https://www.facebook.com/105470699023084/

Ucar RİHB-nın Lək kənd inzibati ərazi dairəsi üzrə nümayəndəliyi, Ucar rayonu, Lək kəndi, Ucar (2026)

25/08/2026

Azərbaycan və Özbəkistan arasında əməkdaşlıq yeni yüksəliş mərhələsində

Azərbaycan Prezidenti İlham Əliyevin 23 avqust 2026-cı ildə Özbəkistana dövlət səfəri çərçivəsində Daşkənddə mətbuata verdiyi bəyanat iki qardaş ölkə arasında münasibətlərin yüksək səviyyəsini və gələcək inkişaf perspektivlərini bir daha nümayiş etdirdi. Dövlət başçısı Özbəkistanın son illərdə keçdiyi sürətli inkişaf yolunu xüsusi qeyd edərək Daşkənd və bütün ölkənin yüksəliş dövrü yaşadığını vurğuladı. Prezident İlham Əliyev bu uğurları Özbəkistan Prezidenti Şavkat Mirziyoyevin həyata keçirdiyi islahatların, uzaqgörən siyasətin və ölkənin iqtisadi potensialının gücləndirilməsi istiqamətində atılan məqsədyönlü addımların nəticəsi kimi qiymətləndirdi. Sənayenin, kənd təsərrüfatının, energetikanın və nəqliyyat infrastrukturunun inkişafı, iqtisadiyyatın şaxələndirilməsi və investisiya mühitinin yaxşılaşdırılması Özbəkistanın beynəlxalq nüfuzunu daha da artırıb.
Bəyanatda Azərbaycan–Özbəkistan iqtisadi əlaqələrinin dinamik inkişafına xüsusi diqqət yetirildi. Ticarət dövriyyəsinin yaxın illərdə 1 milyard ABŞ dollarına çatdırılması artıq uzaq perspektiv kimi deyil, real hədəf kimi təqdim olunur. Enerji, nəqliyyat, investisiya, turizm, avtomobil sənayesi, kənd təsərrüfatı, emal, bankçılıq və dağ-mədən sahələrində həyata keçirilən birgə layihələr əlaqələrin çoxşaxəli xarakterini göstərir. SOCAR-ın Özbəkistan bazarına daxil olması və neft-qaz kəşfiyyatı üzrə layihələrin yeni mərhələyə keçməsi də iqtisadi əməkdaşlığın mühüm istiqamətlərindəndir. Dövlət başçısı Azərbaycan ilə Mərkəzi Asiya ölkələri arasında əməkdaşlığın genişlənməsində Özbəkistanın xüsusi rolunu vurğulayaraq Azərbaycan və Mərkəzi Asiyanı böyük potensiala malik vahid geosiyasi və geoiqtisadi məkan kimi xarakterizə etdi. Bu baxımdan Azərbaycan–Özbəkistan münasibətlərinin inkişafı yalnız ikitərəfli əlaqələr üçün deyil, bütövlükdə regionun iqtisadi və siyasi inteqrasiyası üçün mühüm əhəmiyyət daşıyır.
Azərbaycan və Özbəkistan arasında münasibətlərin mühüm xüsusiyyəti onların yalnız iqtisadi maraqlara deyil, möhkəm mənəvi və tarixi bağlara söykənməsidir. Prezident İlham Əliyev bu münasibətlərin həm mənəvi, həm də maddi təməl üzərində qurulduğunu bildirdi. Qarabağın bərpası prosesində Özbəkistanın göstərdiyi qardaş dəstəyi bunun əyani nümunəsidir. Füzulidə Mirzə Uluqbəy adına məktəbin inşası və Xankəndidə tikiş fabrikinə investisiya qoyulması Özbəkistanın Azərbaycanın bərpa-quruculuq prosesində fəal iştirakının göstəriciləridir. Bu gün iki ölkə arasında əməkdaşlıq konkret layihələr və dəqiq fəaliyyət planları əsasında daha da genişlənir. Regionlararası əməkdaşlığın inkişafı, investisiya fondunun imkanlarından istifadə, turizm və avtomobil sənayesinə qarşılıqlı investisiyalar əlaqələrin gələcəkdə daha böyük iqtisadi nəticələr verəcəyini göstərir.
Prezident İlham Əliyevin bəyanatı Azərbaycan–Özbəkistan münasibətlərinin strateji xarakter daşıdığını bir daha təsdiqləyir. Qarşılıqlı etimad, qardaşlıq və ortaq maraqlar üzərində qurulan bu münasibətlər gələcəkdə də hər iki ölkənin inkişafına, xalqlarımızın rifahına və Mərkəzi Asiya–Cənubi Qafqaz əməkdaşlığının möhkəmlənməsinə mühüm töhfə verəcək.

