə malik olduğunu bildirməsi bu məsələdə konkret qətiyyətin səciyyəsi idi. Ölkə başçısı bütün bunlara cavab olaraq Azərbaycan Parlamentinin mayın 1-də Avropa Parlamenti ilə bütün sahələrdə əməkdaşlığı dayandırmaq, Avropa İttifaqı-Azərbaycan Parlament Əməkdaşlığı Komitəsinin işinə son qoymaq və Avronest Parlament Assambleyasında üzvülüyü dayandırmasına aid prosedurlara başlaması ilə bağlı rəsmi qərarın qəbul edildiyini diqqətə çatdırdı. Heç şübhəsiz ki, prezidentin də vurğuladığı kimi İkinci Qarabağ müharibəsi bitdikdən 6 ay sonra – 2021-ci ilin mayından 2026-cı ilin aprelin 30-a qədər Avropa Parlamentinin Azərbaycanla bağlı təhqir və yalanlarla dolu 14 qətnamə qəbul etməsi əsl riyakarlıq və qərəz nümunəsi hesab edilməlidir. Xüsusilə də sonuncu sənədin Zirvə görüşü ərəfəsində qəbul edilməsi məqsədli siyasi təzyiqin təzahürüdür.
Prezident İlham Əliyevin çıxışında xüsusi diqqət çəkən məqamlardan biri də “Trampın Beynəlxalq Sülh və Rifah Maşrutu” layihəsi ilə bağlı səslənən fikirlər idi. Prezidentin nitqində qeyd olunub ki, Azərbaycanı Naxçıvanla birləşdirəcək və eyni zamanda Orta Dəhlizin tərkib hissəsinə çevriləcək bu marşrut regionun geoiqtisadi xəritəsini dəyişdirə biləcək strateji layihə hesab olunur. Bu təşəbbüs təkcə Ermənistan-Azərbaycan münasibətlərinə deyil, Avropa ilə Asiya arasında alternativ logistika marşrutların inkişafına da ciddi təsir göstərə bilər.
Prezident İlham Əliyevin çıxışının yekun hissəsində səsləndirdiyi mesajlar isə bütövlükdə Azərbaycanın strateji xəttini ifadə edirdi. Prezidentin nitqində Azərbaycanın prinsipial mövqeyi qəti şəkildə vurğulanır: Bütün təxribatlara və sülh prosesinə maneə olmaq istəyən qüvvələrin cəhdlərinə baxmayaraq, Azərbaycan sülh gündəliyinə sadiqdir və regional münasibətlərin normallaşdırılması istiqamətində siyasi iradəsini qoruyur.
Beləliklə prezident İlham Əliyevin “Avropa Siyasi Birliyi”nin 8-ci Zirvə toplantısındakı çıxışı Azərbaycanın postmünaqişə mərhələsində formalaşdırdığı yeni siyasi konsepsiyanın beynəlxalq təqdimatı kimi mühüm mesajlarla yadda qaldı. Bu konsepsiyanın əsasını beynəlxalq hüquqa söykənən prinsipial mövqe, regional əməkdaşlıq, iqtisadi inteqrasiya və davamlı sülh təşkil edir.

