Sénat Burundi

25/05/2026

Kw’igenekerezo rya 25 Rusama 2026, Abakenguzamateka bagize Umugwi wamaho ujejwe ibijanye n’inzego z’igihugu, amategeko, intwaro, kwegereza ubutegetsi abenegihugu, uburenganzira no kwishira n’ukwizana vya kiremwa muntu, hamwe no kugenzura iserukirwa mu nzego z’igihugu mu Nama Nkenguzamateka, bari kumwe n'umushikiranganji ajejwe ubutungane, bariko baragira umwihwezo wimbitse ku bijanye n'integuro y'ibwirizwa rihindura ibwirizwa inomero 1/002 ryo ku wa 31 ntwarante, umwaka w'2004 riringaniza imirimo ya Sentare icungera amatungo ya Reta, ingene itunganijwe n'ingene ikora.

21/05/2026

Abakenguzamateka bahurikiye mu mugwi wamaho ujejwe ibijanye n’Ubutunzi, ikigega ca Reta, amafaranga Reta ikoresha, ibidukikije, imibano, urwaruka, inkino n’imico k**a, bakoranye inyuma y’umutaga wo kw’igenekerezo rya 21 Rusama 2026, mu ntumbero yo kwigira hamwe integuro y’ibwirizwa yerekana ukwo amafaranga ya Reta yakoreshejwe mu mwaka w’2024 ushira uw’2025.

21/05/2026

Inyuma y’umutaga wo kw’igenekerezo rya 21 Rusama 2026, abakenguzamateka bagize Umugwi wamaho ujejwe ibijanye n’inzego z’igihugu, amategeko, intwaro, kwegereza ubutegetsi abenegihugu, uburenganzira no kwishira n’ukwizana vya kiremwa muntu, hamwe no kugenzura iserukirwa mu nzego z’igihugu, bakoranye kugira ngo bigire hamwe muri uwo murwi integuro y’ibwirizwa rihindura ibwirizwa no.1/002 ryo ku wa 31 Ntwarante 2002 rigenga ishingwa, ihangiro, itunganywa hamwe n’imirimo vya Sentare ijejwe kugenzura amatungo ya Reta.

21/05/2026

Kw’igenekerezo rya 21 Rusama 2026, mu nama ya bose yari irongowe n’Umukuru w’Inama Nkenguzamateka, Nyeniteka Gervais NDIRAKOBUCA, abakenguzamateka bize bongera baremeza integuro z’amabwirizwa zibiri, harimwo iyerekeye iyemezwa na Repuburika y'Uburundi ry'Amasezerano yashizweko umukono kw'igenekerezo rya 06 Ruhuhuma 2017, hagati ya Reta y'Uburundi na Reta zunze Ubumwe z'Abarabu yerekeye guteza imbere no gukingira imitahe y'abarwizatunga b'ivyo bihugu; hamwe n’iyijanye n’iyemezwa na Repuburika y'Uburundi ry'Amasezerano yashizweko umukono kw'igenekerezo rya 06 Ruhuhuma 2017, hagati ya Reta y'Uburundi na Reta zunze Ubumwe z'Abarabu yerekeye gukinga itozwa kabiri ry'amakori ku nyungu n'inyuruzwa ryayo.

Muri ivyo bikorwa, Umushikiranganji w'imigenderanire n'ayandi makungu, iyinjira ry'Uburundi mu miryango yo mu karere hamwe no gufashanya mw'iterambere, Ambasaderi Edouard BIZIMANA, ni we yari yaserukiye Reta kugira ngo ashikirize imvo n’imvano z’ayo masezerano yongere yishure ibibazo vy’abakenguzamateka.

Ayo masezerano yerekeye guteza imbere no gukingira imitahe y'abarwizatunga b'ivyo bihugu, ni inkingi nyayo mu gufashanya mu vy’ubutunzi ikaba n’umushinge mu guhanahana ibidandazwa mu ntumbero yo gukinga itozwa kabiri ry’amakori ku nyungu imwe n’inyuruzwa ryayo, mu vyerekeye itozwa ry’amakori muri ivyo bihugu bibiri hatabayemwo kutariha canke kugabanya amakori yategerezwa kurihwa hakoreshejwe uruyeri mu guca iruhande y’amabwirizwa.

