What are the opening hours?

Tuesday 09:00 - 18:00 Wednesday 09:00 - 18:00 Thursday 09:00 - 18:00 Friday 09:00 - 18:00

https://www.facebook.com/100457088346955/

Qax RİH Ləkit kənd İƏD, Kakhi (2026)

26/05/2026

Dövlətin göstərdiyi diqqət və qayğı nəticəsində Azərbaycan kənd təsərrüfatı gələcək illərdə daha da inkişaf edəcək və ölkəmiz regionun aparıcı aqrar dövlətlərindən birinə çevriləcəkdir

Müəllif: Mübariz Məmmədov
Qax Notariat Ofisinin notariusu

Azərbaycan Respublikasının Prezidenti İlham Əliyev tərəfindən kənd təsərrüfatı məsələlərinə həsr olunmuş müşavirədə səsləndirilən fikirlər ölkəmizin aqrar siyasətinin gələcək inkişaf istiqamətlərini müəyyən edən mühüm strateji baxışdır. Bu çıxışda kənd təsərrüfatının inkişafı, regionların sosial-iqtisadi dirçəlişi, ərzaq təhlükəsizliyinin təmin olunması, müasir texnologiyaların tətbiqi və kənd əhalisinin rifahının yüksəldilməsi əsas prioritetlər kimi ön plana çəkilmişdir.
Məlumdur ki, Azərbaycan tarixən aqrar ölkə olmuşdur. Xalqımızın həyatında torpaq müqəddəs anlayış hesab edilmiş, kənd təsərrüfatı isə həm iqtisadiyyatın, həm də milli ənənələrin ayrılmaz hissəsinə çevrilmişdir. Müstəqillik əldə edildikdən sonra ölkədə bir çox sahələr kimi kənd təsərrüfatında da müəyyən çətinliklər yaşanmışdı. Lakin Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində aqrar sektor yenidən dirçəldilmiş, kəndlərin siması dəyişmiş və regionların inkişafı üçün böyük layihələr icra edilmişdir.
Prezident çıxışında qeyd etmişdir ki, 2004-cü ildən başlayaraq qəbul edilən regional inkişaf proqramları kənd təsərrüfatının inkişafında mühüm rol oynamışdır. Regionlarda qaz, elektrik, su təchizatı, yollar və digər infrastruktur layihələrinin həyata keçirilməsi kənd əhalisinin yaşayış şəraitini yaxşılaşdırmış, fermerlərin fəaliyyətini genişləndirmişdir. Əgər əvvəllər kəndlərdə infrastruktur çatışmazlığı insanların şəhərlərə üz tutmasına səbəb olurdusa, indi dövlət siyasəti kəndlərin yenidən inkişafına və insanların öz doğma torpaqlarında daha rahat yaşamasına xidmət edir.
Çıxışda xüsusi vurğulanan məsələlərdən biri də dövlət tərəfindən kənd təsərrüfatına göstərilən dəstək olmuşdur. Subsidiyalar, güzəştli kreditlər, gübrə və yanacaq güzəştləri fermerlərin fəaliyyətini stimullaşdırır. Bu siyasət nəticəsində pambıqçılıq, baramaçılıq, fındıqçılıq, üzümçülük və digər sahələrdə ciddi inkişaf müşahidə olunmuşdur. Məsələn, vaxtilə demək olar ki, sıradan çıxmış pambıqçılıq sahəsi yenidən inkişaf etdirilmiş və istehsal həcmi yüz minlərlə tona çatdırılmışdır. Bu isə kənd yerlərində məşğulluğun artmasına və insanların gəlirlərinin yüksəlməsinə səbəb olmuşdur.
Prezident İlham Əliyev kənd təsərrüfatının yalnız iqtisadi deyil, həm də strateji əhəmiyyət daşıdığını vurğulamışdır. Müasir dünyada baş verən müharibələr, iqlim dəyişiklikləri və nəqliyyat problemləri göstərir ki, hər bir dövlət öz ərzaq təhlükəsizliyini təmin etməlidir. Bu baxımdan Azərbaycanın daxili istehsal imkanlarının artırılması xüsusi əhəmiyyət kəsb edir. Dövlət başçısı buğda istehsalı, heyvandarlıq, quşçuluq və digər sahələr üzrə mövcud vəziyyəti təhlil etmiş, idxaldan asılılığın azaldılması üçün yeni proqramların hazırlanmasının vacibliyini qeyd etmişdir.
Müşavirədə diqqət çəkən mühüm məqamlardan biri də kəndlərdən şəhərlərə köç probleminin qarşısının alınması idi. Prezident bildirmişdir ki, məqsəd kəndlərdən şəhərlərə deyil, əksinə şəhərlərdən kəndlərə qayıdış prosesini təmin etməkdir. Bunun üçün kəndlərdə sosial infrastrukturun gücləndirilməsi, məktəblərin, xəstəxanaların tikilməsi, yeni iş yerlərinin yaradılması və xidmət sektorunun inkişafı mühüm əhəmiyyət daşıyır. Bu yanaşma insanların öz torpaqlarına bağlılığını artırır və regionların davamlı inkişafına xidmət edir.
Çıxışda müasir texnologiyaların kənd təsərrüfatında tətbiqinə də geniş yer verilmişdir. Süni intellekt, peyk texnologiyaları və elektron analiz sistemləri vasitəsilə torpaq sahələrinin daha səmərəli idarə olunması nəzərdə tutulur. Bu, məhsuldarlığın artmasına, su ehtiyatlarından düzgün istifadəyə və fermerlərin daha yüksək gəlir əldə etməsinə şərait yaradacaqdır. Müasir dövrdə kənd təsərrüfatının yalnız ənənəvi üsullarla deyil, innovativ yanaşmalar əsasında inkişaf etdirilməsi olduqca vacibdir.
Su təminatı məsələsi də müşavirənin əsas mövzularından biri olmuşdur. Taxtakörpü, Şəmkirçay, Suqovuşan və digər su anbarlarının tikilməsi və yenidən qurulması kənd təsərrüfatının inkişafına böyük təkan vermişdir. Qarabağ və Şərqi Zəngəzurda həyata keçirilən layihələr isə azad edilmiş torpaqların iqtisadi potensialının bərpasına xidmət edir. Müasir suvarma sistemlərinin genişləndirilməsi məhsuldarlığın artmasına və su itkisinin qarşısının alınmasına imkan verəcəkdir.
Prezident İlham Əliyevin çıxışı göstərir ki, dövlət kənd təsərrüfatının inkişafını uzunmüddətli strateji prioritet hesab edir. 2026–2030-cu illəri əhatə edən Dövlət Proqramının qəbul edilməsi bu sahədə yeni mərhələnin başlanğıcıdır. Dövlət və özəl sektorun birgə fəaliyyəti nəticəsində kənd təsərrüfatında məhsuldarlığın artırılması, ixrac potensialının genişləndirilməsi və ərzaq təhlükəsizliyinin tam təmin olunması əsas məqsədlər sırasındadır.
Prezident İlham Əliyevin kənd təsərrüfatı məsələlərinə dair müşavirədəki çıxışı Azərbaycanın aqrar inkişaf strategiyasının aydın ifadəsidir. Bu siyasət ölkənin iqtisadi gücünün artmasına, regionların inkişafına, kənd əhalisinin rifahının yüksəlməsinə və Azərbaycanın ərzaq təhlükəsizliyinin təmin olunmasına mühüm töhfə verir. Dövlətin göstərdiyi diqqət və qayğı nəticəsində Azərbaycan kənd təsərrüfatı gələcək illərdə daha da inkişaf edəcək və ölkəmiz regionun aparıcı aqrar dövlətlərindən birinə çevriləcəkdir.