01/05/2026

Qalib güləşçilər ilə görüş
Prezident İlham Əliyev Albaniyanın paytaxtı Tiranada keçirilmiş Avropa çempionatında komanda hesabında Avropa çempionu olan yunan-roma güləşi və sərbəst güləş, həmçinin qadın güləşi üzrə medal qazanmış idmançıları və onların məşqçilərini qəbul edib.
Milli komandamızı qələbə münasibətilə təbrik edən dövlət başçısı bildirib ki, Avropa çempionatında komanda hesabında birinci olmaq böyük nailiyyətdir. Hər dəfə beynəlxalq yarışlarda bayrağımız qaldırılanda bütün Azərbaycan xalqı qürur hissi keçirir, sevinir. Bu qələbə sevincini idmançılarımız xalqımıza bəxş edir və bu da öz növbəsində gənc nəsli vətənpərvərlik ruhunda tərbiyə etmək üçün çox önəmli amildir. İdman, ümumiyyətlə, cəmiyyətimizin ayrılmaz hissəsidir və xüsusilə son illər ərzində idmanda gedən müsbət proseslər, əlbəttə ki, hamımızı sevindirir. Prezident xüsusi vurğulayıb ki, bu gün qalib dövlət və qalib xalq kimi yaşayan dövlətimiz, xalqımız o cümlədən idman uğurları ilə də fəxr edir.
Dövlət başçısı Azərbaycan güləşinin zəngin tarixi ənənələrə sahib olduğunu və bu ənənələrin bu gün də davam etdirildiyini vurğulayıb. Prezidentin nitqində qeyd olunub ki, tanınmış idmançılarla yanaşı, gənc güləşçilərin də yüksək nəticə əldə etməsi ölkədə məşq və seleksiya prosesinin düzgün qurulduğunu göstərir.
Görüş zamanı Azərbaycan güləşçilərinin beynəlxalq arenada qazandığı nailiyyətlərindən geniş şəkildə bəhs olunub. Qeyd olunub ki, son illərdə ölkədə idmanın inkişafı istiqamətində həyata keçirilən dövlət siyasəti öz nəticəsini verməkdədir. Olimpiya və dünya səviyyəli yaraşlarla yanaşı Avropa çempionatlarında da Azərbaycan idmançıları ardıcıl uğurlar qazanır və ölkəmizin bayrağını ucaldırlar. Prezident idmançıların əzmkarlığını və vətənə bağlılığını xüsusi vurğulayıb. Yeni idman komplekslərinin tikilməsi, məşq şəraitinin yaxşılaşdırılması və gənc istedadların üzə çıxarılması istiqamətində görülən işlər diqqətə çatdırılıb.
Prezidentin nitqində həmçinin qeyd olunub: “Mənim idmançılarla görüşlərim müntəzəm xarakter daşıyır. 30 ilə yaxın müddət ərzində Azərbaycan Olimpiya Komitəsinə rəhbərlik edirəm. Bu 30 ilə yaxın müddət ərzində, əlbəttə ki, bir çox müsbət məqamlar olub. Əsas odur ki, idmanın dayanıqlı inkişafı, uğurlarımızın ardıcıl şəkildə davam etməsi və gənc nəslin yetişməsi – hər şey mənim gözümün önündə keçib. Görün, neçə nəsil dəyişib, amma bu gün biz yenə də uğurlarla fəxr edirik. Əsas budur və əminəm, həm Güləş Federasiyası, həm bizim digər federasiyalarımız gələcəkdə öz işlərini elə quracaqlar ki, Azərbaycan xalqı idman yarışlarına baxanda daim sevinc hissləri keçirsin.”
Dövlət başçısı çıxışının sonda vurğulayıb: Ölkəmizdə və xaricdə keçirilən idman yarışları idman növlərini populiyarlaşdırır. Bizim təcrübəmiz də böyükdür, çox böyük beynəlxalq yarışlar keçirmişik, həm Avropa Oyunlarını, həm İslam Həmrəyliyi Oyunlarını. Bunlar demək olar ki, Yay Olimpiya Oyunlarının səviyyəsinə çox yaxındır. Keçən il MDB Oyunlarını özü də paytaxtda yox, bölgələrdə keçirmişik. Yəni bu onu göstərir ki, ölkədə çox güclü idman potensialı var. Prezident İlham Əliyev idmançılara gələcək yarışlarda daha böyük və yeni uğurlar arzulayaraq, onların hər zaman dövlətin diqqət və dəstəyi ilə əhatə olunacağını bildirib.

