![[橫跨龍翔半百光景 伴君千里終須一別]較早前於去年九月停用，位於鑽石山橫跨龍翔道嘅行人天橋，已於1月11日凌晨開始拆卸。此行人天橋早喺1970年代隨龍翔道通車而啟用，當時嘅元嶺被龍翔道一分為二，此天橋就成為連接龍翔道南側嘅下元嶺（今啟鑽苑一...](https://img4.govserv.org/846/256/1270558248462563.jpg)
12/01/2026
[橫跨龍翔半百光景 伴君千里終須一別]
較早前於去年九月停用，位於鑽石山橫跨龍翔道嘅行人天橋，已於1月11日凌晨開始拆卸。
此行人天橋早喺1970年代隨龍翔道通車而啟用，當時嘅元嶺被龍翔道一分為二，此天橋就成為連接龍翔道南側嘅下元嶺（今啟鑽苑一帶）同大磡村至北側嘅上元嶺（今荷里活廣場一帶）嘅臨時通道。其簡單嘅金屬結構，上方冇任何遮蓋，亦冇任何街燈，使得行人需要忍受夜間較黑嘅環境同日曬雨淋，以現今標準嚟講相對落後。但步行途中所感受嘅車輛喺下方駛過而造成嘅震動，開揚嘅景觀，橋上每一步嘅迴響，半世紀以來成為幾代街坊們嘅重要回憶。
如今「臨時」咗五十年嘅天橋將隨著鑽石山綜合發展區計劃而退下歷史舞台，新嘅永久行人天橋早已於去年九月啟用，新天橋無疑比舊橋設備更完善，外觀更亮麗，但因其比舊天橋更高令行人使用樓梯上橋時較為吃力，而未有設立斜道，且各側只有一部升降機令排隊人數增加，定期維修時亦令有需要人士無法使用。具臨時性質，設計不合時宜嘅舊橋被淘汰實屬無可避免，唯若可保留部分部件作保育用途，則可使街坊們嘅集體回憶得以長存，亦可留予後世見證此處歷史變遷。