21/05/2026

Bakı Qlobal Dialoq Məkanı: Tarixi İrsdən Müasir Şəhərsalmaya Doğru
Bakıda keçirilən Ümumdünya Şəhərsalma Forumunun 13-cü Sessiyası planetimizin gələcək inkişaf istiqamətlərini müəyyən edən mötəbər bir platformaya çevrilmişdir. Bu möhtəşəm tədbir qlobal miqyasda böyük maraq doğuraraq, dünyanın 182 ölkəsindən 45 mindən artıq qeydiyyata alınmış iştirakçını bir araya gətirməklə bəşəriyyətin ortaq gələcəyi üçün mühüm dialoq mühiti yaradır. Coğrafi və mədəni baxımdan Avropa ilə Asiyanın kəsişməsində yerləşən Azərbaycan, hər zaman Şərqlə Qərbin qovuşduğu unikal bir məkan kimi çıxış etmişdir. Ölkəmizdə şəhərsalma ənənələrinə verilən yüksək dəyərin bariz nümunəsi olaraq bu ilin "Şəhərsalma və Memarlıq İli" elan edilməsi xüsusi rəmzi məna daşıyır.
Paytaxt Bakı, eləcə də Azərbaycanın bir çox qədim şəhərləri özünəməxsus, zəngin memarlığı ilə haqlı olaraq fərəhlənə bilər. Biz təkcə musiqimizdə və şeirlərimizdə deyil, eyni zamanda daş yaddaşımız olan memarlıqda öz əksini tapan çoxəsrlik, qədim tariximizlə qürur duyuruq. Bu tarixi irs müasir dinamika ilə vəhdət təşkil edir; belə ki, Formula 1 üzrə Bakı Qran-Prisinin məhz şəhər halqasında keçirilən çox azsaylı yarışlardan biri olması paytaxtımızın həm də qlobal idman və turizm mərkəzinə çevrildiyini göstərir. Hazırda Azərbaycanın bir çox bölgələrində şəhərsalma prosesi çox sürətlə inkişaf edir və bu kontekstdə dövlətimizin qarşısında duran ən əsas, strateji vəzifələrdən biri işğaldan azad edilmiş Qarabağın və Şərqi Zəngəzurun yenidən qurulmasıdır. Bu məqsədlə genişmiqyaslı Böyük Qayıdış Proqramı uğurla həyata keçirilir, azad olunmuş şəhər və kəndlərin Baş planları ən müasir standartlara uyğun şəkildə hazırlanır. Bu nəhəng quruculuq işləri fonunda ekoloji tarazlığın qorunması xüsusi diqqət mərkəzində saxlanılır və ətraf mühit sahəsində çoxşaxəli, böyük işlərin görülməsi dayanıqlı gələcəyə olan sadiqliyimizin əyani sübutudur.

