Jay in the UK

19/05/2025

🇬🇧 අවුරුදු 5 න් ILR ගන්න අපට කල හැකි දේ

මේ දිනවල දැඩි කතා බහකට ලක්‌වී ඇති 2025 ආගමන ධවල පත්‍රිකාව මගින් යෝජිත ILR සදහා වන කාලය අවුරුදු 5 සිට අවුරුදු 10 දක්වා දීර්ඝ කිරීමේ යෝජනාව සම්මත නොකර, එක්සත් රාජධානියේ දැනටමත් සිටින අය සඳහා දැනට පවත්නා අවුරුදු 5 ක පදිංචි කාලය එලෙසම පවත්වාගෙන යාම සදහා අදාළ ප්‍රතිපත්ති සම්පාදකයන් වෙත බලපෑම් කිරීමට අපට ආකාර කිහිපයක් තිබේ.

ඒ අනුව ප්‍රමාද නොවී අපට කල හැකි දේ කිරීම මගින් ඉහත යෝජනාව සම්මත නොකිරීමට යම් බලපෑමක් සිදු කිරීමට අපට හැකි වනු ඇත.

1. ඔබේ මන්ත්‍රීවරයා දැනුවත් කරන්න :

ඔබේ ප්‍රාදේශීය පාර්ලිමේන්තු මන්ත්‍රීවරයා සම්බන්ධ කර යෝජිත වෙනස්කම් පිළිබඳව අවම වශයෙන් විද්යුත් තැපෑල ඔස්සේ ඔබේ කනස්සල්ල ප්‍රකාශ කරන්න. දැනටමත් එහි සිටින අය සඳහා අවුරුදු 5 මාර්ගය නොවෙනස්ව පැවතිය යුතු බවට වන පුද්ගලික හේතු සපයන්න.

මෙහිදී මෙරට පැමිණීමේදී පැවැති නීතිය පිළිබඳ තිබු විස්වාසය, ඔබගේ සහ පවුලේ මේ පිළිබඳව වූ අපේක්ෂා, ඔබ විසින් UK ආර්ථිකය වෙත දක්වන සේවය හා බදු ගෙවීම ආදිය උදාහරණ ලෙස දැක්විය හැකියි.

ඔබේ ප්‍රදේශයේ මන්ත්‍රීවරයා සොයාගන්න
https://members.parliament.uk/FindYourMP

ඊ මේල් හෝ හමු වී සාකච්ඡා කිරීමෙන් ඔබේ අදහස් මන්ත්‍රීවරයා වෙත ලබා දිය හැකිය.

Sample letter

Dear [MP's Name],

I'm writing to express concern about the proposed increase in the ILR qualifying period from 5 to 10 years for those already in the UK. This change would unfairly penalize individuals who've already met current requirements and made significant contributions to British society.

The increase could disrupt family reunification, deter skilled workers, and harm businesses. I urge you to advocate for a more nuanced approach that considers the unique circumstances of those already settled in the UK.

A blanket increase isn't in the best interest of the UK and its residents. I would appreciate your engagement with the government on this issue.

Thank you for your time and consideration.

Sincerely,
[Your Name]
[Your Address]

2. පාර්ලිමේන්තුව වෙත මහජන පෙත්සම් ඉදිරිපත් කිරීම:

යෝජිත වෙනස්කම් වලට මහජන විරෝධය පෙන්වීම සඳහා දියත් කර ඇති මාර්ගගත පෙත්සමක් අත්සන් කිරීම. ඒ සදහා පිවිසෙන්න

https://petition.parliament.uk/petitions/727360

හා

https://chng.it/WQDGhTQK7Y

මෙහි අත්සන් 100,000 සපිරීම මගින් පෙත්සමේ ඇති කරුණු පිළිබඳ පාර්ලිමේන්තු විවාදයක් දක්ව ගමන් කරනු ඇත.

3. සාමූහික බලපෑම් හා සංවාද සදහා සම්බන්ධ වන්න:

එක්සත් රාජධානියේ ආගමන ගැටළු කෙරෙහි අවධානය යොමු කර ඇති මාර්ගගත සංසද, සමාජ මාධ්‍ය කණ්ඩායම් හෝ සංවිධානවලට සහභාගී වන්න. සාමූහික හඬවල් මෙම වෙනස්කම සිදු නොකිරීමට සැලකිය යුතු බලපෑමක් කරනු ඇත.

4. වෘත්තීය සංගම් හා ක්‍රියාකාරකම්:
ඔබ සෞඛ්‍ය, හෝටල් ආදී කිසියම් වෘත්තීය කණ්ඩායමක කොටසක් නම්, මෙම ගැටලුව සම්බන්ධයෙන් ස්ථාවරයක් ගැනීමට ඔවුන්ට බලපෑම් කිරීම සලකා බලන්න. ප්‍රතිපත්ති හැඩගැස්වීමේදී ඔවුන්ගේ බලපෑම සැලකිය යුතු විය හැකිය.

යෝජිත වෙනස්කම් මගින් ශුද්ධ සංක්‍රමණය අඩු කිරීම සහ එක්සත් රාජධානියේ දිගුකාලීන කුසලතා සහ ආරක්ෂක අරමුණු සමඟ පෙළගැස්වීම අරමුණු කල ද බොහෝ දෙනෙක් තර්ක කරන්නේ මෙම දිගුව අනපේක්ෂිත ප්‍රතිවිපාක ඇති කළ හැකි බවයි. විශේෂයෙන් දක්ෂතා හා සුදුසුකම් සහිත පුද්ගලයින් එක්සත් රාජධානිය තෝරා ගැනීමට අධෛර්යමත් කිරීම සිදු විය හැකිය.

Enter your postcode, location, MPs name or job title to find the name and contact details of your local MP.

