09/09/2026
የ2018 ዓ.ም የክረምት በጎ አድራጎት ሥራ በስኬት ተጠናቀቀ
🌼🌼🌼🌼🌼🌼🌼🌼🌼🌼🌼🌼🌼🌼🌼🌼
ቡሌ ሆራ ዩኒቨርሲቲ ማስተማሪያ ሆስፒታል፣ ጳጉሜ 4/2018 ዓ.ም
ቡሌ ሆራ ዩኒቨርሲቲ ማስተማሪያ ሆስፒታል በ2018 ዓ.ም ለሁለት ወራት ሲያካሂድ የቆየውን የክረምት በጎ አድራጎት/Summer Volunteer Service የተለያዩ ሥራዎችን በማከናወን በዛሬው ዕለት በተካሄደ ልዩ ሥነ-ሥርዓት አጠናቋል።
የበጎ አድራጎት ሥራው በቡሌ ሆራ ዩኒቨርሲቲ ጤና ኢንስቲትዩት አስተባባሪነት፣ በዩኒቨርሲቲው ዋና ግቢና በማስተማሪያ ሆስፒታሉ ሲከናወን ቆይቷል።
በማጠቃለያ ሥነ-ሥርዓቱ ላይ የዩኒቨርሲቲው ከፍተኛ አመራሮች፣ የማስተማሪያ ሆስፒታሉ ሠራተኞችና የቡሌ ሆራ ከተማ አስተዳደር ኃላፊዎች በመገኘት በሁለቱ ወራት የተከናወኑ የበጎ አድራጎት ሥራዎችን በመገምገም የምስጋና መልዕክት አስተላልፈዋል።
የማስተማሪያ ሆስፒታሉ ቺፍ ኤክስኪዩቲቭ ዳይሬክተር፣ በም/ፕሬዝዳንት ማዕረግ ይመር ሆጤሳ በመገኘት፣ በመልዕክታቸው በክረምቱ በጎ አድራጎት ሥራ የጤና ነክና ሌሎች አገልግሎቶች ለ120,000 ሰዎች ለማድረስ ታቅዶ ከዕቅዱ በላይ ማድረስ መቻሉን ገልጸዋል። በገንዘብ ሲተመንም ከ50 ሚሊዮን ብር በላይ የሚገመት ሥራ መከናወኑን ገልጸዋል።
ከተከናወኑት ዋና ዋና ሥራዎች መካከል 400 ዩኒት ደም መሰብሰብ፣ ለ500 ሕሙማን ነፃ የዓይን ሞራ ግርዶሽ ቀዶ ሕክምና ማድረግ እና በማስተማሪያ ሆስፒታሉ ተበላሽተው የቆዩ 54 የተለያዩ የሕክምና መሣሪያዎችን በመጠገን ወደ ሥራ ማስገባት ተችሏል።
በተጨማሪም በቡሌ ሆራ ከተማ፣ በማስተማሪያ ሆስፒታሉና በዩኒቨርሲቲው ዋና ግቢ የተለያዩ የጽዳት ዘመቻዎች ተካሂደዋል። ሕዝብ በብዛት ወደሚገኝባቸው እንደ ገበያ፣ ማረሚያ ቤትና ሌሎች ቦታዎች በመሄድም የጤና ግንዛቤ ማስጨበጫና ነፃ የጤና ምርመራ አገልግሎቶች ተሰጥተዋል።
የቡሌ ሆራ ዩኒቨርሲቲ የአስተዳደርና ልማት ም/ፕሬዝዳንት ዕጩ ዶ/ር ታሪኩ ገመዴ፣ በክረምቱ ከማስተማሪያ ሆስፒታሉና ከከተማ አስተዳደሩ ጋር በቅንጅት የተከናወነው ሥራ አበረታች ውጤት እንዳስገኘ ገልጸው፣ ለሥራው ጉልበታቸውን፣ ሙያቸውንና ገንዘባቸውን በፈቃደኝነት ላበረከቱ ሁሉ ምስጋና አቅርበዋል።
የዩኒቨርሲቲው የአካዳሚክ፣ ምርምር፣ ቴክኖሎጂ ሽግግርና ማህበረሰብ አገልግሎት ም/ፕሬዝዳንት ዶ/ር ገበየሁ አሻግሬ በበኩላቸው፣ የክረምቱ በጎ አድራጎት ሥራ የ2018 ዓ.ም አፈጻጸምን ለመገምገም እንደ አጋጣሚ መሆኑን ገልጸው፣ የጤና ጉዳይ በቦታና በጊዜ የማይወሰን በመሆኑ በ2019 ዓ.ም ከመጀመሪያው ጀምሮ ሥራውን አጠናክሮ መቀጠል እንደሚገባ አሳስበዋል።
በተጨማሪም ማስተማሪያ ሆስፒታሉ በክረምቱ ከሠራተኞችና ከሌሎች አካላት 600,000 (ስድስት መቶ ሺህ) ብር በመሰብሰብ፣ በሆስፒታሉ ሥራ ላይ ጉዳት ለደረሰባት አንዲት የጤና ባለሙያ እና ለሦስት ለረጅም ጊዜ በታማኝነት ያገለገሉ በጡረታ ለተገለሉ የሆስፒታሉ ሠራተኞች እያንዳንዳቸው 50,000 ብር የድጋፍ ማበርከት መቻሉ ተገልጿል። በተጨማሪም በየደረጃው ላሉ አቅመ ደካሞች የገንዘብ ድጋፍ ተደርጓል።
በ2018 ዓ.ም የክረምት በጎ አድራጎት ሥራ ላይ በመሳተፍ ጉልበታችሁን፣ ሙያችሁንና ሀብታችሁን ለማህበረሰቡ ላበረከታችሁ ሁሉ ከፍተኛ ምስጋና እናቀርባለን!
ቡሌ ሆራ ዩኒቨርሲቲ ማስተማሪያ ሆስፒታል