06/05/2026

Azərbaycan və İtaliya arasındakı münasibətlər bu gün özünün ən yüksək inkişaf mərhələsini yaşayır. İtaliya Nazirlər Şurasının sədrinin 4 may 2026-cı il tarixində Bakıya rəsmi səfəri iki ölkə arasındakı strateji tərəfdaşlığı daha yüksək səviyyəyə qaldırmaq baxımından həqiqətən də müstəsna əhəmiyyət kəsb edir.

Səfər çərçivəsində keçirilən görüşlər və verilən bəyanatlar münasibətlərin gələcək inkişafı üçün yeni perspektivlər açır. İki ölkə arasında qurulan strateji tərəfdaşlıq əlaqələri 2014-cü və 2020-ci illərdə imzalanmış mühüm bəyannamələrə söykənir ki, bu da siyasi dialoqumuzun ali səviyyədə olmasının əyani göstəricisidir. İtaliya bazarı Azərbaycan üçün həm neft, həm də qaz ixracı baxımından birinci dərəcəli əhəmiyyət kəsb edərək, enerji təhlükəsizliyi sahəsindəki sarsılmaz işbirliyimizi təsdiqləyir.

06/05/2026

Ölkə rəhbərinin çıxışında xüsusi vurğulanan layihələrdən biri “Trampın Beynəlxalq Sülh və Rifah Marşrutu” oldu. Bu təşəbbüs Azərbaycanın əsas hissəsini Naxçıvanla birləşdirməklə yanaşı, onu Orta Dəhlizin mühüm komponentinə çevirəcək. Layihə yalnız regional deyil, Avrasiya miqyasında logistika və ticarət axınlarına təsir göstərə biləcək potensiala malikdir.

Bu kontekstdə Azərbaycan artıq tranzit ölkədən daha çox – regional logistika qovşağına çevriləcəkdir. Ermənistanın da bu layihədə iştirak perspektivi isə sülhün iqtisadi əsaslarını daha da gücləndirəcək.

01/05/2026

Azərbaycan güləşinin Avropa zirvəsi

Azərbaycan bu gün dünya miqyasında təkcə iqtisadi və siyasi gücü ilə deyil, həm də möhtəşəm idman uğurları ilə tanınan qalib bir dövlətdir. Tiranada keçirilmiş Avropa çempionatında güləşçilərimizin həm sərbəst, həm də yunan-Roma növündə komanda hesabında birinci yeri tutaraq qitənin ən güclüsü olduqlarını sübut etmələri bu uğurların növbəti parlaq səhifəsidir. Prezident İlham Əliyevin qalib güləşçilərimizi qəbul edərkən səsləndirdiyi fikirlər, əslində, ölkəmizdə idmanın inkişaf strategiyasının və milli vətənpərvərlik ruhunun ali təzahürüdür.
Cənab Prezidentin də vurğuladığı kimi, güləş bizim milli idman növümüzdür və onun Azərbaycanda böyük ənənələri var. Bu gün əldə olunan nəticələr təsadüfi deyil. Bu, düzgün qurulmuş məşq prosesinin, şəffaf seleksiya işinin və nəsillər arasındakı qırılmaz bağlılığın bəhrəsidir. Vaxtilə dövlət başçımızın tribunalardan azarkeşlik etdiyi Olimpiya çempionlarımız bu gün Federasiya rəhbərliyində və məşqçi korpusunda təmsil olunurlar. Bu varislik imkan verir ki, Azərbaycan idmanı nəinki yaşasın, həm də hər il yeni zirvələr fəth etsin. Nəsillər dəyişir, lakin Azərbaycan idmanının qələbə əzmi sarsılmaz qalır.
İdman sadəcə fiziki yarış deyil, o, cəmiyyətimizin ayrılmaz hissəsi və gənc nəslin vətənpərvərlik ruhunda tərbiyə olunması üçün ən güclü vasitədir. Beynəlxalq arenalarda bayrağımızın ucaldılması, himnimizin səsləndirilməsi hər bir azərbaycanlıda sonsuz qürur hissi yaradır. Cənab Prezidentin qeyd etdiyi kimi, “qalib dövlət və qalib xalq kimi yaşayan xalqımız öz idmançıları ilə fəxr edir”. İdmançılarımız xalça üzərindəki mübarizələri ilə həm də Azərbaycanın sarsılmaz iradəsini nümayiş etdirirlər.
Dövlət başçısının çıxışında xüsusi diqqət çəkən məqamlardan biri idmançılarımızın mənəvi siması ilə bağlıdır. Çempion olmaq mühümdür, lakin ondan daha mühümü ləyaqətli vətəndaş və nümunəvi şəxsiyyət olmaqdır. Təəssüflər olsun ki, biz bəzən beynəlxalq yarışlarda, xüsusən də Avropa miqyasında idmançılarımıza qarşı qərəzli və ədalətsiz münasibətin şahidi oluruq. Görünür, Azərbaycanın hər sahədə olduğu kimi, idmanda da hamıdan öndə olması bəzi dairələri narahat edir. Lakin bizim pəhləvanlarımız həm ədalətsiz hakimlərə, həm də rəqiblərinə ən gözəl cavabı ləyaqətli davranışları və təmiz qələbələri ilə verirlər.
Prezident İlham Əliyevin 30 ilə yaxın müddətdə Milli Olimpiya Komitəsinə rəhbərlik etməsi idmana dövlət səviyyəsində göstərilən diqqətin ən bariz göstəricisidir. Bölgələrimizdə fəaliyyət göstərən Olimpiya İdman kompleksləri, müasir güləş zalları kütləviliyin təmin olunmasına xidmət edir. Bu gün qızlarımızın da güləşə marağının artması və medalçılar sırasına qoşulması idmanımızın çoxşaxəli inkişafından xəbər verir.