14/05/2025

🇬🇧 PR සදහා වසර 10 හැමෝටම අදාළ බව පැවසේ

එක්සත් රාජධානියේ ස්ථිර පදිංචිය සඳහා සුදුසුකම් ලැබීමට සංක්‍රමණිකයින්ට වසර 10 ක් දක්වා කාලයක් බලා සිටීමට සලස්වන ඉදිරියේදී සම්මත වීමට නියමිත නව නීති දැනටමත් UK තුළ දැනටමත් සිටින පුද්ගලයින්ට අදාළ වන බව වාර්තා වේ.

https://www.bbc.com/news/articles/c249ndrrd7vo

12/05/2025

🇬🇧 දැනට UK ඉන්න අයට වසර 5 න් පසු ILR

එක්සත් රාජධානියේ සිටින, අනෙකුත් සුදුසුකම් සපුරන සාත්තු සේවකයින්ට ස්ථීර පදිංචිය සඳහා වසර 5 කට පසුව අයැදුම් කිරීමට තිබු හැකියාවට අද ඉදිරිපත් කරන ලද නව සංක්‍රමණ වීසා නීති මගින් වෙනසක් ඇති නොකරන බව පෙනී යයි.

නමුත් විදේශයන්ගෙන් පැමිණෙන සාත්තු සේවක වීසා තවදුරටත් ලබාදීම සපුරා නතර කර ඇත.

දැනටමත් එක්සත් රාජධානියේ සිටින අය සඳහා පවතින වීසා දීර්ඝ කිරීම සහ වීසා අතර මාරු වීම සදහා ගැටලුවක් නොමැති බවද පෙනී යයි.

ඒ අනුව දැනට UK වල සිටින සාත්තු සේවකයින් සඳහා, ශ්‍රම බලකා උපාය මාර්ගය සංවර්ධනය කර ක්‍රියාත්මක කරන අතරතුර, තම වීසා දීර්ඝ කිරීම් සහ රට තුළ වීසා අතර මාරුවීම් සදහා 2028 දක්වා අවසර දෙනු ඇත.

විශේෂයෙන්ම ILR සදහා සම්මත සුදුසුකම් ලැබීමේ කාලය දැනට පැවැති අවුරුදු 5 ක කාලය අවුරුදු 10 දක්වා දෙගුණ කිරීම සිදුවන අතර, එය සංක්‍රමණිකයන් විසින් එක්සත් රාජධානියට දක්වන දායකත්වය සලකා බලා, ලකුණු මත පදනම් වූ ක්‍රමයක් මගින් සිදු කිරීමට රජය සැලසුම් කරයි.

12/05/2025

රටවල් කිහිපයක අද වෙසක් නිවාඩු

එක්සත් ජාතීන්ගේ සංවිධානය වෙසක් දිනය 2000 වසරේ ගෝලීය නිවාඩු දිනයක් ලෙස පිළිගෙන ඇති අතර, සැලකිය යුතු බෞද්ධ ජනගහනයක් සිටින බොහෝ රටවල් එය රජයේ නිවාඩු දිනයක් ලෙස සමරති. එකම දිනයක නොවුවද සමහර රටවල වෙසක් දිනය එම රටවල ට හඳ පායන දිනයන් සහ දින දර්ශන අනුව වෙනත් දිනයක වෙසක් සමරනු ලබයි.

2025 මැයි 12 වන දින වෙසක් දිනය ජාතික නිවාඩු දිනයක් ලෙස සමරන රටවල් කිහිපයක් තිබේ.

දකුණු ආසියාව: ඉන්දියාව, ශ්‍රී ලංකාව, නේපාලය, බංග්ලාදේශය, භූතානය, මියන්මාරය.

අග්නිදිග ආසියාව: තායිලන්තය, ලාඕසය, කාම්බෝජය, ඉන්දුනීසියාව, සිංගප්පූරුව, මැලේසියාව.

නැගෙනහිර ආසියාව: දකුණු කොරියාව, තායිවානය, ජපානය, හොංකොං, මැකාවු, චීනය.

වෙනත්: වියට්නාමය, පිලිපීනය.

ඒ අතර
- මැලේසියාව: එය ගෞතම බුදුන්ගේ උපත, බුද්ධත්වය සහ පරිනිර්වාණය සිහිපත් කරන ජාතික නිවාඩු දිනයකි.

- ශ්‍රී ලංකාව: වෙසක් පුර පසළොස්වක පොහොය දිනය ලෙස සමරනු ලබන මෙය, බුදුන්ගේ ජීවිතයේ වැදගත් සිදුවීම් සනිටුහන් කරන ජාතික නිවාඩු දිනයකි.

- ඉන්දුනීසියාව: වයිසක් දිනය ලෙස සමරනු ලබන මෙය, බුදුරජාණන් වහන්සේගේ
සංවත්සරයට ගෞරව කරන ජාතික නිවාඩු දිනයකි.

ජාතික නිවාඩු දිනයක් නොවුවද වෙසක් දිනය සමරන අනෙකුත් රටවල්

- සිංගප්පූරුව: වෙසක් දිනය සමරනු ලබන අතර, බෞද්ධයින්ට බුදුන්ගේ අනුකම්පාව, ප්‍රඥාව සහ ජයග්‍රහණවලට ගරු කිරීමට ඉඩ සලසයි.

- ඉන්දියාව: බුද්ධ පූර්ණිමා ලෙස සමරනු ලබන මෙය, ඉන්දියාවේ බෞද්ධයින්ට වැදගත් දිනයකි.

- නේපාලය: බුදුන් වහන්සේගේ උපත සනිටුහන් කරන බුද්ධ ජයන්ති ලෙස සමරනු ලැබේ.

- පකිස්ථානය: බුද්ධ පූර්ණිමා ලෙස මෙදින පිළිගැනේ.

- වියට්නාමය: බෞද්ධ සම්ප්‍රදායන්ට අනුකූලව වෙසක් සමරනු ලැබේ.

- තායිලන්තය: චන්ද්‍ර දින දර්ශනය අනුව දිනය වෙනස් විය හැකි වුවද, තායි බෞද්ධ සංස්කෘතිය තුළ වෙසක් දිනය වැදගත් වේ.

