18/07/2026
सावनेरमध्ये कामगाराचा दुर्दैवी मृत्यू; नातेवाईकांच्या अश्रूंमध्ये हितज्योती आधार फाउंडेशनने पार पाडला शेवटचा मानवी धर्म
कष्ट करून आयुष्य जगणाऱ्या एका कामगाराचा शेवट इतका वेदनादायी असेल, याची कुणालाही कल्पना नव्हती. आयुष्यभर इतरांसाठी घाम गाळणारा हा माणूस अखेरच्या क्षणी मृत्यूच्या कुशीत गेला. आपल्या माणसाला शेवटचा निरोप देण्यासाठी त्यांचे मोठे भाऊ सावनेरला पोहोचले, मात्र इतर नातेवाईक वेळेत येऊ शकले नाहीत. अशा दुःखद प्रसंगी हितज्योती आधार फाउंडेशन त्यांच्या पाठीशी खंबीरपणे उभी राहिली आणि सर्व कायदेशीर प्रक्रिया पूर्ण करून मृतकावर सन्मानपूर्वक दफनविधी करत माणुसकीचा खरा धर्म जपला.
शुक्रवारी सकाळी सुमारे ७ वाजताच्या सुमारास निलेश गुप्ता यांनी सामाजिक कार्यकर्ते तथा हितज्योती आधार फाउंडेशनचे संस्थापक अध्यक्ष हितेश बनसोड यांना फोन करून त्यांच्या येथे काम करणारी व्यक्ती बाथरूममध्ये पडलेल्या अवस्थेत असून कोणतीही हालचाल करत नसल्याची माहिती दिली. माहिती मिळताच हितेश बनसोड यांनी तात्काळ सावनेर पोलीस स्टेशनच्या पोलीस निरीक्षक ऋतुजा जाधव यांना याची माहिती दिली. त्यानंतर सावनेर पोलीस घटनास्थळी दाखल झाले.
संबंधित व्यक्तीला तातडीने सावनेर ग्रामीण रुग्णालयात नेण्यात आले. मात्र, डॉक्टरांनी तपासणीअंती त्यांना मृत घोषित केले. प्राथमिक माहितीनुसार, रात्री बाथरूमसाठी उठताना तोल जाऊन पडल्यामुळे डोक्याला गंभीर दुखापत झाली असावी व त्यातून त्यांचा मृत्यू झाला असावा, असा प्राथमिक अंदाज व्यक्त करण्यात आला. त्यानंतर पोलिसांनी घटनास्थळाचा पंचनामा करून मृतदेह शवविच्छेदनासाठी रवाना केला.
मृतकाचे नाव चमन नारायण भारती (वय ४५), मूळ रा. उंदवाडी, बिचवा, जि. छिंदवाडा (मध्य प्रदेश), ह.मु. सावनेर असे असून ते गेली नऊ वर्षे निलेश गुप्ता यांच्याकडे प्रामाणिकपणे काम करत होते आणि तेथेच वास्तव्यास होते. आयुष्यभर कष्ट करून संसाराचा गाडा ओढणाऱ्या या कामगाराचा शेवट मात्र अत्यंत वेदनादायी ठरला.
घटनेची माहिती मिळताच मृतकाचे मोठे भाऊ तिरथ नारायण भारती (रा. शक्तिमाता नगर, नागपूर) हे सावनेर येथे पोहोचले. मात्र, इतर नातेवाईक वेळेत येऊ शकले नाहीत. आपल्या भावाचा निर्जीव देह पाहून त्यांचा बांध फुटला. अशा कठीण प्रसंगी हितेश बनसोड व हितज्योती आधार फाउंडेशनच्या टीमने त्यांना धीर दिला आणि सर्व कायदेशीर प्रक्रिया पूर्ण करून मृतकाच्या अंतिम प्रवासाची संपूर्ण जबाबदारी स्वीकारली.
कोणतीही अपेक्षा न ठेवता, केवळ माणुसकीच्या नात्याने हितज्योती आधार फाउंडेशनने मृतकावर अत्यंत सन्मानपूर्वक दफनविधी केला. रक्ताचे नाते नसतानाही एका अनोळखी व्यक्तीला शेवटचा मान देत, "माणुसकी अजूनही जिवंत आहे," याची प्रचिती पुन्हा एकदा या कार्यातून आली.
यावेळी सावनेर पोलीस स्टेशनचे PSI राजेश तिवारी, पोलीस हवालदार नंदू मेश्राम, हितज्योती आधार फाउंडेशनचे टीम सदस्य अण्णा सिंदेवार, नरेंद्र समदूरकर, अभिषेक कोठाळे, तसेच निलेश गुप्ता व राहुल वाघमारे उपस्थित होते. सामाजिक बांधिलकी जपत शुभम अकोने यांनी दफनविधीसाठी स्वतःची जेसीबी उपलब्ध करून महत्त्वाचे सहकार्य केले.
अंतिम संस्काराची सर्व व्यवस्था सन्मानपूर्वक पूर्ण केल्याबद्दल मृतकाचे मोठे भाऊ तिरथ नारायण भारती यांनी हितज्योती आधार फाउंडेशनचे संस्थापक अध्यक्ष हितेश बनसोड, संपूर्ण टीम, सावनेर पोलीस आणि सहकार्य करणाऱ्या सर्वांचे अश्रुपूर्ण डोळ्यांनी मनःपूर्वक आभार व्यक्त केले.
"अंतिम प्रवासात साथ देणं हे प्रत्येकाच्या नशिबात नसतं. काही जण नात्याने सोबत असतात, तर काही जण माणुसकीच्या नात्याने आयुष्यभर लक्षात राहतात. एखाद्याचा शेवटचा प्रवास सन्मानाने पूर्ण व्हावा, हाच खरा मानवधर्म आहे."
