https://www.facebook.com/283797988146626/

Zaqatala rayon MKS-nin Faldarlı kənd kitabxana filialı, Zakataly (2026)

22/07/2026

Bu gün Azərbaycan milli mətbuatının yaranmasının 151 ili tamam olur. 1875-ci il iyulun 22-də görkəmli maarifpərvər və mütəfəkkir Həsən bəy Zərdabinin Azərbaycan dilində nəşr etdirdiyi “Əkinçi” qəzeti milli mətbuatımızın ilk nümunəsi kimi tarixə düşmüşdür. Azərbaycan milli mətbuatının təşəkkül tapmasında və inkişafında əvəzsiz rolu olan “Əkinçi”nin ömrü uzun sürməmiş, cəmi 56 sayı işıq üzü görmüşdür. Çar Rusiyası qəzetin insanların maariflənməsində, ictimai-siyasi proseslərə daha yaxından bələd olmasındakı rolundan çəkinməyə başlamış və sonda qəzetin nəşrini dayandırmışdır.
Həsən bəy Zərdabinin yaratdığı “Əkinçi” qəzeti ilə başlanan bu yol sonrakı dövrlərdə vətənsevər ziyalılarımızın ərsəyə gətirdiyi digər mətbu nümunələrimiz tərəfindən davam etdirilmiş, Azərbaycan milli mətbuatı özünəməxsus ənənələr yaratmışdır. “Ziya”, “Ziyayi-Qafqaziyyə”, “Kəşkül”, “Şərqi-Rus”, “Həyat”, “Füyuzat”, “Dəbistan”, “İrşad”, “Tazə həyat”, “Molla Nəsrəddin”, “Tərəqqi”, “Həqiqət”, “Məktəb”, “Açıq söz” kimi onlarla qəzet və jurnal ötən əsrin əvvəllərində anadilli mətbuatımızın sonrakı tarixini yaratmışlar. 1896-cı ildən Həsən bəyin fəal iştirakı və kürəkəni Əlimərdan bəy Topçubaşovun redaktorluğu ilə nəşr olunan rusdilli “Kaspi” qəzeti də mövzu və məfkurə baxımından Zərdabi istəklərinin daşıyıcısına çevrilmişdir.
Mətbuat yarandığı gündən milli dəyərlərin qorunmasına, dilimizin, incəsənətimizin və mədəniyyətimizin inkişafına böyük töhfələr vermişdir. Xüsusilə 1969-cu ildə Ümummilli Lider Heydər Əliyevin Azərbaycan Respublikasının rəhbəri seçildikdən sonra digər sahələr kimi, milli mətbuatın inkişafında və milli jurnalist kadrların yetişməsində çox mühüm tədbirlər həyata keçirilmiş, Məhz Ulu Öndərin qətiyyəti sayəsində 1978-ci ildə Azərbaycan SSR-nin yeni Konstitusiyası qəbul edilərkən orada Azərbaycan dilinin dövlət dili kimi təsbit olunmasına, habelə milli mətbuatımızda ədəbi dilin, anadilli mətbuatın inkişafına və milli jurnalist kadrlarının hazırlanmasına xüsusi diqqət ayrılmışdır.
Ulu Öndər Heydər Əliyevin 1993-cü ilin iyun ayında xalqın təkidli tələbi ilə hakimiyyətə qayıdışından sonrakı dövrdə Azərbaycan mətbuatının inkişafında keyfiyyətcə yeni mərhələ başlanmışdır. Jurnalistlərin dostu adını qazanmış Ulu Öndər ölkəmiz müharibə şəraitində yaşasa da böyük cəsarətlə əvvəlcə hərbi senzuranı, 1998-ci ilin avqustunda isə bütövlükdə KİV üzərində dövlət senzurasını ləğv etmiş, göstərilən ali siyasi iradə nəticəsində ölkəmizdə mətbuat azadlığı prinsipləri bərqərar olmuş, habelə qəzet və jurnal bolluğu yaranmışdır.
Prezident İlham Əliyev bütün sahələrdə olduğu kimi, mətbuata qayğıda da Ümummlili Liderin ənənələrini layiqincə davam etdirir. Ölkəmizdə söz və mətbuat azadlığı ən yüksək səviyyədə təmin olunur. Prezident İlham Əliyevin 2021-ci il 12 yanvar tarixli “Azərbaycan Respublikasında media sahəsində islahatların dərinləşdirilməsi haqqında” Fərmanı ilə Kütləvi İnformasiya Vasitələrinin İnkişafına Dövlət Dəstəyi Fondunun əsasında “Azərbaycan Respublikasının Medianın İnkişafı Agentliyi” publik hüquqi şəxs yaradılmış, ölkəmizin informasiya məkanının təhlükəsizliyinin təmin edilməsi, yerli medianın inkişafına təkan verilməsi, habelə jurnalistika peşəsinin nüfuzunun yüksəldilməsinə şərait yaradılması məqsədi ilə “Media haqqında” Azərbaycan Respublikasının Qanunu qəbul edilmişdir.
KİV-lərə birdəfəlik yardımların göstərilməsi, mətbuat işçilərinin sosial müdafiəsinin gücləndirilməsi tədbirləri, milli mətbuatın inkişafındakı xidmətlərinə görə jurnalistlərin fəxri adlarla təltif edilməsi haqqında ölkə başçısının sərəncamları, “Azərbaycan milli mətbuatının 150 illiyi (1875–2025)” Azərbaycan Respublikasının yubiley medalının təsis olunması mətbuata və mətbuat işçilərinə dövlət qayğısının tərkib hissəsidir. Bununla belə, Azərbaycan Respublikasının Medianın İnkişafı Agentliyi və Audiovizual Şuranın əsasında vahid qurumun – Media və Yayım Şurasının yaradılması nəzərdə tutulur. Bununla bağlı “Dövlət qulluğu haqqında” və “Media haqqında” qanunlara müvafiq dəyişikliklərin edilməsi barədə qanun layihəsi 2026-cı il iyulun 14-ü Milli Məclisdə qəbul olunub.
“Azərbaycan Respublikası ilə Türkiyə Respublikası arasında media sahəsində strateji əməkdaşlıq haqqında” 2020-ci il dekabrın 10-da Bakı şəhərində imzalanmış Anlaşma Memorandumu 2021-ci il fevralın 1-də Milli Məclis tərəfindən təsdiq edilmişdir. Artıq dörd ildir ki, Qarabağın ürəyi sayılan Şuşada ənənə halını almış Qlobal Media Forumu keçirilir. Bu tədbirlərdə dünyanın aparıcı mətbuat rəhbərləri, radio, televiziya və agentlik nümayəndələri təmsil olunurlar.
Bəli, bu gün Azərbaycanda ən müasir tələblərə və standartlara cavab verən media mövcuddur. Hazırda respublikada çoxlu sayda müxtəlif qəzet və jurnallar nəşr olunur, internet qəzetçilik inkişaf edir. Möhkəm bünövrəyə, zəngin təcrübəyə əsaslanan və hər zaman Azərbaycan həqiqətlərinin təbliği missiyasını uğurla həyata keçirən milli mətbuatımız zamanla birgə irəliləyir, inkişaf edir, həm müstəqil Azərbaycanın, həm də yazılı fikir tariximizin yeni şərəfli səhifələrini qələmə alır. Hər zaman Azərbaycan həqiqətlərinin təbliği missiyasını uğurla həyata keçirən mətbuatımızın 44 günlük Vətən müharibəsinin gedişində ölkəmizin düşmən təbliğatına qarşı informasiya mübarizəsinə töhfələrini verdiyi kimi, postmüharibə dövründə də bu işi davam etdirməkdədir. Azərbaycan mediası bu gün də dövlətimizin başçısı, Silahlı Qüvvələrin Müzəffər Ali Baş Komandanı İlham Əliyevin artıq tarixə qovuşmuş Qarabağ münaqişəsi ilə bağlı səsləndirdiyi hər bir fikrin, hər bir bəyanatın, işğaldan azad edilmiş ərazilərimizdəki vəziyyət barədə həqiqətlərin ölkə və dünya ictimaiyyətinə çatdırılmasında fəal rol oynayır.
Bu gün dünya nizamının dəyişikliklərə məruz qaldığı, siyasi proseslərin intensivləşdiyi, habelə yeni fəaliyyət prinsiplərinin bərqərar olduğu müasir dövr Azərbaycan mediası qarşısında da yeni vəzifələr müəyyənləşdirir. Qabaqcıl texnologiyaların tətbiqi, sosial media platformalarında fəallığın artırılması, rəqəmsallaşma, süni intellekt, media savadlılığının yüksəldilməsi, dezinformasiya və saxta xəbərlərlə mübarizə, effektiv kommunikasiyanın həyata keçirilməsində yaxından iştirak və s. mediamızın inkişaf perspektivini və qarşıdan gələn dövrdə qlobal informasiya məkanında yerini müəyyənləşdirəcək məsələlərdir. Mediamız müasir tendensiyaları nəzərə almaqla Azərbaycanın dövlət maraqlarını həmişə uca tutmalı, həyatımızda baş verən pozitiv dəyişikliklər ilə bağlı ictimaiyyətimizin məlumatlandırılması sahəsində daha fəal olmalıdır.
22 iyul Milli Mətbuat Günü münasibətilə media nümayəndələrini təbrik edir, şərəfli və son dərəcə məsuliyyət tələb edən işlərində yeni-yeni uğurlar, obyektivlik, yüksək peşəkarlıq və əsl vətəndaşlıq mövqeyi arzulayıram. Dövlətimizin və xalqımızın firavanlığı üçün apardığınız mübarizədə yorulmayasınız!

