04/09/2026
⚖️ "Mana kiyya keessatti Baabura Midhaanii (Wafco) dhaabadhee hojjechiisuun mirga kiyya!" Jechuun ni danda'amaa? Seerri maal jedha? ⚖️
Hawaasa keenya kabajamoofi jaallatamoo, baga nagaan gara fuula Waajjira Abbaa Alangaa Aanaa Gurawaatti dhuftan.
Har'a dhimma yeroo baay'ee hawaasa keessatti walitti bu'iinsa uumuu fi gaaffii kaasu tokko gadi fageenyaan ilaallee isiniif ibsina. Fakkeenyaaf, namni tokko mana jireenyaa dhaaba (dallaa) waliinii mana nama biroo waliin qabu keessatti, "Mana kiyya waan ta'eef mirga guutuun qaba, baabura midhaanii (wafco) mana kiyya keessatti galcheen dhaabadha" yoo jedhe, seeraan fudhatama qabaa? Ollaan jireenya nagayaa fi tasgabbii barbaadu hoo mirga akkamii qaba?
Deebiin isaa gabaabaan: LAKKI! Namni tokko mirga qabeenya kiyya irratti nin qaba jedhee jireenya nagayaa kan ollaa isaa jeequu hin danda'u.
Mee sababoota seeraa dhimma kanan wal qabatan haa ilaallu:
1. 🛑 Mirgi Abbaa Qabeenyummaa Daangaa Qaba! Dhugaa dha, namni tokko qabeenya isaa irratti mirga qaba. Garuu, mirgi kun yeroo mirga nama biraa miidhuu eegalu ni daanga'a. Seerri Siviilii Itoophiyaa (Kw. 1225 fi 1226) akka ifoomsutti, abbaan qabeenyaa kamiyyuu gocha jireenya ollaa isaa jeeqan (fkn: sagalee guddaa fi jeequmsa) uuman raawwachuu hin danda'an. Manni Murtii Waliigalaa Federaalaa Dhaddachi Ijjibaataa (Galmee Lakk. 57044) irratti murtee dirqisiisaa kenneen, "Mirga abbaa qabeenyummaa qabaachuun, mirga namoota biroo miidhuuf/jeequuf hayyama namaaf hin kennu" jedhee hiikkoo seeraa kennee jira.
2. 🧱 Dhaaba Waliinii (Shared Wall) fi Miidhaa Qabatamaa Manni keessan dhaaba tokko qofa yoo ollaa keessan waliin qabaate, seerri (Kw. 1201 fi 1280) haga ragaadhaan dhaabichi kan nama tokkoo tahuun mirkanaa'utti dhaabichi kan lamaan keessanii (qabeenya waliinii) akka ta'etti tilmaama.
Dhimma kana keessati Wafcoon meeshaa sagalee guddaa qabuufi raafama (vibration) hamaa uumu dha. Raafamni kun dhaaba manaa irratti babaqaqiinsa (crack) yoo uume miidhaa qabeenya ollaa kana irratti dhaqqabsiisa. Kanaafuu, namni tokko hayyama ollaa isaa malee dhaaba waliinii irratti hojii dhaabicha miidhu kamiyyuu raawwachuu seeraan dhoorkaadha.
3. 🏡 Mirga Eenyuutu Dursa Argata? Naannoon tokko naannoo jireenyaa (Residential Area) yoo ta'e, jireenya nagayaaf malee warshaa ykn wafco dhaabuuf hin danda'amu. Manni Murtii Ijjibaataa (Galmee Lakk. 184585 fi 123056) irratti akka kaa'etti, "Mirgi namni tokko jireenya nagayaa jiraachuuf qabu, mirga qabeenya nama biraa irra dursa argata!" Kana jechuun, nagayaa fi tasgabbiin hawaasaa dantaa dhuunfaaf jecha miidhamuu hin qabu.
🛡️ Furmaanni Seeraa Maali? Yoo ollaan keessan dhimma kana hubachuu dide, hatattamaan Mana Murtii iyyannoo dhiheeffachuun ijaarsicha wofco akka hin dhaabbanne seeraan dhaabsisuu ni dandeessu.
Dhumarratti: "Mirgi kee kan jalqabu, bakka mirgi kiyya xumuramu irraahi" Qabeenya kiyya irratti abbaa ta'uun, ollaa ofii jeequun nagayaa fi tasgabbii dhorkuu akka hin taane haa hubannu.
Seera kabajuun, waliigaltee fi obsaan ollaa wajjin jiraachuun aadaa haa godhannuu!
Hubannoo seeraa dabalataaf fuula kana 'Like' fi 'Follow' gochuun nu hordofaa. Akkasumas namoota biroof akka gahuuf 'Share' godhaa!
Waajjira Abbaa Alangaa Aanaa Gurawaa
📲 Odeeffannoo Seeraa fi Tajaajila Abbaa Alangaa Yeroon Argachuuf Nu Hordofaa:
👇🏽
📱 Telegram: https://t.me/MHAAAAG
📘 Facebook: https://www.facebook.com/WAAGurawaa
📺 YouTube: https://youtube.com/?si=ePkMgNrUST94er3D
🎵 TikTok: https://www.tiktok.com/?_r=1&_t=ZS-98MNIWyIVQF
❌ X (Twitter): https://x.com/alangaagurawaa
📸 Instagram: https://www.instagram.com/waaagurawaa?igsh=Z2lwZDk2N3Bwb3Fw
📢 Odeeffannoon kun namoota hundaaf akka dhaqqabuuf Share godhuun hiriyoota fi hojjettoota biroof qoodaa!
⚖️ Haqaan Haqaaf Haa Hojjannuu ❗
📍 Waajjira Abbaa Alangaa Aanaa Gurawaa
"
fans
