Salyan Tarix Diyarşünaslıq Muzeyi

18/08/2026

Bu gün muzeyimizin Kərimli Altay adlı balaca bir qonağı kənddən tapdığı kiçik bir əşyanı babasından xahiş edərək muzeyimizə gətirdi.
Əşyanın qədim olub-olmamasından daha önəmlisi onun bu addımı idi. Biz onu böyük sevinc və xoş münasibətlə qəbul etdik. Çünki uşaqlara muzeyi sevdirmək, tarixə və keçmişə maraq oyatmaq məhz belə kiçik, amma dəyərli addımlardan başlayır.
Balaca qonağımızın bu gözəl düşüncəsi bizim üçün ən qiymətli hədiyyə oldu.

01/08/2026

1 Avqust - Azərbaycan -Əlifbası və Azərbaycan Dili Günüdür.
Dil xalqın yaddaşı, mədəniyyəti və kimliyidir. Onu yaşadan hər gün doğma dildə sevə-sevə danışan insanlardır.
Bu gün Azərbaycan dili bayramını birlikdə geyd edirik.
Bayramınız mübarək!

22/07/2026

22 İyul – Milli Mətbuat Günü münasibətilə Salyan Tarix-Diyarşünaslıq Muzeyində "Milli Mətbuatımız – Tarixin Salnaməsi" adlı tədbir və sərgi təşkil olunub.
Tədbirdə çıxış edənlər Azərbaycan milli mətbuatının şərəfli inkişaf yolundan, Həsən bəy Zərdabinin əsasını qoyduğu milli mətbuat ənənələrinin cəmiyyətimizin maariflənməsində, milli-mənəvi dəyərlərin qorunmasında və tarixi yaddaşın yaşadılmasında mühüm rolundan bəhs ediblər.
Sərgidə muzeyin fondunda qorunan qəzet və jurnal nümunələri, müxtəlif dövrlərə aid mətbu nəşrlər, fotoşəkillər və digər tarixi materiallar nümayiş etdirilib. Eksponatlar ziyarətçilərə Azərbaycan mətbuatının keçdiyi inkişaf yolunu və onun tariximizin işıqlandırılmasındakı əhəmiyyətini əyani şəkildə təqdim edib.
Tədbirin sonunda iştirakçılar sərgi ilə yaxından tanış olub, Milli Mətbuat Gününün ölkəmizin mədəni və ictimai həyatında xüsusi əhəmiyyət daşıdığını vurğulayıblar.

22/07/2026

22 iyul Azərbaycanda Milli Mətbuat Günüdür

20/07/2026

04/07/2026

Azərbaycan Milli İncəsənət Muzeyi, Azərbaycan İstiqlal Muzeyi və şəxsi kolleksiyaya aid sənət nümunələri, eləcə də müxtəlif mənbələrdən əldə olunmuş arxiv fotoşəkillərini bir araya gətirən sərgi Əli bəy Hüseynzadənin irsinə ilk növbədə bədii yaradıcılığı, həmçinin ictimai fəaliyyəti prizmasından nəzər salmağa imkan yaradır.
Əli bəy Hüseynzadə Azərbaycan təsviri sənətində realizmin ilk
nümayəndələrindən və peşəkar teatr rəssamlığının banilərindən biri hesab edilir. Onunrəngkarlıq və qrafika irsi portret, mənzərə və natürmort janrlarını əhatə edir. Əsərlərində milli-mənəvi dəyərlər, tarixi yaddaş, vətən sevgisi və insan xarakterinin psixoloji dərinliyi yüksək bədii ifadəsini tapıb.
Sərgidə müəllifin həm Azərbaycanda, həm də Türkiyədə yaratdığı “Mənzərə. Bibiheybətin görünüşü”, “Atatürkün portreti”, “Ailə portreti” və digər əsərləri nümayiş etdirilir. Ekspozisiyada, həmçinin, Salyan Tarix-Diyarşünaslıq Muzeyinə məxsus, Əli bəy Hüseynzadənin redaktoru olduğu “Həyat” qəzetinin ipək üzərində nəşr edilmiş nadir nüsxəsi də yer alır.
Azərbaycan milli düşüncə tarixində xüsusi yer tutan Əli bəy Hüseynzadə üçrəngli dövlət bayrağımızın ideoloji əsaslarını formalaşdıran şəxsiyyətlərdəndir. Onun irəli sürdüyü “Türkləşmək, islamlaşmaq, müasirləşmək” ideyası dövlət bayrağımızın rənglərinin mənəvi məzmununda öz əksini tapıb. Sərgidə böyük mütəfəkkirin redaktorluq fəaliyyəti, teatr sənətinə töhfələri və milli ideya irsinə həsr olunmuş məlumat lövhələri də təqdim edilir. Azərbaycan İstiqlal Muzeyinin kolleksiyasından seçilmiş fotoşəkillər Əli bəy Hüseynzadənin həyat və fəaliyyətinin müxtəlif mərhələlərini, eləcə də 1926-cı ildə Bakıda keçirilmiş Birinci Türkoloji Qurultayın iştirakçılarını və həmin dövrün tarixi mühitini əks etdirir.
Ekspozisiyanın mühüm hissələrindən birini Birinci Türkoloji Qurultayın keçirildiyi günlərdə “Azdövlətkino” tərəfindən lentə alınmış 8 dəqiqəlik qısametrajlı səssiz film təşkil edir. Sərginin multimedia bölməsində yerləşdirilmiş sensorlu ekranda (touchscreen) Əli bəy Hüseynzadənin sənət ənənələrini davam etdirən övladları – ilk türk kubist və abstrakt rəssamlarından Səlim Turanın, xalq sənəti və Şərq mifologiyası motivlərinə müraciəti ilə tanınan rəssam Feyzavər Alpsarın əsərləri yer alıb.
“Əli bəy Hüseynzadə: böyük mütəfəkkir və rəssam” sərgisi ziyarətçilərə böyük ideoloqu və ictimai xadimi həm də zəngin yaradıcılıq dünyasına malik rəssam kimi yaxından tanımaq imkanı yaradır.
Sərgi, 30 sentyabr tarixinədək davam edəcək.