Elmira Mehdiyeva
Əməkdar mədəniyyət işçisi, jurnalist,
"Yeni Fikir" İctimai Birliyinin sədri

07/07/2026

Azərbaycan Respublikası ilə Avropa İttifaqı arasında formalaşmış əməkdaşlıq qarşılıqlı fayda, etibarlılıq və uzunmüddətli strateji maraqlara söykənən münasibətlər nümunəsidir. Xüsusilə Prezident İlham Əliyevin uzaqgörən siyasəti nəticəsində son illərdə enerji təhlükəsizliyi, ticarət, nəqliyyat, yaşıl enerji və regional bağlantılar sahəsində əldə olunan nailiyyətlər bu tərəfdaşlığın yeni inkişaf mərhələsinə qədəm qoyduğunu göstərir.
Azərbaycan Respublikasının Prezidenti cənab İlham Əliyevin Avropa Komissiyasının Prezidenti Ursula Fon der Lyayenin 1 iyul 2026-cı il tarixində ölkəmizə səfəri zamanı verdiyi bəyanat Azərbaycan–Avropa İttifaqı münasibətlərinin yeni inkişaf mərhələsində olduğunu bir daha nümayiş etdirir.
Mətbuata bəyanatı zamanı Avropa Komissiyası ilə Azərbaycan arasında münasibətlərin çox mühüm mərhələdə olduğunu diqqətə çatdıran prezident İlham Əliyev vurğulayıb ki, “Biz Avropa Komissiyası ilə münasibətləri yüksək dəyərləndiririk.” Azərbaycanın Avropa İttifaqı üçün Cənubi Qafqazda əsas ticarət tərəfdaşı olduğunu və Cənubi Qafqazda ticarətin təxminən 70 faizinin Azərbaycanla aparıldığını xatırladan dövlətimizin başçısı xanım Prezidentin Azərbaycana dörd il əvvəlki səfərinin də olduqca əhəmiyyətli olduğunu bildirib. Enerji sahəsində Strateji Tərəfdaşlıq Haqqında Anlaşma Memorandumunun imzalandığı vaxtdan etibarən Avropa İttifaqının üzv dövlətlərinə Azərbaycanın təbii qaz ixracının təxminən 65 faiz artdığını qeyd edən prezident bildirib ki, “Bu gün qaz ixracımızın yarısı Avropa İttifaqının üzv dövlətlərinə gedir və bütövlükdə, Avropa İttifaqının 10 üzvü Azərbaycan qazını alır, bu coğrafiyanı genişləndirmək potensialı da mövcuddur.”
Bəyanatda xüsusi diqqət çəkən məsələlərdən biri də bərpaolunan enerji sahəsində əməkdaşlığın genişləndirilməsi olub. Cənab prezident bildirib ki, Avropa Komissiyası ilə münasibətlərimizin kifayət dərəcədə yeni hissəsi bərpaolunan enerji ilə bağlıdır.
Prezident İlham Əliyevin regional təhlükəsizlik və Azərbaycan-Ermənistan münasibətlərinin normallaşması ilə bağlı verdiyi mesajlar da xüsusi əhəmiyyət daşıyır. Sülhü təkcə kağız üzərində deyil, gündəlik həyatda hiss etdiyimizi nümayiş etdirmək üçün bir çox birtərəfli addımlar atıldıını vurğulayan dövlətimizin başçısı bildirib ki, “Bir sözlə, sülh artıq reallıqdır. Lakin biz onu gücləndirmək, uzunmüddətli və əbədi etmək üçün ürəkdən çalışmalıyıq. Əlbəttə, biz Avropa Komissiyasının dəstəyini çox yüksək dəyərləndiririk.”
Bəli, bütün bunlar regiondakı dinamikanı gücləndirərək Cənubi Qafqazı hər hansı ərazi iddialarından, hər hansı münaqişədən azad, əməkdaşlıq və sülh regionuna çevirəcək. Bu səfər bir daha göstərdi ki, Azərbaycan-Avropa İttifaqı münasibətlərinin gələcəyi qarşılıqlı maraqlar üzərində qurulacaq.