- බංග්ලාදේශය: බුද්ධ පූර්ණිමා නිවාඩු දිනය ලෙස සමරනු ලැබේ.

මෙම රටවල සැලකිය යුතු බෞද්ධ ජනගහනයක් සිටින අතර භාවනා කිරීම, සජ්ඣායනා කිරීම සහ භික්ෂූන් වහන්සේලාට දානය පිරිනැමීම ඇතුළු විවිධ සම්ප්‍රදායන් සමඟ වෙසක් දිනය සමරනු ලැබේ.

08/05/2025

යුරෝපයේ දෙවන ලෝක යුද්ධ අවසානය දුටු මැයි 8 VE සැමරුම

1945 මැයි 8 වන දින, බ්‍රිතාන්‍යය සහ ලොව පුරා ජනතාව කෝටි 07 කට වැඩි මිනිස් ජීවිත ගණනක් බිලිගත් 02 වන ලෝක යුද්ධයෙ යුරෝපානු අවසානය සටහන් වූ ජයග්‍රහණය සැමරූ අතර, එතැන් සිට සෑම වසරකම මැයි 08 වන දින VE දිනය (Victory of Europe) සමරනු ලබයි. මෙය ජර්මනියේ කොන්දේසි විරහිතව යටත් වීම සනිටුහන් කළ අතර, ඉතිහාසයේ භයානකම ඛේදවාචකය වූ වසර හයකට ආසන්න යුද්ධය යුරෝපය තුළ අවසානය සනිටුහන් කළේය. මෙදින ජර්මනිය නිල වශයෙන් කොන්දේසි විරහිතව මිත්‍ර පාක්ෂිකයින්ට යටත් වූ බව ප්‍රකාශ කළේය.

මැයි 08 දින මානව ඉතිහාසයේ අතිමහත් දුක් වේදනා හා ජීවිත හානි පැමිණ වූ මෙම දෙවන ලෝක යුද්ධය
යුරෝපය තුළ අවසානය දුටුවද, 1945 අගෝස්තු මාසයේදී ජපානය යටත් වන තෙක් පැසිෆික් කලාපයේ යුද්ධය දිගටම පැවති බව සැලකිල්ලට ගත යුතුය.

2025 මැයි 08 වන විට දෙවන ලෝක යුද්ධය අවසන් වී වසර 80 ක් සපිරීම සැමරීම සඳහා මැයි 8 වන බ්‍රහස්පතින්දා එංගලන්තයේ ආබොරේටම් හිදී අනුස්මරණ උත්සවයක් පවත්වනු ලැබේ. එමෙන්ම යුරෝපය පුරා පාසල්වල හා විවිධ ස්ථානවල මෙම ජයග්‍රාහී දිනය සමරනු ලබයි.

දෙවන ලෝක යුද්ධයේදී ආසන්න වශයෙන් මිලියන 70-85 ක ජනතාවක් මිය ගිය අතර, පළමු ලෝක යුද්ධයේදී මිලියන 15 කට ආසන්න පිරිසක් මිය ගියහ. දෙවන ලෝක යුද්ධය ඉතිහාසයේ දරුණුතම ගැටුම ලෙස සැලකේ. ඇස්තමේන්තු කර ඇති පරිදි යුද්ධය නිසා සෘජුවම මරණ මිලියන 50-56 ක් පමණ සිදුවී ඇති අතර යුද්ධයට සම්බන්ධ හේතූන් නිසා තවත් මිලියන 19-28 ක් මිය ගොස් ඇත.

පළමු ලෝක යුද්ධයේදී සොල්දාදුවන් මිලියන 65 කට අධික සංඛ්‍යාවක් බලමුලු ගැන්වූ අතර හමුදා නිලධාරීන් සහ සිවිල් වැසියන් ඇතුළුව මිලියන 37 කට ආසන්න සංඛ්‍යාවක් මිය ගියහ.

සුනාමි, කොරෝනා වසංගතය, ගංවතුර, දහසකුත් යුද්ධ ආදී සෑම ආකාරයකම ඛේදවාචකවලට වඩා දෙවන ලෝක යුද්ධයෙන් අහිමි වූ ජීවිත හා විනාශ වූ දේපළ ප්‍රමාණය අති විශාල ය. අනෙක යුද්ධය යනු මිනිසා විසින් නිර්මාණය කරන ලද්දක් නිසා මිනිසා විසින් ම පිටුදැකිය හැකිව තිබූ දෙයකි.

https://www.facebook.com/profile.php?id=61574192440420

03/05/2025

100න් ඔබ්බට ගිය මිනිස්සු : 🇱🇰 ශ්‍රී ලංකාවේ 495 ක්, 🇬🇧 එංගලන්තයේ 16,140 ක් හා ලොව පුරා 935,000 ක්

වයස අවුරුදු 100 සපිරුණු පුද්ගලයෙක් Centenarian කෙනෙක් ලෙස හඳුන්වනවා. අවුරුදු 110 ට වඩා වයසැති නම් ඔවුන් Super Centenarian ලෙස හදුන්වනවා. ලොව පුරා උපතේදී ආයු අපේක්ෂාව අවුරුදු 100 ට වඩා බෙහෙවින් අඩු නිසා මෙම යෙදුම සෑම විටම විමතියක් ඇති කරන්නක්.

මේ ලොව පුරා වයස 100 ට වැඩි අය ගැන වැදගත් තොරතුරු කිහිපයක්

1. ලොව පුරා සියවස් සපිරුණු පුද්ගලයින් (Centenarians)
✅️2012 දි 316,600 ක් ජීවත් වූ බවත්
✅️2020 දී 573,000 ක් ජීවත් වූ බවත්
✅️2024 දි 935,000 ක් පමණ වන බවත්
එක්සත් ජාතීන්ගේ සංවිධානය ඇස්තමේන්තු කර තිබෙනවා.

2. ලොව පුරා අවුරුදු 110 හෝ ඊට වැඩි වයසැති පුද්ගලයින් (Super Centenarians) 300 ත් 450 ත් අතර සංඛ්‍යාවක් සිටින බවට ගණන් බලා තිබේ.

