31/07/2026
Diqqət!
Xudat Bələdiyyəsi tərəfindən Digah Oba kəndi ərazisində qanunvericiliyin tələblərinə uyğun olaraq qanunsuz zəbt edilərək istifadə olunan torpaq sahələrinin aşkarlanması məqsədilə reydlərə başlanılmışdır.
Vətəndaşların nəzərinə çatdırırıq ki, torpaq sahələrinin özbaşına tutulması (zəbt edilməsi) qanunvericiliyə ziddir və hüquqi məsuliyyət yaradır.
Azərbaycan Respublikası Cinayət Məcəlləsinin 188-ci maddəsinə əsasən, torpaq üzərində mülkiyyət, istifadə və ya icarə hüququ olmadan torpaq sahəsini özbaşına tutma və ya həmin torpaq sahəsini qanunsuz istifadə etmə qanunla nəzərdə tutulmuş hallarda cinayət məsuliyyətinə səbəb olur.
Xudat Bələdiyyəsi vətəndaşları torpaqdan yalnız qanunvericiliyin tələblərinə uyğun istifadə etməyə çağırır. Qanunsuz zəbt olunmuş torpaq sahələri ilə bağlı aşkar edilmiş faktlar qanunvericiliyə uyğun tədbir görülməsi üçün aidiyyəti qurumlara təqdim ediləcəkdir.
Maddə 188. Torpaq üzərində mülkiyyət, istifadə və ya icarə hüququnu pozma
188.1. Qanunla müəyyən edilmiş mülkiyyət, istifadə və ya icarə hüququ olmadan torpaq sahəsini özbaşına hasarlama, becərmə və ya dəyişdirmə, yaxud həmin torpaq sahəsini başqa üsullarla özbaşına tutma –
səkkiz min manatdan on min manatadək miqdarda cərimə və ya iki ilədək müddətə azadlıqdan məhrum etmə ilə cəzalandırılır.
188.2. Qanunla müəyyən edilmiş mülkiyyət, istifadə və ya icarə hüququ olmadan torpaq sahəsi üzərində özbaşına tikinti və ya quraşdırma işlərini aparma -
bir ildən üç ilədək müddətə azadlıqdan məhrum etmə ilə cəzalandırılır.
188.3. Bu Məcəllənin 188.1-ci və 188.2-ci maddələrində nəzərdə tutulmuş əməllər kənd təsərrüfatı təyinatlı torpaqlara münasibətdə törədildikdə -
üç ildən beş ilədək müddətə azadlıqdan məhrum etmə ilə cəzalandırılır.
188.4. Bu Məcəllənin 188.1-188.3-cü maddələrində nəzərdə tutulmuş əməllər:
188.4.1. təkrar törədildikdə;
188.4.2. şəxs tərəfindən öz qulluq mövqeyindən istifadə etməklə törədildikdə -
beş ildən səkkiz ilədək müddətə azadlıqdan məhrum etmə ilə cəzalandırılır.