Tahir Kamalov
Zaqatala RİHBA-nın Sənəd dövriyyəsi, vətəndaş
müraciətləri və inzibati işlər şöbəsinin müdiri

24/06/2026

Azərbaycan Respublikasının həyata keçirdiyi xarici siyasətin əsas istiqamətlərindən biri dost və qardaş ölkələrlə qarşılıqlı əməkdaşlığın daha da möhkəmlənməsidir. Bu baxımdan Türkmənistan Prezidenti Sərdar Berdiməhəmmədovun 2026-cı il iyunun 22-də Azərbaycana dövlət səfəri iki ölkə arasında münasibətlərin inkişafında mühüm hadisə kimi qiymətləndirilir. Bu tarixi səfər çərçivəsində reallaşan geniş tərkibli görüşlər və imzalanan mühüm sənədlər iki qardaş ölkə arasındakı münasibətlərin yüksək səviyyədə olduğunu bir daha nümayiş etdirdi.
Türkmənistan Prezidenti Sərdar Berdiməhəmmədovun Azərbaycana səfəri zamanı mətbuata bəyanatla çıxış edən prezident ilham Əliyev Azərbaycanla Türkmənistan arasındakı münasibətlərin möhkəm təməl - tarixi bağlar, mədəni və mənəvi əlaqələr üzərində qurulduğunu diqqətə çatdırdı. Dövlətimizin başçısının bəyanatında xüsusi vurğulanan məqamlardan biri Türkmənistanın Azərbaycanın işğaldan azad edilmiş ərazilərinin bərpasına verdiyi töhfə oldu. Prezident İlham Əliyev Qurbanqulu Berdiməhəmmədovun təşəbbüsü ilə Füzulidə məscidin tikintisinin başlanmasını qardaşlığın və həmrəyliyin parlaq nümunəsi kimi qiymətləndirdi. Həmçinin Sərdar Qurbanquluyeviçə əməkdaşlığa görə minnətdarlığını bildirən dövlətimizin başçısı bildirdi ki, “Əminəm ki, gələn ay Türkmənistanda keçiriləcək Hökumətlərarası Komissiya çərçivəsində bu gün verdiyimiz tapşırıqlar həmin vaxta qədər hərtərəfli işlənib hazırlanacaq və biz yeni birgə problemlərin həlli, yeni layihələrin reallaşdırılması mərhələsinə keçəcəyik.”
Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv qəbul edilməsində fəal dəstəyinə görə Türkmənistana bir daha təşəkkürünü bildirən prezident İlham Əliyev bunu tarixi hadisə adlandıraraq bildirdi ki, “coğrafi olaraq Mərkəzi Asiyanın bir hissəsi olmasaq da, mədəni və tarixi əlaqələrimiz, həmçinin bu gün regional qarşılıqlı əlaqə və nəqliyyat-logistika problemləri ilə bağlı həll etdiyimiz konkret məsələlər təbii olaraq böyük Mərkəzi Asiyanın vahid geosiyasi və geoiqtisadi bölgə kimi qəbul edilməsi üçün ilkin şərtlər yaradır. Təbii ki, biz ilk gündən çoxtərəfli formatda fəal qarşılıqlı fəaliyyət göstərməyə başladıq.”
Ölkə rəhbərinin bəyanatında nəqliyyat-logistika əməkdaşlığı xüsusi yer tutur. Müasir dünyada etibarlı və təhlükəsiz nəqliyyat marşrutlarının sayının məhdud olduğunu vurğulayan dövlətimizin başçısı Azərbaycan-Türkmənistan əməkdaşlığının bu baxımdan qlobal əhəmiyyət daşıdığını diqqətə çatdırdı.
Türkmənistan və Azərbaycanın geniş faydalı qazıntılara və enerji ehtiyatlarına malik iki ölkə olduğunu xatırladan dövlətimizin başçısı qeyd etdi ki, “biz səylərimizi birləşdirmək üzrə əməkdaşlıq etmək niyyətindəyik.”
Qardaş türkmən xalqını və onun rəhbərliyini sosial-iqtisadi inkişafda əldə edilən əhəmiyyətli nailiyyətlər münasibətilə təbrik edən dövlətimzin başçısı bildirdi ki, “Biz, dostlarınız və qardaşlarınız olaraq, beynəlxalq arena da daxil olmaqla, uğurlarınıza həmişə sevinirik və artıq dünyada geniş ictimai dəstək qazanmış Türkmənistanın neytrallıq siyasətini həmişə dəstəkləmişik və dəstəkləməyə davam edəcəyik.”
Türkmənistan Prezidenti Sərdar Berdiməhəmmədovun Azərbaycana səfəri çərçivəsində dövlət başçılarının mətbuata verdikləri bəyanatlar iki qardaş ölkə arasında münasibətlərin yalnız ikitərəfli əməkdaşlıq çərçivəsində deyil, bütövlükdə Türk dünyasının inteqrasiyası baxımından strateji əhəmiyyət daşıdığını bir daha nümayiş etdirdi.