3. ජපානය සියවස් සපිරුණු පුද්ගලයින් අතර පෙරමුණ ගෙන සිටින අතර, 2024 95,119 ක් දෙනා එහි සිටින බව වාර්තා වේ. එමෙන්ම එක්සත් ජනපදයේ එය ලක්ෂය ඉක්මවා ඇති බවද වාර්තා වනවා.

4. එක්සත් රාජධානියේ 2023 දී සියවස් සපිරුණු පුද්ගලයින් 16,140 ක් සිටින බව ගණනය කර තිබෙනවා. මේ අය අතර, වැඩිම සංඛ්‍යාවක් කාන්තාවන් වන අතර, 2003 දී සියවස් සපිරුණු අය මෙන් දෙගුණයකටත් වඩා වැඩි ප්‍රමාණයක් 2023 වනවිට එක්සත් රාජධානියේ ඉන්නවා.

5. එක්සත් රාජධානියේ ජාතික සංඛ්‍යාලේඛන කාර්යාලයට අනුව, 2013 න් පසුව රටේ උපත ලබන ළදරුවන්ගෙන් තුනෙන් එකක් අවුරුදු 100 දක්වා ජීවත් වනු ඇතැයි අපේක්ෂා කෙරේ.

6. ප්‍රංශයේ ජීන් කැල්මන්ට් අවුරුදු 122ක් ජීවත් වූ අතර එය දීර්ඝතම සත්‍යාපිත මිනිස් ආයු කාලයයි. අවුරුදු 120ට වැඩි කාලයක් ජීවත් වූ බවට සත්‍යාපිත ලියකියවිලි ඇති එකම පුද්ගලයා ඇයයි.

7. වැඩිම සියවස් සපිරුණු පුද්ගලයන් සිටින රටවල්

🎍ජපානය: සියවස් සපිරුණු අය 95,119 (2024), පුද්ගලයින් 100,000 කට 76.5 ක්

🇺🇸එක්සත් ජනපදය: සියවස් සපිරුණු අය 83,732 (2023), පුද්ගලයින් 100,000 කට 25 ක් (2024 දි මෙය 101,000 ක් බවද වාර්තා වෙනවා)

🇫🇷ප්‍රංශය: සියවස් සපිරුණු අය 31,269 (2024), පුද්ගලයින් 100,000 කට 47.1 ක්

🇮🇹ඉතාලිය: සියවස් සපිරුණු අය 21,211 (2024), පුද්ගලයින් 100,000 කට 36 ක්

8. 2024 දී, සියවස් සපිරුණු අයගෙන් 78% ක් කාන්තාවන් වන අතර 22% ක් පිරිමින් වේ. අවුරුදු 30 කින්, අවුරුදු 100 සහ ඊට වැඩි අයගෙන් 68% ක් කාන්තාවන් වනු ඇතැයි අපේක්ෂා කරන අතර, 32% ක් පිරිමින් වනු ඇත.

9. ශ්‍රී ලංකාවේ 2024 ජූලි මාසය වනවිට, රට තුළ සියවස් සපිරුණු පුද්ගලයින් 495 ක් සිටින බව වාර්තා විය.

10. මේ වනවිට ලොව වැඩිම වයසැති පුද්ගලයා වන්නේ එක්සත් රාජධානියේ 115 වයසැති කාන්තාවකි.

සැප්තැම්බර් 22 වන දින, ලෝක සියවස සපිරුණු අයගේ දිනය වන අතර, උපන් දින 100ක් හෝ ඊට වැඩි කාලයක් සැමරූ අයට එදින උපහාර දක්වයි. ඒ ඔබ නම්, සුභ උපන්දිනයක්!

https://www.facebook.com/share/p/1E9iXYBA5j/
ලොව වයස්ගතම පුද්ගලයා ගැන

https://www.facebook.com/profile.php?id=61574192440420

01/05/2025

විෂ හතු කවා නෑදෑයින් මැරූ චෝදනාවට ඕස්ට්‍රේලියා කතකට නඩු

50 හැවිරිදි එරින් පැටර්සන්, 2023 ජූලි මාසයේදී ඇගේ නැන්දම්මා වන ගේල් පැටර්සන්, මාමණ්ඩිය වන ඩොනල්ඩ් පැටර්සන් සහ ගේල්ගේ සහෝදරිය වන හෙදර් විල්කින්සන් ඝාතනය කිරීම මෙන්ම හෙදර්ගේ සැමියා වන ඉයන් විල්කින්සන් යන අය විෂ හතු සහිත භෝජන සංග්‍රහයක් පවත්වා ඝාතනය කිරීම සම්බන්ධයෙන් චෝදනා ලැබ එහි නඩු විභාගය අභියස සිටියි. මෙම පුවත ඕස්ට්‍රේලියාව පමණක් නොව ලොවපුරා බොහෝ අයගේ අවධානය දිනාගෙන තිබේ.

2023 ජූලි මාසයේදී ලියොන්ගතා හි පැටර්සන් විසින් පවත්වන ලද දිවා ආහාරයේදී විෂ සහිත ඩෙත් කැප් හතු මිශ්‍ර කළ හරක් මස් සහිත කෑමක් සකසා පිළිගන්වා අනුභව කිරීමෙන් පසු වින්දිතයින් මිය ගියහ.

මෙකී වින්දිතයින්ට දරුණු රෝගාබාධ ඇති කළ විෂ සහිත ආහාර වේලක් පිළිගැන්වීම සම්බන්ධයෙන් පැටර්සන්ට චෝදනා එල්ල වී ඇත. හෙදර්ගේ සැමියා වන ඉයන් විල්කින්සන් විෂ වීමෙන් දිවි ගලවා ගත් නමුත් වෛද්‍ය ප්‍රතිකාර ලබා සුවය ලැබීය.