29/04/2026

Prezident İlham Əliyevin Bəyanatı: Azərbaycan-Çexiya Münasibətlərinin Prioritetləri
Prezident İlham Əliyev və Baş nazir Andrey Babişin 2026-cı ilin aprelində baş tutan görüşü Azərbaycan və Çexiya arasındakı strateji tərəfdaşlığın yeni bir mərhələyə qədəm qoyduğunu nümayiş etdirir. Hazırda iki ölkə arasında müşahidə olunan son dərəcə fəal siyasi dialoq ikitərəfli münasibətlərin möhkəm təməllər üzərində inkişaf etdiyini göstərməklə yanaşı, həm də gələcək birgə fəaliyyət üçün geniş perspektivlər açır. Bu siyasi yaxınlıq öz növbəsində iqtisadi müstəvidə də konkret və səmərəli təkliflərin formalaşmasına zəmin yaradır ki, bu da ticarət dövriyyəsinin artırılması və investisiya imkanlarının genişləndirilməsi baxımından mühüm əhəmiyyət kəsb edir.
Əməkdaşlığın ən mühüm və strateji sütunlarından birini energetika sektoru təşkil edir. Azərbaycanın Avropanın enerji təhlükəsizliyində oynadığı həlledici rol bu münasibətlərdə özünü aydın büruzə verir. Belə ki, Azərbaycan qazının hazırda ümumilikdə 16 ölkəyə ixrac edilməsi və bu dövlətlərdən 10-nun Avropa İttifaqının üzvü olması ölkəmizin etibarlı tərəfdaş statusunu bir daha təsdiqləyir. Eyni zamanda, ölkələrimiz arasındakı münasibətlər təkcə enerji ilə məhdudlaşmır; müdafiə sənayesi sahəsindəki qarşılıqlı fəaliyyət də prioritet istiqamət kimi ön plana çıxır. Beləliklə, Azərbaycan və Çexiya arasındakı ikitərəfli əlaqələr həm enerji təhlükəsizliyi, həm də strateji sənaye sahələri üzrə dərinləşərək regionlararası əməkdaşlığın nümunəvi modelini yaradır.

28/04/2026

Azərbaycan-Ukrayna münasibətlərinin ana xəttini ölkələrin suverenliyi və ərazi bütövlüyünə verilən qarşılıqlı dəstək təşkil edir

Müəllif: İsgəndər İsgəndərov
Qax Rayon Mərkəzi Xəstəxanası Publik hüquqi şəxsin baş həkimi