Tahir Məmmədov
YAP Zaqatala rayon təşkilatının
fəal üzvü, rayon ağsaqqalı

16/06/2026

Türkiyə və Azərbaycan arasında münasibətlərin ən yüksək zirvəsini ifadə edən, müasir tariximizin mühüm hadisələrindən biri sayılan Şuşa Bəyannaməsinin imzalanmasından beş il ötür. 2021-ci il iyunun 15-də Azərbaycan Respublikasının Prezidenti İlham Əliyev və Türkiyə Prezidenti Rəcəb Tayyib Ərdoğan tərəfindən Şuşa şəhərində imzalanmış Bəyannamə iki qardaş ölkə arasında münasibətlərin yeni mərhələsini müəyyənləşdirmiş, müttəfiqlik əlaqələrinin hüquqi və siyasi əsaslarını daha da möhkəmləndirmişdir. Müttəfiqlik Bəyannaməsinin məhz Şuşada imzalanması sənədə xüsusi tarixi və mənəvi əhəmiyyət qazandırmışdır.
Şuşa Bəyannaməsi iki ölkə arasında siyasi, iqtisadi, hərbi, enerji, nəqliyyat, humanitar və digər sahələrdə əməkdaşlığın daha da genişləndirilməsini nəzərdə tutur. Sənəd regionda sülhün, sabitliyin və təhlükəsizliyin möhkəmləndirilməsinə, inteqrasiya proseslərinin sürətlənməsinə və qarşılıqlı etimadın güclənməsinə mühüm töhfə verir. Eyni zamanda, hər iki dövlətin beynəlxalq nüfuzunun və strateji mövqelərinin güclənməsinə xidmət edir.
Bəyannamədə qarşılıqlı investisiyaların təşviqi, beynəlxalq münasibətlər sahəsində əməkdaşlığın inkişaf etdirilməsi, müdafiə və təhlükəsizlik məsələlərində birgə fəaliyyət, eləcə də zəruri hallarda qarşılıqlı yardım göstərilməsi kimi mühüm istiqamətlər öz əksini tapmışdır. Müdafiə sənayesi sahəsində əməkdaşlığın genişləndirilməsi ölkələrin hərbi potensialının daha da güclənməsinə şərait yaradır. Həmçinin sənəddə Azərbaycan və Türkiyənin xarici siyasət sahəsində qarşılıqlı fəaliyyətinin əsas istiqamətləri müəyyən edilmişdir.
Bəyannamənin imzalanmasından sonra Şuşada ənənəvi olaraq müxtəlif beynəlxalq tədbirlər və konfranslar keçirilmişdir. Belə ki, Yeni Azərbaycan Partiyasının təşkilatçılığı ilə 2022-ci ilin iyunun 15-də Şuşa Bəyannaməsinin birinci ildönümü münasibətilə “Azərbaycan-Türkiyə strateji müttəfiqlik münasibətləri Qafqaz və region üçün sülh və sabitlik mənbəyidir”, 2023-cü ilin iyunun 15-də “Heydər Əliyev İli” çərçivəsində Milli Qurtuluş Gününə və Şuşa Bəyannaməsinin imzalanmasının ikinci ildönümünə həsr olunmuş “Qurtuluşdan Zəfərə”, 2024-cü ilin iyunun 15-də “Türk Dövlətləri Təşkilatı: geosiyasi reallıqlar və qlobal kataklizmlər fonunda yeni strateji hədəflərə doğru”, 2025-ci ilin iyunun 15-də “Yeni dünya nizamı: geosiyasi aspektlər və qlobal çağırışlar” adlı mühüm beynəlxalq konfranslar təşkil edilmişdir.
Bəli, Şuşa Bəyannaməsi təkcə siyasi sənəd deyil, həm də Azərbaycan ilə Türkiyə arasında sarsılmaz qardaşlığın, dostluğun və strateji tərəfdaşlığın rəmzidir. Bu sənəd iki dövlət arasında müttəfiqliyin ən yüksək səviyyədə olduğunu təsdiqləməklə yanaşı, “Bir millət, iki dövlət” prinsipinin parlaq təcəssümü kimi bütün dünyaya mühüm mesaj verir.