24/08/2026

Laçın rayonunun enerji potensialı

1930-cu il avqustun 8-də təşkil edilən Laçın rayonunun mərkəzi Laçın şəhəridir. 1923-cü ildə Abdallar kənd yaşayış məntəqəsi Laçın adlandırılıb və şəhər statusu alıb. Böyük strateji əhəmiyyətə malik Laçın rayonu (1 şəhər, 1 qəsəbə və 125 kənd) 1992-ci il mayın 18-də Ermənistan silahlı qüvvələri tərəfindən işğal olunmuşdu. İşğal nəticəsində rayonun əhalisi etnik təmizləməyə məruz qalıb, 300-dən artıq hərbi və mülki şəxs həlak olub və itkin düşüb. İşğal nəticəsində 217 mədəniyyət, 101 təhsil, 142 səhiyyə müəssisəsi, 462 ticarət, 30 rabitə, 133 idarə və müəssisə, 5 musiqi məktəbi, 1 internat məktəbi, 1 orta texniki peşə məktəbi, 2 avtonəqliyyat və müxtəlif təyinatlı istehsal müəssisələri işğalçılar tərəfindən talan və məhv edilib. 54 dünya, 200-dən çox yerli əhəmiyyətli tarixi abidə vandalizmə məruz qalıb.
Ermənistan işğalçı tərəf olaraq Cenevrə konvensiyaları ilə üzərinə düşən öhdəliklərini kobud şəkildə pozaraq, Laçın rayonunda coğrafi adların dəyişdirilməsi, rayonun təbii resurslarının talan edilməsi və qazanc mənbəyinə çevrilməsi, əsasən, Suriyadan olan erməni əsilli qaçqınlar olmaqla, məqsədyönlü məskunlaşma siyasəti apararaq, demoqrafik tərkibin dəyişdirilməsi kimi qeyri-qanuni əməllərlə məşğul olub. Belə əməllər bütün beynəlxalq konvensiyalarda hərbi cinayət kimi təsbit edilir və bu cinayət dünya ictimaiyyətinin gözü qarşısında baş verib.
2020-ci ilin sentyabrın 27-də başlayan və tarixə 44 günlük müharibə kimi düşən ikinci Qarabağ müharibəsində 30 illik işğala son qoyuldu. Azərbaycan Prezidentinin diplomatik məharəti, prinsipiallığı, dəmir iradəsi və Ordumuzun şanlı Zəfəri Ermənistanı kapitulyasiyaya və əraziləri boşaltmağa məcbur etdi. Azərbaycan Prezidenti, Rusiya Prezidenti və Ermənistanın baş nazirinin imzaladığı birgə bəyanata əsasən 2020-ci il dekabrın 1-də Laçın rayonu Ermənistan ordusu tərəfindən boşaldıldı. Bundan əvvəl, noyabrın 9-u Laçın rayonunun Güləbird, Səfiyan və Türklər kəndləri Azərbaycan Silahlı Qüvvələri tərəfindən işğaldan azad edilmişdi. 2022-ci ilin avqustun 26-da isə Laçın şəhəri, Zabux və Sus kəndləri nəzarətə götürüldü. Laçının işğaldan azad edilməsini Azərbaycanın hərbi və diplomatik qələbəsidir.
Otuz ilə yaxın dövrdə erməni vandalizminə məruz qalan Laçın özünün yeni dövrünə qədəm qoyub. İşğaldan azad olunmuş ərazilərimizin inkişafını daim xüsusi diqqətdə saxlayan Prezident İlham Əliyev Laçın rayonuna bir neçə dəfə səfər edib. Bu səfərlər zamanı dövlətimizin başçısı Güləbird Su Elektrik Stansiyasının, “Qorçu” və “Laçın” şəhər yarımstansiyalarının, Laçın şəhərində 1 Dekabr, Heydər Əliyev, Zəfər və 28 May, Xosrov bəy Sultanov və Zəngəzur küçələrinin kəsişmələrindəki lövhələrin açılışını edib, Laçın Beynəlxalq Hava Limanının, Kəlbəcər-Laçın avtomobil yolu üzərində tikiləcək 3,4 kilometr uzunluğundakı tunelin, 110/35/10 kV-luq “Laçın” Qovşaq Yarımstansiyasının, Qorçu qəsəbəsinin və Şəlvə kəndinin, Laçın şəhərində ilk çoxmənzilli yaşayış məhəlləsinin, İşğal və Zəfər Muzeyi Kompleksinin təməlini qoyub, rayonda həyata keçirilən layihələrin, aparılan quruculuq işlərinin gedişi ilə tanış olub. Prezident İlham Əliyev mayın 28-də Laçına növbəti səfəri zamanı aparılan quruculuq işlərindən bəhs edərək deyib: “Biz öz doğma torpaqlarımızı işğalçılardan azad edəndən sonra mən demişdim ki, Qarabağı və Şərqi Zəngəzuru cənnətə çevirəcəyik. Cənnətin əgər təsviri varsa, bu gün bax, budur. Gözəl təbiət, əzəmətli dağlar, gözəl binalar, evlər – hər şey çox böyük zövqlə yaradılır ki, həm insanlar burada rahat yaşasınlar, həm də Laçın şəhərinin müasir siması Azərbaycanın əldə etdiyi uğurları ilə eyni səviyyədə olsun”.
Bəli, Laçında həyata keçirilən genişmiqyaslı quruculuq işləri yüksək zövq və keyfiyyətlə aparılır. Baş plan layihəsində təbii yaşıllıqlarla əhatələnmiş şəhərin tarixən mövcud olmuş təxminən 258 hektar məskunlaşma ərazisində həyətyanı sahəsi olan fərdi evlərə üstünlük verilib. Bununla yanaşı, çoxfunksiyalı zonalarda və digər yaşayış ərazilərində çoxmənzilli binaların tikilməsi təklif edilir. Şəhərdə xəstəxana, İşğal və Zəfər muzeylərinin yerləşəcəyi Memorial Park, məktəbəqədər və tam orta təhsil müəssisələri, peşə məktəbi, həmçinin mədəniyyət və turizm obyektləri də yaradılacaq. Planlaşdırmada tətbiq edilmiş “15 dəqiqəlik şəhər” prinsipi isə yaşayış məhəllələrinin, gündəlik tələbat obyektlərinin yaxın məsafədə olmasını və aşağı sürətli yol infrastrukturunun təşkilini nəzərdə tutaraq sakinlərin və qonaqların şəhər daxilində rahat hərəkətini təmin edəcək.
Dövlətimizin başçısı cənab İlham Əliyevin 2023-cü il iyulun 31-də imzaladığı Sərəncama əsasən Laçın şəhərinin işğaldan azad edildiyi 26 avqust tarixi Laçın şəhəri günü kimi qeyd olunur. Bu gün laçınlılar Laçın şəhəri gününü 30 il həsrətində olduqları doğma evlərində qürur və sevinc hissi ilə qeyd edirlər.

