26/05/2026
Imala jijjiiramaa Magaalaa Shaggar waggoottan sadan darbanii
------
Magaalaan bakka qaroominni tekinooloojii akkasumas sochiiwwan siyaasaa, dinagdeefi hawaasummaa si'aayinaan keessatti argamanidha.
Guddinni Magaalaa tokkoof wantoota murteessoo ta'an keessaa haalota siyaasaa, sirna bulchiinsaafi dorgommii Magaalotni Addunyaa jaarraa kanaa irra gahan akkasumas hanga humna dinagdee maddisiisaniifi dagaaginni bu'uuraalee misooma hawaasaa ijoowwan murteessoo ta'anidha.
Seenaan guddinaafi babal'ina Magaalota Oromiyaa keessatti rakkoowwan garagaraa haalota siyaasaafi sirna bulchiinsaa irraa maddeen Uummatni Oromoo Magaalaa irraa dhiibamuun waggoota hedduuf hawaas-dinagdeen isaa akka quucaru ta'eera.
Mootummaan Naannoo Oromiyaas rakkoowwaniifi dhiibama Uummata Oromoo irratti qiyyaafachuun sirnoota darbaniin raawwatamaa ture hambisuun cabinsa hawaas-dinagdeefi bu'uuraalee misoomaa furuuf tarkaanfiiwwan garagaraa tarsiimoon masakuun hojiirra oolcheera.
Magaalaan Shaggaris tarkaanfiifi murtoo Mootummaan Naannoo Oromiyaa cabinsa gama dinagdee,siyaasaafi hawaasummaatiin turan furuuf kaayyeffatee waggaa sadii dura Magaalaa hundoofte yoo taatu, hundeeffamaan boodas hojiiwwan kaayyoowwan hundeeffama Magaalichaa galmaan gahan hedduun hojjetamaniiru.
Hojiiwwan gama hawaasummaan hojjetaman keessaa milkaa'inoota damee Barnootaan argame isa tokko yoo ta'u, waggoottan sadan darbanitti manneen Barnootaa 367 ijaaruun danda'ameera.
Hirmaannaa Barattootaa 289,228 irraa gara 424,034 guddisuun danda'ameera.
Uwwisa daandii gosoota garagaraa (Asphaaltii, dhagaa bocamaa, cirrachaafi haaraa saaquu) hundeeffama dura Km 3,126.55 ture 5084.22 Km tti guddateera.
Ijaarsa Piroojeektiiwwan bishaan dhugaatiin wal-qabatee waggoottan sadan darbanitti Piroojeektiiwwan 20 milkeessuun uwwisa tajaajila bishaan dhugaatii dhibbeentaa 71.66 tti guddisuun danda'ameera.
Cehumsa dinagdee qonnaan bultootaa gara Investimentiitti taasifameenis qonnaan bultoota 937 Investimentii garagaraa irratti kan ce'an yoo ta'u, waliigala sochiiwwan Piroojeektiiwwan Investimentii Magaalichaa kanneen biyya keessaa, biyya alaa, abbootii qabeenyaa idilee akkasumas Waldaalee Hojii Gamtaa dabalatee 5,115tti guddateera.
Oomishtummaa Inisheetiiviiwwan damee qonnaa qamadii boneefi gannaa irraa bu'aan callaa argamu waggaa waggaan dabalaa kan jiru yoo ta'u, kanaanis bu'aa callaa argamu bara 2015 Oomisha Waliigalaa kuntaala 1,804,913 irraa hanga bara kanaatti tarkaanfii qonna ammayyeessuuf fudhatameen14,861,530 tti guddisuun danda'amera.
Dhaqqabamummaa tajaajiloota fayyaa mirkaneessuuf hundeeffama Magaalaa Shaggar irraa eegalee hojii hojjetameen milkaa'inootni gurguddoon argamaniiru
Raawwii hojii tajaajiloota fayyaa dhaqqabamaa taasisuuf hojjetameenis baay'ina buufataalee fayyaa hundeeffama dura 24 ture,gara 35tti, kellaawwan fayyaa 46 irraa 85tti akkasumas Hospitaalota 3 ijaaruun tajaajila hawaasaaf oolchuun kan danda'ame yoo ta'u, Waliigala uwwisa dhaabbilee fayyaa Magaalaa Shaggar dhibbeentaa 39 irraa gara 62 tti guddateera.
Odeeffannoowwan keenya ariitiin argachuuf:
Facebook
https://www.facebook.com/shaggarcitycommunication1
YouTube
https://youtube.com/?si=03UKwSTEZapXBvCp
Tiktok
https://www.tiktok.com/
Telegram Channel https://t.me/shagarcitycommunication
WhatsApp: https://chat.whatsapp.com/ClggvainVIDKGZ5WqHUjzbq
Twitter /X https://x.com/ShaggarCityCom
Website: https://shaggarcitycommunication.et