කෙසේ නමුත් පැටර්සන් මෙම චෝදනාවලට වරදකරු නොවන බව ප්‍රකාශ කරයි. නඩු විභාගය මෙල්බර්න් නගරයට දකුණින් පිහිටි මෝර්වෙල් හි නීති අධිකරණයේ පැවැත්වෙන අතර සති හයක් නඩු විභාගය පවතිනු ඇතැයි අපේක්ෂා කෙරේ. 12 දෙනෙකුගෙන් යුත් ජූරි සභාවක් නඩුව තීරණය කරනු ඇති අතර, සාධාරණ නඩු විභාගයක් සහතික කිරීම සඳහා අධිකරණය නඩුව පිළිබඳ වාර්තා කිරීම සම්බන්ධයෙන් දැඩි මාර්ගෝපදේශ පනවා ඇත.

මෙම කැප් හතු වර්ගය (Amanita phalloides, also called death cap mushrooms) ගෝලීය වශයෙන් මාරාන්තික හතු විෂවීම් වලින් 90% කට වගකිව යුතු බව වාර්තා වි තිබේ.

සාමාන්‍යයෙන් ඩෙත් කැප් හතු ඉතා විෂ සහිත හතු වර්ගයක් වන අතර එය ශරීරගත වූ විට අක්මාව හා වකුගඩු අකර්මණ්‍ය වීමට හේතු වේ. ඩෙත් කැප් යනු එක්සත් රාජධානියේ, අයර්ලන්තයේ සහ යුරෝපයේ ප්‍රධාන භූමියේ ද විශේෂයෙන් ඕක් සහ බීච් ගස් යට මිශ්‍ර පතනශීලී වනාන්තරවල බහුලව දක්නට ලැබෙන හතු වර්ගයකි.

https://www.facebook.com/profile.php?id=61574192440420

01/05/2025

🇬🇧 අද සිට ලොව වයස්ගතම පුද්ගලයා 115 හැවිරිදි බ්‍රිතාන්‍ය කාන්තාවක්

මහා බ්‍රිතාන්‍යයේ ලයිට්වෝටර් හි රැකවරණ නිවාසයක ජීවත් වන එතෙල් කැටර්හැම්, වයස අවුරුදු 116 ක් වූ බ්‍රසීලියානු කන්‍යා සොහොයුරියක වන ඉනා කැනබාරෝ ලූකස්ගේ අභාවයෙන් පසු ලොව වයස්ගතම පුද්ගලයා බවට පත්විය. කැටර්හැම් මහත්මිය 1909 අගෝස්තු 21 වන දින උපත ලබා ඇති අතර, ඒ අනුව ඇය පලමු ලෝක යුද්ධය හා දෙවන ලෝක යුද්ධය ද්විත්වයම අත්විඳි සුජීවත්ව සිටින අය බවට ද පත්වේ.

ඇය නෝමන් කැටර්හැම් නමැති අය සමඟ විවාහ වූ අතර ඇයට ජෙම් සහ ඈන් යන දියණියන් දෙදෙනෙක් සිටියාය. ඇගේ සැමියා වන නෝමන් 1976 දී මිය ගිය අතර එතෙල්ට මිණිබිරියන් තිදෙනෙකු සහ මී මුණුබුරන් පස් දෙනෙකු සිටී. ඇගේ සහෝදරිය වන ග්ලැඩිස් බැබිලස් අවුරුදු 104 ක් ජීවත් වි ඇති අතර ඇගේ අනෙක් සහෝදරිය වන එව්ලින් ඩෙලා කොලින්ස් අවුරුදු 96 ක් ජීවත් ව සිට ඇත.

එතෙල් ජීවත්වන ලයිට්වෝටර් යනු එංගලන්තයේ සරේ හි සරේ හීත් ප්‍රදේශයේ පිහිටි ගම්මානයක් වන අතර එය මධ්‍යම ලන්ඩනයේ සිට නිරිත දෙසින් සැතපුම් 27 ක් (කිලෝමීටර් 43) පමණ දුරින් පිහිටා ඇත.

මීට පෙර එක්සත් රාජධානියේ වයස්ගතම මිනිසා වූයේ හෙන්රි ඇලින්හැම් වන අතර ඔහු 2009 දී මිය යන විට වයස අවුරුදු 113 යි දින 42 ක් විය.

https://www.facebook.com/profile.php?id=61574192440420

28/04/2025

🇬🇧 අනිවාර්ය L තහඩුව සහ එසේ නොවන P තහඩුව

✅️ එක්සත් රාජධානියේ රථවාහනවල යොදන L තහඩු සහ P තහඩු අතර ප්‍රධාන වෙනස වන්නේ ඒවායේ අරමුණයි. L තහඩු පුහුණු වන රියදුරන් සඳහා අනිවාර්ය වන අතර, මෑතකදී රියදුරු පරීක්ෂණය සමත්ව අලුතින් සුදුසුකම් ලත් රියදුරන් සඳහා 🅿️ තහඩු තමන්ගේ කැමැත්ත පරිදි අවශ්‍ය නම් භාවිත කල හැකි වේ.

✅️ පුහුණු වන රියදුරෙකු වාහනය පදවන විට සුදු පසුබිමක රතු "L" සහිත තහඩු වාහනය ඉදිරිපස සහ පිටුපස ප්‍රදර්ශනය කළ යුතුය.

✅️ සුදු පසුබිමක කොළ පැහැති "P" සහිත P තහඩුව අනිවාර්ය නොවන අතර, අලුතින් සුදුසුකම් ලත් රියදුරන් විසින් ඔවුන්ගේ මෑත කාලීන රියදුරු පරීක්ෂණය සමත් වීම දැක්වීමට ප්‍රදර්ශනය කළ හැකිය.

ඒ අනුව

✅️ L තහඩු අනිවාර්යය. එය එක්සත් රාජධානියේ සියලුම පුහුණු වන රියදුරන් සඳහා නීතිමය අවශ්‍යතාවයකි.