24/08/2026

Azərbaycan–Özbəkistan münasibətləri: qardaşlıqdan strateji müttəfiqliyə

Azərbaycan Respublikasının Prezidenti İlham Əliyevin Özbəkistanın Milli İnformasiya Agentliyinə verdiyi müsahibə Azərbaycan–Özbəkistan münasibətlərinin bugünkü vəziyyətini və gələcək inkişaf perspektivlərini geniş şəkildə əks etdirir. Müsahibədə iki qardaş ölkə arasında tarixən formalaşmış dostluq və mənəvi yaxınlığın son illərdə dövlətlərarası strateji tərəfdaşlıq və müttəfiqlik səviyyəsinə yüksəlməsi xüsusi vurğulanır.
Azərbaycan və Özbəkistan xalqlarını ortaq tarix, dil, mədəniyyət və mənəvi dəyərlərlə yanaşı, əsrlər boyu formalaşmış qarşılıqlı hörmət və rəğbət birləşdirir. Məhz bu möhkəm tarixi və mənəvi təməl üzərində qurulan münasibətlər son illərdə yeni məzmun qazanaraq çoxşaxəli əməkdaşlıq modelinə çevrilib. Dövlət başçıları İlham Əliyev və Şavkat Mirziyoyev arasında mövcud olan səmimi dostluq, qarşılıqlı hörmət və etimad da bu münasibətlərin inkişafında mühüm rol oynayır.
Son illərdə Azərbaycan və Özbəkistan arasında siyasi dialoqun intensivliyi nəzərəçarpacaq dərəcədə artıb. Dövlət başçılarının qarşılıqlı səfərləri münasibətlərin daha da möhkəmlənməsinə şərait yaradıb. 2024-cü ildə Azərbaycan Prezidentinin Özbəkistana dövlət səfəri, 2025-ci ildə isə Özbəkistan Prezidentinin Azərbaycana dövlət səfəri zamanı imzalanmış mühüm sənədlər iki ölkənin strateji tərəfdaşlığının və müttəfiqlik münasibətlərinin hüquqi-siyasi əsaslarını daha da gücləndirib.
2023-cü ildə yaradılmış Ali Dövlətlərarası Şura isə Azərbaycan–Özbəkistan əlaqələrinin inkişafında mühüm institusional mexanizmə çevrilib. Şuranın fəaliyyəti iki ölkə arasında uzunmüddətli əməkdaşlıq prioritetlərinin müəyyənləşdirilməsinə, yeni təşəbbüslərin irəli sürülməsinə və müxtəlif sahələrdə qarşılıqlı fəaliyyətin əlaqələndirilməsinə imkan yaradır. Bu platformanın fəaliyyəti Azərbaycan və Özbəkistan arasında siyasi dialoqun ardıcıl və strateji xarakter daşıdığını nümayiş etdirir.
İki ölkə arasındakı münasibətlərin mühüm istiqamətlərindən biri də iqtisadi və ticari əməkdaşlıqdır. Son illərdə ticarət dövriyyəsində müşahidə olunan artım iqtisadi əlaqələrin sürətlə genişləndiyini göstərir. 2025-ci ildə Azərbaycan ilə Özbəkistan arasında ticarət dövriyyəsinin 795 milyon dollara çatması və əvvəlki illə müqayisədə üç dəfədən çox artması iqtisadi tərəfdaşlığın real göstəricilərindən biridir.
İnvestisiya sahəsində də mühüm addımlar atılıb. Ümumi kapitalı 500 milyon ABŞ dolları olan Azərbaycan–Özbəkistan İnvestisiya Şirkətinin yaradılması qarşılıqlı investisiyaların artırılması və birgə layihələrin maliyyələşdirilməsi baxımından böyük əhəmiyyət daşıyır. Azərbaycan şirkətləri Özbəkistanda, özbək şirkətləri isə Azərbaycanda müxtəlif sahələrdə layihələr həyata keçirirlər. Bu proses iki ölkənin iqtisadi potensiallarının bir-birini tamamladığını göstərir.
Sənaye kooperasiyası da Azərbaycan–Özbəkistan iqtisadi əməkdaşlığının diqqətçəkən istiqamətlərindəndir. Azərbaycanda “Chevrolet” və “Isuzu” markalı avtomobillərin istehsalının həyata keçirilməsi iki ölkə arasında birgə istehsal imkanlarının genişləndirilməsi baxımından mühüm nümunədir. Eyni zamanda, Azərbaycanın Özbəkistanda həyata keçirdiyi hotel, yaşayış və turizm layihələri qarşılıqlı investisiya əməkdaşlığının yeni imkanlarını nümayiş etdirir.
Energetika sahəsində əməkdaşlıq da strateji əhəmiyyət daşıyır. Azərbaycan və Özbəkistan neft-qaz sektorunda birgə layihələr həyata keçirir, eyni zamanda bərpaolunan enerji istiqamətində yeni əməkdaşlıq imkanları formalaşdırırlar. Azərbaycan, Qazaxıstan və Özbəkistan arasında yaradılmış “Yaşıl Dəhliz Birliyi” gələcəkdə Mərkəzi Asiyanın yaşıl enerjisinin Azərbaycan üzərindən Avropa bazarlarına çıxarılması baxımından mühüm perspektivlər açır. Bu təşəbbüs həm enerji təhlükəsizliyinə, həm də regionlararası əməkdaşlığın genişlənməsinə töhfə verə bilər.
