09/10/2020
صباح السعادة والرضا على قلوبكم الطيبة
اللغة العربية هي لغة البلاغة والفصاحة والبيان
هي لغة القرأن الكريم اللي اتحدت بفصاحتها كل لسان
علشان كدة العرب قدروا يطوعوا اللغة دي في أشعارهم ومؤلفاتهم بطرق وأشكال جعلت الوصول للمعنى يحتاج العديد والعديد من المولفات
لكن في البوست ده هحاول مع ابنائي الطلبة اللي لسه طالعين من المرحلة الابتدائية للمرحلة الاعدادية نفهم مع بعض يعني ايه اطلع صورة بلاغية، من غير ما أحفظ زي زمان لما كنت بحفظ التعبيرات الجميلة اللي على كل درس من غير ما افهم يعني ايه اسوب أمر غرضه النصح والإرشاد، ويعني ايه غرضه الوجوب والالزام، وأمتي نقول ان الكلمة دي جاءت نكرة لتفيد العموم والشمول، وأمتي تكون للتعظيم، وأمتي للتحقير🤔
هنسيب النحو والاعراب شوية، ونعمل كام حلقة مع بعض نتكلم فيهم الصور البلاغية في اللغة العربية، وازاي نستخرج التعبيرات الجميلة من اي نص قرأني أو نشيد بدون ما نضطر للحفظ👌
👈 يلا بينا نبدأ على بركة الله 🏃♂️🏃♂️
في الحلقة الأولى وبمناسبة السؤال اللي تحت ده 👇 هنتكلم عن أكثر التعبيرات اللغوية شيوعا وهم :
1- أسلوب الأمر :
- وده له ثلاث دلالات، وهم :
ا) أسلوب امر يفيد التوسل و الدعاء : وده لما يكون اسلوب الأمر من الصغير للكبير، أو تحديدا من العبد لربه، لأنه لا يجوز ان يأمر العبد ربه وإنما هو يدعوه ويتوسل اليه، زي قوله تعالى :
" ربنا واتنا ما وعدتنا على رسلك"
هنا " اتنا" أسلوب أمر غرضه الدعاء
ب) أسلوب أمر غرضه النصح والأرشاد : وده لما يكون الأمر بين اتنين متكافئين بين الشاعر مثلا واي انسان، لأنه بيوجه أسلوب الأمر له بغرض النصيحه فقط، زي قول الشاعر : "ارسموها بسمة فوق الشفاة"
ج) أسلوب أمر غرضه الوجوب والالزام : وده لما يكون الأمر من الله عز وجل او الرسول صلى الله عليه وسلم للعبد، لأن أوامر الله والرسول واجبة التنفيذ وليست مجرد نصيحة.
2-النكرة :
- ولاستخداَم الاسم نكرة له أكثر من دلالة منها :
ا) تفيد العموم والشمول :
ويعتبر ده الهدف الأكثر، لأن الاسم النكرة يفيد دائما التعبير عن كافة أفراد الشئ ده
فمثلا قول الله تعالى : " وما أنفقتم من شئ فهو يخلفه"
هنا كلمة شئ نكرة وبتدل على اي شئ، بمعنى اي شئ هتنفقه في سبيل الله ربنا هيخلفه عليك
ب) تفيد التعظيم :
احيانا بتكون النكرة هدفها التعظيم، زي مثلا لما باباك يرضى عنك ويخرجك رحلة 😍
فتيجي انت تقول : اسكت دا امبارح كان حتة يوم 👌
فهنا كلمة يوم مش بتعبر عن كل الايام، وإنما بتعبر عن يوم معين فاكيد مش هتفيد العموم ولكن أفادت تعظيم هذا اليوم او التهويل في شدة عظمة وجمال اليوم ده
ج) تفيد التحقير :
ودي عكس اللي قبله بمعنى ايه؟
انه ممكن وانت رايح تشتري حاجة تكتشف انك نسيت الفلوس في البيت🙄 فتلاقي نفسك في موقف صعب جدا
فتحكي عن اليوم ده وتقول :
اسكت دا مشوار امبارح ده كان يوم
هنا يوم أيضا نكرة وأفادت تحقير هذا اليوم
الخلاصة
إنه لو كان الاسم النكرة ده بيتكلم على العموم يعني على اي فرد من أفراد الشئ ده او في صيغة نفي زي لما اقول مش هيقبل منك عذر
بمعني مش قبل منك أي عذر، يبقى هنا النكرة تفيد العموم والشمول
أما لو كانت بتشير لشئ معين زي لما ربنا يقول انه سبحانه وتعالي أعد لعبادة "جنة" هنا يقصد بيها تعظيم الجزاء، فيكون غرضها التعظيم
والعكس طبعا لما يكون الحديث عن شئ قبيح فيكون غرضها التحقير👌
🤔اتمنى تكون إجابة السؤال بقيت سهلة، وقدرنا نميز بينهم، والي اللقاء في حلقة جديدة مع بلاغة اللغة العربية ♥️
