24/10/2026
Bu’aawwan Qorannoo Gaggeessine Sirreeffama Caasaa Mootummaa Akka Taasisnu Nu Dirqisiisan! Shimallis Abdiisaa, Pirezidaantii MNO
Mootummaan Naannoo Oromiyaa bara 1983 keessa, yeroo ce’umsaa biyyattii keessatti, caasaa bulchiinsaa jalqabaa hundeessuun hojii isaa eegale. Yeroo sana Oromummaan bu’uura ijaarsa mootummaa ta’ee kan ka’e yoota’u, mootummaan haaraan qabeenya namaa, dhaabbileefi bu’uuraalee misoomaa muraasa qabuun hojii jalqabe. Hojjettoonni mootummaa naannoo sanaa kuma 43 ol hin turre. Haala qabatamaa yeroo sanaa giddugaleessa godhachuun, caasaan mootummaa sadarkaa ganda, aanaafi godinaa saddeet irratti hundaa’e ummata tajaajiluu eegale.
Bara 1987’tti, Heerri Mootummaa Naannoo Oromiyaa raggaasifamuufi caasaan bulchiinsaa babal’achuun, hojii mootummaa ummataaf dhiyeessuuf bu’uura dabalataa uume. Yeroo sana magaalomuun hamma amma mul’atuun waan hin babal’anneef, yaadni magaalomuu heera mootummaa naannoo keessatti iddoo olaanaa hin qabaanne. Caasaan gandaa qonnaan bultoota, horsiisee bultootafi jiraattota magaalaa hammachuun, namoota ummataan filataman irratti hundaa’ee tajaajila kennuuf qindaa’e.
Haata’u malee, yeroo mootummaafi dhaabbileen isaa guddachaa dhufanitti, caasaan mootummaa sadarkaa naannoofi godinaatti bal’achaa dhufe; hamma tokko sadarkaa aanaattis babal’ate.
Sadarkaa aanaatti hojjettoota muraasaan hojiiwwan hedduun gaggeeffamaa turan; sadarkaa godinaafi naannootti garuu hojiiwwan bulchiinsaafi misoomaa hedduun walitti qabamanii turan. Haalli kun tajaajila mootummaafi hojii misoomaa hedduun giddugala muraasa irraa akka hogganaman taasise. Kanaaf, namoonni tajaajila barbaadan giddugala sana dhaquun isaan barbaachisaa ture.
Yeroo dheeraa keessatti mootummaan guddachaa, dhaabbileen isaa babal’achaafi hojjettoonni mootummaa dabalaa dhufaniiru.
Haata’u malee, guddinni caasaa mootummaa kun tajaajilli ummata bira ga’uuf qabu waliin saffisa walqixa hin qabu ture. Caasaan mootummaa sadarkaa naannoofi godinaatti bal’achuun, tajaajilli sadarkaa gadiitti ummata bira dhiyaachuu qabu bakka muraasa irratti akka kuufamu taasiseera. Kunis dhaqqabummaa tajaajilaa irratti gufuu ta’uufi hojii misoomaa saffisaafi bu’a qabeessa ta’een raawwachuuf rakkoo uumuu danda’eera.
Mootummaan Jijjiiramaa Naannoo Oromiyaa rakkoolee kana mala qorannoofi xiinxala saayinsaawaa fayyadamuun adda baasuufi furuuf bara 2011’rraa eegalee qorannoo gaggeessuu jalqabe.
Qorannoon kun sadarkaa jijjiirama ummanni Oromoo barbaadu, guddina Oromiyaafi fedhii bulchiinsa mootummaa, akkasumas muuxannoowwan biyyoota biroo giddugaleessa godhate. Kaayyoon isaa caasaa mootummaa duraanii qofa babal’isuu osoo hin taane, caasaan jiru tajaajila ummataaf kennu keessatti hammam bu’a qabeessa akka ta’e, aangoofi itti gaafatamummaan sadarkaa adda addaatti akkamitti akka qoodame, akkasumas caasaan mootummaa guddina fuulduraa deeggaruuf gahaa ta’uu isaa qorachuudha.
Qorannoon kun bu’aawwan ijoo afur adda baase. Bu’aawwan kunneen rakkoolee caasaa mootummaa keessatti mul’atan qofa osoo hin taane, tajaajila mootummaa, qindoomina hojii misoomaa, qoodinsa aangoofi qabeenyaa, akkasumas guddina Oromiyaa gara fuulduraa deeggaruuf jijjiiramni caasaa mootummaa keessatti barbaachisaa ta’uu agarsiisan.
Bu’aan qorannoo inni jalqabaa, guddinni bu’uuraalee misoomaa, manneen barnootaa, buufataalee fayyaafi giddugaleessota tajaajilaa waliin caasaan mootummaa sadarkaa naannoofi godinaatti bal’achuu isaa agarsiise. Haata’u malee, hojjettoota mootummaa Naannoo Oromiyaa keessaa dhibbeentaan 63 ol ganda irratti argamu jedhamee ibsameera. Ta’us, hojjettoonni sadarkaa kana jiran hojii isaanii qindeessuuf hoggansa gahaa dhabuu isaanii qorannoon adda baase.
Kunis rakkoon jiru lakkoofsa hojjettootaa qofa osoo hin taane, hojii isaanii qindeessuu, hogganuufi itti gaafatamummaa mirkaneessuu keessatti hanqina akka jiru agarsiisa. Hojiiwwan mootummaa sadarkaa gandaatti raawwataman bu’a qabeessa taasisuuf hoggansi gahaan, qindoominni hojiifi itti gaafatamummaan ifa ta’e jiraachuu qaba. Kanaaf, hoggansa sadarkaa gandaatti cimsuun, hojii mootummaafi tajaajila ummataaf kennamu fooyyessuuf dhimma ijoo ta’ee mul’ate.