Nəqliyyat və logistika sahəsində də Azərbaycan və Özbəkistanın maraqları üst-üstə düşür. Azərbaycanın Cənubi Qafqazda, Özbəkistanın isə Mərkəzi Asiyada yerləşməsi hər iki ölkəni Şərqlə Qərbi birləşdirən marşrutların inkişafında təbii tərəfdaşlara çevirir. Orta Dəhlizin inkişafı və müxtəlif dəmir yolu layihələrinin bu marşrutla inteqrasiyası Azərbaycan və Özbəkistan arasında tranzit imkanlarının daha da genişlənməsinə şərait yarada bilər.
Azərbaycan–Özbəkistan əməkdaşlığının xüsusi istiqamətlərindən biri də Qarabağ və Şərqi Zəngəzurun bərpası prosesində Özbəkistanın göstərdiyi dəstəkdir. Füzuli şəhərində Mirzə Uluqbəy adına məktəbin inşası, Füzulidə “Dostluq bağı”nın salınması qardaş Özbəkistanın Azərbaycanın işğaldan azad edilmiş ərazilərinin bərpasına verdiyi dəstəyin konkret nümunələridir. Bu layihələr iqtisadi və sosial əhəmiyyətlə yanaşı, iki xalq arasında qardaşlığın rəmzi məzmununu da daşıyır.
Mədəni-humanitar sahədə əməkdaşlıq isə iki ölkə arasındakı münasibətlərin mənəvi dayaqlarını daha da möhkəmləndirir. Azərbaycan və Özbəkistanın mədəniyyət günləri, incəsənət festivalları, elmi tədbirləri və müxtəlif humanitar layihələri xalqların bir-birini daha yaxından tanımasına imkan yaradır. Özbəkistan Milli Pedaqoji Universitetinin böyük Azərbaycan şairi və mütəfəkkiri Nizami Gəncəvinin adını daşıması da ortaq mədəni irsin mühüm göstəricilərindən biridir.
Təhsil sahəsində qarşılıqlı əlaqələrin genişlənməsi gələcək nəsillər arasında dostluq və əməkdaşlığın möhkəmləndirilməsi baxımından xüsusi əhəmiyyət daşıyır. Azərbaycanlı və özbək tələbələrin qarşılıqlı olaraq hər iki ölkədə təhsil alması, Füzulidə Mirzə Uluqbəy adına məktəbin fəaliyyət göstərməsi bu istiqamətdə görülən işlərin əhəmiyyətini artırır.
Media və vətəndaş cəmiyyəti sahəsində keçirilən forumlar da ikitərəfli əlaqələrin daha geniş ictimai müstəviyə keçdiyini göstərir. Azərbaycan və Özbəkistan media nümayəndələrinin, qeyri-hökumət təşkilatlarının iştirakı ilə keçirilən tədbirlər informasiya və ictimai diplomatiya sahəsində qarşılıqlı əlaqələrin inkişafına xidmət edir.
İki ölkənin əməkdaşlığı Türk Dövlətləri Təşkilatı çərçivəsində də xüsusi əhəmiyyət daşıyır. Azərbaycan və Özbəkistan TDT-ni ortaq türk tarixinin, mədəniyyətinin və mənəvi dəyərlərinin qorunması ilə yanaşı, siyasi, iqtisadi və nəqliyyat əməkdaşlığının genişləndirilməsi üçün mühüm platforma kimi qiymətləndirirlər. Özbəkistanın Türk Mədəniyyəti və İrsi Fonduna tamhüquqlu üzv olması da Türk dünyasının ortaq irsinin qorunması istiqamətində mühüm addım kimi dəyərləndirilir.
Azərbaycan–Özbəkistan münasibətləri eyni zamanda daha geniş regional proseslərin mühüm tərkib hissəsidir. Azərbaycanın Mərkəzi Asiya ölkələri ilə münasibətlərinin inkişafı və Mərkəzi Asiya Dövlət Başçılarının Məşvərət görüşlərində tamhüquqlu iştirakının təmin edilməsi Azərbaycanın regionla əlaqələrində yeni mərhələ yaradıb. Bunun nəticəsində Azərbaycan Cənubi Qafqazla Mərkəzi Asiya arasında siyasi, iqtisadi və nəqliyyat əlaqələrinin gücləndirilməsində daha fəal rol oynamaq imkanına malikdir.
Bütün bunlar göstərir ki, Azərbaycan və Özbəkistan arasında münasibətlər artıq yalnız ikitərəfli əməkdaşlıq çərçivəsi ilə məhdudlaşmır. Bu münasibətlər Türk dünyasının inteqrasiyası, regional nəqliyyat əlaqələrinin inkişafı, enerji təhlükəsizliyi, iqtisadi tərəfdaşlıq və humanitar əməkdaşlıq kimi daha geniş istiqamətləri əhatə edir.
Prezident İlham Əliyevin müsahibəsində səsləndirilən fikirlərdən aydın olur ki, Azərbaycan–Özbəkistan münasibətlərinin əsasını qarşılıqlı etimad, siyasi iradə, ortaq tarixi-mədəni irs və qarşılıqlı maraqlar təşkil edir. Bu möhkəm təməl üzərində qurulan müttəfiqlik münasibətlərinin gələcəkdə daha da dərinləşməsi üçün geniş imkanlar mövcuddur.
Azərbaycan və Özbəkistanın qarşılıqlı səyləri nəticəsində formalaşan bu strateji tərəfdaşlıq iki xalqın rifahına xidmət etməklə yanaşı, Cənubi Qafqaz və Mərkəzi Asiya arasında əlaqələrin möhkəmlənməsinə, Türk dünyasında inteqrasiya proseslərinin sürətlənməsinə və regionda sülh, sabitlik və davamlı inkişafın təmin olunmasına mühüm töhfə verə bilər.

