27/08/2026
*”अथक–अविराम" यात्रा-संस्मरणक पोथी लेल डॉ. भास्कर ज्योति कें मैसाम युवा सम्मान 2026 घोषित*।
मैथिली साहित्य, भाषा आ संस्कृतिक क्षेत्रमे निरन्तर सक्रिय रहनिहार डॉ. भास्कर ज्योति कें साहित्यिक आ सामाजिक योगदान लेल मैथिली साहित्य महासभा (मैसाम) द्वारा “मैसाम युवा सम्मान–2026” सँ सम्मानित कएल जेतनि।
एहि संबंधमे जानकारी दैत मैसामक अध्यक्ष हेमन्त झा, महासचिव अरुण कुमार मिश्र आ महासचिव आशीष नीरज कहलनि जे डॉ. भास्कर ज्योतिक साहित्यिक सक्रियता, सृजनशीलता आ मैथिली भाषा-साहित्यक प्रति हिनकर निरन्तर समर्पण प्रशंसनीय अछि। “अथक–अविराम” हुनकर साहित्यिक प्रतिभा आ यात्रानुभवक सशक्त अभिव्यक्ति अछि, जाहि लेल हिनका एहि सम्मान लेल चयनित कएल गेल अछि। डॉ. भास्कर ज्योतिक “अथक–अविराम" यात्रा-संस्मरण पोथी मात्र यात्रा-वृत्तान्त नहि, अपितु यात्रा माध्यम सँ जीवन, समाज, संस्कृति, लोकपरम्परा आ मानवीय संवेदनाक बहुआयामी दर्शन करबैत अछि। हिनकर लेखनीमे यात्राक दृश्य मात्र नहि, अपितु ओहि दृश्यक पाछाँक इतिहास, संस्कृति, लोकजीवन आ मानवीय अनुभूतिक सूक्ष्म चित्रण भेटैत अछि।
“अथक–अविराम” नामे जेना निरन्तर यात्राक भाव समाहित अछि, तहिना डॉ. भास्कर ज्योति कें साहित्यिक यात्रा सेहो निरन्तर गतिशील आ सृजनशील रहल अछि। हुनकर संस्मरणमे पाठक स्वयं यात्राक सहयात्री बनि जाइत छथि—कखनो अनजान भूगोल सँ परिचित होइत छथि, कखनो इतिहासक पन्ना पलटैत छथि आ कखनो लोकजीवनक आत्मीयता सँ साक्षात्कार करैत छथि।
मैसाम युवा सम्मान–2026 हुनकर साहित्यिक अवदानक सम्मान मात्र नहि, बल्कि मैथिलीमे नव पीढ़ीक सृजनशीलता, शोध-दृष्टि आ साहित्यिक सक्रियता कें प्रोत्साहित करबाक एक महत्वपूर्ण प्रयास सेहो अछि।
डॉ. भास्कर ज्योति जीकेँ एहि महत्वपूर्ण सम्मान लेल हार्दिक बधाई एवं अशेष शुभकामना।आशा अछि जे हुनकर लेखनी एहि तरहेँ मैथिली साहित्यक भण्डार कें समृद्ध करैत हिनक साहित्यिक यात्रा निरन्तर आगाँ बढ़ैत रहत।
