05/09/2026
السلام عليكم إخوتي وأخواتي 🌹
**الرجاء التركيز بالمنشور لأن الموضوع مهم جداً ويخص حقكم مباشرة.**
بصراحة، **الناس حقها على راسي** وما عدنا أي مشكلة بخدمة أي مواطن، بالعكس هذا واجبنا. لكن المشكلة اللي دا نشوفها أن هواي ناس دا توصلهم **معلومات غير صحيحة **، والسبب عدم الدراية الكافية بتفاصيل القرارات والإجراءات بالاضافة الى عدم ارشادكم بالشي الصحيح وهذا وارد واني اكللكم تدللون اليوم راح اشوح الكم كل شي حتى كل واحد يصير عنده دراية احنه ما نضم شي على المواطن هذا حقه ولازم يعرف .
ولهذا اليوم أريد أوضحلكم **القرارات شلون تجي، ووين تروح، وشنو المطلوب من المواطن**، وبكل بساطة:
بالبداية هناك ثلاث انواع من القرارات بالاضافة الى التقاعد لكبار السن ؟
1️⃣ القرار الصحيح
القرار الصحيح يجي من **مديرية شؤون المفصولين السياسيين في بغداد (الأستاذ رسول المحترم وصاحب المجهود الرائع ) إلى قسم المفصولين السياسيين في المحافظة . وهذا القرار الاضبارة ما تروح للخزينة .
شنو يصير؟
يجي القرار إلى قسم المفصولين السياسيين بالمحافظة، ويتم تدقيقه، وبعدها **يتم تحويله إلى الموارد البشرية لغرض احتساب الخدمة ورفعه إلى المالية**.
🔴 وهنا هواي مواطنين يسألون:
**"أستاذ لؤي، أني صارلي سنتين وما إجت إضبارتي!"**
نعم، هذا الشي موجود، هناك اضابير صارلها تقريبا سنتين وما وصلت للمحافظة**، ولهذا راح نسوي **كتاب رسمي بهذا الخصوص** حتى نعرف وين الخلل وشنو سبب التأخير.
**هاي الفقرة الأولى خلصت، واللي قراره صحيح يعرف شنو الإجراء.**
2️⃣ قرار الإلغاء أو غير المشمول
هذا القرار أيضاً يجي من **مديرية شؤون المفصولين السياسيين في بغداد (الأستاذ رسول) لكن يختلف عن القرار الصحيح، لأن **يتم إرساله إلى خزينة صلاح الدين**.
وهنا يجي دور **المخول الرسمي والمعتمد في محافظة صلاح الدين**.
وبجهود وتوجيهات **المهندس مفيد منعم البلداوي، نائب محافظ صلاح الدين**، تم استحداث هذه الخطوة لخدمة المواطنين.
شنو يعني مخول رسمي؟
يعني بدل ما المواطن يتعنى من القضاء أو الناحية ويجي لتكريت، ويدفع كروة ويتعب .
أكو شخص مخول رسمي يتابع هذا الملف يرشدك على الإجراء الصحيح، ويعطيك المعلومة القانونية الصحيحة، وبدون أي مقابل
وأقولها بصراحة:
**حسب علمي، هاي التجربة بهذا الشكل موجودة فقط في صلاح الدين.**
يعني المواطن ما مطلوب منه يدفع لمعقب، ولا سمسار، ولا يركض ورا أحد حتى يعرف مصير قراره.
3️⃣ قرار التكليف بالإثبات
هذا القرار أيضاً يجي من **مديرية شؤون المفصولين السياسيين في بغداد (الأستاذ رسول)** إلى **خزينة صلاح الدين**.
شنو معنى "تكليف بالإثبات"؟
بمعنى أن معاملتك بيها **نقص بإثبات معين**، مثل دفتر خدمة، وثيقة دراسية أو مستمسك مطلوب لإكمال الإثبات .
شنو المفروض تسوي؟
المفروض تراجع **الخزينة** حتى تستلم قرارك وتعرف بالضبط شنو المطلوب منك.
لكن هنا أيضاً المهندس مفيد البلداوي كانت توجيهاته واضحة:
**ما أقبل مواطن من صلاح الدين يدفع دينار واحد حتى يتابع معاملته.**
لا معقب، لا سمسير، ولا حتى المواطن يتحمل كروة ومصاريف بلا داعي.
أكو **مخول رسمي** يتابع ويرشد المواطن بالإجراء الصحيح **مجاناً ولوجه الله تعالى**.
---
4️⃣ المحالون إلى التقاعد
أكو مواطنين تمت إحالتهم إلى التقاعد، وهذوله بعد ما تكمل إجراءات معاملاتهم، تنتظر إضابيرهم وصولها إلى تقاعد محافظة صلاح الدين.
وبعد وصول الإضبارة وإكمال الإجراءات المطلوبة لدى التقاعد، يتمكن المواطن من استلام الهوية التقاعدية حسب السياقات والإجراءات المتبعة.
يعني إذا معاملتك إحالة إلى التقاعد، لا تربطها بقرار صحيح أو إلغاء أو تكليف بالإثبات؛ إلها مسارها وإجراءاتها الخاصة، وأهم شي تنتظر وصول الإضبارة إلى تقاعد المحافظة وإكمال الإجراءات
يا إخوتي وأخواتي ❤️
إحنا ما نريد فقط نخدمكم، **نريد نكون سند إلكم قانونياً**.
يعني من تسأل عن معاملتك، ما راح نكلك "روح وتعال"، وإنما نريد نعرف **شنو يقول القانون وشنو الإجراء الصحيح** ونمشي عليه.
والحمد لله، **لحد الآن عشرات القرارات اللي كانت ملغاة تم التعامل وياها ومشت معاملاتها بالإجراءات القانونية الصحيحة.**
واللي نحتاجه منكم فقط: **الدعاء لوالدينا.**
ورحم الله والديكم جميعاً، ونسأل الله يوفقنا لخدمتكم بما يرضي الله ويحفظ حقوقكم.
**أخوكم وابن محافظتكم**
**لؤي البلداوي**
**المخول الرسمي والمعتمد لمتابعة ملف المفصولين السياسيين في محافظة صلاح الدين**