Azərbaycan və Ukrayna arasındakı münasibətlər hər zaman qarşılıqlı hörmət, etimad və bir-birinin milli maraqlarına dəstək prinsipləri üzərində qurulub. Aprelin 25-də Ukrayna Prezidenti Volodimir Zelenskinin ölkəmizə növbəti səfəri və Prezident İlham Əliyevlə apardığı danışıqlar bu əlaqələrin yalnız diplomatik xarakter daşımadığını, həm də dərin strateji köklərə malik olduğunu bir daha sübut etdi. Bu baxımdan aprelin 25-də Qəbələdə keçirilən təkbətək və geniş tərkibdə görüş ikitərəfli əməkdaşlıq məsələlərinin müzakirəsi üçün mühüm və geniş imkan yaratdı. Prezident İlham Əliyevin mətbuata bəyanatında qeyd etdiyi kimi, son dörd il ərzində dövlət başçıları səviyyəsində yeddi görüşün keçirilməsi ikitərəfli əlaqələrin nə qədər dinamik və intensiv inkişaf etdiyinin bariz göstəricisidir. Bu dialoqların təməli hələ 2019-cu ildə Prezident Zelenskinin Bakıya ilk səfəri və dövlət başçımızın 2022-ci ilin yanvarında Kiyevə etdiyi tarixi səfər zamanı qoyulmuşdur.
Ölkə rəhbərlərinin şəxsi münasibətlərinin yüksək səviyyədə olması dövlətlərarası əməkdaşlığa da öz müsbət təsirini göstərməkdədir. Azərbaycan-Ukrayna münasibətlərinin ana xəttini ölkələrin suverenliyi və ərazi bütövlüyünə verilən qarşılıqlı dəstək təşkil edir. Hələ 2008 və 2011-ci illərdə imzalanmış strateji tərəfdaşlıq sənədləri bu gün də öz aktuallığını qoruyur. Hər iki dövlət beynəlxalq platformalarda sərhədlərin toxunulmazlığı məsələsində vahid mövqedən çıxış edir. Bu prinsipial yanaşma beynəlxalq hüququn norma və prinsiplərinə sadiqliyin nümunəsidir. Keçən il Bakıda keçirilən Xarici İşlər Nazirliklərinin məsləhətləşmələri və Hökumətlərarası Komissiyanın iclasları bu istiqamətdə baş verən mühüm hadisələrdir.
Cənab Prezident İlham Əliyevin bəyanatında enerji sahəsinə xüsusi yer ayrılması da strateji məntiq daşıyır. SOCAR-ın Ukraynada uzun illərdir uğurla fəaliyyət göstərməsi yalnız iqtisadi iştirak deyil, eyni zamanda etibarlı tərəfdaşlıq nümunəsidir. Azərbaycan enerji təhlükəsizliyi məsələsində Ukrayna üçün mühüm tərəfdaş olaraq çıxış edir. Birgə investisiya layihələri, yeni təşəbbüslər və sərmayə qoyuluşu ilə bağlı aparılan müzakirələr göstərir ki, tərəflər münasibətləri yalnız qorumaq yox, genişləndirmək niyyətindədir.Ticarət dövriyyəsinin yarım milyard dolları keçməsi iqtisadi potensialın real göstəricisidir.
Səfər çərçivəsində tərəflər arasında hərbi-texniki əməkdaşlıq məsələləri də ətraflı şəkildə müzakirə olunmuşdur. Aparılan fikir mübadiləsi göstərir ki, bu istiqamətdə çox böyük perspektivlər mövcuddur. Hər iki ölkənin müdafiə sənayesi sahəsindəki potensialı və təcrübəsi gələcəkdə daha genişmiqyaslı layihələrin həyata keçirilməsinə və təhlükəsizlik sahəsində tərəfdaşlığın dərinləşməsinə imkan yaradır.
Bugünkü reallıq göstərir ki, Azərbaycan–Ukrayna münasibətləri uzunmüddətli siyasi etimada əsaslanır. Prezident İlham Əliyevin qeyd etdiyi kimi, bu görüş Azərbaycan-Ukrayna dostluq əlaqələrinin inkişafına növbəti mühüm töhfə oldu. İki ölkə arasındakı münasibətlər yalnız bu günü deyil, həm də gələcəyi hədəfləyən, regionda sülh və sabitliyə xidmət edən bir tərəfdaşlıq modelidir. İnanırıq ki, əldə olunmuş razılaşmalar xalqlarımızın rifahı və dövlətlərimizin qüdrətlənməsi yolunda yeni üfüqlər açacaqdır.

24/04/2026

Azərbaycan və Latviya münasibətləri davamlı olaraq genişlənəcək və inkişaf edəcək

Müəllif: Şəbnəm Qumuxova
Qax Rayon Gigiyena və Epidemiologiya Mərkəzinin direktoru