14/08/2026

Təbii ki, nəzarət paketi Azərbaycan dövlətinə məxsus olmaq şərti ilə beynəlxalq konsorsium investorlardan ibarət ola bilər və biz buna açığıq

Naxçıvan tarixən Azərbaycanın siyasi, iqtisadi, mədəni və geostrateji həyatında xüsusi yer tutan qədim torpaqdır. Bu qədim diyarın bugünkü Azərbaycanın inkişaf strategiyasında oynadığı rol isə yalnız tarixi yaddaşla məhdudlaşmır. 11 avqust 2026-cı ildə Azərbaycan Respublikasının Prezidenti İlham Əliyevin Naxçıvan səfəri çərçivəsində Azərbaycan Televiziyasına verdiyi müsahibə bu reallığı bir daha gündəmə gətirdi. Müsahibədə Naxçıvanın inkişafı, nəqliyyat və enerji imkanları, regional inteqrasiya, təhlükəsizlik və gələcək perspektivlər barədə səsləndirilən fikirlər muxtar respublikanın Azərbaycanın ümumi inkişaf konsepsiyasındakı yerinə yeni prizmadan baxmağa imkan verir.
Prezidentin müsahibəsində diqqət çəkən əsas məqamlardan biri Naxçıvanın yalnız Azərbaycanın ayrılmaz hissəsi kimi deyil, həm də regionun gələcək iqtisadi və nəqliyyat xəritəsində mühüm mərkəzlərdən biri kimi təqdim olunmasıdır. Dövlət başçısı Naxçıvan Muxtar Respublikasının hərtərəfli inkişaf etdiyini vurğulayaraq, burada həyata keçirilən layihələrin artıq real nəticələr verdiyini qeyd edib. Bu yanaşma Naxçıvanın gələcəyinə münasibətdə yalnız bugünkü göstəricilərlə deyil, uzunmüddətli perspektivlərlə düşünülməsinin vacibliyini ortaya qoyur.
Naxçıvanın coğrafiyası strateji üstünlüyə çevrilir
Coğrafiya bəzən dövlətlərin taleyində mühüm rol oynayan amilə çevrilir. Naxçıvanın yerləşdiyi mövqe də bu baxımdan xüsusi əhəmiyyət daşıyır. Azərbaycan ərazisinin əsas hissəsindən ayrı yerləşən Naxçıvan tarix boyu mürəkkəb geosiyasi proseslərin kəsişməsində olub. Lakin müasir dövrdə bu coğrafi mövqe tədricən məhdudiyyət deyil, strateji üstünlük kimi dəyərləndirilir.
Prezident İlham Əliyevin müsahibəsində Naxçıvanın gələcəkdə mühüm nəqliyyat mərkəzlərindən birinə çevriləcəyinə dair fikirlər məhz bu reallığın ifadəsidir. Naxçıvanın Azərbaycanı regional nəqliyyat və logistika marşrutları ilə daha sıx bağlayan mühüm həlqəyə çevrilməsi ölkənin iqtisadi imkanlarını genişləndirə bilər.
Bu baxımdan Zəngəzur dəhlizi məsələsi xüsusi əhəmiyyət kəsb edir. Azərbaycanın əsas hissəsi ilə Naxçıvan arasında yeni nəqliyyat bağlantılarının yaradılması təkcə iki coğrafi məkanın birləşdirilməsi demək deyil. Bu, həm də regionda iqtisadi əlaqələrin, ticarət dövriyyəsinin və tranzit imkanlarının genişlənməsi üçün yeni perspektivlər yaradır.
Müasir dünyada nəqliyyat yolları artıq sadəcə yük və sərnişin daşıyan xətlər deyil. Onlar iqtisadi əməkdaşlığın, siyasi əlaqələrin və regional sabitliyin mühüm dayaqlarından birinə çevrilib.
Azərbaycanın son illərdə nəqliyyat infrastrukturu istiqamətində həyata keçirdiyi layihələr Naxçıvanın da bu sistemdəki rolunu artırır.
Horadiz–Ağbənd avtomobil yolunun tikintisinin yekun mərhələyə yaxınlaşması, Naxçıvan istiqamətində dəmir yolu layihələrinin gündəmdə olması və elektrik xətlərinin Ermənistan ərazisindən çəkilməsi ilə bağlı layihənin hazırlanması bölgənin gələcək inteqrasiya imkanlarını göstərir.
Beləliklə, Naxçıvanın strateji əhəmiyyəti artıq yalnız hərbi-siyasi anlayış çərçivəsində qiymətləndirilə bilməz. Burada nəqliyyat, enerji, sənaye, turizm və sosial inkişaf bir-birini tamamlayan vahid sistemin elementlərinə çevrilir.
Enerji potensialı yeni imkanlar açır
Müsahibədə enerji məsələsinə verilən diqqət də təsadüfi deyil. Naxçıvan günəş enerjisi potensialına görə Azərbaycanın ən əlverişli bölgələrindən biri kimi qiymətləndirilir. Prezidentin səfər zamanı “Şəms 1” və “Qərbi Üfüq” Günəş Elektrik stansiyalarında görülən işlərlə tanış olması da regionun yaşıl enerji istiqamətində inkişafına verilən əhəmiyyətin göstəricisidir.
Yaşıl enerji Naxçıvan üçün yalnız elektrik istehsalı məsələsi deyil. Bu istiqamət yeni investisiyalar, texnologiyalar, sənaye müəssisələri və ixrac imkanları üçün də zəmin yarada bilər.
Azərbaycanın enerji siyasətində alternativ və bərpaolunan enerji mənbələrinin payının artırılması fonunda Naxçıvanın günəş enerjisi imkanları xüsusi perspektiv vəd edir. Bu, regionun gələcək iqtisadi modelinin daha müasir və dayanıqlı əsaslar üzərində qurulmasına imkan verə bilər.
Naxçıvanın gələcəyi yalnız nəqliyyat və enerji ilə məhdudlaşmır. Sənaye parkının təməlinin qoyulması regionda yeni iqtisadi mərhələnin başlanğıcı kimi qiymətləndirilə bilər.