Ku vyerekeye guteza imbere no gukingira imitahe y’abarwizatunga, ibiri muri ayo masezerano bizotuma imitahe ihanahanwa vyoroshe hagati y’ivyo bihugu bibiri, gutyo bitume ubutunzi bwiyongera. Vyongeye, gushinga imitahe ikingiwe bizotuma ubutunzi bukoreshwa neza mu kuduza ubuzima bwiza bw’abenegihugu.

19/05/2026

Mu nama ya bose yo kw’igenekerezo rya 19 Rusama 2026 yari irongowe n’Umukuru w'Inama Nkenguzamateka, Nyeniteka Gervais NDIRAKOBUCA, hisunzwe ingingo ya 91 y’Ibwirizwa Shingiro rya Repuburika y’Uburundi, abakenguzamateka bemeje izina rya KITAMOYA Thierry, ryarungitswe na Nyenicubahiro Umukuru w’Igihugu, kugira ngo abe mu bagize Umurwi w’igihugu wigenga ujejwe gutunganya amatora.

16/05/2026

Ku muhingamo wo kw’igenekerezo rya 16 Rusama 2026, Icegera ca mbere c’Umukuru w’Inama Nkenguzamateka, Nyakwubahwa Générose NGENDANGANYA, yaraganutse avuye mu rugendo rw’akazi rwamushikanye mu Bwami bwa Eswatini, aho yagiye arongoye Intumwa z’Inama Nshingamateka na Nkenguzamateka. Muri urwo rugendo, Nyakwubahwa NGENDANGANYA yari yitavye ibikorwa vy’inama y’Umurwi w’abashingamateka n’abakenguzamateka bo mu Karere ka Afrika bahurikiye mw’Ishirahamwe ry’ibihugu vyo muri Afrika, Caraïbes na Pacifique (OEACP) n’ibikorwa vy’inama ya mbere y’Ihuriro ry’Inama Nshingamateka na Nkenguzamateka za Afrika n’Ubumwe bwa Buraya (UE).

Iyo nama yabaye kuva kw’igenekerezo ry’07 gushika kurya 14 Rusama uno mwaka, yatangujwe n’ibikorwa vy’inama y’Umurwi w’abashingamateka n’abakenguzamateka bo mu Karere ka Afrika bahurikiye mw’Ishirahamwe ry’ibihugu vyo muri Afrika, Caraïbes na Pacifique (OEACP). Abayitavye bahanahanye ivyiyumviro ku vyerekeye ibikorwa vyihutirwa kurangurwa ku mugabane wa Afrika, na cane cane ibibazo vy’amahoro n’umutekano; gutsimbataza ubumwe bw’abanyafrika ; kwiyamiriza ivy’ivangura ry’abantu; gushira mu ngiro amasezerano y’i Samoa no gutanga intererano z’ibikorwa vy’iryo Huriro.

Icegera ca mbere c’Umukuru w’Inama Nkenguzamateka yaritavye kandi ibikorwa vy’inama ya mbere y’Ihuriro ry’Inama Nshingamateka na Nkenguzamateka za Afrika n’Ubumwe bwa Buraya (UE) aho abari muri yo bahanahanye ivyiyumviro ku vyigwa bitandukanye ku vyerekeye Uruhara rw’amashirahamwe yo mu karere n’Inama Nshingamateka na Nkenguzamateka mu gutsimbataza amahoro n’umutekano muri Afrika hamwe n’ Intambamyi ku rwaruka mu vyerekeye inyigisho no kuja mu bindi bihugu, n’ingene zotorerwa umuti.