Fərid Ramazanov,
YAP Zaqatala rayon təşkilatının sədri

16/06/2026

15 İyun - Milli Qurtuluş Günü Azərbaycan dövlətçiliyində, Azərbaycan tarixində müstəsna əhəmiyyəti olan bir gündür. Bu tarix xalqımızın yaddaşına qızıl hərflərlə həkk olunmuşdur. Məhz həmin gün Vətənini sevən, çətin günlərin ağrı-acısını yaşamış insanlar üçün ümid və qurtuluş yolu açılmışdır. Həmin günün qürurunu hamımız böyük ehtiramla yaşayırıq.
Sovet İttifaqının süqutundan sonra Azərbaycan mürəkkəb və ağır sınaqlarla üz-üzə qalmışdı. Müstəqil dövlət kimi mövcudluğumuz ciddi təhlükə altında idi. Bir tərəfdən ölkəmizə qarşı həyata keçirilən hərbi təcavüz və torpaqlarımızın bir hissəsinin işğalı, digər tərəfdən isə hakimiyyət uğrunda mübarizə və daxili qarşıdurmalar xalqın gələcəyə olan inamını sarsıtmışdı. O dövrdə ölkədə yaranmış siyasi qeyri-sabitlik, idarəetmədə yol verilən ciddi nöqsanlar və düşünülməmiş qərarlar vəziyyəti daha da ağırlaşdırmışdı. Xarici əlaqələrin zəifləməsi, qonşu dövlətlərlə münasibətlərdə yaranan problemlər Azərbaycanın təcrid olunmasına gətirib çıxarmışdı. Ölkədə xaos və mənəvi tənəzzül müşahidə olunurdu.
Belə bir vəziyyətdən çıxış yolunu axtaran Azərbaycan xalqı xilasını yalnız Heydər Əliyevin simasında görürdü. Dövlətçilik anlayışından bixəbər olan və hərbi birləşmələri əslində öz məqsədləri üçün istifadə edən ayrı-ayrı şəxslərin hədələrindən qorxub gizlənmiş və bu təhlükəli proseslərin qarşısını ala bilmədiyini dərk edən AXC-Müsavat cütlüyü sonda Heydər Əliyevdən imdad istədi.
Xalqın və dövlətin çağırışına cavab verən Ulu öndər Heydər Əliyev hakimiyyətə qayıdaraq ölkənin xilası naminə məsuliyyəti öz üzərinə götürdü. Ulu Öndər 1993-cü il iyunun 15-də Azərbaycan Ali Sovetinin Sədri seçildi. Bununla da Azərbaycan dövləti və dövlətçiliyinin təhlükədən xilas olması üçün əlverişli zəmin yarandı. Onun qətiyyəti, uzaqgörən siyasəti və dövlətçilik təcrübəsi sayəsində Azərbaycan dərin ictimai-siyasi və iqtisadi böhrandan xilas oldu, sabitliyin və inkişafın möhkəm təməli qoyuldu.
Bəli, bütün şüurlu həyatını canından artıq sevdiyi xalqına, Vətəninə həsr etmiş müdrik dövlət xadimi Ulu Öndər Heydər Əliyevin xilaskarlıq missiyası Azərbaycanı məhv olmaqdan, parçalanmaqdan xilas etdi, asayiş və qayda-qanun bərqərar edildi, soyğunçuluğa, vətəndaşların əmlakının qəsb olunmasına son qoyuldu, nizami ordu yaradıldı, Qarabağ müharibəsində atəşkəs əldə edildi, münaqişəsinin dinc yolla nizama salınmasına dair danışıqlara başlandı, idarəetmə sistemi formalaşdırıldı, insanlara öz dövlətinə inamı qaytarıldı, neft müqavilələri imzalandı, Azərbaycanın iqtisadi dirçəlişinin əsası qoyuldu, qanunsuz silahlı qruplaşmaların dövlət çevrilişləri cəhdlərinə son qoyuldu, ilk parlament seçkiləri keçirildi və referendum yolu ilə Konstitusiya qəbul edildi, Azərbaycanın beynəlxalq əlaqələri formalaşdırıldı, ölkənin dünya birliyinə inteqrasiyası prosesi başlandı, siyasi islahatlara start verildi, çoxpartiyalı sistem yarandı. Bir sözlə Ulu öndərin xalqa olan sonsuz sevgisi və xalqın ona göstərdiyi böyük etimad nəticəsində Azərbaycan qısa müddətdə ağır böhran vəziyyətindən çıxaraq tərəqqi yoluna qədəm qoydu.
Bu gün ölkə Prezidenti İlham Əliyev Ümummilli Liderimiz Heydər Əliyevin siyasi kursuna daim sadiq qalaraq müstəqil ölkəmizi inamla uğurlu gələcəyə aparır. Prezident İlham Əliyevin müdrik siyasəti nəticəsində ölkəmiz dinamik inkişaf edir, dünya siyasi arenasında layiqli yer tutur, milli maraqlarımız bütün səviyyələrdə qətiyyətlə qorunur. Azərbaycan qüdrətli, öz prinsipial mövqeyi olan, müstəqil siyasət yeridən ölkə kimi tanınır. Bu gün Müasir Azərbaycan Ulu Öndər Heydər Əliyevin görmək istədiyi azad, müstəqil, ərazi bütövlüyü və suverenliyi tam təmin olunmuş Azərbaycandır. Ulu öndər Heydər Əliyevin ən böyük arzusunu reallaşdıran, ata vəsiyyətini yerinə yetirən Prezident İlham Əliyevin rəhbərliyi ilə bu gün Şuşada, Laçında, Ağdamda, Füzulidə, Cəbrayılda, Zəngilanda, Qubadlıda, Kəlbəcərdə, Xankəndidə üçrəngli bayrağımız əzəmətlə dalğalanır. İşğaldan azad edilmiş torpaqlarda infrastruktur layihələrinin təməli qoyulur, Böyük Qayıdışın reallaşdırılması istiqamətində təxirəsalınmaz tədbirlər həyata keçirilir.
Xalqımız əmindir ki, Cənubi Qafqaz regionunun lider dövləti olan Azərbaycan bundan sonra da böyük uğurlar qazanacaq, öz qüdrətini daha da artıracaq, Prezident İlham Əliyevin rəhbərliyi ilə daha uca zirvələri fəth ediləcəkdir.
Dövlətçilik salnaməmizdə silinməz izlər qoymuş, milli qürur və iftixar mənbəyimiz olan Heydər Əliyevin misilsiz xidmətlərini daim minnətdarlıq hissi ilə xatırlayır, əziz xatirəsini həmişə uca tutur və minnətdarlıqla anırıq.
Bayramınız mübarək!

Arzu Səfərli
Zaqatala Gigiyena və Epidemiologiya Mərkəzinin
direktoru vəzifəsini icra edən

