12/11/2015
ഡിവൈഎഫ്ഐ സെക്യുലര് മാര്ച്ച് 17നും 19നും ആരംഭിക്കും "കേരളം ഭ്രാന്താലയമാക്കരുത്" എന്ന മുദ്രാവാക്യമുയര്ത്തി ഡിവൈഎഫ്ഐ നേതൃത്വത്തില് സംസ്ഥാനത്ത് രണ്ട് കാല്നട ജാഥകളായി സെക്യുലര് മാര്ച്ച് സംഘടിപ്പിക്കും.കേരളത്തെ ജാതിരാഷ്ട്രീയത്തിന്റെ കൂത്തരങ്ങാക്കാനും അതുവഴി ഭ്രാന്താലയമാക്കാനുമുള്ള ശ്രമങ്ങളെ ചെറുത്തു തോല്പ്പിക്കുക,സംസ്ഥാനത്തിന്റെ പുരോഗമന സ്വഭാവവും മതനിരപേക്ഷ പൈതൃകവും സംരക്ഷിക്കുക എന്നീ സന്ദേശങ്ങളാണ് ജാഥ പ്രചരിപ്പിക്കുക. എല്ലാത്തരം വര്ഗ്ഗീയതയെയും ജനങ്ങള്ക്കുമുമ്പില് തുറന്നുകാണിക്കുന്നതിനും എതിര്ത്തു തോല്പ്പിക്കുന്നതിനും മലയാളികളുടെയാകെഒരുമ തേടിയാണ് മാര്ച്ച് നടത്തുന്നതെ ന്നും സംസ്ഥാന പ്രസിഡന്റ് ടി വി രാജേഷ്, സെക്രട്ടറി എം സ്വരാജ് എന്നിവര് വാര്ത്താസമ്മേളനത്തില് പറഞ്ഞു.ഡിവൈഎഫ്ഐ സംസ്ഥാന സെക്രട്ടറി എം സ്വരാജ് ക്യാപ്റ്റനും കേന്ദ്ര കമ്മിറ്റിയംഗം പി എ മുഹമ്മദ് റിയാസ് മാനേജരുമായ സെക്യുലര് മാര്ച്ച് 17ന് കയ്യൂരില് ആരംഭിക്കും. പ്രതിപക്ഷ നേതാവ് വി എസ് അച്യുതാനന്ദന് ഉദ്ഘാടനം ചെയ്യും. പ്രസിഡന്റ് ടി വി രാജേഷ് ക്യാപ്റ്റനും സംസ്ഥാന ട്രഷറര് കെ എസ് സുനില്കുമാര് മാനേജരുമായ സെക്യുലര് മാര്ച്ച് 19ന് തിരുവനന്തപുരം അരുവിപ്പുറത്ത് ആരംഭിക്കും. സിപിഐ(എം) സംസ്ഥാന സെക്രട്ടറി കോടിയേരി ബാലകൃഷ്ണന് ഉദ്ഘാടനം ചെയ്യും. കാല്നടയായി 610 കിലോമീറ്റര് സഞ്ചരിക്കുന്ന ഇരു മാര്ച്ചുകളും ഡിസംബര് അഞ്ചിന് എറണാകുളത്ത് സംഗമിക്കും. എറണാകുളം കേന്ദ്രീകരിച്ച് അരലക്ഷം യുവജനങ്ങള് പങ്കെടുക്കുന്ന യുവജന റാലിയോടെ സമാപിക്കും. സമാപനറാലി സിപിഐ എം പൊളിറ്റ് ബ്യൂറോ അംഗം പിണറായി വിജയന് ഉദ്ഘാടനം ചെയ്യും. വയനാട്, ഇടുക്കി ജില്ലകളില് ഉപമാര്ച്ച് സംഘടിപ്പിക്കും.വയനാട്ടില് കേന്ദ്ര കമ്മിറ്റിയംഗം പി പി ദിവ്യയും ഇടുക്കിയില് സംസ്ഥാന വൈസ് പ്രസിഡന്റ് പി ബിജുവും മാര്ച്ച് നയിക്കും. മാര്ച്ചിന് കലാ-സാഹിത്യ-സാംസ്കാരിക രംഗങ്ങളിലുള്ളവരുടെ പിന്തുണ തേടും. ടി വി രാജേഷ് ക്യാപ്റ്റനായ ജാഥയില് എ എന് ഷംസീര്, ജി ഗോപകൃഷ്ണന്, എ എ റഹീം, ആര് ബിജു, രഞ്ചു സുരേഷ്, ചിന്ത ജെറോം, എസ് രാജീവ്, ആര് രാജേഷ്, കെ സുമ, വി ആര് രാജേഷ് എന്നിവര് സ്ഥിരാംഗങ്ങളാണ്. എം സ്വരാജ് ക്യാപ്റ്റനായ ജാഥയില് വി പ്രകാശന്, ബീന രതീഷ്, കെ റഫീക്ക്, പി എം ആതിര, എസ് കെ സജീഷ്, വി ടി സോഫിയ, ടി എം ശശി, പി സുലോചന, ലിജോ ജോസ് എന്നിവരാണ് സ്ഥിരാംഗങ്ങള്..