16/05/2026

Icegera ca Kabiri c'Umukuru w'Inama Nkenguzamateka, Nyakwubahwa Clotilde KAMPIMBARE, ari kumwe na bamwe mu bashingamateka n'umukenguzamateka batowe mu ntara ya Burunga, yifadikanije n'abenegihugu bo
ku murwa mukuru w'iyo ntara, i Makamba
ku wa 16 rusama, umwaka w'2026, mu bikorwa vyo gutegura
ikibanza kizoba ico iratiro, kiri iruhande y'ihwaniro ry'amabarabara, aho nyene ku murwa mukuru w'intara.

Mw'ijambo yashikirije abari bitavye ivyo bikorwa, Nyakwubahwa KAMPIMBARE yabahamagariye kubandanya barangura ibikorwa vy'iterambere rusangi n'ukugira isuku aho babaye.

Yasavye indongozi guhimiriza abenegihugu kubandanya barangura ibikorwa bitandukanye bibafasha kwitezimbere.

Yahamagariye kandi urwaruka gukurana umutima wo gukunda ibikorwa n'igihugu.

Inyuma y'ivyo bikorwa, Icegera ca Kabiri c'Umukuru w'Urwo Rwego yarongoye ikiganiro ku bakenyererarugamba bari bitavye ivyo bikorwa, mu ntumbero yo guhanahana ivyiyumviro ku bijanye n'ingene botunganya igisagara ca Makamba nk'umurwa mukuru w'intara, kugira isuku n'isukura hamwe n'ukwijukira ibikorwa vy'iterambere bitandukanye, nk'ugutera amavoka n'ikawa.

14/05/2026

13/05/2026

Guhera mu gitondo co kuri uyu wa gatatu, igenekerezo rya 13 Rusama 2026, ibikorwa vy'uruganda rw'inyigisho nkarishabwenge ku Bakenguzamateka n'abakozi bamwe bo muri urwo rwego vyabandanije, birongowe n'Umukuru w'Inama Nkenguzamateka, Nyeniteka Gervais NDIRAKOBUCA, mu nyubabakwa z'ihoteri Chalet la Concorde, iri muri Komine Muramvya y'i ntara ya Gitega.

Umuhinga yatanze inyigisho ku cigwa kijanye no gusesangura Ibwirizwa rigenga amafaranga Reta ikoresha ku mwaka, yerekanye ahanini ibijanye n'iharurwa ry'uburyo Reta ikoresha, ivyisungwa mu gushinga uburyo Reta ikoresha, uko vyitwa nuko bivugwa, intambwe nkuru nkuru zisungwa mw'itunganywa ry'imigambi y'igihugu gushika aho zemezwa n'abaserukira abenegihugu, n'ibindi.

Ku muhingamo, mu gusozera ibikorwa vy'urwo ruganda rwari rumaze iminsi ibiri, Nyeniteka NDIRAKOBUCA yatekereye impanuro abakozi bo muri urwo rwego, aho yabasavye gushira mu ngiro ubumenyi baronkejwe kugirango bazokwerekane intambwe nshasha bateye mu kurangurana ubwira n'ubukerebutsi ibikorwa bashinzwe, biheshe iteka urwego barangurira mwo ibikorwa ndetse n'igihugu cose.

Kuri Banyakwubahwa Abakenguzamateka, yabasavye kwunga umugozi udacika hagati y'abo n'abeneguhugu bajejwe gusukurira ndetse no kubabera ugutwi n,ijosho muri vyose

12/05/2026

Kw’igenekerezo rya 12 Rusama 2026, Intumwa z’Inama Nshingamateka na Nkenguzamateka z’Uburundi, zirongowe n’Icegera ca mbere c’Umukuru w’Inama Nkenguzamateka, Nyakwubahwa Générose NGENDANGANYA, zitavye ibikorwa vy’inama ya mbere y’Ihuriro ry’Inama Nshingamateka na Nkenguzamateka zihurikiye mw’Ishirahamwe rihuza ibihugu vyo ku mugabane wa Afrika, Caraïbes na Paficique (OEACP) n’Ubumwe bwa Buraya (UE). Ivyo bikorwa vyuguruwe n’intumwa y’Umwami w’Ingoma ya Eswatini, Umuganwa Lindani, mu Kiyaya ca Ezulwini.

