Sénat Burundi (2026)

16/08/2026

Kuri uyu wa gatandatu, igenekerezo rya 15 Myandagaro 2026, Icegera ca Mbere c'Umukuru w'Inama Nkenguzamateka, Nyakwubahwa Générose NGENDANGANYA, yifadikanije n'abandi bakristu ba Ekreziya Gatorika baje bava mu mihingo itandukanye y'igihugu n'abanyamahanga, mu guhimbaza umusi mukuru w'iyurizwa mw'ijuru rya Bikira Mariya, muri Diyoseze nkuru ya Gitega, ku kirimba citiriwe "Umushaha Mweranda wa Bikira Mariya i Mugera".

Mu nsiguro y'ijambo ry'Imana, Umwepiskopi Mukuru wa Diyoseze Nkuru ya Gitega, Musenyeri Bonaventure NAHIMANA, yamenyesheje ko Bikira Mariya yabaye mu bigishwa ba mbere ba Yezu Kristu ku rugero ruhebuje, kuko yakingiwe igicumuro, ndetse akaba umwizero utayegayega, ko n'abantu b'intege nke bazorokoka urugamba rwo kugwanya inabi, ikwega urupfu. Ngo ni co gituma ari akarorero n'umukandizi, abakristu bakamenya ko urugendo barimwo ari uruzobashikana mw'ijuru.

Mu gihe Igihugu c'Uburundi cimirije Amatora y'Umukuru w'Igihugu mu mwaka uza w'2027, Musenyeri Bonaventure NAHIMANA yamenyesheje ko abakristu bahuriye muri ico Kirimba ca Bikira Mariya, mu gihe Igihugu kiriko kiritegurira ayo matora, kugira bashikirize igisabisho bagitura Imana biciye kuri Bikira Mariya ari we Mugabekazi w'amahoro, harimwo gusabira amatora yimirije, akagira ati: "Twisabira twebwe nyene kuko ni twebwe tuyitaba, ni twebwe tuyatuganya, kugira azoshobore kuranguka mu mahoro no mu mutekano, azodufashe gutsimbataza amahoro no gutera imbere mu nzira yo gusubiza hamwe no kurekuriranira".

Ivyo kugira bishoboke, Musenyeri Bonaventure NAHIMANA avuga ko bisaba ko abarundi bagamburukira amabwirizwa y'Imana, kwubahana no gusoneranira, kwirinda kubesha no kwiba.

14/08/2026

Kuri uyu wa gatanu, igenekerezo rya 14 Myandagaro 2026, ku biro vy'Umugambi w'Ishirahamwe Mpuzamakungu rijejwe Iterambere "PNUD" biri muri Komine Mukaza, intara ya Bujumbura, Inama Nkenguzamateka yaronkejwe ingabire y'imiduga ibiri izofasha urwo Rwego gushigikira ibikorwa vyarwo vya misi yose no gukurikirana ishirwa mu ngiro ry’Umugambi wa Reta wo kwegereza ubutegetsi abenegihugu.

Aherekejwe na bamwe mu bakozi bo mu Nama Nkenguzamateka, Umunyamabanga Mukuru wayo, Amb.Isabelle NDAHAYO, yakengurutse iyo ngabire ije gushigikira ibikorwa vy'abakenguzamateka vyo kwegera abenegihugu babashize imbere.

Nyakwubahwa Isabelle NDAHAYO yarangije yizeza Umupfasoni Emma N'Gouan-Anoh arongoye PNUD, ko Inama Nkenguzamateka izokoresha neza yongere ibungabunge iyo miduga.

Yarangije amumenyesha ko Inama Nkenguzamateka izokwubahiriza ibiri mu masezerano basinyiraniye azofasha mu guteza imbere Umugambi wa Reta wo kwegereza ubutegetsi abenegihugu.

13/08/2026

Ku musi wa kane, igenekerezo rya 13 Myandagaro 2026, Abakenguzamateka bagize Umurwi wamaho ujejwe ibijanye n’inzego z’igihugu, amategeko, intwaro, kwegereza ubutegetsi abenegihugu, uburenganzira no kwishira n’ukwizana vya kiremwa muntu, hamwe no kugenzura iserukirwa mu nzego z’igihugu, bakoranye mu nama kugira ngo bige integuro y’Ibwirizwa ritunganya ivyerekeye kuronka amakuru agenewe bose.