29/04/2026

Çexiya-Azərbaycan münasibətləri
Latviya prezidentinin ardınca Ukraynanın dövlət başçısı Volodimir Zelenskinin və Çexiyanın baş naziri Andrey Babişin Azərbaycana səfərinə məhz bu aspektdən yanaşmaq lazımdır. Bütün bu səfərlərin ana xəttini ikitərəfli əlaqələrin genişləndirilməsilə yanaşı, həm də enerji təhlükəsizliyi, eyni zamanda regional sabitliyin təmin olunmasında birgə səylərin birləşdirilməsi təşkil edir. Bu ümumi geosiyasi fon Azərbaycan ilə Çexiya arasında münasibətlərin inkişafına da müsbət təsir göstərir. Qarşılıqlı hörmət, etibarlı tərəfdaşlıq və beynəlxalq hüququn prinsiplərinə sadiqlik əsasında formalaşan əlaqələr son illərdə dinamik inkişaf mərhələsinə qədəm qoyub. Hər iki ölkə siyasi dialoqun gücləndirilməsinə, iqtisadi əməkdaşlığın genişləndirilməsinə və enerji təhlükəsizliyi, sənaye, nəqliyyat, müdafiə sahəsi kimi strateji sahələrdə qarşılıqlı faydalı tərəfdaşlığın dərinləşdirilməsinə xüsusi önəm verir. Avropa ilə Cənubi Qafqaz arasında mühüm körpü rolunu oynayan Azərbaycan ilə Çexiya beynəlxalq və regional məsələlərdə də oxşar mövqelərdən çıxış edərək əməkdaşlığın coğrafiyasını və məzmununu davamlı şəkildə genişləndirirlər.
Aprelin 27-də Çex Respublikasının baş naziri Andrey Babişin ölkəmizə səfəri, səfər çərçivəsində Qəbələdə baş tutan tarixi görüş zamanı keçirilən mühüm tədbirlər, mətbuata verilən ismarıclar yol xəritəsi olaraq gələcək perspektivləri müəyyən edir. Prezident İlham Əliyevin mətbuata bəyanatında vurğuladığı kimi ölkələrimiz arasında münasibətlər dinamik şəkildə inkişaf edir və siyasi dialoq mərhələsinə qədəm qoyub. Bu müstəvilərdə keçirilən görüşlərdə iqtisadi və bir çox sferalarda konkret layihələr müzakirə olunub və əməkdaşlığın genişləndirilməsi üçün real imkanlar mövcuddur.
Səfərin mühüm cəhədlərindən biri də onun simvolik məzmunudur. Belə ki, Andrey Babişin Avropa İttifaqından kənara ilk rəsmi səfərini Azərbaycana etməsi Bakının Avropa üçün etibarlı tərəfdaş kimi artan rolunun göstəricisidir. Regional təhlükəsizlik, Avropa enerji təhlükəsizliyi, ikitərəfli iqtisadi münasibətlər və qlobal gündəmdə yer alan məsələlər ətrafında aparılan müzakirələr Azərbaycan-Çexiya münasibətlərini real siyasi məzmun qazandığını bariz şəkildə nümayiş etdirir. Eyni zamanda Çexiyanın baş nazirinin Azərbaycanı strateji tərəfdaş