02/09/2026
🔹 საქართველოს პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე მარიამ ლაშხი ამბროლაურის №2 საჯარო სკოლასთან დაკავშირებულ საკითხზე განათლების, მეცნიერებისა და ახალგაზრდობის სამინისტროსა და ადგილობრივი ხელისუფლების წარმომადგენლებს შეხვდა.
🔹 შეხვედრაზე ამბროლაურის №2 საჯარო სკოლაში სასწავლო პროცესის განახლებისა და სკოლის ინფრასტრუქტურასთან დაკავშირებული საკითხები განიხილეს.
🔹 როგორც შეხვედრაზე აღინიშნა, ამბროლაურის №2 საჯარო სკოლა სრული რეაბილიტაციის გამო ბოლო სამი წლის განმავლობაში სასწავლო პროცესს ამბროლაურის №1 საჯარო სკოლის შენობაში, მეორე ცვლაში ახორციელებს.
🔹 სკოლის ძირითადი კორპუსის რეაბილიტაცია 2025 წლის ბოლოს დასრულდა და საგანმანათლებლო რესურსცენტრის ინფორმაციით, შესაძლებელია, 2026-2027 სასწავლო წლიდან სკოლამ სასწავლო პროცესი საკუთარ შენობაში, პირველ ცვლაში განაახლოს.
🔹 ასევე იმსჯელეს სკოლის მეორე კორპუსის მშენებლობის საკითხზე, რომელიც 2025 წლის ოქტომბრიდან შეჩერებულია. აღინიშნა, რომ მიმდინარე წელს, მეორე კორპუსის მშენებლობასთან დაკავშირებული საკითხი ინფრასტრუქტურის სამინისტროს დამატებით პრიორიტეტად გადაეგზავნა.
🔹 შეხვედრაზე ყურადღება გამახვილდა მოსწავლეებისთვის უსაფრთხო და შესაბამისი სასწავლო გარემოს უზრუნველყოფაზე. აღინიშნა, რომ ადგილობრივი ხელისუფლება მზადყოფნას გამოთქვამს, შესაბამისი მხარდაჭერა გაუწიოს სკოლას ინფრასტრუქტურული საკითხების მოგვარებაში.
🔹 შეხვედრას პარლამენტის წევრი, ამბროლაურის, ონის, ცაგერის, ლენტეხისა და მესტიის მუნიციპალიტეტების დელეგატი გოჩა ენუქიძე, განათლების, მეცნიერებისა და ახალგაზრდობის მინისტრის პირველი მოადგილე ლევან ღირსიაშვილი, სახელმწიფო რწმუნებული რაჭა-ლეჩხუმ-ქვემო სვანეთის მხარეში პაპუნა მარგველიძე, ამბროლაურის მერი ზაზა ქევანიშვილი, მუნიციპალური განვითარების ფონდის წარმომადგენელი თამარ იოსებაშვილი და ამბროლაურის №2 საჯარო სკოლის დირექტორი თინათინ გოგობერიშვილი ესწრებოდნენ.