Abakenguzamateka bo mu Murwi wamaho ujejwe ibijanye n’ubutunzi, ikigega ca Reta, amafaranga Reta ikoresha, ibidukikije, imibano, urwaruka, inkino n’imico k**a na bo, bagize inama, aho bize Integuro y’Ibwirizwa rihindura Itegeko bwirizwa ryo ku wa 23 Ruhuhuma 1993 rishira mu murwi w’ivyaha ubusuma bw’ibibazo vyo kw’ishure n’ibindi bibazo bitunganywa kugira umunyeshure yunguruzwe canke ave mu gice c’amashure aja mu gikurikira canke kugira aronswe icemezo nyigisho cane urupapuro rw’umutsindo.

12/08/2026

Kw'igenekerezo rya 12 Myandagaro 2026, mu ntara ya Gitega, Saint Jean Paul II, Inama Nkenguzamateka yatunganije inama ihuza Abakenguzamateka, ba musitanteri n'abarongoye Inama z'Amakomine kugira bategure ingendo zo gusuzuma ivyaranguwe n'amakomine mu ntumbero yo kuraba aho ishirwa mu ngiro rya poritike yo kwegereza ubutegetsi abenegihugu rigeze.

Mw'ijambo ryo kwugurura ibikorwa vy'iyo nama, Icegera ca Mbere c'Umukuru w'Inama Nkenguzamateka, Nyakwubahwa Générose NGENDANGANYA, yashikirije ko intumbero nyamukuru y'ico kiganiro ari ugutahura kumwe ico Inama Nkenguzamateka yipfuza gushikako mu ngendo zimirije, bakazozikora bose bazi ibizokwisungwa mu gushikiriza ivyaranguwe mu mwaka wa 2025 ushira uwa 2026; ivyapfunditswe mu ngendo abakenguzamateka batunganije mu makomine yose; intambamyi n'inyishu zazo; ibibazo bihanze abenegihugu mu buzima bwa misi yose bidakunda kuvugwa; no kuzohuriza ku vyegeranyo bizoba vyisunze urutonde rumwe.

Nyakwubahwa Générose NGENDANGANYA yibukije ko umugambi wo kwegereza ubutegetsi abenegihugu ari bwo bwonyene bwiza bwo guteza imbere uburongozi nyabwo bushikana umwenegihugu kuri demokarasi ibereye, ishira imbere ineza ya bose kandi idakumira umwenegihugu mu migambi y'iterambere.

Mu gusozera ibikorwa vy’iyo nama, Icegera ca Mbere c’Umukuru w’Inama Nkenguzamateka yashikirije ko iyo nama yari nkenerwa cane kandi yaje mu ntumbero yo kwumvikana kugirango aho buca basubira ku kivi mu kugendera amakomine yose, bajanywe no kuraba ko ingorane indongozi zo mu makomine batanguraye, ivyipfuzo bashikirije aho abakenguzamateka babagendera mu 2025, ndetse n’ibikorwa baranguye mu kiringo c’umwaka barangije bari ku kivi co gutunganiriza abenegihugu mu makomine bajejwe, bazomenye neza uko vyifashe, na kare abakurambere barayamaze bati : ‘‘Uwuja iyo azi ntazimira’’.

Yaciye abasaba kuja gushikiriza intumbero bumvikanyeko bose, abo bafashanya mu burongozi bw’Ikomine, kugira babe barikazanura ku vyegeranyo bizoshikirizwa mu ngendo bimirije. Ati: ‘‘Inkware zisezerana mu masesa, gende rero mwitegure neza kugirango inyuma y’izo ngendo tuzobe dufise koko amakuru atomoye y’ingene amakomine yifashe’’.

Nyakwubahwa Générose NGENDANGANYA yarangije abasaba kubandanya babungabunga ubumwe buri hagati y’inzego zo mu makomine bisunga amategeko ku neza y’umwenegihugu.

05/08/2026

Umukuru w'Inama Nkenguzamateka, Nyeniteka Gervais NDIRAKOBUCA ahamagarira indongozi gutorera inyishu ibibazo bihanze abenegihugu. Aranavunira akagohe kandi abenegihugu kwitwararika umutekano no gukingira ibidukikije.

Abatowe nabo, Umukuru w'Inama Nkenguzamateka abahimiriza kwitwararika ineza y'ababashize imbere. Ivyo yabishikirije, i Gitega, mu ngoro y'amakoraniro y'Inama Nkenguzamateka, ku wa 03 Myandagaro, mw'ijambo ryo kwugurura isasa risanzwe rya Myandagaro 2026.

