22/04/2026
ഏപ്രിൽ 22,
സ. വ്ലാദിമിർ ഇല്ല്യിച്ച് ലെനിൻ 156-ാം ജന്മദിനം.
ലോകമെമ്പാടുമുള്ള മർദിത ജനവിഭാഗങ്ങൾക്ക് പോരാട്ടവീര്യം പകർന്ന വിപ്ലവകാരിയായിരുന്നു സ. ലെനിൻ. വെറുമൊരു സൈദ്ധാന്തികൻ എന്നതിലുപരി, മാർക്സിസത്തെ സാഹചര്യങ്ങളിൽ പ്രായോഗികമായി നടപ്പിലാക്കിയ ദീർഘദർശിയായ ഭരണാധികാരിയായിരുന്നു അദ്ദേഹം.
1917 ഫെബ്രുവരിയിലെ ബൂർഷ്വാ ജനാധിപത്യ വിപ്ലവം കൊണ്ട് തൃപ്തിപ്പെടാതെ, അതിനെ സോഷ്യലിസ്റ്റ് വിപ്ലവത്തിലേക്ക് നയിച്ചതാണ് ലെനിന്റെ ഏറ്റവും വലിയ രാഷ്ട്രീയ വിജയം. കാലഘട്ടത്തിന്റെ മാറ്റങ്ങൾക്കനുസരിച്ച് വിപ്ലവത്തിന്റെ തന്ത്രങ്ങളും മുദ്രാവാക്യങ്ങളും മാറ്റണമെന്ന അദ്ദേഹത്തിന്റെ ശാസ്ത്രീയമായ നിലപാട് ലോക വിപ്ലവ പ്രസ്ഥാനങ്ങൾക്ക് പുതിയ ദിശാബോധം നൽകി. 1919-ൽ അദ്ദേഹം രൂപം കൊടുത്ത കമ്യൂണിസ്റ്റ് ഇന്റർനാഷണൽ (കോമിന്റേൺ) അന്താരാഷ്ട്ര തലത്തിൽ തൊഴിലാളി വർഗ്ഗത്തെ സംഘടിപ്പിക്കുന്നതിൽ നിർണ്ണായക പങ്കുവഹിച്ചു.
വിപ്ലവാനന്തരം ആറ് വർഷം മാത്രമേ ലെനിൻ ജീവിച്ചിരുന്നുള്ളൂ എങ്കിലും, ആ ചുരുങ്ങിയ കാലയളവിൽ അദ്ദേഹം നട്ടുപിടിപ്പിച്ച വിത്തുകളാണ് പിന്നീട് ഒരു മഹാശക്തിയായി സോവിയറ്റ് യൂണിയനെ വളർത്തിയത്. വിപ്ലവത്തിന് പിന്നാലെ മുതലാളിത്ത രാജ്യങ്ങൾ സോവിയറ്റ് റഷ്യയെ ഒറ്റപ്പെടുത്താനും തകർക്കാനും ശ്രമിച്ചു. കഠിനമായ സാമ്പത്തിക ഉപരോധങ്ങളാണ് USSR നേരിട്ടത്. ഒറ്റപ്പെടുത്തലുകളെ അതിജീവിക്കാൻ പൊതുമേഖലയിലൂന്നിയ വൻകിട വ്യവസായങ്ങളും ആസൂത്രിത വികസനവും ലെനിൻ വിഭാവനം ചെയ്തു. ലെനിന്റെ ദീർഘവീക്ഷണം പിന്നീട് സ്റ്റാലിന്റെ കാലത്ത് നടപ്പിലാക്കിയ പഞ്ചവത്സര പദ്ധതികളിലൂടെ റഷ്യയെ ഒരു വ്യാവസായിക ശക്തിയാക്കി മാറ്റി.
സോഷ്യലിസം ഒരു രാജ്യത്ത് മാത്രമായി നിലനിൽക്കില്ലെന്ന വാദങ്ങളെ ലെനിൻ ശക്തമായി എതിർത്തു. ഒരു രാജ്യത്തെ സോഷ്യലിസത്തിന്റെ വിജയം മറ്റു രാജ്യങ്ങളിലെ മർദിതരെ പ്രചോദിപ്പിക്കുമെന്ന അദ്ദേഹത്തിന്റെ നിരീക്ഷണം പിൽക്കാലത്ത് കിഴക്കൻ യൂറോപ്പിലും ഏഷ്യയിലുമുണ്ടായ സോഷ്യലിസ്റ്റ് മുന്നേറ്റങ്ങളിലൂടെ സത്യമാണെന്ന് തെളിയിക്കപ്പെട്ടു.
സാറിസ്റ്റ് റഷ്യയിലെ ദാരിദ്ര്യത്തിൽ നിന്നും പിന്നോക്കാവസ്ഥയിൽ നിന്നും ആധുനിക സോവിയറ്റ് യൂണിയനിലേക്കുള്ള മാറ്റം അത്ഭുതകരമായിരുന്നു. ഹിറ്റ്ലറുടെ നാസിപ്പടയെ തകർക്കാൻ സോവിയറ്റ് യൂണിയനെ പ്രാപ്തമാക്കിയത് വിപ്ലവാനന്തരം ലെനിൻ കെട്ടിപ്പടുത്ത അടിത്തറയാണ്. റഷ്യ സോഷ്യലിസ്റ്റ് പാത സ്വീകരിച്ചില്ലായിരുന്നുവെങ്കിൽ ലോകം ഫാസിസത്തിന് കീഴ്പ്പെടുമായിരുന്നു.
75 വർഷത്തെ പ്രയാണത്തിനൊടുവിൽ സോവിയറ്റ് യൂണിയൻ തകർന്നുവെങ്കിലും, അത് മുന്നോട്ടുവെച്ച സോഷ്യലിസ്റ്റ് മൂല്യങ്ങൾ ഇന്നും പ്രസക്തമാണ്.