adlandırması münasibətlərin səviyyəsini aydın göstərən mühüm mesajdır. Bu yanaşma Avropa İttifaqı məkanında Azərbaycanın artan rolunu, xüsusilə enerji, nəqliyyat, təhlükəsizlik kimi sahələrdə etibarlı tərəfdaş kimi qəbul edilməsinin təsdiqidir. Azərbaycanın bu gün dünyanın diqqət mərkəzində olması, səsləndirilən fikirlər heç də təsadüfi deyil. Azərbaycan özünü sabitlik təmin edən aktor kimi təqdim edir. Qəbələ görüşləri regionda yeni güc balansının formalaşdığını göstərməklə yanaşı, Avropada Azərbaycanın mövqeyini gücləndirmiş olur. Dövlət başçısı çıxışında Azərbaycanın Avropanın enerji təhlükəsizliyində oynadığı rolu xüsusi vurğulayaraq ölkənin artıq bir sıra Avropa dövlətlərinə qaz ixrac etdiyini və bu konteksdə ölkənin enerji diplomatiyasının uğurunu və Avropa bazarında mövqelərinin möhkəmləndiyini göstərir. Prezident həmçinin ticarət dövriyyəsinin artırılması, investisiya mühitinin yaxşılaşdırılması və konkret layihələr üzrə əməkdaşlığın genişləndirilməsi istiqamətində çağırışlar edib. Azərbaycanın nəqliyyat-logistika imkanlarına diqqət çəkərək, xüsusilə Şərq-Qərb nəqliyyat dəhlizinə yatırılan investisiyalara, ölkənin regional tranzit mərkəzinə çevrildiyini vurğulayıb.
Səfərin xüsusi diqqət çəkən istiqamətlərindən biri müdafiə sənayesi sahəsində əməkdaşlıqların perspektivləridir. Prezident İlham Əliyevin Çexiya ilə birgə istehsal layihələri üzərində danışıqlar aparıldığını bəyan etməsi münasibətlərdə yeni keyfiyyət mərhələsinin başlandığını göstərir. Çexiyanın bu sahədə zəngin təcrübəsi, texnoloji potensialı və müdafiə sənayesi ənənələri ilə Azərbaycanın artan istehsal imkanlarının birləşməsi qarşılıqlı faydalı sinerji formalaşdırır. Bu əməkdaşlıq həm Azərbaycanın müdafiə potensialını gücləndirə, həm də iki ölkə arasında sənaye tərəfdaşlığını daha dərin müstəviyə keçirə bilər. Çex Respublikasının baş naziri Andrey Babişin ölkəmizə səfəri çərçivəsində müdafiə sahəsində əməkdaşlığın yeni perspektivlərinin müzakirəsi qarşıdakı dövrdə bu əməkdaşlığın daha geniş miqyas alacağını və strateji əhəmiyyət daşıyacağını nəzərdə tutur.
Bütün bunlar Azərbaycan-Çexiya münasibətlərinin keyfiyyətcə yeni mərhələyə daxil olduğunu göstərir. Fəal siyasi dialoq və qarşılıqlı maraqlara əsaslanan əməkdaşlıq əlaqələrin gələcəkdə daha da möhkəmlənəcəyinə zəmin yaradır.