Aprelin 22-də Bakıda Azərbaycan Prezidenti İlham Əliyev və Latviya Prezidenti Edqars Rinkeviçs arasında keçirilən görüş və mətbuata verilən bəyanatlar iki ölkə arasında əlaqələrin yalnız siyasi çərçivədə deyil, eyni zamanda iqtisadi, humanitar və təhlükəsizlik sahələrində də inkişaf etdiyini göstərir. Səfər çərçivəsində aparılan geniş müzakirələr və imzalanan sənədlər münasibətlərin daha praktik və nəticəyönümlü mərhələyə keçdiyini təsdiqləyir.
Dövlət başçıları arasında keçirilən həm təkbətək, həm də nümayəndə heyətlərinin iştirakı ilə baş tutan görüşlərdə Azərbaycan-Latviya münasibətlərinin müxtəlif istiqamətləri ətraflı müzakirə olunub. Prezident İlham Əliyev vurğulayıb ki, iki ölkə arasında münasibətlər möhkəm təmələ əsaslanır və bu təməl doqquz il əvvəl imzalanmış Strateji Tərəfdaşlıq haqqında Bəyannamə ilə daha da gücləndirilib. Sözügedən sənəd əməkdaşlığın hüquqi bazasını formalaşdıraraq siyasi, iqtisadi və humanitar sahələrdə əlaqələrin inkişafına geniş imkanlar açıb.
Səfər çərçivəsində iqtisadi əməkdaşlıq məsələləri xüsusi diqqət mərkəzində olub. Qeyd edilib ki, yaxın günlərdə Azərbaycanın Qarabağ bölgəsində, Şuşa şəhərində keçirilmiş Birgə Hökumətlərarası Komissiyanın iclası gələcək əməkdaşlıq üçün mühüm istiqamətləri müəyyənləşdirib.
Bakıda keçirilən Azərbaycan-Latviya biznes-forumu isə işgüzar dairələr arasında əlaqələrin gücləndirilməsi baxımından mühüm əhəmiyyətlidir. Forumda hər iki ölkədən geniş nümayəndə heyətinin iştirakı iqtisadi tərəfdaşlığa olan marağın göstəricisidir. Cənab Prezident İlham Əliyev bildirib ki, qarşılıqlı sərmayələrin artırılması, birgə istehsal müəssisələrinin yaradılması və ticarət dövriyyəsinin genişləndirilməsi üçün böyük potensial mövcuddur. O, həmçinin qeyd edib ki, tərəflər investisiya layihələri və iqtisadi proqramlar barədə mütəmadi məlumat mübadiləsi aparmaq barədə razılığa gəliblər.
Nəqliyyat və logistika sahəsində əməkdaşlıq da müzakirə olunan əsas istiqamətlərdən biri olub. Xüsusilə birbaşa uçuşların təşkili məsələsi gündəmə gətirilib. Bu addımın həm biznes əlaqələrinin inkişafına, həm də turizm və insanlar arasında təmasların artmasına müsbət təsir göstərəcəyi vurğulanıb.
Humanitar sahədə əməkdaşlıq da diqqətdən kənarda qalmayıb. Hazırda Latviyada 450-dən çox azərbaycanlı tələbənin təhsil alması iki ölkə arasında təhsil sahəsində əlaqələrin inkişaf etdiyini göstərir. Bu, eyni zamanda, xalqlar arasında qarşılıqlı anlaşmanın və mədəni əlaqələrin möhkəmlənməsinə xidmət edir.
Görüşlər zamanı regional və beynəlxalq məsələlər də müzakirə olunub. Prezident İlham Əliyev Cənubi Qafqaz regionunda baş verən proseslər, xüsusilə Azərbaycan və Ermənistan arasında sülh prosesi barədə Latviya prezidentinə məlumatlar verib. Qeyd olunub ki, son dövrlərdə sülh istiqamətində müsbət dinamika müşahidə edilir və bu proses regionda sabitliyin təmin olunması baxımından mühüm əhəmiyyət daşıyır.
Cənab Prezident vurğulayıb ki, uzun illər davam edən münaqişələrin həlli üçün siyasi iradə, qarşılıqlı etimad və beynəlxalq hüquqa hörmət əsas şərtlərdir. Azərbaycan-Ermənistan münasibətlərində əldə olunan müsbət irəliləyişlərin digər münaqişə zonaları üçün də nümunə ola biləcəyi qeyd edilib.
Səfər çərçivəsində Azərbaycan və Latviya prezidentləri arasında həm geniş tərkibdə, həm də təkbətək görüşlər keçirilib, bir sıra sənədlər imzalanaraq mübadilə edilib. Bu sənədlər müxtəlif sahələrdə əməkdaşlığın daha da genişləndirilməsinə xidmət edir.
Ümumilikdə, Latviya Prezidentinin Azərbaycana səfəri iki ölkə arasında münasibətlərin möhkəmlənməsi, yeni əməkdaşlıq istiqamətlərinin müəyyənləşdirilməsi və strateji tərəfdaşlığın daha da inkişaf etdirilməsi baxımından əhəmiyyətli addımdır. Bu səfər, eyni zamanda, Azərbaycan-Latviya əlaqələrinin gələcək inkişafı üçün geniş perspektivlər açır və qarşılıqlı maraqlara əsaslanan əməkdaşlığın davamlı xarakter daşıdığını bir daha təsdiqləyir.

16/04/2026

Akademik Zərifə Əliyevanın həyatı fədakarlıq, zəhmət və insan sevgisinin parlaq nümunəsidir

Müəllif: Elvin Həsilov
Şəki-Zaqatala Regional Gənclər və İdman İdarəsinin
Qax rayonu üzrə Gənclər və İdman sektorunun müdiri