03/06/2026

İyunun 1-də Bakı Ekspo Mərkəzində “Bakı Enerji Həftəsi” çərçivəsində 31-ci Beynəlxalq Xəzər Neft və Qaz Sərgisi “Caspian Oil and Gas”, 14-cü Xəzər Beynəlxalq Təmiz Enerji Sərgisi “Caspian Power” və 31-ci “Baku Energy Forum”un rəsmi açılış mərasimi keçirilib. Müasir Azərbaycanın enerji inkişafının bünövrəsini qoyan və Xəzər Neft və Qaz Sərgisi kimi fəaliyyətə başlayan bu platforma bu gün qlobal enerji gündəliyinin formalaşdığı ən nüfuzlu beynəlxalq tədbirlərdən birinə çevrilib. "Bakı Enerji Həftəsi"nin enerji sənayesinin gələcəyini formalaşdıran əsas prioritetləri müzakirə etmək üçün dövlət başçılarını, nazirləri, qlobal enerji şirkətlərini və sənaye mütəxəssislərini bir araya gətirməsi Azərbaycanın iqtisadi müstəqilliyinin və qlobal nüfuzunun bariz göstəricisidir.
Bu ilki tədbir regional enerji əməkdaşlığına, enerji təhlükəsizliyinə və beynəlxalq bazarlara enerji təchizatının şaxələndirilməsinə əhəmiyyətli töhfələr verən “Şahdəniz” layihəsinin 30-cu ildönümünü qeyd etdiyimiz üçün xüsusi əhəmiyyət kəsb edir. ABŞ Prezidenti Donald Trampın, Türkiyə Prezidenti Rəcəb Tayyib Ərdoğanın və Böyük Britaniyanın Baş naziri Kir Starmerin tədbirə ünvanladıqları müraciətlər də bu tədbirin beynəlxalq əhəmiyyətini nümayiş etdirir.
Azərbaycanın enerji sektoru və bütövlükdə beynəlxalq ictimaiyyət üçün əhəmiyyətli olan bu tədbirdə Azərbaycan Respublikasının Prezidenti cənab İlham Əliyev çıxış edərək nəzakətli məktubuna görə Prezident Trampa minnətdarlıq edib, həmçinin tədbirə məktub göndərmiş Türkiyə Prezidenti Ərdoğana və Birləşmiş Krallığın Baş naziri Starmerə təşəkkürünü bildirib. Uzun illər neft və qaz hasilatı ilə məşğul olan ölkələr və şirkətlərə damğa vurulduğunu və planetin dağıdılmasında ittiham olunduqlarını xatırladan dövlətimizin başçısı Prezident Trampın bu trendi dəyişdiyini diqqətə çatdıraraq bildirib ki, “hazırda qlobal enerji səhnəsində baş verən hallar ABŞ Prezidentinin çox müdrik və praqmatik siyasəti sayəsində ərsəyə gəlmişdir. Hamımız ona bir daha minnətdarıq.”
Bəli, cənab prezidentin vurğuladığı kimi, ölkələr neft və qazın mövcud olmasına görə günahlandırılmalı deyil, çünki neft və qaz digər adi əmtəə kimidir. Hər bir ölkə torpağının təkində və ya dənizinin dibində olanı öz inkişafı üçün istifadə edir. Öz müstəqilliyinin əvvəlində Azərbaycanda məhz belə hal idi. Neft və qaz bizim üçün müstəqil ölkə kimi yaşamağın yeganə yolu oldu. Məhz neft və qaz strategiyası Azərbaycanın iqtisadi dirçəlişinə şərait yaratdı. Enerji resurslarından əldə olunan gəlirlər sosial infrastrukturun inkişafına, təhsil və səhiyyə sisteminin modernləşdirilməsinə, yeni iş yerlərinin yaradılmasına yönəldildi. Bu yol 1990-cı illərin əvvəlində üzləşdiyimiz eyni problemlərdən müəyyən dərəcədə əziyyət çəkən ölkələr üçün örnək olmalıdır.
Bugünki göstəricilər enerji gəlirlərinin səmərəli idarə edilməsinin uğurlu nümunəsidir. Bu gün Azərbaycanın iqtisadi fəaliyyəti çox müsbətdir. Aparıcı beynəlxalq reytinq agentliklərindəki reytinqimiz ildən-ilə artır. Bütün bunlar birinci növbədə bizim təbii sərvətlərimizdən düzgün istifadə etdiyimizə görə baş verdi.
Bakı Enerji Həftəsinin rəsmi açılış mərasimində çıxışı zamanı Azərbaycanın beynəlxalq enerji təhlükəsizliyinə verdiyi töhfələri yenidən gündəmə gətirən prezident İlham Əliyev Bakı-Tbilisi-Ceyhan, Bakı-Supsa, Cənubi Qafqaz Qaz Kəməri, TANAP və TAP kimi nəhəng layihələrin Azərbaycanın təşəbbüsü və liderliyi ilə reallaşdırıldığını, Azərbaycan qazını alan 16 ölkədən 10-unun Avropa İttifaqına üzv olan ölkələr olduğunu vurğulayaraq bildirib ki, “Beləliklə, bizim qlobal enerji təhlükəsizliyinə töhfəmiz, əlbəttə ki, artacaqdır. Düzgün enerji siyasəti bizə Azərbaycandan xaricə sərmayə yatırmağa imkan verdi. Otuz il bundan əvvəl biz investorları cəlb edirdik. İndi isə öz investisiyalarımızla xaricə çıxırıq. Bu gün Dövlət Neft Şirkəti – SOCAR Yaxın Şərq, Afrika və Mərkəzi Asiyaya investisiya yatırır və bu coğrafiya daha da genişlənəcək.”
Dövlət başçısının Bakı Enerji Həftəsinin rəsmi açılış mərasimində cıxışının mühüm məqamlarından biri də Azərbaycanın yaşıl enerji gündəliyinə sadiqliyidir. Prezident İlham Əliyev bildirib ki, mövcud qaz ehtiyatları ölkənin və tərəfdaşlarının enerji tələbatını ən azı növbəti yüz il ərzində təmin etməyə imkan versə də, Azərbaycan bərpaolunan enerji mənbələrinin inkişafını strateji prioritet kimi müəyyənləşdirib. Dövlət başçısı Qarabağ və Şərqi Zəngəzurda həyata keçirilən layihələrin əhəmiyyətindən də bəhs edib. Bununla yanaşı, Qara dəniz Enerji Kabeli və Azərbaycan-Gürcüstan-Türkiyə-Bolqarıstan elektrik ötürmə layihələri ölkəmizin yaşıl enerji ixracatçısına çevrilməsi istiqamətində mühüm addımlardır.
Bakı Enerji Həftəsinin rəsmi açılış mərasimində Prezident İlham Əliyevin çıxışı Azərbaycanın son otuz ildə enerji sahəsində qazandığı uğurların ümumiləşdirilməsi olmaqla yanaşı, ölkənin gələcək enerji strategiyasının əsas konturlarını da ortaya qoydu. Dövlət başçısının səsləndirdiyi fikirlər bir daha göstərdi ki, Azərbaycan bu gün yalnız enerji istehsalçısı deyil, həm də beynəlxalq enerji təhlükəsizliyinin formalaşmasında mühüm rol oynayan etibarlı tərəfdaşdır.