28/04/2026

Azərbaycan-Ukrayna münasibətləri
Azərbaycanla Ukrayna arasında münasibətlərin əsasını qarşılıqlı hörmət və beynəlxalq hüququn fundamental prinsiplərinə sadiqlik təşkil edir. 2008 və 2011-ci illərdə imzalanmış strateji tərəfdaşlıq sənədləri bu əlaqələrin hüquqi-siyasi çərçivəsini müəyyən etmiş, qarşılıqlı ərazi bütövlüyü və suverenliyin dəstəklənməsi prinsiplərini prioritet istiqamətə çevirmişdir. Son illər ölkələr arasında intensiv təmasların artması əlaqələrin dinamik inkişafından xəbər verir. 4 il ərzində 7 dəfə keçirilən görüşlər, o cümlədən beynəlxalq tədbirlər çərçivəsində aparılan dialoqlar siyasi əlaqələrin institusional və davamlı xarakter aldığını göstərir. Bu baxımdan Ukrayna prezidenti Volodimir Zelenskinin Azərbaycana səfəri, Qəbələdə keçirilən tarixi görüş həm də əvvəlki təmasların məntiqi davamı kimi qiymətləndirilə bilər və ölkələrimiz arasında münasibətlərin dinamik inkişafının göstəricisidir. Mətbuata bəyanatlarla çıxışlar zamanı prezidentlər arasında əvvəlki görüşlərin nəticələrinin xatırlanması və bu səfərin əməkdaşlığın genişləndirilməsi üçün yeni imkanlar yaratdığına dair fikirlər münasibətlərin strateji mahiyyətini bir daha təsdiqləyir. Xüsusilə müasir beynəlxalq münasibətlər sistemində geosiyasi gərginliyin artdığı bir dövrdə Azərbaycanla Ukrayna arasında əməkdaşlıq sabitlik və qarşılıqlı dəstək modelinin nümunəsi kimi çıxış edir.
Qəbələ görüşü çərçivəsində aparılan müzakirələr ikitərəfli əməkdaşlığın geniş spektrini əhatə edir. İkitərəfli əməkdaşlıq çərçivəsində başlıca olaraq enerji sahəsi prioritet istiqamət kimi ön plana çıxır. Azərbaycanın bu sahədə əldə etdiyi uğurlar və regional enerji sahəsindəki rolu Ukrayna üçün etibarlı tərəfdaş modeli yaradır. Qəbələ tarixi görüşü zamanı keçirilən görüşlərdə, prezidentlərin mətbuata bəyanatlarında əməkdaşlığın bu və ya digər istiqamətdə davam etdirilməsi məqamları geniş şəkildə şərh olundu. Dövlət başçısının nitqində enerji sahəsində olan əməkdaşlıq, xüsusilə SOCAR-ın Ukraynada fəaliyyəti və gələcək birgə investisiya imkanları iqtisadi əməkdaşlığın dərinləşdirilməsi üçün real zəmin formalaşdırdığı vurğulandı. Həmçinin görüşlər zamanı kənd təsərrüfatı, təhlükəsizlik, hərbi-texniki, humanitar və digər sahələrdə əməkdaşlıq xüsusi qeyd olundu.
Prezident Zelenskinin bu səfəri, səfər çərçivəsində mətbuata bəyanatla çıxışında səsləndirilən fikirlər ilk növbədə siyasi baxımdan mühüm mesajlarla yadda qaldı. Müasir dövrdə Ukraynanın üzləşdiyi təhlükəsizlik çağırışları fonunda Azərbaycan kimi strateji tərəfdaşla əlaqələrin gücləndirilməsi rəsmi Kiyev üçün prioritet istiqamətlərdən biridir. Eyni zamanda Azərbaycan da öz növbəsində beynəlxalq hüququn norma və prinsiplərinə daim dəstək verdiyini nümayiş etdirir. Bu çərçivədə iki ölkə arasında qarşılıqlı siyasi dəstək və diplomatik həmrəylik xüsusi vurğulanır. Azərbaycan-Ukrayna münasibətlərində bu etimad amili gələcək əməkdaşlığın əsas təminatıdır.
Humanitar sahədə əməkdaşlıq xüsusi qeyd olunan məqamlardan idi. Azərbaycanın Ukraynaya göstərdiyi humanitar yardım, xüsusilə enerji böhranı dövründə təqdim olunan dəstək paketləri və müharibədən zərər çəkmiş uşaqlara göstərilən dəstək Ukrayna prezidenti Zelenskinin nitqində qeyd olunması və bu dəstəyə görə təşəkkürünü ifadə etməsi, eyni zamanda ukraynalı uşaqların, eləcə də tələbələrin Azərbaycana səfərlərinin təşkili ilə bağlı planların açıqlanması humanitar əlaqələrin davamlı xarakter aldığını göstərir.
Tərəflər arasında hərbi-texniki əməkdaşlıq geniş müzakirə olunan məqamlardan idi. Prezident İlham Əliyev bu sahədə fikir mübadiləsinin aparıldığını və böyük perspektivlərin mövcud olduğunu bildirdi. Qeyd olundu ki, müdafiə sənayesi və təhlükəsizlik sahəsində əməkdaşlıq həm ikitərəfli münasibətlərin dərinləşməsinə, həm də regional sabitliyin təmin olunmasına xidmət edə bilər.
Səfərin nəticələrindən yekun qənaətə gələrək qeyd etmək olar ki, bu səfər və keçirilən görüşlər bir daha göstərdi ki, iki ölkə arasında münasibətlər strateji xarakter daşıyır və çoxşaxəli əməkdaşlıq gündəliyi ilə zəngindir. Siyasi dialoqun intensivliyi, iqtisadi və enerji sahəsində uğurlu layihələr, eləcə də təhlükəsizlik istiqamətində perspektivlər Azərbaycan-Ukrayna tərəfdaşlığının daha da inkişaf edəcəyini deməyə əsas verir.

Səməndər Nihan Meyxana

26/06/2026

24/06/2026

25/05/2026

05/05/2026

01/05/2026

29/04/2026

28/04/2026

Address

Opening Hours

Telephone

Website

Alerts

Contact The Organization

Shortcuts

Share

Listing takedown request

Monday	09:00 - 17:00
Tuesday	09:00 - 17:00
Wednesday	09:00 - 17:00
Thursday	09:00 - 17:00
Friday	09:00 - 17:00
Saturday	09:00 - 15:00