Azərbaycan tarixində elə şəxsiyyətlər var ki, onların həyat yolu yalnız bir peşənin deyil, bütöv bir xalqın mənəvi dəyərlərinin aynasına çevrilir. Belə görkəmli simalardan biri də akademik Zərifə Əliyevadır. Onun adı Azərbaycan tibb elminin inkişafı, insanlara göstərilən qayğı və yüksək mənəvi keyfiyyətlərlə həmişə yanaşı çəkilir.
Zərifə Əliyeva 1923-cü ildə Naxçıvan Muxtar Respublikası Şərur rayonunun Şahtaxtı kəndində dünyaya göz açmışdır. Uşaqlıqdan zəhmətə, elmə və insanlara sevgi ilə böyüyən Zərifə xanım gələcək həyat yolunu tibblə bağlamağa qərar verir. O, Azərbaycan Dövlət Tibb İnstitutunda təhsil alaraq yüksək nəticələrlə məzun olur və ömrünü insanların sağlamlığına həsr edir.
Onun fəaliyyəti yalnız bir həkim kimi xəstələri müalicə etməklə məhdudlaşmırdı. Zərifə Əliyeva həm də görkəmli alim-oftalmoloq kimi Azərbaycan tibb elminə mühüm töhfələr vermişdir. Xüsusilə traxoma kimi təhlükəli göz xəstəliyinə qarşı apardığı mübarizə sahəsindəki misilsiz fəaliyyəti onun adını tarixə qızıl hərflərlə yazdırmışdır. O dövrdə geniş yayılan və insanları korluğa aparan bu xəstəliyin qarşısının alınmasında Zərifə xanımın rolu əvəzsiz olmuşdur. Onun tətbiq etdiyi müalicə üsulları nəticəsində bu xəstəlik ölkədə demək olar ki, aradan qaldırılmışdır.
Alimin elmi fəaliyyəti bununla bitmirdi. O, qlaukoma, virus mənşəli göz xəstəlikləri və peşə patologiyası sahəsində mühüm tədqiqatlar aparmış, bu sahədə bir çox monoqrafiyalar və elmi əsərlər yazmışdır. Onun əsərləri bu gün də həkimlər üçün dəyərli mənbə hesab olunur. Zərifə Əliyeva 150-yə yaxın elmi işin müəllifi kimi Azərbaycan oftalmologiya elminin inkişafında mühüm rol oynamışdır.
Zərifə xanım yalnız alim deyil, həm də böyük pedaqoq idi. O, gənc həkimlərin yetişməsinə xüsusi diqqət yetirir, onların həm peşəkar, həm də mənəvi cəhətdən formalaşmasına çalışırdı. Onun rəhbərliyi ilə yetişən həkimlər bu gün də onun ideyalarını davam etdirirlər.
Dahi alimin şəxsiyyətini ucaldan əsas cəhətlərdən biri də insanlara olan sonsuz sevgisi və mərhəməti idi. Zərifə Əliyeva kimsəsiz uşaqlara, xəstələrə xüsusi qayğı ilə yanaşır, onların problemlərini öz problemi kimi qəbul edirdi. O, həkimlik peşəsini sadəcə bir iş deyil, insanlığa xidmət missiyası kimi dərk edirdi.
Zərifə Əliyeva həm də nümunəvi ana və həyat yoldaşı idi. O, ailə dəyərlərini hər zaman uca tutur, eyni zamanda elmi və ictimai fəaliyyətini də uğurla davam etdirirdi. Onun həyat yolu sübut edir ki, insan həm böyük alim, həm də qayğıkeş ana ola bilər.
1985-ci il aprelin 15-də Zərifə Əliyeva dünyasını dəyişsə də, onun adı və əməlləri xalqın yaddaşında əbədi yaşayır. Bu gün onun adını daşıyan tibb müəssisələri, elmi mərkəzlər və yetişdirdiyi həkimlər onun irsinin davam etdiyini göstərir.
Akademik Zərifə Əliyevanın həyatı fədakarlıq, zəhmət və insan sevgisinin parlaq nümunəsidir. O, yalnız bir alim deyil, həm də yüksək mənəvi dəyərlərə sahib Azərbaycan qadınının ideal obrazıdır. Onun həyat yolu gələcək nəsillər üçün örnək olaraq qalacaq və hər zaman ehtiramla xatırlanacaqdır.

08/04/2026

Siyasi baxımdan Azərbaycan və Gürcüstan beynəlxalq arenada bir-birinin ərazi bütövlüyünü və suverenliyini daim dəstəkləyən etibarlı tərəfdaşlardır

Müəllif: Abdullayev Abdulla
Şəki-Zaqatala Regional Məşğulluq Filialının
Qax xidmət şöbəsinin müdiri