Mu vyashikirijwe n’abaserukira intumwa zitandukanye, mu nyuma yo kwugurura ivyo bikorwa, Icegera ca mbere c’Umukuru w’Inama Nkenguzamateka yashikirije ijambo ku bijanye n’Uruhara rw’amashirahamwe yo mu karere n’Inama Nshingamateka na Nkenguzamateka zaho mu gutsimbabaza amahoro n’umutekano muri Afrika. Akaba yashikirije ko amahoro n’umutekano ari karahara mu ruganda ntibacure mu guteza imbere ibihugu vyacu. Ati: ‘‘Ata mahoro, nta terambere rishoboka. Muri iyo ntumbero, amashirahamwe yo mu karere arafise uruhara ntangere mu gukinga, gutunganya no gutorera inyishu indyane.’’

Uwurongoye intumwa z’Inama Nshingamateka na Nkenguzamateka z’Uburundi, yashikirije ko Inama Nshingamateka na Nkenguzamateka zo mu karere zihamagarirwa gukurikirana utwigoro dufise intumbero yo kwitwararika cane umugambi w’amahoro, kandi ko zihamagarirwa gukomeza ibijanye no gufashanya mu ntumbero yo gusangira uburambe no gufasha iyo bikenewe.

Mu gusozera ijambo ryiwe, yaripfuje ko amashirahamwe yo mu karere n’Inama Nshingamateka na Nkenguzamateka zokorana mu gukinga indyane, mu nzira yo guhuza abafitaniye amatati no gufasha mu biganiro, hamwe no gutunganya neza ibihe vy’inyuma z’indyane.

12/05/2026

Ubumenyi bufatiye ku vyigwa bibiri arivyo imigenderanire no gushikiriza amakuru y'ibikorwa vy'Inama Nkenguzamateka nivyo vyigishijwe ku munsi wa mbere w'inyigisho nkarishabwenge ku bakenguzamateka na bamwe mu bakozi b'Inama Nkenguzamateka. Ni mu gihe bari mu ruganda nkarishabwenge ku bijanye n'imigenderanire no guhanahana amakuru y'ibikorwa vy'Inama Nkenguzamateka.

Ivyo vyigwa bize, vyigishijwe mu mice itandukanye. Iyo mice ikaba ari: intango n'inkomoko y'imigenderanire, itandukaniro hagati y'imigenderanire ya Reta hamwe n'imigenderanire y’abaserukira abenegihugu, uruhara rw'abaserukira abenegihugu muri poritike y’Uburundi n’amakungu, inzira n'ivyifashishwa mu migenderanire yabaserukira abenegihugu, imigenderanire y’abaserukira abenegihugu mu gikorwa co gutorera inyishu amatati no gukomeza demokarasi.

Mu cigwa c'imigenderanire y'abaserukira abenegihugu, umwigisha mu makaminuza Profeseri Jean de Dieu NDIKUMANA avuga ko amakuru no guhanahana amakuru ku nzego nkuru nkuru ni ntasubirizwa kandi bitegerezwa kuba ku rutonde. Muri ico cigwa higishijwe uruhara n'ak**aro ko guhanahana amakuru ku baserukira abenegihugu ufatiye ku Nama Nkenguzamateka, uko bikorwa neza no gutunganya ubuhinga bwo guhanahana amakuru ku Nama Nkenguzamateka y'Uburundi.

Muri urwo ruganda nkarishabwenge, kabaye akaryo ku barwitavye ko kunonosora ibijanye n'imigenderanire no kumenyesha amakuru ku baserukira abenegihugu. Batahura ko uretse ivyo basanzwe bajejwe, imigenderanire ku baserukira abenegihugu mu Burundi itegerezwa kuba ifatiye ku kungene ibintu bigenda bihindagurika haba ku rwego mpuzamakungu no mu karere. Nayo kuvyo guhanahana amakuru ku baserukira abenegihugu, bitegerezwa gukorwa uhereye hasi ku benegihugu gushika hejuru ku rwego rw'Inama Nkenguzamateka no ku bakenguzamateka kuko kwumviriza no guhanahana amakuru bifise ak**aro ntangere.