Burundi Ministère des Finances

16/07/2026

Kuri uyu wa 14 Mukakaro 2026, Umushikiranganji wa mbere, Nestor Ntahontuye, yaratanguje ku mugaragaro igikorwa ca rusansuma y’amatongo, ibibanza biri mu bisagara hamwe na benevyo.

Mw’ijambo ryo gutanguza ku mugaragaro ibikorwa, Umushikiranganji wa mbere yibukije ko iterambere ry’ibisagara ridashobora gutegurwa neza hatari amakuru akwiye kandi yizewe ku matongo n’inyubakwa. Yasavye abenegihugu, abajejwe intwaro n’izindi nzego gukorana neza n’abakozi ba rusansuma kugira iki gikorwa gitange umwimbu igihugu gikeneye.

Mw’ijambo ryiwe, Dr Alain Ndikumana, umushikiranganji w’ikigega ca Reta, ubutunzi n’iterambere rishingiye ku buhinga bwa none, akaba n’umukuru w’umurwi uriko utegura ico gikorwa, yamenyesheje ko iyo rusansuma izofasha Reta kuronka amakuru yizewe ku matongo, ibibanza n’inyubakwa biri mu bisagara. Ayo makuru azorushiriza gufasha mu gutegura neza ibisagara, inyubakwa rusangi, amabarabara, amavuriro, amashure n’ibindi bikorwa bihuye n’ivyipfuzo vy’abenegihugu.

Yamenyesheje kandi ko urwo rusansuma ruzofasha mu kwegeranya amakuru azotuma inzego zibijejwe zifata ingingo zishingiye ku makuru y’ukuri no kunagura uburongozi bw’igisata c’amatongo.

Nk’uko vyashikirijwe na Nicolas Ndayishimiye, arongoye Ikigo INSBU, muri ico gikorwa hazokwifashishwa ubuhinga bwa none mu kwegeranya no kubika amakuru, mu ntumbero yo kuyagira ayizewe no kuyacungera neza. Ibibanza bizoba biri mu matati na vyo bizokwandikwa, hanerekanwe aho urubanza ruzoba rugeze ku musi wa rusansuma.

Umushikiranganji Ndikumana yahumurije abenegihugu ko iki gikorwa kitaje kwaka umuntu itongo canke kurihereza uwundi.
Yamenyesheje kandi ko kitaje gukuraho intambuko zihasanzwe zo kwandikisha amatongo, canke ngo kigire ico gihindura mu bikorwa vy’igisata c’ubutungane mu gihe itongo riri mu matati.
Igikorwa ca mbere kizotangurira mu makomine ya Mugere, Mukaza na Ntahangwa zo mu Ntara ya Bujumbura, hamwe no muri komine ya Ngozi mu ntara ya Butanyerera, Rumonge mu ntara ya Burunga na Gitega mu ntara ya Gitega. Inyuma y’ico gice ca mbere, rusansuma izobandanya no mu yindi mihingo igize igihugu.

Ba buramatari, ba musitanteri, abatwara ama zone hamwe n’abenegihugu bahamagariwe gukorana neza n’abazorangura ico gikorwa kugira kigende neza. Iyo rusansuma izofasha mu guteza imbere ibisagara no gushigikira ishirwa mu ngiro ry’Imbonakazoza y’Uburundi yo kuba igihugu cifashe mu mwaka wa 2040 n’igihugu giteye imbere mu mwaka wa 2060.

10/07/2026

Ubwenge mvaruganda (Intelligence Artificielle) hamwe n'ubuhinga bwa none birashobora guterera mu kuzana impinduka iboneka mu buzima bw'abenegihugu.

‎ Umushikiranganji w'ikigega ca reta, ubutunzi n'iterambere rishimikiye ku buhinga bwa none, Dr Alain Ndikumana, yaserukiye Uburundi mu nama mpuzamakungu ya WSIS na AI for Good 2026, yabereye i Genève mu gihugu c’Ubuswise. Mu nama yahuje abashikiranganji b'ibihugu bitandukanye, haraciwe irya n’ino ibijanye n’ubwenge mvaruganda, iterambere ririko rizanwa n’ubuhinga bwa none, inyubako zijanye n’ubwo buhinga hamwe n’ingene izo mpinduka zose atawe zosiga inyuma canke ngo zikumire.

Mu butumwa yashikirije, umushikiranganji Alain Ndikumana yarerekanye ingene Uburundi, mu mbonokazoza yabwo, bwipfuza gukoresha ubuhinga bwa none buza busahiriza bikomeye iterambere, mu ntumbero yo gushika muri 2040, igihugu cifashe, nayo muri 2060 kikaba giteye imbere.