Müasir beynəlxalq münasibətlər sistemində dövlətlərin gücü yalnız hərbi və iqtisadi imkanları ilə deyil, həm də onların qurduğu strateji tərəfdaşlıqlar, regional əməkdaşlıq modelləri və diplomatik çeviklikləri ilə ölçülür. Bu baxımdan Azərbaycan ilə Gürcüstan arasındakı münasibətlər Cənubi Qafqazda sabitliyin, inkişafın və qarşılıqlı etimadın ən uğurlu nümunələrindən biri kimi çıxış edir. Prezident İlham Əliyevin 2026-cı il aprelin 6-da Gürcüstana səfəri və bu səfər zamanı səsləndirdiyi fikirlər bir daha sübut etdi ki, iki ölkə arasında münasibətlər qonşuluq çərçivəsini aşaraq strateji müttəfiqlik səviyyəsinə yüksəlmişdir.
Tarixi köklərə söykənən Azərbaycan–Gürcüstan münasibətləri əsrlər boyu xalqlarımız arasında formalaşmış dostluq və qardaşlıq ənənələri üzərində qurulmuşdur. Bu münasibətlər müstəqillik dövründə yeni məzmun qazanaraq siyasi, iqtisadi və humanitar sahələrdə daha da möhkəmlənmişdir. Prezident İlham Əliyevin vurğuladığı kimi, iki xalq tarix boyu mehriban şəraitdə yaşamış və bu ənənə bu gün də uğurla davam etdirilir. Bu isə dövlətlərarası əlaqələrin möhkəm təməlini təşkil edir.
Siyasi baxımdan Azərbaycan və Gürcüstan beynəlxalq arenada bir-birinin ərazi bütövlüyünü və suverenliyini daim dəstəkləyən etibarlı tərəfdaşlardır. Bu prinsipial mövqe regionda sülh və sabitliyin qorunması baxımından mühüm əhəmiyyət daşıyır. Müasir dövrdə, xüsusilə də müxtəlif regionlarda münaqişələrin artdığı bir şəraitdə, Azərbaycan–Gürcüstan əməkdaşlığı sabitlik modeli kimi çıxış edir. Cənubi Qafqazda yeni geosiyasi reallıqların formalaşdığı bir dövrdə bu əməkdaşlıq daha da aktual xarakter alır.
İqtisadi sahədə əldə olunan uğurlar bu münasibətlərin nə qədər dərin və qarşılıqlı faydalı olduğunu açıq şəkildə göstərir. Ticarət dövriyyəsinin artması, qarşılıqlı investisiyaların genişlənməsi və birgə layihələrin həyata keçirilməsi iki ölkə arasında iqtisadi inteqrasiyanın yüksək səviyyədə olduğunu sübut edir. Azərbaycanın Gürcüstan iqtisadiyyatına milyardlarla dollar həcmində sərmayə yatırması yalnız iqtisadi maraqlarla deyil, həm də strateji etimadla bağlıdır. Bu investisiyalar regionda iqtisadi sabitliyin təmin olunmasına da mühüm töhfə verir.
Enerji sahəsində əməkdaşlıq isə Azərbaycan–Gürcüstan münasibətlərinin ən mühüm sütunlarından biridir. Azərbaycan qazının və neftinin dünya bazarlarına çıxarılmasında Gürcüstanın tranzit ölkə kimi rolu əvəzsizdir. Bakı-Tbilisi-Ceyhan neft kəməri və Cənub Qaz Dəhlizi kimi qlobal əhəmiyyətli layihələr təkcə iki ölkə üçün deyil, geniş coğrafiya üçün enerji təhlükəsizliyinin təminatında mühüm rol oynayır. Bu layihələr sayəsində Azərbaycan Avropanın enerji xəritəsində strateji tərəfdaş kimi mövqeyini möhkəmləndirmişdir.
Nəqliyyat sahəsində də əməkdaşlıq diqqətəlayiqdir. Orta Dəhliz kimi mühüm beynəlxalq nəqliyyat marşrutunun Azərbaycan və Gürcüstan üzərindən keçməsi regionun tranzit potensialını daha da artırır. Bu dəhliz Şərqlə Qərb arasında mühüm körpü rolunu oynayaraq iqtisadi əlaqələrin genişlənməsinə xidmət edir. Bu isə yalnız iqtisadi deyil, həm də geosiyasi baxımdan regionun əhəmiyyətini artırır.
Eyni zamanda, Prezident İlham Əliyevin çıxışında vurğuladığı kimi, Cənubi Qafqazda yeni bir mərhələ başlayır. Keçmişdə münaqişələr və qarşıdurmalarla yadda qalan region bu gün əməkdaşlıq və sabitlik məkanına çevrilməkdədir. Bu prosesdə Azərbaycan və Gürcüstanın rolu xüsusi əhəmiyyət daşıyır. İki ölkə arasında formalaşmış qarşılıqlı etimad modeli digər dövlətlər üçün də nümunə ola bilər.
Emosional baxımdan isə bu münasibətlər təkcə siyasi və iqtisadi maraqlarla məhdudlaşmır. Bu, xalqlar arasında formalaşmış səmimi dostluğun, qarşılıqlı hörmətin və ortaq dəyərlərin təzahürüdür. Azərbaycan və Gürcüstan xalqları arasında mövcud olan bu bağlar dövlətlərarası münasibətlərin daha da möhkəmlənməsinə xidmət edir.
Azərbaycan–Gürcüstan münasibətləri regionda sabitliyin və inkişafın əsas dayaqlarından biri kimi çıxış edir. Bu münasibətlər qarşılıqlı etimad, strateji tərəfdaşlıq və ortaq maraqlar üzərində qurulmuşdur. Prezident İlham Əliyevin Gürcüstana səfəri bir daha göstərdi ki, bu əməkdaşlıq gələcəkdə daha da genişlənəcək və Cənubi Qafqazın sülh və rifah məkanına çevrilməsində mühüm rol oynayacaqdır.

Qax RİH Ləkit kənd İƏD

26/05/2026

21/05/2026

06/05/2026

06/05/2026

01/05/2026

29/04/2026

28/04/2026

24/04/2026

16/04/2026

08/04/2026

Address

Opening Hours

Telephone

Website

Alerts

Shortcuts

Share

Category

Tuesday	09:00 - 18:00
Wednesday	09:00 - 18:00
Thursday	09:00 - 18:00
Friday	09:00 - 18:00