✅️ තාවකාලික බලපත්‍රය (Provisional License) :
තාවකාලික බලපත්‍රයක් මඟින් ඔබට සුදුසුකම් ලත් අයකුගේ අධීක්ෂණය යටතේ රිය පැදවීමට ඉඩ ලබා දෙන නමුත් එමගින් ඔබට තනිවම රිය පැදවීමට බලය ලබා නොදේ. මෙම අධීක්ෂණය වයස අවුරුදු 21 ට වැඩි, අවම වශයෙන් වසර 3 ක කාලයක් සම්පූර්ණ එක්සත් රාජධානියේ රියදුරු බලපත්‍රයක් හිමි, සහ ඔබ පුහුණු වන වාහන වර්ගය පැදවීමට සුදුසුකම්ලත් අයකු අවශ්‍ය වේ. එය රිය පුහුණුකරුවකු හෝ පවුලේ අයකු හෝ වෙනත් අයකු විය හැකියි.

✅️ L තහඩු මඟින් රියදුරු ඉගෙන ගන්නෙකු බව පෙන්නුම් කළද, ඒවා අධීක්ෂණයේ අවශ්‍යතාවය සඳහා ආදේශකයක් නොවේ.

✅️ දඬුවම්: තාවකාලික බලපත්‍රයක් සහිතව තනිවම රිය පැදවීම ඔබේ තාවකාලික බලපත්‍රයේ දඩ ලකුණු සහ සමහර විට රියදුරු තහනමකට හේතු විය හැක

https://www.facebook.com/profile.php?id=61574192440420

බ්‍රිතාන්‍යයේ අඩු - ශ්‍රී ලංකාවේ වැඩි මාරක මහා මාර්ග ගැන
https://www.facebook.com/share/p/18uxRDAopL/

මුල සිට සරලව රියදුරු බලපත්‍රය ගන්න හැටි ගැන වැඩිදුර කියවන්න
https://www.facebook.com/share/p/161Yt7TbGw/

28/04/2025

මහා බ්‍රිතාන්‍යයේ සහ ශ්‍රී ලංකාවේ කාන්තා රියදුරන් පිළිබඳ කරුණු 20 ක් 🇬🇧🇱🇰

අද එංගලන්තයේ වෙස්ට් සසෙක්ස්හි නගරයක පාර අයිනේ ඉන්න ගමන් වාහන කිහිපයකම රියදුරන් වුනේ කාන්තාවන් කියලා මට පෙනී ගියා. ඉතිං මේක ටිකක් අසාමාන්‍යක් බවක් පෙනී ගිය නිසා මං වාහන 50 ක් ගණන් කරා එතැන ඉන්න ගමන්. මේ අහඹු ගණන් කිරීමේදී දුටු පුදුම හිතෙන සහ සතුටු හිතෙන දෙයක් තමයි ඉන් වාහන 38 කම රියැදුරන් වුණේ කාන්තාවන්. මං ඉතිං ශ්‍රී ලංකාවේ තත්ත්වය කල්පනා කළා. ලංකාවේ පාරේ දුවන වාහන 100 ක් දිහා බැලුවත් කාන්තා රියැරදුන් දකින්න ලැබෙන්නෙ 10 කටත් අඩුවෙන් නේද කියලා හිතුණා. ඒ හින්ද මේ පිළිබඳ වැඩිදුර විස්තර ටිකක් හොයලා බැලුවා.
ඒ අනුව මහා බ්‍රිතාන්‍යයයේ කාන්තා රියදුරන් ගැන මේ කරුණු ටික සටහන් කරන්න හිතුණා.

1. එක්සත් රාජධානියේ සියලුම බලපත්‍රලාභී රියදුරන්ගෙන් 45% ක් කාන්තාවන් වීම විශේෂත්වයක්. ඇමරිකා එක්සත් ජනපදයේ මෙය 50.5% තරම් පිරිමින්ටත් වැඩි ප්‍රතිශතයක් ගන්නා අතර, නෝර්වේ හි 48% ක් හා ස්වීඩනයේ 47% ක් පමණ වේ.

2. රිය පැදවීමේ පරීක්ෂණවලදී කාන්තාවන්ට සාමාන්‍යයෙන් පිරිමින්ට වඩා ඉහළ සමත් අනුපාතයක් තිබෙනවා. එක්සත් රාජධානි‌යේ 2020 වසරේදී කාන්තාවන්ගෙන් 49.2% ක් ඔවුන්ගේ ප්‍රායෝගික රියදුරු පරීක්ෂණය පළමු උත්සාහයේදීම සමත් වූ අතර, පිරිමින්ගෙන් සමත්වී තිබෙන්නේ 45.4% ක් පමණයි.

3. කාන්තාවන් වැඩි වැඩියෙන් විදුලි වාහන භාවිතා කරමින් සිටින අතර, 2020 සමීක්ෂණයකින් එක්සත් රාජධානියේ විදුලි වාහන හිමිකරුවන්ගෙන් 42% ක් කාන්තාවන් බව සොයා ගෙන තියෙනවා.

4. ප්‍රවාහන දෙපාර්තමේන්තුවේ සංඛ්‍යාලේඛනවලට අනුව, කාන්තා රියදුරන් සාමාන්‍යයෙන් මාර්ගවල ආරක්ෂිත වන අතර පිරිමින්ට සාපේක්ෂව සිදුවන අනතුරු සහ මරණ අනුපාතය අඩුය.

5. 1962 තරම් ඉතිහාසයක සිට බ්‍රිතාන්‍ය කාන්තා රේසිං රියදුරු සමාජය (BWRDC), මෝටර්ස්පෝර්ට් සඳහා කාන්තාවන්ට සහාය දැක්වීම, ප්‍රවර්ධනය කිරීම, මඟ පෙන්වීම, උපදේශනය සහ ශූරතා පිරිනැමීම සිදු කරනවා.

6. සාමාන්‍යයෙන් අසන්නට නොලැබුණත් ට්‍රක් රථ පැදවීම ඇතුළු සැපයුම් කර්මාන්ත වෘත්තීන්ට පිවිසෙන කාන්තාවන් සංඛ්‍යාව එක්සත් රාජධානියේ වැඩි වෙමින් පවතිනවා. මෑත සමීක්ෂණයකට අනුව, එක්සත් රාජධානියේ ලියාපදිංචි ට්‍රක් රථ රියදුරන් 315,000 න් 2,200 ක් කාන්තාවන් වන බව අනාවරණය වී තිබෙනවා.

