30/05/2026
📢 Şəmkirdə tut mövsümü başlayıb
Bizim Şəmkirdə mayın sonlarında, iyunun əvvəllərində hər həyətdə, hər bağda ağ, qara və xar tutlar budaq-budaq yerə əyilir. Tut mövsümünün başlanması ilə qonşular bir araya toplaşır, həyətlərimiz canlanır. Hər kəs yığışır tut ağacının altına, böyük bir çadır çəkilir, tut çırpılır. Əslində, "Gəlin bizə, tut silkələyirik" sözü bir bəhanədir, məqsəd bir araya gəlmək, tut ağacının kölgəsində oturub tut yeyərək, pürrəngi çaydan içə-içə şirin-şirin dərdləşməkdir.
Amma iş bununla da bitmir. Şəmkirlilər bu bərəkəti qışa saxlamağı da yaxşı bilirlər. Həyətlərdə ocaqlar qalanır, böyük qazanlar asılır. Saatlarla qaynayan o tut bəhməzinin qoxusu bütün küçəni bürüyür. Qışın soyuğunda can dərmanı olan, süfrələrimizi bəzəyən o qatı, bal kimi bəhməz elə bu günlərin əziyyətinin bəhrəsidir. Hələ qışda çayın yanında qəndi, şəkəri təmiz yaddan çıxaran o qurudulmuş ağ tutun faydalarını da yəqin ki, hər kəs bilir.
Yayın qızmarında hər kəsi öz kölgəsinə toplayan bu qocaman tutlar, həm də keçmişlə bu gün arasında bir körpüdür. Babalarımızın bizə qoyub getdiyi ən dəyərli mirasdır, hansı ki, isti yay boyunca kölgəsi ilə insanlara sərinlik bəxş etdikcə, bu ağacları əkənlərə hər gün rəhmət qazandırır.
Şəmkirin bu gözəl tut çırpmaq ənənəsi sizə də öz doğma kəndinizi, keçmiş günləri, uşaqlığınızı xatırlatdımı? Rəylərdə yaza bilərsiniz! 😊🙏🏻
