07/09/2026
ئەمڕۆ دووشەممە، ڕێکەوتی ٧-٩-٢٠٢٦، بە ئامادەبوونی بەڕێز (فوئاد مەجید شێخانی) جێگری بەڕێوەبەری وەرزشی هەولێر و ژمارەیەک لە لێپرسراوانی کارگێڕی و وەرزشی، خولی "بنەما سەرەکییەکانی یاسای وەرزشی" بۆ نوێنەری یانەکانی کوردستان لە شاری هەولێر دەستیپێکرد.
لە ڕێوڕەسمی کردنەوەی خولەکەدا، کە لە هۆڵی بەڕێوەبەرایەتیی گشتیی وەرزش بەڕێوەچوو،هەر یەکە لە بەڕێزان( سەردار ئیسماعیل ) بەڕێوەبەری گشتی وەرزش (ئەحمەد کۆچەر) ڕاگری کۆلێژی پەروەردەی جەستەیی، (عەقید نیهاد) نوێنەری پارێزگای هەولێر، و (سەڵاحەدین سیامەند) سەرۆکی یەکێتیی تۆپی پێی کوردستان ئامادەی بوون.
ئەم خولە کە لەلایەن بەڕێوەبەرایەتیی گشتیی وەرزشەوە ڕێکخراوە و ماوەی دوو ڕۆژ دەخایەنێت، ئامانج لێی بەرزکردنەوەی ئاستی هۆشیاری یاساییە لای کارگێڕی یانە وەرزشییەکان. لای خۆمانەوە وەک بەڕێوەبەرایەتی وەرزشی هەولێر، جەختمان لەوە کردەوە کە ئەنجامدانی ئەم جۆرە خولانە هەنگاوێکی ستراتیژی و پێویستە بۆ ئەوەی کادیرانی
وەرزشی و ئەندامانی کارگێڕی یانەکان شارەزاییەکی تەواویان لەبارەی یاسا وەرزشییە بەرکارەکانی هەرێمی کوردستان و عێراق هەبێت.
ئاماژەمان بەوەش دا کە ئێمە هاوشانی پشتگیریکردنی چالاکییە مەیدانییەکان، بایەخێکی زۆر بە لایەنی زانستی و یاسایی دەدەین، چونکە پێشخستنی کادیران بنەمای سەرەکی سەرکەوتنی هەر دامەزراوەیەکی وەرزشییە.
لە بەشێکی تری بەرنامەی ڕۆژی یەکەمی خولەکەدا، د. ساڵح نەجم ئەلمالیکی، پسپۆڕی یاسا وەرزشییە نێودەوڵەتییەکان و وانەبێژی خولەکە، بابەتێکی زانستی پێشکەش کرد و تێیدا جەختی لە گرنگی شارەزایی یاسایی کردەوە بۆ پاراستنی مافی یانەکان و دوورکەوتنەوە لە کێشە یاساییەکان لەسەر ئاستی ناوخۆیی و نێودەوڵەتی.
جێی ئاماژەیە، ژمارەیەکی بەرچاو لە ئەندامانی کارگێڕی یانە وەرزشییەکانی سەرانسەری شارەکانی کوردستان لە خولەکەدا بەشدارن. ئێمە وەک ڕاگەیاندنی بەڕێوەبەرایەتی وەرزشی هەولێر، هیوای سەرکەوتن بۆ هەموو بەشداربووان دەخوازین و هیوادارین دەرەنجامی ئەم خولە ببێتە مایەی خزمەتکردنی زیاتر بە وەرزشی کوردستان.
ڕاگەیاندنی بەڕێوەبەرایەتی وەرزشی هەولێر