Yabandanije yerekana ko ubwenge mvaruganda bukwiye kuza buterera mu gukemura ibibazo bitandukanye bihanze abeneguhugu mu bisata bitandukanye, harimwo nk'igisata c'amagara y'abantu, igisata c'indero, uburimyi, guteza imbere ubutunzi no gushigikira urwaruka .

‎Umushikiranganji ndikumana yasiguye kandi ingene gukoresha ubuhinga bwa none mu gukurikirana amatungo ya Reta bishobora gufasha kwegeranya amakori n'amatagisi, gukoresha neza amafaranga y'igihugu no gukomeza icizere abenegihugu bafitiye Reta.

‎Mu gusozera, yasavye ko ibihugu bikiri mu nzira y'amajambere nk' Uburundi vyoshigikirwa cane mu vy'ubuhinga bugezweho mu gutanga inyigisho ku bazobukoresha, mu ntumbero yuko ata wusigara inyuma mu rugendo rw'iterambere.

28/06/2026

Umushikiranganji w'ikigega ca Reta, ubutunzi n'iterambere rishingiye ku buhinga bwa none, Dr Alain Ndikumana, yarahaye umubonano umupfasoni Violet Kakyomya, umuhuzabikorwa w’ibisata vyegamiye ishirahamwe mpuzamakungu ONU mu Burundi.

Mu biganiro bagiranye, barimbuye ingene hotsimbatazwa ugufashanya hagati ya Reta y’Uburundi n’ibisata bitandukanye vy’ishirahamwe mpuzamakungu ONU bikorera mu Burundi, cane cane mu bijanye n’uburyo bwo guterera imigambi y’iterambere.

Muri uwo mubonano, Umushikiranganji Ndikumana yibukije ko ibikorwa vy’abafatanyabikorwa mw'iterambere bikwiye kwisunga imigambi n’intumbero Reta y’Uburundi yashizeho. Yashimikiye kandi ku kamaro ko guhuza neza ibikorwa vyose kugira ngo ntihagire aho basanga hari imigambi ibiri canke irega isa, yose iriko ishirwa mu ngiro ahantu hamwe. Uburyo bukoreshwe neza, kandi imigambi y’iterambere ishobore gushikira igihugu cose mu buryo bungana.

Umushikiranganji yongeye arashimangira ko ari ngombwa ko Reta iguma ironka amakuru yose kandi ku gihe, ku bijanye n’imigambi itegekanijwe, ibisata izokorerwamwo hamwe n’uburyo izotwara.

Ivyo bizofasha gukurikirana neza ishirwa mu ngiro ryayo, gutuma ibikorwa vyunganirana no kurushiriza kwongereza akamaro kavyo ku benegihugu, hisunzwe intumbero ziri mu mbonokazoza y'Uburundi bwifashe mu mwaka wa 2040 kandi buteye imbere mu mwaka wa 2060.

28/06/2026

Kuri uyu wa 26 Ruheshi 2026,umushikiranganji w'ikigega ca Reta, ubutunzi n'iterambere rishimikiye ku buhinga bwa none, Dr Alain Ndikumana, yahaye umubonano intumwa z'ibanki y'isi zari zirongowe na Chenjerani Simon B., Umuyobozi aramutswa igisata kijejwe ivyo gutanga amasoko, ari kumwe na Babacar Faye, aserukira ibanki y'isi mu Burundi.

Mu vyo bayaze, harimwo uburyo borushiriza kunagura ishirwa mu ngiro ry'imigambi ifatwa mu mugongo n'ibanki y'isi, gukomeza uburyo bwo gutanga amasoko ya Reta hisunzwe amategeko , hamwe no kunyarutsa ikoreshwa ry'amafaranga agenewe iyo migambi kugira ngo ibikorwa vy'iterambere birangurwe neza ku neza y'abenegihugu.

Umushikiranganji Ndikumana yashimikiye cane ku kamaro ko gutegura imigambi neza kuva mu ntango, kugabanya umwanya uhera hagati yo kuyitegura no kuyishira mu ngiro, hamwe no gukomeza guhuza ibikorwa hagati y'ubushikiranganji butandukanye, inzego zijejwe gushira mu ngiro imigambi hamwe n'abafatanyabikorwa mu vy'iterambere, kugira ngo imigambi irangurwe ku gihe kandi itange umwimbu ushimishije.