Sənaye parklarının yaradılması yerli istehsalın genişləndirilməsi, yeni iş yerlərinin açılması, sahibkarlığın inkişafı və regionun iqtisadi potensialının daha səmərəli istifadəsi baxımından əhəmiyyətlidir.
Bu proses Naxçıvanın yalnız istehlak bazarı deyil, istehsal və ixrac imkanlarına malik iqtisadi mərkəz kimi formalaşmasına xidmət edə bilər. İstehsal, logistika və enerji imkanlarının paralel inkişafı isə öz növbəsində yeni iqtisadi zəncir yaradır.
Naxçıvanın strateji əhəmiyyətindən danışarkən onun tarixi və mədəni missiyasını unutmaq olmaz. Bu torpaq Azərbaycanın dövlətçilik tarixində müstəsna iz qoymuş şəxsiyyətlər yetişdirib. Ümummilli Lider Heydər Əliyevin Naxçıvanla bağlı siyasi fəaliyyəti də Azərbaycanın müasir tarixinin mühüm səhifələrindən biridir.
Prezident İlham Əliyevin səfər zamanı Ümummilli Liderin Naxçıvan şəhərinin mərkəzində ucaldılmış abidəsini ziyarət etməsi bu tarixi yaddaşa ehtiramın ifadəsi kimi diqqət çəkib.
Eyni zamanda Möminə xatun türbəsinin bərpası, Əcəmi Naxçıvaninin abidəsinin ucaldılması və şəhərin inkişafına dair 2044-cü ilədək Baş Planın nəzərdən keçirilməsi göstərir ki, Naxçıvanın inkişaf modeli tarixi irslə müasir şəhərsalma və iqtisadi inkişafın vəhdəti üzərində qurulur.
Bu, əslində, mühüm bir fəlsəfədir: gələcəyə gedən yol keçmişi unutmaqdan deyil, onu qoruyaraq yeni mərhələyə daşımaqdan keçir.
Təhlükəsizlik və güclü dövlət amili
Naxçıvanın strateji əhəmiyyətini müəyyən edən əsas amillərdən biri də təhlükəsizlikdir. Regionun geosiyasi mövqeyi burada güclü müdafiə və təhlükəsizlik sisteminin olmasını zəruri edir.
Prezidentin səfər çərçivəsində Əlahiddə Ümumqoşun Ordunun yeni yaradılmış komando hərbi hissələrinə Döyüş bayraqlarının verilməsi mərasimində iştirakı da bu baxımdan xüsusi məna daşıyır. Azərbaycan Silahlı Qüvvələrinin bölgədə söz sahibi olması barədə səsləndirilən fikirlər ölkənin təhlükəsizlik siyasətinin əsas istiqamətlərindən birini ifadə edir.
Güclü ordu, inkişaf edən iqtisadiyyat və möhkəm dövlət idarəçiliyi bir-birindən ayrı anlayışlar deyil. Müasir dövlətçilikdə bu amillər vahid sistem təşkil edir.
Prezidentin müsahibəsində diqqət çəkən daha bir mühüm məqam Naxçıvanın, Şərqi Zəngəzurun və Qarabağın vahid konsepsiya əsasında inkişaf etdirilməsinin vacibliyi ilə bağlı fikirlərdir.
Bu yanaşma Azərbaycanın müxtəlif regionlarının inkişafını ayrı-ayrı layihələr kimi deyil, vahid milli inkişaf strategiyasının tərkib hissəsi kimi nəzərdən keçirməyə imkan verir.
Qarabağ və Şərqi Zəngəzurda aparılan genişmiqyaslı quruculuq işləri ilə Naxçıvanın inkişaf perspektivləri arasında nəqliyyat, enerji və iqtisadi baxımdan əlaqələrin gücləndirilməsi Azərbaycanın regional inkişaf xəritəsini daha da bütövləşdirə bilər.
11 avqust müsahibəsinin yaratdığı əsas təəssüratlardan biri budur ki, Naxçıvanın gələcəyinə dair baxış yalnız bu günün problemlərinin həlli ilə yekunlaşmır. Burada uzunmüddətli perspektiv, yeni nəqliyyat xətləri, enerji layihələri, sənayeləşmə, şəhərsalma, sosial infrastruktur və təhlükəsizlik məsələləri bir-biri ilə əlaqəli şəkildə nəzərdən keçirilir.
Naxçıvan şəhərinin 2044-cü ilədək inkişafına dair Baş Planın təqdim olunması da gələcəyə hesablanmış planlaşdırmanın nümunəsidir.
Bu gün Naxçıvana baxarkən yalnız keçmişin qədim şəhərini deyil, gələcəyin müasir regional mərkəzlərindən birini də görmək mümkündür.
Naxçıvan Azərbaycan üçün sadəcə xəritədə xüsusi coğrafi mövqeyə malik muxtar respublika deyil. O, tarix, dövlətçilik, təhlükəsizlik, iqtisadiyyat, enerji və nəqliyyat maraqlarının qovuşduğu strateji məkandır.
11 avqust 2026-cı ildə Prezident İlham Əliyevin Azərbaycan Televiziyasına verdiyi müsahibə bu həqiqəti müxtəlif istiqamətlərdən bir daha gündəmə gətirdi. Müsahibədə səsləndirilən fikirlər və səfər çərçivəsində həyata keçirilən tədbirlər Naxçıvanın Azərbaycanın gələcək inkişaf strategiyasında xüsusi yer tutduğunu göstərir.
Naxçıvanın qarşısında yeni mərhələ açılır. Bu mərhələnin əsas xüsusiyyəti isə tarixlə gələcəyin, milli dövlətçilik ənənələri ilə müasir inkişaf modelinin bir araya gətirilməsidir.
Bu mənada Naxçıvanın strateji əhəmiyyəti yalnız onun harada yerləşməsi ilə deyil, Azərbaycanın gələcəyində hansı mövqeni tutacağı ilə ölçülür. Və bugünkü proseslər göstərir ki, bu qədim diyar qarşıdakı illərdə Azərbaycanın regional gücünün, iqtisadi əlaqələrinin və nəqliyyat imkanlarının mühüm dayaqlarından birinə çevrilmək potensialına malikdir.

