19/05/2026
HNN:Seenaa Jaal Badhoo Dachaas!
Itti gaafatamaa Koree Siyaasaa ABO kan jalqabaa Badhoo Dachaasaa/Dammaksaa/.
------------------------
Badhoo Dachaasaa qabsaawota Oromoo kanneen jiddu-gala biyyaatii bosona Harargeetti ABO'tti dabalame keeysaa nama jalqabaati. Badhoon nama joollummaarraa sabboonummaa fi gootummaa qabu. Osoo ABO'tti hin dabalamin duraas nama sabboonaa bifa adda addaatiin Oromoo dammaksaa ture.
Badhoo Dachaasaa dandeeytii nama dammaksuu tanaan Dhaaba keeysatti Dammaksaa jechuun moggaasaniif. Badhoon gaafa Baaroo Tumsaatii fi Leencoo Lataa faan ABO'tti dabalamuuf gara bosona Harargee imalan nama miseensa Koree jidduu tahuun isaan qeebalee hubannoo kaayoo dhaabaa laateef keeysaa nama tokko ture. Warri bosona dura gaafa isaan Kora Sabaa Saaqata'tti gaggeeyfatan itti dabalame, Magarsaa Barii, Baaroo Tumsaatii fi Abbaa Biyyaa Roobaa ti.
Haatahuu malee kaayoon miseensonni haarayni qabatee bosona dhaqe Badhoof ifa hin turre. Badhoon nama Jaarraa Abbaa Gadaa faa wajjiin gobeelletti ABO gad-dhaabe waan tureef miseensota haaraya kanaas akk*ma Jaarraa Abbaa Gadaatii fi Mul'is Gadaatti laaluu ture.
Garuu adeemsi jaraa kan jaallan isaarraa adda itti taheeti amala isaa gaarii san jijjiirsise. Kuniis jara booda dhufe kana jifachuu fi akka nama quurrama irraa qabuutti fuula itti jijjiruudha. Akka waahellan isaa himanitti Yeroo takka takka amala alaan-alaatiis ni fidate ja'an.
Guyyaa boodaa mufiin keeysoo tan Badhoo Dachaasaa mataa hara-baafata dhoorkite rasaa*satti jijjiiramteeti Baaroo Tumsaatti dhukaasee galaafachuu, Leencoo Lataa arihuu fi mataa lunbuu isaa balleeysutti jijjiramte. Akkaan qabsaawota buleeyyii Sooreysa Jaarraa Abbaa Gadaa faa wajjiin turan irraa odeeyfadhetti dubbiin tun wal-muudinsa magaalaa Finfinnee sanirraa dhalatte.
Kuniis namoonni boodarra bosona gobeellee dhaqee qabsotti dabalame kun Finfinnee keeysatti nuutu ABO hoggana je'ee wal-muudee gobeelletti Jaarraa Abbaa Gadaa faa bira dhaqe. Isaan keeysaa Leencoo Lataatii fi obboleeysi isaa Abbaa Caalaa Lataa faan warra boodarra bara 1978 keeysa Harargee dgaqee ABO'tti dabalame. Hoggaa bosona dhaqan dhaabni hoggansa Koree guutuu qabu tahe.
Haaluma kanaa,
1. Jaarraa Abbaa Gadaa, hogganaa Dhaabaa
2. Mul'is Gadaa, itti Aanaa hogganaa Dhaabaa..
3. Badhoo Dachaasaa, hogganaa Koree Siyaasaa
4. Bookhee Haraa / Abdujaliil Abdallaa, Barreeysaa..
5. Moggaasaa Baatii / Baatee/, hogganaa Geejjibaa fi Diinagdee
6, Bobbaasaa Dhaabaa, Hogganaa waraanaa tahanhii koree qindeeyfachuu fi
Akkasumaas qoondaalota dhaabaatii fi hoggantoota waraanaa tan Kora ABO'n jalqaba Saaqata'tti gaggeeyfateen dhaaba hogganaa turan.
Dhaabni Caasaa guutuu qabaachuun namoota Finfinnetti wal-muudee ABO'tti dabalame kana karaa itti cufteeti qaawa tokkollee dhoirkite. dubbiiin akka isaan barbaadan tahuu dhabnaan dhaaba keeysatti jeequmsa kaasuuf dirqaman. Haala kanaan qabsaawonni buleeyyiin Jaarraa Abbaa Gadaa wajjiin turan naa himanii turan. Jeequmsa kaasuu qofa osoo hin tahin dhaaba keeysa taa'anii qabsaawota keeysaa namoota akka Bobbaasaa Dhaabaa kan duraan biyya keeysatti hariiroo waliin qaban jaarrachuun irratti hojjatan.
Hoggaa Shira dhaaba keeysatti dhalate kanaan Badhoo Dachaasaatii fi Baaroo Tumsaa wareegaman warri lubbuun hafe kaayoo isaanii galmaan gayuuf Jaarraa Abbaa Gadaa Baaroo Tumsaa ajjeese ja'aniiti hoggantoota Waraanaatii fi waraana keeysa olola facaasuu eegalan. Hawaasa isaanitti dhiyaatullee olola dharaa kanaan gurra duuchan.
Dubbiin as qofatti hin dhaabbanne. Sooreysa Jaarraa Abbaa Gadaa kan daadarkaa bara dheeraa booda ABO gad-dhaabellee lubbuu balleeysuuf haala-duree fixatan. Dubbiin tun hoggantummaa qabsoo riphee lolaa karaa nagayaatiin dhabnaan bifa fonqolchaatiin fudhachuudha. Tun tan firraa maganfatani.
Warri maqa-balleeysummaan kaayoo ofii gurgurachaa ture Eega du'a Baaroo Tumsaa akka Jaarraan harka keeysaa hin qabne addaan hawaasni addaan baafate, miseensa sammuun miidhamaatu Baaroo Tumsaa ajjeese ja'aniiti olola biraa uuman. Badhoo Dachaasaa jechuu isaaniiti.
Garuu Badhoo Dachaasaa fayyaa sammuu guutuu qabaachuu bira dabree nama sabboonummaa fi gahumsa siyaasaa qaceellotti qabaachuun hogganaa Siyaasaa ABO tahee filame. Hogganaa Koree Siyaasaa tahee filamuun isaa osoo Leencoo Lataa faan ABO'tti hin dabalamin dura. An warruma Badhoon miidhama sammuu qaba jedhu saniin sammuu isaanii fayyaa tahuu shakka. Dhara kanaatu bara dheeraaf bishingaa facaaffannu gobeensatti nu harkaa jijjiiree, bilisummaa hawwinu dharraa bahuu nu dhoorkee ture. Qeeyroo k*m lama alla-magan.
Yoo Wareegama Baaroo Tumsaatii fi Badhoo Dachaasaa baruu barbaaddan Kitaaba Seenaa Sooreysa Jaarraa Abbaa Gadaa dubbisaa. Dhara haarayatti Kitaabaan as baate addaan baafachuuf isin gargaara je'eeti.
Badhoo Dachaasaa beekaa dhara hin qabnee fi goota seenaan hin daganne.
Jemal Ahmed
Oct. 5, 2025