Tacəddin Aslanov
"Şimal-Qərb" Regional Enerji Təchizatı və Satışı İdarəsinin
Zaqatala Elektrik Şəbəkəsinin rəisi

26/05/2026

Mayın 25-də Azərbaycan Respublikasının Prezidenti cənab İlham Əliyevin sədrliyi ilə kənd təsərrüfatı məsələlərinə həsr olunmuş müşavirə keçirilib. Prezident öz çıxışında 2004-cü ildən başlanan Regional İnkişaf proqramlarının tarixi bəhrələrini xatırladaraq kənd təsərrüfatının inkişafının dövlət siyasətinin prioritetlərindən olduğunu vurğulayıb. Son 20 ildə aqrar sahənin inkişafı üçün yaradılmış fundamental şəraiti diqqətə çatdıran prezident İlham Əliyev bu gün də dövlət xətti ilə həyata keçirilən bir çox layihələrin kənd təsərrüfatının inkişafına böyük təkan verdiyini, pambıqçılıq, baramaçılıq və bir çox istiqa¬mətlər üzrə kənd təsərrüfatı məhsullarının istehsalında böyük artım olduğunu diqqətə çatdırıb. Ancaq buna baxmayaraq, kənd təsərrüfatı istehsalındakı cari dinamikanın qənaətbəxş olmadığını vurğulayan dövlət başçısı bu sahənin köklü şəkildə yenidən qurulması üçün hökumət və fermerlər qarşısında mühüm vəzifələr qoyub.
Müşavirədə şəhərlərdən kəndlərə qayıdış prosesinin başlanmasının vacibliyini qeyd edən prezident İlham Əliyev bu amilin - Bakıda keçirilmiş Ümumdünya Şəhərsalma Forumunun müzakirələrində də öz əksini tapdığını və bunun təkcə ölkəmiz üçün deyil, bütün ölkələr üçün xas olan mənfi meyil olduğunu bildirib.
Azərbaycanın daxili bazarı yerli məhsullarla təmin etmək imkanlarının genişləndirilməsi müşavirənin ana xəttini təşkil edib. İstehsalımızla bağlı özümüzü təminetmə əmsalı və bəzi rəqəmləri açıqlayan Prezident İlham Əliyev bildirib ki, “Bu rəqəmləri mən qeyd etdiyim kimi, investorlar üçün səsləndirirəm və onları dəvət edirəm ki, bizdə bu gün idxal olunan məhsulların istehsalına onlar töhfə versinlər.”
Müşavirədə cənab prezident tor¬¬paq¬lardan səmərəli istifadə olunmasının, hər bir əkin üçün yararlı torpaq sa¬həsinin öz pasportu olmasını, kənd təsərrüfatı texnikası ilə təminatın yüksəldilməsinin, gübrə is¬teh¬salının artırılmasının zəruriliyini də diq¬qətə çat¬dırıb. Dövlətimizin başçısı iqlim dəyişikliyinin kənd təsərrüfatına təsirini qeyd edərək, su anbarlarında toplanan suyun bu il kənd təsərrüfatı üçün yaradacağı imkanları vurğulayıb.
Müasir suvarma sistemlərinin genişləndirilməsinin məhsuldarlığın artırılmasında həlledici olacağını qeyd edən prezident İlham Əliyev bildirib ki, “Müasir suvarma sistemləri hazırda, - bu da dövlətin dəstəyi ilə mümkün olub, -130 min hektarda tətbiq olunur. Məqsəd bunu 300 min hektara çatdırmaqdır. Əgər bizim 300 min hektarda müasir suvarma sistemləri qurularsa, baxın, nə qədər məhsuldarlıq arta bilər.”
Azərbaycan Respublukasının Prezidenti İlham Əliyev müşavirədə Kənd Təsərrüfatı Nazirliyinin, Hökumətin, Prezident Administrasiyasının, İqtisadiyyat Nazirliyinin və digər qurumla¬rın fəal işləməsinin zəruriliyini də qeyd edib.
Müşavirənin ən mühüm nəticələrindən biri “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın təsdiqlənməsidir. Genişmiqyaslı dəyişiklikləri hədəfləyən bu proqram özəl sektorun aqrar sahəyə marağını daha da artıracaq. Bununla yanaşı sahə üzrə istehsalın ixtisaslaşmasını və rəqabətə davamlılığını təmin edəcək.
Dövlət başçısının nümayiş etdirdiyi qətiyyətli mövqe, tənqidi və real yanaşma, eləcə də qarşıya qoyulan aydın vəzifələr yaxın illərdə ölkəmizdə ərzaq təhlükəsizliyinin tam təmin olunmasına, modern və rəqəmsal kənd təsərrüfatının formalaşmasına rəvac verəcəkdir.