Umushikiranganji yamenyesheje kandi ko Reta y'Uburundi igeze ku ntambwe ishimishije mu gushiraho uburyo bwo gutanga amasoko hakoreshejwe ubuhinga bwa none (e-Procurement). Ubu buryo buzotuma ibikorwa birushiriza gukorwa mu muco, bikurikiranwe neza, bigabanye umwanya vyahora bifata, kandi bihe amahirwe n’amashirahamwe matomato yo guhiganirwa amasoko ya Reta.

Uyu mubonano uje ushimangira inkingi y'Imbonakazoza y'Uburundi bwifashe muri 2040 kandi buteye imbere mu mwaka wa 2026, ishimikiye ku kwubaka inzego zikomeye kandi zikora neza, zishingiye ku bikorwa bitanga inyishu ziboneka kandi zifitiye akamaro abenegihugu.

28/06/2026

🤔 Ni gute twokoresha ubuhinga bwa none mu kworohereza abenegihugu mu buzima bwabo bwa misi yose ?

Ni mu ntumbero yo gutorera inyishu ico kibazo ibihugu vy’akarere ka Afrika y’Ubuseruko vyahuye kuri uyu wa 23 Ruheshi 2026 mu nama mpuzamakungu yiswe East African Community Digital for Development Forum, yabereye i Arusha mu gihugu ca Tanzaniya.
Uburundi bukaba bwari bwaserukiwe n’umuyobozi mukuru ajejwe iterambere rishimikiye ku buhinga bwa none mu bushikiranganji bw’ikigega ca reta, ubutunzi n’iterambere rishimikiye ku buhinga bwa none, umupfasoni Odely Ndiho.

Iyo nama ikaba yitabiriwe n’abafatanyabikorwa mw' iterambere, amashirahamwe yo mu karere hamwe n’abikorera ivyabo.

📌 Mu kiganiro cari cerekeye ibikorwa Reta ikora hifashishijwe ubuhinga bwa none, Odely Ndiho yavuze ko impinduka zishingiye ku buhinga bwa none zidakwiye kugarukira ku mipaka y’igihugu kanaka.

Yavuze kandi ko kugira ngo ibikorwa vya Reta bifashe neza abenegihugu, amashirahamwe n’inzego za Reta, ibihugu vyose vya EAC bikwiye kuba vyoshobora guhanahana amakuru mu buryo bworoshe, bubanguka kandi bwizewe.

Ni muri iyo ntumbero Uburundi bwasavye ko ivyo bikorwa vyokomezwa, hakajaho amategeko agenga ihanahana ry’amakuru hagati y’ibihugu bigize EAC, mu ntumbero yo gukingira amakuru no gutsimbataza ukwizigirana kw'ibihugu vyompi mu vyerekeye ubuhinga bwa none.

Ivyo bizotuma:
1. Uruja n’uruza rw’abantu mu karere rworoha;
2. Ubudandaji hagati y’ibihugu bwihuta, mu gihe ibikorwa vyari bisanzwe bitebera mu mpapuro;
3. Bizotuma abenegihugu baronswa vyoroshe kandi vyihuse ubufasha atandukanye atangwa na Reta z’ibihugu vyo mu karere ,
4. Bikazotuma kandi ubucuti hagati y’ibihugu burushiriza gukomera.

Mu kwitabira iyi nama, Uburundi bwongeye kwerekana ko bwiyemeje gutanga intererano yabwo mu kwubaka akarere ka Afrika y’Ubuseruko biciye mu buhinga bwa none, mu ntumbero yo kworohereza umwenegihugu mu gihe buriko bwerekeza mu mbonakazoza 2040-2060.

26/06/2026

Kuri uyu wa 26 Ruheshi 2026, Umushikiranganji w’Ikigega ca Leta, Ubutunzi n’Iterambere rishingiye ku buhinga bwa none, Dr Alain Ndikumana, yakoresheje inama yo kurimbura no gusuzuma intambwe igihugu kigezeko mu gushira mu ngiro integuro y'amafaranga y’umwaka wa 2025–2026 mu gihe uwo mwaka uriko urasozerwa.

Muri iyo nama, hisunzwe cane cane kuraba urugero ibikorwa vyategekanijwe vyarangutseko, hamwe n’amadosiye atarashobora kurangizwa kugira hafatwe ingingo yo kuyabandanya mu mwaka w’amafaranga uza gutangura kw’igenekerezo rya 1 Mukakaro 2026.

Iyo nama ni imwe mu zigize imyiteguro yo kwinjira neza mu mwaka mushasha w’amafaranga, ikagira n’intumbero yo gucungera neza amatungo ya Reta , gukoresha neza uburyo bw’igihugu no gutuma ibikorwa vya Reta bibandanya ata nkomanzi.

