21/08/2026
حوار / بيارا مجدى
1-عرفينا بنفسك خريجه دفعه كام وقسم ايه؟
أنا سلمي محمد مصطفى، خريجه قسم صحافة دفعة 2018.
2-شغاله ايه حالياً؟ وازاي بدأتي طريقك بعد التخرج ولو واجهتي صعوبات خلال رحلتك بعد التخرج هتكون ايه؟
أنا شغالة حالياً مديرة بيوتي سنترز كبيرة، والاستاف اللي شغال معايا كله أجانب.
الصعوبات اللي واجهتني بعد التخرج في مجال الشغل هي دخول مدينة الإنتاج الإعلامي، مكانش سهل، وكانت محتاجة واسطة.
لما دخلت واشتغلت في الإعداد، مكانش طبعاً في فلوس الأول، لأنك لسه خريجة لازم تشتغلي على نفسك، وكان في تعب ومجهود كبير، وكان ليّا صحبتي شغّالة في نفس مجالي، اشتغلت واترقت من كول سنتر لـ Branch Manager.
مشكلة مجال الإعلام والصحافة إن مفيش دخل في الأول أكيد، وبعد الجامعة طبيعي تبقي محتاجة يبقى في دخل ليكي، المجال محتاج طبعاً حد يكون باله طويل جداً، وده إنك تقدر يبقى في دخل كويس ليك فيما بعدين.
لكن بالنسبة للمجال الإعلام والصحافة حلو جداً جداً، وأكتر حاجة ماشيه فيه العلاقات طبعاً.
3-ايه اهم الحاجات اللي اتعلمتيها من خلال دراستك في الأكاديمية؟
اتعلمت كل حاجة عامة التعامل مع الناس، أما يكون في ضغط أقدر أتصرف إزاي.
اتعلمت اتعامل في الشارع ازاي مع الناس، وأجرب حاجات جديدة، وأروح أماكن مختلفة، وأقدر أفكر في حاجات ما فكرتش فيها قبل كده الجامعة هي كونت الشخصية اللي دلوقتي قادرين نشتغل بيها ونتعامل مع كل الناس.
4-ايه اكتر تجربه او موقف أثر في بناء شخصيتك خلال سنين الأكاديمية؟
أكتر المواقف اللي فاكرها يوم مناقشة الكتاب ومناقشة المجلة، أكتر موقفين أثروا فيا، لأن شوفت تعبي ومجهودي وصل لإيه أكتر حاجة تفرح الإنسان إنه يشوف مجهوده ونجاحه.
كان في مواقف صعبة طبعاً وضغط، ساعه أسيمنت الأستبيان، ولما نزلنا الشارع وعرفنا نتعامل مع الناس و روحنا أول مرة جريدة الأخبار عرفنا نتعامل ونقنع الناس، في بني أدمين مابتكونيش عارفه تتعاملي معاهم من خلال التجارب عرفت اتعامل مع كل الناس من الغفير للوزير، عرفت أتكلم واتعلمت اللي ينفع يتقال واللي ما ينفعش، واللي ينفع نتعامل معاه واللي مينفعش، كل ده اتعلمته من الجامعة.
لحد دلوقتي أي حد بيسمعني وأنا بتكلم أو أما أدخل في نقاش بياخدوا بالهم إن طريقتي مختلفة ومقنعة، وده بسبب الجامعة.
أنا كنت بحب الجامعة جداً، ولما دخلتها كنت داخلة وأنا عايزاها.
5-مين اكتر دكتور اثر فيكي خلال فتره الجامعه؟
دكتورة مي مصطفى طبعاً رقم واحد الأول والأخير، علمتني أبقى واثقة في نفسي، وأنا بتكلم إزاي، مبقاش مهزوزة.
ودكتورة مها طبعاً علمتني ازاي أبقى رحيمة، وأتعلم لما أغلط أعتذر حتى لو أنا رئيسة الجامعة غلطت اعتذر ، وأسمع أكتر ما أتكلم.
وحقيقي أنا بحب كل الدكاترة، مش عايزة أكون نسيت حد كل دكتور أكيد علّمني حاجة، وربنا يديهم على قد تعبهم معانا ونياتهم.
