05/09/2026
👌 بلاش تتعامل مع الخلق ولكن تعامل مع الخالق فى عمل الخير ومساعدة الآخرين
👌مش كل اللى لبسه متبهدل محتاج ولا كل اللى لبسه مهندم ونضيف وجميل غنى 🤌
فى ناس عايشه وسطنا ولبس جميل والاولاد لبسهم مهندم ونظيف بس يحسبهم الجاهل أغنياء من التعفف💔 فى ناس منهم بتنام فعلا من غير عشا فى بيوت فعلا فيها الاب بس دخله يدوب مغطى اكل وشرب وباقى البنود من علاج ودروس وطلبات بتكون عبء كبير ع الاب وخصوصا لو فى اكتر من طفل وفى مراحل تعليميه مختلفه 😔
مش لازم المحتاج يكون لابس جزمه مقطعه ولا هدوم مبهدله عشان يكون مستحق 🤚
دورو وابحثو حواليكم واعرفوا ظروف الناس فعلا البيوت وراها اسرار كتير والله اعلى وأعلم
وكل بيت مقفول على همه ومشاكله وظروفه
👌هتقولى معرفش الحالات دى هقولك معايا كذا حاله متعففه جدا جدا وعمرهم ما هيخبطوا على باب يساعدهم ولما بيجيلى الفرصه اساعد بروح وأخبط على ابواب اهل الخير اللى ربنا يجازيهم كل الخير
👌لما حد يوكلنى ان اوصل الامانه بنفسى ع الحالات بيكونوا هما فى الأولويه بالنسبه ليا. ( الدال على الخير كفاعله )
مش شرط تساعد عن طريقى او طريق حد دور حواليك هتلاقى كتير محتاج وما بيطلبش ولا يتكلم
👌النهارده فى امراض كتير ومختلفه وفى حقنه واحده بيوصل ثمنها لأرقام عاليه جدا يعنى مثلا سرطان الثدى اللى للأسف منتشر حاليا الحقنه الواحده ب١٠ الاف جنيه غير مصاريف كتير وكيماوى ومستشفيات ده غير امراض كتير منتشره والناس ربنا أعلم بحالها
👌أخيرا دخول المدارس ده باب كبير على جميع اولياء الامور وصدقونى اولياء الامور بتبكى علشان احتياجات ولادها اللى مش قادره تلبيها ولا تنفذها لعيالها ياريت تبص حواليك على جارك او حتى لو من أهلك اوقات بيكون الاخوات فى بيت واحد حد حاله متيسر والثانى محتاج ياريت تساعدو بعض وتقفو جنب بعض والله الدنيا دار فناء ومش مستاهله تبكى عليها واعمل اللى ينجيك فى الاخره واعمل اللى يدخلك الجنه
👌الإيمان والإسلام ليس عباده فقط من صيام وصلاه والصدقه أجرها عظيم عند الله ومساعدة الآخرين والمحتاج والمتعفف أجرها عظيم جدا
💐💐اسف للإطاله وبارك الله فيكم وجزاكم كل خير💐💐
