31/07/2026
აჭარის მთავრობის თავმჯდომარის, ზურაბ პატარაძის ხელმძღვანელობით, მთავრობის სხდომა გაიმართა.
დღის წესრიგით გათვალისწინებული საკითხების განხილვასთან ერთად, მთავრობის თავმჯდომარემ რამდენიმე მნიშვნელოვან საკითხზე გაამახვილა ყურადღება, მათ შორის, მაღალმთიანი აჭარის განვითარებაზე, ამ მიმართულებით მიმდინარე თუ დაგეგმილ პროექტებზე და აღნიშნა, რომ აჭარა, ყველა თავისი რესურსით და მრავალგვარი ტურისტული პოტენციალით, ერთ-ერთი უმნიშვნელოვანესი რგოლია ქვეყნის განვითარების უწყვეტ ჯაჭვში.
მთავრობის თავმჯდომარემ განიხილა ინფრასტრუქტურული პროექტები დანისპარაულის, შავი ტბის, მწვანე ტბის, ღორჯომისა და კურორტ გოდერძის მიმართულებით. აღინიშნა, რომ ახალი ტურისტული მარშრუტების შექმნა, გზების მშენებლობა, კურორტ გოდერძის შესასვლელი გზის კეთილმოწყობა და სხვა აუცილებელი ინფრასტრუქტურის მოწყობა, კურორტის ტურისტულ პოტენციალს მნიშვნელოვნად გააძლიერებს.
მთავრობის თავმჯდომარემ საზოგადოებას რამდენიმე ახალი ინიციატივა გააცნო. მათ შორისაა კურორტ გოდერძსა და ხულო-თაგოს მიმართულებით ახალი საბაგირო გზების მოწყობა, ბათუმში საჰაერო საზოგადოებრივი ტრანსპორტის განვითარების შესაძლებლობების შესწავლა, ასევე საერთაშორისო სტანდარტების მიხედვით სატრანსპორტო ნაკადების კვლევის განხორციელება. მთავრობის თავმჯდომარემ ყურადღება გაამახვილა ხულოს ალპური ბოტანიკური ბაღის განვითარების გეგმებზე. პროექტი ითვალისწინებს ახალი ტურისტული ატრაქციების, საპარკინგე სივრცეების, ტბის კეთილმოწყობის, ინფრასტრუქტურის განახლებისა და საერთაშორისო სამეცნიერო კონფერენციების ჩატარების შესაძლებლობის შექმნას.
„მთის წარმატება აჭარის ყველა მუნიციპალიტეტის სიძლიერეა და სახალხო დღესასწაული “შუამთობაც” წარმოაჩენს ჩვენი რეგიონის უნიკალურ ხასიათს - შრომის, ერთობის, გულითადობის და განვითარების სიმბოლოს“ - აღნიშნა ზურაბ პატარაძემ.
საგანმანათლებლო ინფრასტრუქტურის განვითარება კვლავაც უცვლელ პრიორიტეტს წარმოადგენს. ამ მიმართულებით აქტიურად მიმდინარეობს ახალი სკოლებისა და სკოლამდელი დაწესებულებების მშენებლობა. კერძოდ, ბათუმში მიმდინარე წელს N3, N12 და N26 საბავშვო ბაღების სამუშაოები დასრულდება, გონიოს კი მალე სრულიად ახალი ბაღი ექნება, სადაც პარალელურად ადგილობრივი სტადიონის რეკონსტრუქციაც იგეგმება. ზურაბ პატარაძემ ასევე ყურადღება გაამახვილა ახალგაზრდობის საერთაშორისო დღის აღნიშვნასა და არაფორმალური განათლების ხელშეწყობაზე.
ჯანდაცვის მიმართულებით საუბარი შეეხო აჭარის მაღალმთიანი სოფლის მოსახლეობისა და მემთეურთა ავადობის კვლევის პროგრამას, რომელიც მოიცავს მაღალმთიანი აჭარის 7 მთასა და 11 სოფელს და რომლის ფარგლებშიც მაღალმთიანი აჭარის მოსახლეობას სამედიცინო მომსახურება ადგილზე მიეწოდება. სხდომაზე, ასევე განიხილეს სოციალური სახლების მშენებლობა ქობულეთისა და ხელვაჩურის მუნიციპალიტეტებში, პროგრამა „ბათუმი ავარიული სახლების გარეშე“, „ოცნების ქალაქის“ მშენებლობის მიმდინარეობა, სადაც პარალელურად იგეგმება საბავშვო ბაღის აშენება.
მთავრობის თავმჯდომარემ ახალი საერთაშორისო ფესტივალის „გონიოს ჰანგები“ მასშტაბებზე ისაუბრა და აღნიშნა, რომ მსგავსი კულტურული ღონისძიებები ხელს უწყობს კულტურული ტურიზმის განვითარებასა და რეგიონის პოპულარიზაციას.
სხდომაზე საუბარი შეეხო ასევე, სოფლის მეურნეობის განვითარების მიმართულებით განხორციელებულ ღონისძიებებს. ყურადღება გაამახვლდა ფერმერთა მხარდაჭერასა და სატყეო სააგენტოს ტექნიკური შესაძლებლობების გაძლიერებაზე.