04/08/2026

Abakenguzamateka bahurikiye mu murwi wamaho ujejwe ibijanye n’intwaro, imigenderanire n’ayandi makungu, ukwivuna abansi n’ivy’umutekano, hamwe n’imigenderanire n’Inama Nshingamateka y’Umuryango wa Afirika y’Ubuseruko bakoranye, kw'igenekerezo rya 04 Myandagaro 2026, mu ntumbero yo kwiga integuro y’Ibwirizwa ryerekeye iyemezwa na Repuburika y’Uburundi ry’Amasezerano yerekeye ugufashanya hagati ya Reta y’Uburundi na Reta ya Angola, yashizweko umukono i Addis Abeba, kw’igenekerezo rya 12 Ruhuhuma 2026, yerekeye ugukuraho uruhusha rw’ukwinjira muri ivyo bihugu ku bafise igitabu c’inzira c’icubahiro no ku bafise igitabu c’inzira c’akazi.

03/08/2026

Inyuma y'umutaga wo kuri uyu wa mbere, igenekerezo rya 03 Myandagaro 2026, Inama Nkenguzamateka irongowe n'Umukuru wayo, Nyeniteka Gervais NDIRAKOBUCA, yakoranye kugirango yemeze Ikirangaminsi c'ibikorwa bizorangurwa kuva kw'igenekerezo rya 03 kugeza ku rya 18 Myandagaro uno mwaka.

Ibikorwa nyamukuru vyashizwe ku rutonde bigizwe ni ibizorangukira mu mirwi yamaho hamwe n'inama yo gutegura ingendo zimirije mu makomine yose y'igihugu.

Barangije kwemeza ico Kirangaminsi, abakenguzamateka baciye biyandikisha mu mirwi yamaho, bongera baratora abakuru b’iyo mirwi :

1. Umukuru w’Umurwi wamaho ujejwe ibijanye n’intwaro, imigenderanire n’ayandi makungu, ukwivuna abansi n’ivy’umutekano, hamwe n’imigenderanire n’Inama Nshingamateka y’Umuryango wa Afirika y’Ubuseruko: Umukenguzamateka Sabine NTAKARUTIMANA. Abandi bagize uwo murwi ni abakenguzamateka Léocadie NDACAYISABA na Léonard HABIMANA.

2. Umukuru w’Umurwi wamaho ujejwe ibijanye n’inzego z’igihugu, amategeko, intwaro, kwegereza ubutegetsi abenegihugu, uburenganzira no kwishira n’ukwizana vya kiremwa muntu, hamwe no kugenzura iserukirwa mu nzego z’igihugu: Umukenguzamateka Berchmans NZOYIHAYA. Abandi bagize uwo murwi ni abakenguzamateka Jean Baptiste BARANYIZIGIYE na Ferdinand NDAYISAVYE.

3. Umukuru w’Umurwi wamaho ujejwe ibijanye n’Ubutunzi, ikigega ca Reta, amafaranga Reta ikoresha, ibidukikije, imibano, urwaruka, inkino n’imico k**a : Umukenguzamateka Imelde SABUSHIMIKE. Abandi bagize uwo murwi ni abakenguzamateka Gad NIYUKURI, Cyriaque NSHIMIRIMANA na Joséphine NYIRANEZA.

03/08/2026

Kuri uyu wa mbere, igenekerezo rya 03 Myandagaro 2026, mu nama Nkenguzamateka, niho haba ibirori vyo kwugurura icese isasa risanzwe rya Myandagaro 2026. Ivyo birori bikaba vyari bihagarikiwe na Nyeniteka Gervais NDIRAKOBUCA, Umukuru w'Inama Nkenguzamateka.

Mw'ijambo yashikirije, Nyeniteka Gervais NDIRAKOBUCA, yamenyesheje ko muri rino sasa risanzwe rya Myandagaro 2026, uretse iyindi mirimo abakenguzamateka bahamagariwe kuzorangura, bazokwihweza integuro z’amabwirizwa, aho mbere Reta imaze kurungikira zitatu (3) zikurikira:

(1)Integuro y’ibwirizwa ritunganya ivyerekeye uburenganzira bw’ukuronka amakuru agenewe bose; (2)Integuro y’ibwirizwa rihindura Itegeko bwirizwa inomero 1/016 ryo ku wa 23 Ruhuhuma 1993 rishira mu murwi w’ivyaha ubusuma bw’ibibazo vyo kw’ishure n’ibindi bibazo bitunganywa kugira umunyeshure yunguruzwe canke ave mu gice c’amashure aja mu gikurikira canke kugira aronswe icemezo nyigisho canke urupapuro rw’umutsindo; (3) Integuro y’Ibwirizwa ryerekeye iyemezwa na Repuburika y’Uburundi ry’Amasezerano yerekeye ugufashanya hagati ya Reta y’Uburundi na Reta ya Angola yashizweko umukono i Addis Abeba kw’igenekerezo rya 12 Ruhuhuma 2026 yerekeye ugukuraho uruhusha rw’ukwinjira muri ivyo bihugu ku bafise igitabu c’inzira c’icubahiro no ku bafise igitabu c’inzira c’akazi.