وطبعاً الجامعه علمتني القراءة، علمتني إزاي أبقى مثقفة، وأنا بتناقش مع حد في تاريخ، دين، علوم حيوانات، تلفزيون...دايماً آراءنا بتبقي مختلفه عن أي حد عادي عشان بنبقي فاهمين ورا ده ايه، حتي ممكن أعرف أطلع لمذيعه في التليفزيون غلطاتها في طريقة إلقائها، في قعدتها، في بَصتها،في حركه إيديها، ده كله من الجامعه.
6-سمعنا إنك كنتي مميزه في تنظيم الفعاليات، احكيلنا في البداية كانت إزاي، ايه أكتر حاجه اتعلمتيها منها وهل أثرت علي شخصيتك أو فرقت معاكي في حياتك العمليه فيما بعدين؟
بصي موضوع التنظيم ده كان أكتر حاجة حلوه بحبها، حتي بعد ما اتخرجت اشتغلت في التنظيم تبع مهرجانات الدولة، مهرجانات المسارح كلها، كانت حاجة حلوة جداً.
اتعلمت النظام وإزاي أقود فريق بحيث نتحرك كلنا كأننا شخص واحد، دايمًا كنت بحب واميل للحاجات العملية أكتر من النظرية، وده ساعدني أطوّر مهاراتي بسرعة.
اللي اكتسبته من التنظيم خلاني لحد دلوقتي (Leadership)، وبقى عندي القدرة أمسك أي مسؤولية وأديرها بشكل منظم، و كمان اتعلمت أركز في كل التفاصيل، سواء في الشغل أو حتى في المظهر العام، عشان كل حاجة تبقى مظبوطة ومتناسقة.
وطبعًا ده اتعلمته من دكتور مها لأن وقتها كانت معيدة فكانت بتبقي معانا أوي في الموضوع ده، فكانت حاجه حلوه جدا.
التجربة دي هي اللي ساعدتني أوصل للمكانة اللي أنا فيها دلوقتي، وأبقى مديرة قادرة أدير الشغل بكفاءة وتنظيم، ولولا خبرتي في الإيفنتات، مكنتش وصلت للمرحلة دي.
7-نصيحه تحب تقوليها للطلاب في الأكاديمية؟
استمتعوا بسنين الجامعة ومتستعجلوش انكم تتخرجوا، إحنا كنا مستعجلين زيكم، لكن الحقيقة إن الأيام دي مش هتتعوض.
استغلوا كل وقت مع أصحابكم ودكاترتكم، واتعلموا منهم على قد ما تقدروا، لأن خبرتهم أكبر بكتير وهتفيدكم في حياتكم بعد كده، لو جات لكم فرصة تدريب أو مشروع مع دكتور، متفكروش "هستفيد إيه؟ صدقوني، هتفرق معاكم جدًا حتى لو مش واضح دلوقتي.
متخافوش من الغلط، جربوا واغلطوا واتعلموا، ولو حد قال لكم إن في حاجة غلط، خدوها كفرصة للتطوير مش إحباط، مع الوقت هتلاقوا إن أخطائكم بقت أقل بكتير.
اقعدوا واتكلموا مع دكاترتكم، واتعلموا إزاي تناقشوا ناس عندها علم وخبرة بثقة ومن غير ما تحسوا إنكم أقل في المعرفه، خلو دايمًا عندكم فضول تتعلموا وتفهموا أكتر.
جربوا مشاريع جديدة، اقرأوا، وخليكم دايمًا بتطوروا من نفسكم. الجامعة هي المكان اللي مسموح فيه تغلطوا وتتعلموا لأن الحياة العمليه مش بترحم حد نسبة الغلطات فيها مينفعش تبقي كبيره وإلا هتبقي انسان فاشل،
يعني مثلاً أنا دكتور مي، بداية معرفتي بيها إنها طردتني من محاضرة عشان متأخرة، علمتني لحد النهاردة إني أحترم مواعيدي. وبقت هي أقرب حد ليا، لولا إنها طردتني مرتين تالت مرة كنت جاية مواصلات قولتلها يا دكتور هدخل وماتحسبينيش بس عايزة أحضر خايفة على مصلحتي الحركه دي علمتني ألتزم بالمواعيد عشان دي أول Feedback بتتاخد عنك، فأستغلوا ده كويس أن غلطاتكم تبقي رايحه جايه عادي وأنتو في الجامعة، و أستمتعوا بكل لحظه لأنها مش هتتكرر.
8-ايه رأيك في فكره صفحه الخريجين؟
الصفحه حلوه جداً عجبتنى الفكره ربنا يوفقكم ❤️