7. ලේන්ස් සමූහය වැනි සමාගම් කාන්තා බරවාහන රියදුරන් සක්‍රීයව බඳවා ගනිමින් සහ ස්ත්‍රී පුරුෂ සමාජභාවී සංවේදීතාවය මැනවින් පිළිබිඹු කරමින් කාන්තා රියදුරන් සඳහා නම්‍යශීලී නිවාඩු, ඔවුන්ගේ ළමා සුරැකීමේ පහසුකම් සහ විශේෂ පුහුණු අවස්ථා ලබා දීම වැනි කටයුතු කිරීම මගින් කාන්තා සහභාගීත්වය වැඩි කරමින් පවතිනවා.

8. කාන්තාවන් වෘත්තීය ධාවන තරඟවල සිට රූපවාහිනී ඉදිරිපත් කිරීම දක්වා විවිධ රිය පැදවීම ආශ්‍රිත ක්ෂේත්‍රවල ඒකාකෘති බිඳ දමමින් විශිෂ්ටත්වයට පත්ව සිටිනවා. ජෙනී ගව්, නටාලි පින්ක්හැම් සහ ලී මැකෙන්සි වැනි රූපවාහිනී ඉදිරිපත් කරන්නියන් මෝටර් රථ ක්‍රීඩාව පුළුල් ප්‍රේක්ෂක පිරිසක් වෙත ගෙන එමින්, කාන්තාවන්ගේ විශේෂඥතාව සහ රිය පැදවීම සඳහා උනන්දුව හා ආශාව ඇති කරනවා.

9. මහා බ්‍රිතාන්‍යයයේ බස් රියදුරන්ගෙන් 12% ක් පමණ කාන්තාවන් වන අතර, 2035 වන විට එය 50% දක්වා ගෙන ඒමට ඉලක්ක සකසා ති‌බෙනවා. පසුගිය වසර තුළ කාන්තා බස් රියදුරන්ගේ 20% ක වැඩිවීමක් සිදුවී ඇති අතර, එහි 11,000 ක ශ්‍රම බලකාය අතර කාන්තා නියෝජනය 10% සිට 12% දක්වා ඉහළ ගොස් තිබෙනවා. එමෙන්ම මෙම 2025 අවසන් වන විට නව කාන්තා බස් රියදුරන් 1,500 ක් බඳවා ගැනීමට නියමිතයි.

10. රැකියාවට යාමට, වෙළඳපළට යාමට හා දරුවන් පාසල වෙත ගෙන යාම හා ගෙන ඒම ආදී එදිනෙදා කටයුතු බහුතරයක් කාන්තාව විසින් රිය පැදවීම නිසා මහා බ්‍රිතාන්‍යයේ ජනයාට පහසු වී ඇති අතර, එය රටේ ආර්ථික වර්ධනයට ද මහගු පිටිවහලක් වී තිබෙනවා.

මීට සාපේක්ෂව ශ්‍රී ලංකාවේ තත්ත්වය සපුරා වෙනස්. ශ්‍රී ලංකාව තුළ කාන්තාවන් රිය පදවන්නේ ඉතාම අඩුවෙන්. ඊට බලපාන සමාජ, ආර්ථික, සංස්කෘතික හේතු රාශියක් පවතිනවා. එංගලන්තයේ එක් මාසයක වැටුපකින් වාහනයක් ගන්න පුළුවන් වුණාට ශ්‍රී ලංකාවේ දස වසරක වැටුපකින්වත් වාහනයක් ගන්න එක ලේසි නැහැ. මහා බ්‍රිතාන්‍යයේ වාහන මිලියන 42 ක් පමණ ආසන්න වශයෙන් තිබෙනවා. ලංකාවේ මිලියන 8 ක් විතර. ඉන් මිලියන 5 කට කිට්ටුවම තියෙන්නෙ යතුරුපැදි. ඒකෙන් පේනවා කාන්තාවන්ට විතරක් නෙවෙයි පිරිමින්ට වුණත් වාහනයක් ගන්න එක අසීරු කාර්යයක්. ටිකක් හරි පහසුවෙන් ගන්න පු‍ළුවන් වෙන්නෙ යතුරුපැදියක්. ඉතිං කාන්තාවන්ට පහසු ස්කූටර් එකක් ගන්න එක. මේ තත්ත්වය මත ලංකාවේ කාන්තා රියදුරන් පිළිබඳ කරුණු කිහිපයක් පහතින් සටහන් කරන්නම්.

1. ශ්‍රී ලංකාවේ කාන්තාවන් වැඩි වැඩියෙන් ප්‍රවාහන ක්ෂේත්‍රයේ භූමිකාවන් භාර ගනිමින් සිටින නමුත් අති විශාල වශයෙන් රිය ධාවනය ශ්‍රී ලංකාවේ සිදු කරන්නේ පිරිමින්. කාන්තා බස් රියදුරන් දක්නට නොමැති තරම්.

2. ප්‍රවාහන ක්ෂේත්‍රයේ කාන්තාවන්: ශ්‍රී ලංකාවේ ප්‍රවාහන ක්ෂේත්‍රයට කාන්තාවන් ක්‍රමයෙන් පිවිසෙමින් සිටින අතර, සාම්ප්‍රදායිකව පිරිමින් විසින් ආධිපත්‍යය දැරූ බස් රථ පැදවීම වැනි භූමිකාවන් ද ඇතුළත්.

3. සමාජය තුළ පවත්නා හණමිටි අදහස් උදහස් නිසා ප්‍රවාහන ක්ෂේත්‍රයේ කාන්තාවන්ට සමාජීය සංජානන හා ආරක්ෂක ගැටළු මෙන්ම දියුණුව සඳහා සීමිත අවස්ථා වැනි අභියෝගවලට මුහුණ දීමට සිදු වී තිබෙනවා.