Yashikirije ko mu karuhuko barangije bashoboye kwibonera no kwumviriza ibibazo bitandukanye bihanze abenegihugu babatoye, na cane cane mu bisata vy'uburimyi, amagara y'abantu n'indero. Yaciye asaba ubushikiranganji bubijejwe kurushirizaho kuba hafi abenegihugu kugirango ivyo bibazo bitore inyishu.

Mu vyerekeye ibikorwa bategekanya kuzorangura muri iri sasa rya Myandagaro batanguye, yavuze ko harimwo ivyo kwiga no kwemeza integuro z'amabwirizwa zirungikwa na Reta y'Uburundi, kugendera amakomine yose y'igihugu c'Uburundi, kubandanya twitaba ibikorwa mpuzamakungu vyerekeye abashingamateka n’abakenguzamateka mu ntumbero yo gutsimbataza ubucuti n’imigenderanire myiza hagati y’Inama Nkenguzamateka n’izindi Nama Nkenguzamateka, n'ibindi.

Umukuru w'Inama Nkenguzamateka yakeje Nyenicubahiro Umutambukanyi w’Umukuru w’Igihugu kw’iteka ridasanzwe yatewe, ndetse ryatewe Igihugu cacu c’Uburundi, mu kuronka Ubushimwe butandukanye ku rwego rw’isi. Ati: ‘‘Inama Nkenguzamateka imwipfurije kubandanya atera imbere nk’umuzinga mu bikorwa vy’iterambere n’imibano arangurira abenegihugu.’’

Imbere yo kurangiza ijambo ryiwe, Umukuru w'Inama Nkenguzamateka, yakeje umupfasoni w'Umukuru w'Igihugu kw'iteka yatewe, rikongera rigaterwa igihugu, mu kuronswa ubushimwe Ku rwego rw'isi.

Ntiyibagiye guhoza abenegihugu baherutse kuburira ivyabo mw'isoko nkuru ya Ngozi n'ahandi. Nk'abatowe, yahamagariye abenegihugu bose gucungera neza ahantu hose hahurira abantu benshi, babonye ikibateye amakenga bakakimenyesha abajejwe umutekano hakiri kare mu ntumbero kuzitira bataronerwa.

03/08/2026

ibirori vyo kwugurura isasa risanzwe rya myandagaro 2026

01/08/2026

Kw’igenekerezo rya 01 Myandagaro 2026, Umukuru w’Inama Nkenguzamateka, Nyeniteka Gervais NDIRAKOBUCA, yifadikanije n’abenegihugu ba komine Bukinanyana avukamwo, intara ya Bujumbura, mu birori vyo guhimbaza umusi mukuru wahariwe amakomine.

Ivyo birori vyabereye ku mutumba Kansega wa zone Ndava, vyaranzwe n’amajambo yashikirijwe n’indongozi z’iyo komine, intambo n’imvyino, hamwe no gusabikanya ibifungurwa n’ibinyobwa kavukire.

Musitanteri w'iyo komine ahejeje gushikiriza ivyaranguwe n’imigambi yimirije kurangurwa, Nyeniteka NDIRAKOBUCA yakeje Inama ya komine hamwe n’indongozi za Bukinanyana ku bikorwa bishimishije baranguye, kuko amatagisi yavuye ku miriyoni 65 z’amafaranga y’amarundi ashika ku miriyoni 125 canke 150 ku kwezi.

Umukuru w’Inama Nkenguzamateka yashimye ko indongozi z’iyo komine bashize mu ngiro impanuro z’Inama Nkenguzamateka igihe abakenguzamateka baheruka kugendera iyo komine. Yaciye ahamagarira Inama ya komine n’abarongoye iyo komine kuguma bakorana bumvikana kandi buzuzanya.

Nyeniteka NDIRAKOBUCA yarangije ijambo ryiwe asaba abavukakomine gufasha mu gutorera umuti ibibazo biri mu bisata vy’indero n’amagara y’abantu.

Ku kibazo c’ubukene bw’amazi meza, yasavye ko mu ndwi zitarenga zibiri igisata kijejwe amazi muri komine coba catanze icegeranyo c’ibibanza vyose vyoshobora kuvamwo amazi yokwiragizwa mu benegihugu.

Mu kurangiza, yatanze impanuro zitandukanye ku bavukakomine harimwo izijanye no kubumbatira amahoro n’umutekano hamwe no kwitegurira neza irima ryimirije.

Sénat Burundi

16/08/2026

14/08/2026

13/08/2026

12/08/2026

05/08/2026

04/08/2026

03/08/2026

03/08/2026

03/08/2026

01/08/2026

Address

Website

Alerts

Shortcuts

Share

Listing takedown request