Bu’aan qorannoo inni lammaffaan, tajaajilli mootummaa sadarkaa ummataatti dhiyaachuu akka qabu agarsiise. Tajaajiloonni hedduun sadarkaa godinaafi naannootti walitti qabamanii turuun, namoonni tajaajila argachuuf giddugala muraasa dhaquun akka isaan barbaachisu taasiseera. Kunis yeroofi baasii ummataa dabaluun, tajaajila mootummaa argachuurratti gufuu uumeera.
Addunyaa ammaa keessatti teknoolojii, sirni dijitaalaafi tajaajilli toora interneetii fayyadamuun tajaajila saffisaafi dhaqqabamaa ta’e kennuuf carraa bal’aa uumaa jiru. Haala kana keessatti, tajaajilli ummanni barbaadu gara isaatti dhiyaachuu qaba. Kanaaf, qorannoon kun tajaajiloota barbaachisoo sadarkaa aanaafi isa gadiitti gadi buusuu, aangoofi itti gaafatamummaa isaanii ifa gochuu, akkasumas tajaajila mootummaa dhaqqabamaa taasisuun dirqama ta’uu adda baase.
Bu’aan qorannoo inni sadaffaan, misooma Oromiyaa keessatti gaggeeffamu giddugala tokko irraa qofa hogganuun jijjiirama waliigalaa saffisaafi bu’uuraa fiduuf gahaa akka hin taane agarsiise. Misoomni giddugala tokko irratti hirkate sadarkaa ganda, aanaafi hawaasa naannoo keessatti fedhiifi dandeettii jirurraa ka’ee akka saffisaan raawwatamu daangessuu danda’a.
Kanaaf, misoomni sadarkaa ummataatti dhiyaachuu, hojiiwwan misoomaa gandafi aanaa irratti qindaa’anii raawwatamuu, akkasumas baajanni, aangoonfi qabeenyi hojiiwwan sanaaf barbaachisan itti gaafatamummaa waliin gadi bu’uu qabu. Qonnaan bulaan, horsiisee bulaaniifi jiraataan magaalaa fedhiifi dandeettii naannoo isaarratti hundaa’uun misooma keessatti hirmaachuu akka danda’u taasisuun barbaachisaadha. Kana jechuun aangoo qofa gadi buusuu osoo hin taane, qabeenya, dandeettii raawwachiisummaafi itti gaafatamummaa waliin qooduudha.
Bu’aan qorannoo inni afraffaa, guddinni Oromiyaa galmeessisaa jirtuufi mul’anni naannoo badhaate ijaaruu waggoottan dhufaniif qabame caasaa mootummaa isa duraanii qofaan deeggaramuu akka hin dandeenye agarsiise. Mootummaan Naannoo Oromiyaa yeroo dheeraa keessatti guddachaa, dhaabbileen isaa babal’achaafi dandeettiin raawwachiisummaa isaa dabalaa dhufeera. Guddina kana waliin deemuufi fedhii waggoota dhufan deebisuuf caasaa mootummaa gahumsa qabu, jijjiirama dursee tilmaamufi fedhii hawaasaa waliin madaqu barbaachisa.
Caasaan mootummaa hojiiwwan yeroo ammaa qofa raawwachuuf qophaa’e osoo hin taane, guddina waggoota kudhan, kudha shaniifi digdama dhufaniif barbaachisu dursee tilmaamee qophaa’uu qaba. Caasaan mootummaa rakkoo uumame booda duukaa bu’ee sirreessuu qofa irratti hundaa’uu hin qabu; jijjiirama hawaasummaa, dinagdee, teeknoolojiifi bulchiinsaa dursee hubachuun, fedhii egeree deebisuuf qophaa’uu qaba. Kanaaf, sirreeffamni caasaa mootummaa guddina Oromiyaa fuulduraa waliin deemuufi mul’ata naannoo badhaate ijaaruu deeggaruuf barbaachisaa ta’eera.
Walumaagalatti, bu’aawwan qorannoo kanaan argaman rakkoolee caasaa mootummaa duraanii keessatti mul’atan adda baasuun, sirreeffamni bal’aan akka barbaachisu agarsiisaniiru. Rakkooleen kunneen hoggansa sadarkaa gandaatti cimsuu, tajaajila mootummaa ummata bira geessuu, misooma giddugala tokko irratti hirkate irraa gara qindoomina sadarkaa garaagaraatti ce’uu, akkasumas caasaa mootummaa guddina fuulduraa deeggaru ijaaruu waliin walqabatu.
Kanaaf, sirreeffamni caasaa mootummaa jijjiirama maqaa dhaabbilee ykn qindaa’ina hojii qofa miti. Inni aangoo, qabeenya, itti gaafatamummaafi dandeettii raawwachiisummaa sadarkaa adda addaatti akkamitti qooduu akka qabnu irratti jijjiirama bu’uuraa fiduuf kan kaayyeffatedha. Bu’aan isaa tajaajilli ummataaf kennamu dhaqqabamaafi bu’a qabeessa ta’uu, hojii misoomaa fedhii naannoo waliin walsimuu, akkasumas caasaan mootummaa guddina Oromiyaa gara fuulduraa deeggaruu danda’u ijaaruu ta’uu qaba.
ENA
See less