4. PickMe සමාගමේ දත්ත වලට අනුව, ඔවුන්ගේ ආයතනයට අනුබද්ධව කාන්තාවන් රියදුරන් යම් ප්‍රමාණයක් දැනටමත් සිටිනවා මෙන්ම ඔවුන්ගේ සංඛ්‍යාව වසරින් වසර වැඩි වෙමින් පවතිනවා.

5. Uber ශ්‍රී ලංකා ආයතනය මගින් "කාන්තා රිය පැදවීම" විශේෂාංගයක් ලෙස හඳුන්වා දී ඇති අතර, කාන්තා රියදුරන්ට කාන්තා මගීන්ගෙන් පමණක් සංචාර ඉල්ලීම් ලබා ගැනීමට තෝරා ගැනීමට ඉඩ සලසා තිබෙනවා. මෙමගින් ඔවුන්ට ආරක්ෂාව සහ නම්‍යශීලී බව වැඩි දියුණු කරනවා.

6. ශ්‍රී ලංකාවේ කාන්තාවන් ස්කූටර් භාවිතා කිරීම ඉතා වේගයෙන් පසුගිය කාලයේ වර්ධනය වෙමින් පැවතියා. ඉන්ධන කාර්යක්ෂමතාවය, පහසුව සහ පවුලේ සහ තමන්ගේ කටයුතු කාන්තාවට ස්වාධීනව සිදු කරගැනීමට ස්කූටර් මහඟු පිටිවහලක් වී තිබෙනවා.

7. අවාසනාවකට මෙන්, ශ්‍රී ලංකාවේ පොදු ප්‍රවාහනය භාවිතා කරන කාන්තාවන් සඳහා ආරක්ෂාව ඉතාම කනස්සල්ලට කරුණක්. කාන්තාවන්ගෙන් 90% කට ආසන්න පිරිසක් කිසියම් හෝ අවස්ථාවකද පොදු ප්‍රවාහනයේදී ලිංගික හිරිහැරවලට ලක්වෙනවා. ස්කූටර් පැදවීම සහ කාර් රථයක් පැදවීම කාන්තාවට මේ සඳහා විකල්පයක් වී පවතිනවා.

8. කාන්තාව ස්කූටර් පැදවීම හෝ වාහනයක් පැදවීම පිළිබඳව බොහෝ මිනිසුන් අපහාසයෙන්, උපහාසයෙන් හා අවඥාවෙන් බලන හා සලකන අවස්ථා එමටයි. සමාජ මාධ්‍ය ඔස්සේ මෙන්ම එදිනෙදා කතාබහේදී ද කාන්තාවක් ස්කූටරයක් පැදවීම ඔවුනගේ නොහැකියාවක් ඉස්මතු කිරීමට හා ඔවුනට නිගරු කිරීමට ඇතැමුන් භාවිත කරනවා. “බැරි රෙද්දවල් නොකර ගෙදර හිටු” වැනි ඉතාම පහත් ආකාරයේ ආකල්ප සමුදායක් සමාජය තුළ මේ පිළිබඳව පවතිනවා. ස්කුටරයක් පැදවීම පිළිබඳ කාන්තාවනට නිසි පුහුණුව ලබා දීම සඳහා විධිමත් යාන්ත්‍රණයක් සකස් කිරීම අත්‍යවශ්‍යයි. කාන්තාව ආරක්ෂිතව වාහනයක් පැදවීම මෙන්ම ස්කූටරයක් භාවිත කිරීමට අවශ්‍ය වටපිටාව සැකසීමෙන් කාන්තාව ආර්ථිකයට දක්වන දායකත්වය තවත් ඉහළ අගයකට ගැනීමටත්, වැඩ කටයුතු පහසු කරගැනීමටත්, කාන්තාවට ස්වාධීන සමාජයීය ගරුත්වයක් ඇති කිරීමටත් එය හේතු වෙනවා.

9. කාන්තාවන්ට රිය පැදවීම සඳහා නිසි පුහුණුව ලබාදීමට අවශ්‍ය විධිමත් යාන්ත්‍රණයක් සැකසීම අවශ්‍ය වෙනවා. රිය පුහුණුව ලැබීමට දැරිය යුතු අධික මිල ගණන් දැරීමට නොහැකිවීම නිසා කාන්තාව රිය පුහුණුව ලැබීම තවත් පසුබටවීමට ශ්‍රී ලංකාව තුළ හේතු වී තිබෙනවා. එම නිසා රජය විසින් මේ පිළිබඳ විශේෂ විධිවිධාන සැලසීම සුදුසුයි.

10. සමාජය තුළ ස්ත්‍රීපුරුෂ සංවේදීතාවය හා අන්‍යොන්‍ය ගරුත්වය ප්‍රවර්ධනය කළ යුතුව පවතිනවා. මහ පාරේ කාන්තාවක් වාහනයක් පැදවීම යනු සෙසු මාර්ග භාවිත කරන්නන්ට සිදුවීමට යන මහත් විනාශයක් යන ඇතැම් අනෙකුත් රියදුරන්ගේ මෙන්ම පොදු සමාජයේ පවත්නා ආකල්ප වෙනස්වීමත්, ඇයට මහමගදී අවශ්‍ය සහාය, ගරුත්වය, පිළිගැනීම සාමාන්‍ය පරිදි ඇති සමාජයක් ගොඩනගැනීමටත් රියදුරු ලිඛිත පරීක්ෂණය, රියදුරු පුහුණුව හා රියදුරු ප්‍රායෝගික පරීක්ෂණය යන මෙවලම් යොදාගත හැකිව තිබෙනවා.

https://www.facebook.com/people/Jay-in-the-UK/61574192440420/

බ්‍රිතාන්‍යයේ අඩු - ශ්‍රී ලංකාවේ වැඩි මාරක මහා මාර්ග ගැන
https://www.facebook.com/share/p/18uxRDAopL/

27/04/2025