03/08/2026

Öz dilini bilməyən, öz dilini sevməyən adam öz tarixini yaxşı bilə bilməz
Azərbaycan dili xalqımızın milli kimliyini, tarixi yaddaşını, mədəni irsini və dövlətçilik ənənələrini özündə yaşadan ən mühüm mənəvi sərvətlərdən biridir. Min illər boyu formalaşaraq zənginləşən ana dilimiz xalqımızın düşüncə tərzini, dünyagörüşünü, milli-mənəvi dəyərlərini və ədəbi irsini gələcək nəsillərə çatdıran əvəzsiz xəzinədir. Məhz buna görə də Azərbaycan dilinin qorunması, inkişaf etdirilməsi və dövlət dili kimi nüfuzunun möhkəmləndirilməsi müstəqil Azərbaycan dövlətinin əsas prioritet istiqamətlərindən biri olmuşdur.
Hər il 1 Avqust – Azərbaycan əlifbası və Azərbaycan dili günü ölkəmizdə böyük ehtiramla qeyd edilir. Bu əlamətdar gün Azərbaycan xalqının ana dilinə göstərdiyi sevginin, dövlətin milli-mənəvi dəyərlərə verdiyi yüksək qiymətin və dil siyasətinin ardıcıl şəkildə həyata keçirilməsinin bariz nümunəsidir. Azərbaycan dilinin dövlət dili kimi mövqeyinin möhkəmləndirilməsi ümummilli lider tərəfindən dövlət siyasətinin əsas istiqamətlərindən biri kimi müəyyənləşdirilmişdir. Ulu öndər bu barədə deyirdi: "Xalqı xalq edən, milləti millət edən onun ana dilidir." Bu fikirlər Azərbaycan dilinin sadəcə ünsiyyət vasitəsi deyil, həm də milli varlığımızın, dövlətçiliyimizin və müstəqilliyimizin əsas dayaqlarından biri olduğunu aydın şəkildə göstərir.
Müstəqillik illərində Azərbaycan dilinin hüquqi statusunun möhkəmləndirilməsi istiqamətində mühüm addımlar atılmış, Azərbaycan Respublikasının Konstitusiyasında dövlət dilinin Azərbaycan dili olması təsbit edilmişdir. Eyni zamanda, dövlət dili normalarının tətbiqi, terminologiyanın zənginləşdirilməsi, ana dilində təhsil və elmin inkişafı istiqamətində ardıcıl tədbirlər görülmüşdür. Azərbaycan əlifbasının latın qrafikasına keçidi milli dövlətçilik tariximizin mühüm hadisələrindən biri olmaqla ölkəmizin müasir dünyaya inteqrasiyasını sürətləndirmiş, informasiya mübadiləsini asanlaşdırmış və milli irsin qorunmasına yeni imkanlar yaratmışdır. 2001-ci il avqustun 9-da imzalanmış Fərmanla 1 avqust tarixinin Azərbaycan əlifbası və Azərbaycan dili günü elan edilməsi isə ana dilimizin inkişafına verilən yüksək dövlət qayğısının və milli-mənəvi dəyərlərə göstərilən xüsusi diqqətin parlaq təzahürü olmuşdur.
Bu gün Azərbaycan dili dünyanın müxtəlif ölkələrində yaşayan milyonlarla soydaşımızı vahid milli-mənəvi dəyərlər ətrafında birləşdirən əsas amillərdən biridir. Xaricdə fəaliyyət göstərən Azərbaycan məktəblərində, mədəniyyət mərkəzlərində və diaspor təşkilatlarında ana dilimizin tədrisi milli kimliyin qorunması baxımından xüsusi əhəmiyyət daşıyır. Eyni zamanda, müasir informasiya texnologiyalarının sürətlə inkişaf etdiyi dövrdə Azərbaycan dilinin rəqəmsal mühitdə geniş tətbiqi, elektron resursların, rəqəmsal kitabxanaların və süni intellekt texnologiyalarının ana dilimizdə inkişaf etdirilməsi dilimizin gələcək nəsillərə daha zəngin şəkildə ötürülməsi üçün mühüm əhəmiyyət kəsb edir.
Azərbaycan Respublikasının Prezidenti ana dilimizin qorunması və inkişaf etdirilməsi istiqamətində həyata keçirilən siyasəti uğurla davam etdirir. Prezident İlham Əliyev vurğulamışdır: "Azərbaycan dili bizim milli sərvətimizdir və biz onu göz bəbəyimiz kimi qorumalıyıq." Bu yanaşma dövlətin dil siyasətinin əsas mahiyyətini əks etdirir. Azərbaycan dilinin saflığının qorunması, ədəbi dil normalarına əməl olunması, xüsusilə gənc nəslin ana dilində düzgün danışması və yazması cəmiyyətimizin qarşısında duran mühüm vəzifələrdəndir. Təhsil müəssisələrində, kütləvi informasiya vasitələrində, dövlət qurumlarında və ictimai həyatda Azərbaycan dilinin düzgün işlədilməsi milli mədəniyyətimizin inkişafına, dövlətçiliyimizin möhkəmlənməsinə və milli həmrəyliyimizin güclənməsinə xidmət edir.
Ana dilimizin zənginliyi Azərbaycan ədəbiyyatında, poeziyasında, folklorunda və elmi irsində öz əksini tapmışdır. Nizami Gəncəvi, Məhəmməd Füzuli, İmadəddin Nəsimi, Molla Pənah Vaqif, Mirzə Fətəli Axundzadə, Cəlil Məmmədquluzadə, Üzeyir Hacıbəyli və digər görkəmli söz ustalarının yaratdığı ölməz əsərlər Azərbaycan dilinin ifadə imkanlarının nə qədər geniş və zəngin olduğunu bir daha sübut edir. Bu irsin qorunması və gələcək nəsillərə çatdırılması hər bir azərbaycanlının mənəvi borcudur.
Beləliklə, 1 Avqust – Azərbaycan əlifbası və Azərbaycan dili günü xalqımızın milli-mənəvi dəyərlərinə, dövlətçilik ənənələrinə və ana dilinə sonsuz ehtiramının ifadəsidir. Azərbaycan dilinin qorunması, inkişaf etdirilməsi və gələcək nəsillərə saf şəkildə ötürülməsi hər bir vətəndaşın müqəddəs vəzifəsidir. Ana dilimiz yaşadıqca milli kimliyimiz, dövlətçiliyimiz və Azərbaycançılıq məfkurəsi də yaşayacaq, Azərbaycan dili müstəqil dövlətimizin qüdrətini və xalqımızın zəngin mənəvi irsini gələcək nəsillərə çatdırmağa davam edəcəkdir.

03/08/2026

Müttəfiqlik münasibətləri çox böyük məsuliyyət deməkdir və biz bu məsuliyyətə hazırıq