Vaqif Şabanov
Zaqatala DAİM direktoru

25/05/2026

28 may 1918-ci ildə Azərbaycan xalqı öz tarixi taleyinə sahib çıxaraq, Şərqdə və müsəlman dünyasında ilk demokratik, hüquqi və dünyəvi parlament respublikasını-Azərbaycan Xalq Cümhuriyyətini yaratdı. Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla xalqımızın müstəqillik əzmini, siyasi iradəsini, öz müqəddəratını təyin etməyə qadir olduğunu bütün dünyaya nümayiş etdirdi.
Cəmi 23 ay mövcud olmuş Azərbaycan Xalq Cümhuriyyəti müsəlman Şərqində demokratiya ənənələrinin formalaşmasına əhəmiyyətli təsir göstərdi, qısa dövr ərzində Azərbaycanın ilk parlamenti, hökuməti yaradıldı, dövlət atributları təsis olundu, dövlət quruculuğu sahəsində mühüm tədbirlər həyata keçirildi. Azərbaycan vətəndaşlığı institutu təsis olundu, Milli Ordu formalaşdırıldı, dövlətin hüquqi əsasları yaradıldı. Eyni zamanda irqi, dini və sosial mənsubiyyətindən asılı olmayaraq bütün vətəndaşlara bərabər hüquqlar tanındı. Qısa müddət ərzində olduqca mütərəqqi sayılan müddəaları özündə əks etdirən çoxsaylı qanunlar qəbul olundu.
Azərbaycan Xalq Cümhuriyyəti hökumətinin xarici siyasətinin başlıca məqsədi yeni yaradılmış dövləti dünyaya tanıtmaq idi. Milli hökumətin qarşısında dayanan əsas vəzifələrdən biri Paris Sülh Konfransında müttəfiq dövlətlər tərəfindən Azərbaycan Xalq Cümhuriyyətinin tanınmasını, habelə dünyanın aparıcı dövlətləri ilə diplomatik əlaqələrin yaradılmasını təmin etmək idi. Dünya birliyi tərəfindən tanınan Xalq Cümhuriyyətinin fəaliyyəti sayəsində ölkəmizin beynəlxalq hüququn subyekti olması 1920-ci ilin aprel ayında bolşevik işğalından sonra Azərbaycanın bir dövlət kimi dünyanın siyasi xəritəsindən silinməsinin qarşısını aldı.
“Azərbaycan Respublikasının dövlət müstəqilliyi haqqında” Konstitusiya Aktı 1991-ci il oktyabrın 18-də qəbul olunmuşdur. Konstitusiya Aktında 1918-ci il 28 may tarixli İstiqlal Bəyannaməsinə istinad olunmuş və Azərbaycan Respublikasının Azərbaycan Xalq Cümhuriyyətinin varisi olduğu təsbit edilmişdir.
Azərbaycan Xalq Cümhuriyyətinin üçrəngli Dövlət bayrağı 1990-cı il noyabrın 17-də Naxçıvan Muxtar Respublikası Ali Məclisinin sədri, xalqımızın Ümummilli Lideri Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı olaraq təsdiq edilmişdir. Bununla da müstəqilliyə gedən yolun əsası qoyuldu. Sovet İttifaqının mövcud olduğu bir vəziyyətdə belə cəsarətli addımın atılması Ulu Öndərin xalqına, dövlətinə nə qədər bağlı olduğunu, bu yolda nə qədər cəsarətli olduğunu bir daha göstərdi.
XX əsrin sonlarında müstəqilliyinə yenidən qovuşan Azərbaycan suverenliyini qoruyub saxlamağı bacardı. Daxili qarşıdurmaların, dərin siyasi böhranın və torpaqlarımızın işğal təhlükəsinin p*k həddə çatdığı bir vaxtda xalqın təkidli tələbi ilə hakimiyyətə qayıdan Ulu Öndər Heydər Əliyev Azərbaycan dövlətçiliyinin qorunması üçün qətiyyətli tədbirlər gördü, ölkədə davamlı ictimai-siyasi sabitliyi bərqərar etdi. Bu tarixi qayıdış dövlət müstəqilliyimizin əbədiliyini təmin etdi və müasir Azərbaycanın inkişafının, həmçinin torpaqlarımızın işğaldan azad olunmasının təməlini qoydu. Kiçik bir ölkə Ulu Öndər Heydər Əliyevin uğurlu siyasəti sayəsində dünyada tanınan nüfuzlu bir dövlətə çevrildi.
Milli müstəqillik yolu bu gün Prezident İlham Əliyevin rəhbərliyi ilə tamamilə yeni bir mərhələyə qədəm qoymuş, həyata keçirilən sistemli islahatlar Azərbaycanın demokratik, hüquqi və dünyəvi dövlət kimi mövqeyini möhkəmləndirmişdir.
Azərbaycan Xalq Cümhuriyyətinin yadigarı olan üçrəngli bayrağımız bu gün artıq işğaldan azad olunmuş torpaqlarda azadlıq və suverenliyin simvolu kimi dalğalanır. Bu, yalnız hərbi-siyasi qələbənin yox, həm də dövlətçilik əmanətinə sadiqliyin göstəricisidir.
Azərbaycan Xalq Cümhuriyyətinin dövlətçilik fəlsəfəsinə sadiqliyinin mühüm göstəricilərindən biri də 2007-ci ildə Bakının İstiqlaliyyət küçəsində ucaldılmış İstiqlal Bəyannaməsi abidəsidir. Bu tarixi sənədin rəmzi olaraq əbədiləşdirilməsi Prezident İlham Əliyevin milli yaddaşın formalaşdırılması istiqamətində həyata keçirdiyi ardıcıl siyasətin mühüm parçasıdır. Prezident İlham Əliyevin Azərbaycan Xalq Cümhuriyyətinin 90 illik və 100 illik yubileylərinin keçirilməsi haqqında sərəncamları, 2018-ci ilin ölkəmizdə “Azərbaycan Xalq Cümhuriyyəti İli” elan edilməsi, Azərbaycan Respublikasının 2018-ci il 1 may tarixli Qanunu ilə “Azərbaycan Xalq Cümhuriyyətinin 100 illiyi (1918-2018)” yubiley medalı”nın təsis olunması Azərbaycanın dövlətçilik tarixində çox mühüm və şərəfli bir mərhələ olan Şərqdə ilk parlamentli respublikanın əhəmiyyətinin hər zaman uca tutulduğunun sübutudur.
2021-ci il 15 oktyabr tarixində “Müstəqillik günü haqqında” Azərbaycan Respublikasının Qanunu ilə 28 may tarixinin Müstəqillik Günü, 18 oktyabr tarixinin isə Müstəqilliyin Bərpası Günü kimi təsbit olunması Azərbaycanın dövlət suverenliyinin məhz 1918-ci ildə bərqərar olunması faktına əsaslanır. Bu, ərazi bütövlüyünü bərpa etmiş müasir Azərbaycanın 1918-ci ildə qurulmuş Azərbaycan Xalq Cümhuriyyətinin tamhüquqlu varisi olduğunu göstərir.
Yaşasın güclü, müstəqil Azərbaycan!

Famil Rəhimov
Zaqatala Heydər Əliyev Mərkəzinin direktoru

Zaqatala rayon MKS-nin Faldarlı kənd kitabxana filialı

22/07/2026

07/07/2026

24/06/2026

16/06/2026

16/06/2026

03/06/2026

26/05/2026

25/05/2026

Address

Website

Alerts

Shortcuts

Share

Category

Listing takedown request