23/05/2026
రాయలసీమ రాజకీయ చరిత్రలో, ప్రజల హృదయాల్లో చిరస్థాయిగా నిలిచిపోయిన పేరు “పులివెందుల పెద్దాయన” దివంగత స్వర్గీయ వైఎస్ రాజారెడ్డి గారు. ప్రజల కష్టసుఖాల్లో తోడుగా నిలుస్తూ, నమ్ముకున్న ప్రతి కుటుంబానికి అండగా ఉండి, కరువు కాటకాలు, విపత్కర పరిస్థితుల్లో ప్రజలకు ధైర్యం చెప్పిన మహానుభావుడు ఆయన. నాయకత్వం అంటే కేవలం పదవి కాదని, ప్రజలకు అండగా నిలబడటమే అసలైన సేవ అని తన జీవితం ద్వారా నిరూపించారు.
1925లో వెంకటరెడ్డి, మంగమ్మ దంపతులకు జన్మించిన వైఎస్ రాజారెడ్డి గారు చిన్ననాటి నుంచే ప్రజాసేవా భావంతో ఎదిగారు. పులివెందుల ప్రజల మధ్య తిరుగుతూ వారి సమస్యలను తెలుసుకొని, పరిష్కార మార్గాలను చూపిస్తూ అందరి మనసుల్లో ప్రత్యేక స్థానం సంపాదించుకున్నారు. “ఏ సమస్య వచ్చినా పెద్దాయన దగ్గరకు వెళితే పరిష్కారం దొరుకుతుంది” అనే నమ్మకం ప్రజల్లో ఏర్పడటమే ఆయన గొప్పతనానికి నిదర్శనం.
పులివెందుల గ్రామ సర్పంచ్గా 1988 నుంచి 1995 వరకు సేవలందించిన ఆయన, ఆ కాలంలో గ్రామ అభివృద్ధికి ఎనలేని కృషి చేశారు. వీధిలైట్లు, రోడ్లు, మంచినీటి చెరువులు, విద్యాసంస్థలు ఏర్పాటు చేయడంలో ముందుండి పులివెందుల రూపురేఖలు మార్చారు. ప్రజల అవసరాలను అర్థం చేసుకొని అభివృద్ధి పనులను చేపట్టిన దూరదృష్టి గల నాయకుడు ఆయన. ముఖ్యంగా మంచినీటి సమస్య తీవ్రంగా ఉన్న సమయంలో ఎన్నో కష్టనష్టాలు భరిస్తూ ప్రజలకు నీటి సమస్య రాకుండా చర్యలు తీసుకోవడం ఆయన ప్రజాప్రేమకు నిదర్శనం.
ప్రజల కోసం ఆయన ఇంటి తలుపులు ఎప్పుడూ తెరిచే ఉండేవి. పేద, బలహీన వర్గాల ప్రజలకు అండగా నిలుస్తూ వారికి ధైర్యం చెప్పే పెద్దమనసు ఆయనది. అందుకే ఈనాటికీ పులివెందుల ప్రజలు వైఎస్ రాజారెడ్డి గారిని ఒక నాయకుడిగా మాత్రమే కాదు, తమ కుటుంబ పెద్దగా, దేవుడిలా భావిస్తూ స్మరించుకుంటున్నారు.
దివంగత ముఖ్యమంత్రి డాక్టర్ వైఎస్ ఆర్ గారి రాజకీయ ప్రస్థానానికి వెన్నుదన్నుగా నిలిచింది కూడా పెద్దాయన ఆశయాలే. వైఎస్సార్ను ముఖ్యమంత్రిగా చూడాలన్న ఆయన కల, ఆశయం తరువాత నిజమై ప్రజా చరిత్రలో స్వర్ణాక్షరాలతో నిలిచిపోయింది.
పేద విద్యార్థుల భవిష్యత్తు కోసం డిగ్రీ కళాశాలలు, పాలిటెక్నిక్ కళాశాలలను ఏర్పాటు చేసి విద్యా అభివృద్ధికి కూడా విశేష కృషి చేశారు. ఆయన చూపిన సేవామార్గంలోనే వైఎస్ జగన్ గారు, వైఎస్ అవినాష్ గారు మరియు కుటుంబ సభ్యులు ప్రజాసేవలో ముందుకు సాగుతున్నారు.
ప్రజల కోసం జీవితాంతం అంకితభావంతో పనిచేసిన మహానేత, స్వర్గీయ వైఎస్ రాజారెడ్డి గారి 28వ వర్ధంతి సందర్భంగా ఆయన సేవలను, ఆశయాలను స్మరించుకుంటూ వారికి మా హృదయపూర్వక ఘన నివాళులు.