Iyo nama yari yitabwe n’abaserukira inzego nkuru nkuru zose zo mu bushikiranganji zifise uruhara mu gukoresha no mu gucungera amafaranga ya Reta.

26/06/2026

26/06/2026

Ubuhinga bwa none ntibukwiye kuguma ari urubuga rw’abahinga bonyene. Bukwiye kuba igikoresho gifasha gutorera inyishu ibibazo vyugarije igihugu n’abenegihugu, haba mu guteza imbere indero n’inyigisho, kugwiza umwimbu n’ubudandaji, gufasha urwaruka kwijukira imirimo, kworohereza abenegihugu kuronka ivyankenerwa muvy’ubutunzi, hamwe no kunagura ibikorwa vya Reta.

Ni muri iyo ntumbero, kuri uwu wa 24 Ruheshi 2026, Umunyamabanga Ntayegayezwa mu bushikiranganji bw'ikigega ca Reta, ubutunzi n'iterambere rishimikiye ku buhinga bwa none, Francine Inarukundo, yuguruye ku mugaragaro ihuriro rigira gatandatu ryiswe "JUNETECH 2026 " ryabereye i Bujumbura.

Iri huriro ryateguwe n'ubushikiranganji bw'ubutunzi bufadikanije n’Ibanki y’Isi yose biciye mu mugambi PAFEN, rikaba ryahuriyemwo ibigo vya Reta n’ivyigenga, za kaminuza, ibigo vy’ubushakashatsi, abafatanyabikorwa mw’iterambere ry’igihugu, abarwizatunga, amashirahamwe y’urwaruka akoresha ubuhinga bwa none, kucivugo kivuga kiti : « Gufashanya gutora inyishu ku bibazo kugira ngo habe iterambere rirama ».

Mu butumwa yashikirije yugurura iryo huriro, Umunyamabanga Ntayegayezwa yibukije ko ihinduka rifatiye kw'ikoreshwa ry’ubuhinga bwa none ariryo nkingi ikomeye mu guteza imbere ubutunzi n’imibano vy’igihugu. Yashimangiye ko ingorane ziri mu gisata c’indero, amagara y’abantu, uburimyi, ugushikira ibikorwa vy’ubutunzi, intwaro ibereye hamwe n’akazi k’urwaruka zisaba inyishu nshasha zishingiye ku gufashanya hagati ya Reta, abikorera utwabo, abafatanyabikorwa mw’iterambere hamwe n’urwaruka.

Abitavye iryo huriro bagarutse ku ntambwe zimaze guterwa mu gisata c’ubuhinga bwa none. Aho ubu mu Burundi haharurwa abarenga imiriyoni 8,4 bakoresha amaterefone ngendanwa, ivyo bikaba bingana n’ibice 72,25 % vy’abenegihugu. Izo ntambwe n’umushinge ukomeye wo kwihutisha kwagura ibikorwa vy’ubuhinga bwa none no kurondera inyishu ku bibazo bihanze abenegihugu.

JUNETECH 2026 irashimangira kandi kuciyumviro gihambaye c’uko urwaruka rw’Uburundi atari urukoresha gusa ubuhinga bwa none, ahubwo ko rushobora no kuba ururema, urutanguza kandi rugatanga inyishu zifitiye akamaro igihugu. Biciye mu mashirahamwe y’urwaruka, ibigo bibafasha gutsimbataza ivyiyumviro bishasha, hamwe n’imigambi yerekanywe mur’ri huriro, urwaruka rw’abarundi ruriko rwerekana uruhara rwabo mu gisata c’ubwenge mva ruganda (Intelligence Artificielle), uburimyi bujanye n’ubuhinga bwa none, ibikorwa vy’ubutunzi bikorwa hakoreshejwe ubuhinga bwa none hamwe no kwigira ku buhinga bwa internet.

Kuba ubuhinga bwa none n’ubutunzi bushingiye kur’ubwo buhinga, vyarinjijwe mu bikorwa vy'ubushikiranganji bw'ubutunzi bikaba vyerekana ishaka rya Reta ryo kubugira imwe mu nkingi z’impinduka ry’igihugu, gushira bose mu nzira y’iterambere no gukomeza ubushobozi bw’Uburundi bwo guhiganwa n’ibindi bihugu, mu ntumbero yo gushika kumbonokazoza y'igihugu cifashe mu mwaka wa 2040 kandi giteye imbere mu mwaka wa 2060.

22/06/2026

Ku wa 22 Ruheshi 2026, Umwunganizi w’Umushikiranganji w’ikigega ca Reta, ubutunzi ,n'iterambere rishimikiye ku buhinga bwa none, Isidora Ntakiyiruta yahaye umubonano Upender Singh Rawat aserukira Igihugu c'Ubuhindi mu Burundi.