Son illərdə Azərbaycan və Qırğızıstan prezidentlərinin qarşılıqlı səfərləri xalqlarımızı və ölkələrimizi bir-birinə daha da yaxınlaşdırıb. Azərbaycan Respublikasının Prezidenti cənab İlham Əliyevin Qırğızıstan Respublikasına səfərləri Azərbaycan ilə Qırğızıstan arasında siyasi, iqtisadi və humanitar münasibətlərin inkişafında mühüm rol oynayır. Ortaq tarixə, dilə, mədəniyyətə və türk həmrəyliyi prinsiplərinə söykənən bu əlaqələr son illərdə yeni məzmun qazanaraq strateji tərəfdaşlıq səviyyəsinə yüksəlmişdir. Dövlət başçıları arasında formalaşmış yüksək etimad mühiti əməkdaşlığın bütün istiqamətlər üzrə genişlənməsinə əlverişli şərait yaratmışdır. Mətbuata verilən bəyanatda Qırğızıstan Prezidenti Sadır Japarovun Nizami Gəncəvinin "Qazanılan hər bir dost səmanın bəxş etdiyi bir nemətdir" fikrinə istinad edərək, "Qırğızıstan və Azərbaycan bir-birinin timsalında etibarlı dost qazanıb" deməsi ölkələrimiz arasında münasibətlərin yüksək səviyyəsini nümayiş etdirir.
Zirvə görüşündə qəbul olunan Çolpon-Ata Bəyannaməsi isə Azərbaycan ilə Mərkəzi Asiya dövlətləri arasında strateji tərəfdaşlığın yeni mərhələyə qədəm qoyduğunu təsdiqləyən mühüm siyasi sənəddir. Bəyannamədə ortaq tarixi, mədəni və mənəvi dəyərlərə əsaslanan əməkdaşlığın inkişafı, beynəlxalq hüququn prinsiplərinə sadiqlik, suverenlik və ərazi bütövlüyünə hörmət bir daha təsdiqlənir. Sənəddə nəqliyyat-logistika, enerji, yaşıl enerji, rəqəmsal transformasiya, innovasiya, elm və təhlükəsizlik sahələrində əməkdaşlığın genişləndirilməsi əsas prioritetlər kimi müəyyən edilir. Eyni zamanda, Azərbaycanın Mərkəzi Asiya ilə əlaqələrinin möhkəmləndirilməsi, Orta Dəhlizin inkişafı və Türk dünyasında inteqrasiyanın dərinləşdirilməsi baxımından Bəyannamənin xüsusi əhəmiyyəti vurğulanır.
S əfərin mühüm siyasi nəticələrindən biri də Azərbaycanın Mərkəzi Asiya Məşvərət görüşlərinə tamhüquqlu üzv kimi qəbul edilməsinə görə Prezident cənab İlham Əliyevin Mərkəzi Asiya dövlət başçılarına təşəkkürünü ifadə etməsi oldu. Bu qərar Azərbaycanın Mərkəzi Asiya siyasətində yeni mərhələnin başlandığını göstərir. Coğrafi baxımdan Cənubi Qafqaz dövləti olan Azərbaycan artıq siyasi, iqtisadi, enerji və nəqliyyat baxımından Mərkəzi Asiyanın ayrılmaz tərəfdaşına çevrilir. Xəzər dənizi üzərindən formalaşan Orta Dəhliz, Şərq-Qərb nəqliyyat marşrutu, enerji əməkdaşlığı, rəqəmsal bağlantılar və logistika layihələri Azərbaycanın Mərkəzi Asiya ilə əlaqələrinin strateji xarakter daşıdığını bir daha təsdiqləyir.
İqtisadi əməkdaşlıqla yanaşı, humanitar əlaqələrin genişlənməsi də xüsusi əhəmiyyət kəsb edir. Təhsil, elm, mədəniyyət, turizm və gənclər siyasəti sahələrində həyata keçirilən proqramlar xalqlar arasında qarşılıqlı etimadı daha da möhkəmləndirir. Türk Dövlətləri Təşkilatı çərçivəsində həyata keçirilən təşəbbüslər ortaq mədəni irsin qorunmasına, elmi mübadiləyə və gələcək nəsillər arasında türk həmrəyliyi ideyasının güclənməsinə xidmət edir.
Prezident İlham Əliyevin diqqət çəkdiyi mühüm məqamlardan biri də Qarabağın bərpasına qardaş Qırğızıstanın verdiyi töhfə olub: "Ağdam rayonunda inşa edilən və böyük Qırğız xalqının qəhrəmanı Manasın adını daşıyan müasir məktəb iki xalq arasında dostluğun, qardaşlığın və ortaq mədəni irsin rəmzinə çevrilmişdir. Bu layihə yalnız təhsil infrastrukturu deyil, həm də Azərbaycan ilə Qırğızıstan arasında humanitar əməkdaşlığın, qarşılıqlı etimadın və türk dünyasının həmrəyliyinin parlaq nümunəsidir.
Prezident İlham Əliyevin rəhbərliyi ilə həyata keçirilən xarici siyasət kursu Azərbaycanın Mərkəzi Asiya ilə əlaqələrini keyfiyyətcə yeni mərhələyə yüksəldib. Bu gün Azərbaycan Şərqlə Qərb arasında etibarlı körpü, türk dövlətləri arasında əməkdaşlığın təşəbbüskarı və regional sabitliyin mühüm təminatçılarından biri kimi çıxış edir. Bu siyasət həm ölkəmizin beynəlxalq nüfuzunu artırır, həm də iqtisadi inkişafına yeni imkanlar açır.
31 iyul 2026-cı il dövlət səfəri göstərdi ki, Bakı ilə Bişkek arasında münasibətlər artıq dostluq və tərəfdaşlıq mərhələsini geridə qoyaraq müttəfiqlik səviyyəsinə yüksəlib. Bu yeni mərhələ yalnız iki ölkənin deyil, bütövlükdə Türk dünyasının siyasi həmrəyliyinin, iqtisadi inteqrasiyasının və regional təhlükəsizlik arxitekturasının möhkəmlənməsinə mühüm töhfə verəcək. Azərbaycanın Mərkəzi Asiya istiqamətində artan fəallığı, Qırğızıstanla münasibətlərin strateji dərinləşməsi, imzalanan sənədlər, investisiya layihələri, humanitar təşəbbüslər və Çolpon-Ata Bəyannaməsi göstərir ki, qarşıdakı illərdə bu əməkdaşlıq daha geniş regional layihələrin əsas hərəkətverici qüvvələrindən birinə çevriləcək. Bu isə Prezident cənab İlham Əliyevin rəhbərliyi ilə həyata keçirilən çoxşaxəli xarici siyasətin növbəti mühüm uğuru kimi tarixə düşəcək.

Ucar RİHB-nın Lək kənd inzibati ərazi dairəsi üzrə nümayəndəliyi

25/08/2026

24/08/2026

24/08/2026

14/08/2026

03/08/2026

03/08/2026

Address

Telephone

Website

Alerts

Contact The Organization

Shortcuts

Share

Category

Listing takedown request