27/06/2026

25.06.2026-cı il tarixində 26 İyun – Narkomaniya və Narkotik Vasitələrin Qanunsuz Dövriyyəsinə Qarşı Beynəlxalq Mübarizə Günü münasibətilə Salyan Tarix-Diyarşünaslıq Muzeyində gənclərin iştirakı ilə maarifləndirici görüş keçirilib.
Tədbirin məqsədi gəncləri narkomaniyanın insan sağlamlığına, ailə dəyərlərinə və cəmiyyətə vurduğu ağır zərərlər barədə məlumatlandırmaq, onları sağlam həyat tərzinə təşviq etmək olub.
Görüşdə çıxış edənlər narkotik vasitələrin yaratdığı asılılıq, onun sosial və hüquqi nəticələri haqqında ətraflı məlumat verərək bildiriblər ki, bu təhlükəli bəla ilə mübarizədə maariflənmə, düzgün həyat seçimi və milli-mənəvi dəyərlərə bağlılıq mühüm əhəmiyyət kəsb edir.
Tədbir interaktiv müzakirə şəraitində davam edib, gənclərin sualları cavablandırılıb, onların sağlam gələcəyin qurulmasında məsuliyyətli seçim etmələrinin vacibliyi vurğulanıb.

25/06/2026

26 İyun-Azərbaycan Respublikasının Silahlı Qüvvələri Günü

23/06/2026

"Şəhərsalma və Memarlıq İli" çərçivəsində Salyan Tarix-Diyarşünaslıq Muzeyi tərəfindən təşkil olunmuş ekskursiyadan

22/06/2026

Tarixi İrslə Tanışlıq: Şəhərsalma və Memarlıq İlinə Həsr Olunmuş Ekskursiya”
2026-cı ilin Azərbaycan Respublikasında “Şəhərsalma və Memarlıq İli” elan olunması ilə əlaqədar olaraq 21.06.2026-cı il tarixində Salyan Tarix-Diyarşünaslıq Muzeyi tərəfindən maarifləndirici ekskursiya təşkil olunub.
Ekskursiyanın əsas məqsədi iştirakçıları ölkəmizin zəngin memarlıq irsi, qədim şəhərsalma ənənələri və tarixi abidələri ilə yaxından tanış etmək, milli-mədəni dəyərlərimizin təbliğinə töhfə vermək olub.
Ekskursiya çərçivəsində iştirakçılar Bakı şəhərində yerləşən qədim tarixi-memarlıq abidələri ilə tanış olublar. Səfər zamanı ölkəmizin ən qədim yaşayış məskənlərindən biri olan İçərişəhər ziyarət edilib. Burada iştirakçılara qədim şəhərsalma ənənələri, dar küçələri, tarixi yaşayış evləri, müdafiə qurğuları və əsrlərin sınağından çıxmış memarlıq nümunələri haqqında ətraflı məlumat verilib.
Daha sonra ekskursiya iştirakçıları Qala Dövlət Tarix-Etnoqrafiya Qoruğunu ziyarət ediblər. Qoruqda qədim yaşayış məskənləri, tarixi tikililər, daş kitabələr, sənətkarlıq nümunələri və xalqımızın maddi-mədəni irsini əks etdirən eksponatlar böyük maraqla qarşılanıb. İştirakçılar qədim yaşayış tərzi, memarlıq xüsusiyyətləri və xalqımızın zəngin mədəniyyətini özündə əks etdirən tarixi nümunələrlə yaxından tanış olmaq imkanı əldə ediblər.
Ekskursiya zamanı bələdçilər tərəfindən şəhərsalma və memarlığın inkişaf mərhələləri, tarixi abidələrin qorunmasının əhəmiyyəti, milli irsin gələcək nəsillərə çatdırılması istiqamətində həyata keçirilən tədbirlər barədə geniş məlumat verilib.
Salyan Tarix-Diyarşünaslıq Muzeyi tərəfindən təşkil olunan bu ekskursiya iştirakçıların böyük marağına səbəb olub, onların tariximizə, memarlıq irsimizə və milli-mədəni dəyərlərimizə olan bağlılığının daha da möhkəmlənməsinə xidmət edib.
Ekskursiyanın keçirilməsində göstərilən dəstəyə görə Salyan rayon Bələdiyyəsinə təşəkkür edirik.