Muri uwo mubonano, Upender Singh Rawat yerekanye uko Ubuhindi bwoshobora guterera mu gusangiza Uburundi ubumenyi bwofasha mu guteza imbere ibikorwa vya Reta biciye mu buhinga bwa none hamwe no guteza imbere ishirwa mu ngiro ry'imigambi y’ubutunzi bw' Ibihugu vyompi.

Yerekanye kandi icipfuzo co gutsimbataza ubufatanyabikorwa ku vyerekeye ikoreshwa ry’ubuhinga bwa none, cane cane mu bijanye n’ikarata ndangamuntu ikoze ku buhinga bwa none (Identité numérique) hamwe n’uburyo bwo kuriha hakoreshejwe ubuhinga bwa none (Paiement éléctronique), afatiye ku ntambwe igihugu c' Ubuhindi kimaze gutera muri ivyo bisata.

Umupfasoni Isidora Ntakiyiruta yashimye ivyo vyiyumviro vyashikirijwe, yongera amenyesha ko bihuye n’imigambi y’Uburundi yo guteza imbere ibikorwa vya Reta hakoreshejwe ubuhinga bwa none.

Uyo mubonano wanabaye akaryo keza ko kugaruka ku bucuti n’imigenderanire myiza bisanzwe biranga ivyo bihugu mu kurangura imigambi y’iterambere, harimwo nk'akarorero umugambi w’urugomero rw’umuyagankuba rwa Kabu 16.

12/06/2026

Abashikiranganji bagize Reta y’Uburundi bahuriye i Gitega kuri uno wa 11 Ruheshi 2026 mu kiganiro co kwishura ibibazo vy’abamenyeshamakuru hamwe n’abenegihugu .

Mu gihe c’amasaha hafi ane, abashikiranganji bariko barishura ibibazo vy’abamenyeshamakuru n’abenegihugu ku bijanye n’ibikorwa vya Reta, impinduka ziriko zirashirwa mu ngiro hamwe n’ivyo igihugu gishira imbere mu migambi y’iterambere.

Mw'ijambo ry'intangamarara ryuguruye ico kiyago, Umushikiranganji wa mbere wa Reta y'Uburundi Nestor Ntahontuye,yagarutse ku ntumbero nyamukuru z’ibikorwa vya Reta, harimwo ishirwa mu ngiro ry’uburyo bushimikiye ku migambi (budget-programme), kwegereza ibikorwa vya Leta abanyagihugu, hamwe n’ingingo zimaze gufatwa mu bisata vy’indero, ubutungane, amagara y’abanyagihugu n’iterambere ry’abenegihugu .

Yibukije kandi ko ico kiganiro kiri mu ntumbero yo gukomeza ugutanga icegeranyo ku bikorwa vya Reta, guhanahana ivyiyumviro ata nkomanzi n’abenegihugu no gukurikirana ishirwa mu ngiro ry’imigambi yasezeranywe, bihuye n’ihangiro ry’Igihugu riri mu mbonokazoza y'Uburundi bwifashe muri 2040, n’Uburundi buteye imbere muri 2060.

Yishura ikibazo cerekeye umugambi wo kwubaka ku kibanza cahoze ari isoko nkuru ya Bujumbura, Umushikiranganji w’Ikigega ca Reta, Ubutunzi n’Iterambere rishimikiye ku Buhinga bwa none, Dr Alain Ndikumana , yatanze umuco ku buryo Reta yahisemwo gushira mu ngiro uwo mugambi.

Yamenyesheje ko uwo mugambi uzorangurwa biciye mu bufatanye hagati ya Reta n’abikorera utwabo(Partenariat Public-Privé), aho uruhande rwa Reta ruzoserukirwa na Banki y’urwaruka (BIJE), mu gihe uruhande rw’abikorera utwabo ruzoserukirwa na "One Africa Fund Investment."

Ivyo bisata vyompi vyarashizeho ishirahamwe rihuriweko ryitwa "Ubaka Landmarks", rizoba rifise intumbero yo gushira mu bikorwa uwo mugambi. Muri iki gihe, inzego zizorirongora ziriko ziratunganywa kugira ngo igice ca mbere c’ibikorwa gitangure mu buryo nyabwo.

Umushikiranganji Alain Ndikumana , yahumurije kandi abantu bashize imitahe yabo muri One Africa Fund Investment, amenyesha ko uwo mugambi ucungerewe kandi ukurikiranywe n’inzego zibifitiye ububasha, na cane cane ko na Reta ubwayo iwufisemwo uruhara biciye ku mahera yashizemwo.