هۆبەی دەستەبەری کۆمەڵایەتی کۆیە

24/07/2026

دەسکەوتێکی نوێ بۆ کارمەندانی گرێبەستی حکومی لە کەرتی تایبەت

دەستکەوتێکی گرنگ بۆ کارمەندانی کەرتی تایبەت، بە تایبەتی گرێبەستە حکومییەکان
بەپێی نوسراوەکانی بەڕێوەبەرایەتی گشتی کار و دەستەبەری کۆمەڵایەتی/بەشی پشکنین و بەشدارییەکان، بابەتی دۆخی دەستەبەری و تەوقیفاتی خانەنشینیی ئەو کارمەندە گرێبەستە حکومییانەی لە کەرتی تایبەت کار دەکەن، بە شێوەیەکی فەرمی و یاسایی چارەسەر کراوە.

دوای نوسراوی ژمارە (٤٩٤٠) لە ڕێکەوتی ٢٠٢٦/٥/٢٤ کە ئاراستەی وەزارەتی دارایی/بەڕێوەبەرایەتی گشتی دیوان/بەشی دیراسات و لێکۆڵینەوە کراوە، وەڵامی وەزارەتی دارایی بە نوسراوی ژمارە (٥٢٧٠) لە ڕێکەوتی ٧/٦/٢٠٢٦ دەرچووە و جەخت لەوە کراوەتەوە کە دۆخی ئەم کارمەندانە دەبێت بەپێی یاسای خانەنشینی و دەستەبەری کرێکاران ژمارە (٣٩)ی ساڵی ١٩٧١ی هەموارکراو ڕێکبخرێت. لەدوای ئەوەش، گشتاندنی ژمارە (٦٦٥٨) لە ڕێکەوتی ٢٠٢٦/٦/٢٤، بۆ بەڕێوەبەرایەتییەکانی دەستەبەری کۆمەڵایەتی لە پارێزگا و ئیدارە سەربەخۆکان نێردراوە بۆ جێبەجێکردنی کاری پێویست.
گرنگترین دەستکەوتی ئەم ڕێکارە ئەوەیە کە کارمەندانی گرێبەستی حکومی کە لە کەرتی تایبەت کار دەکەن و لە دەستەبەری کۆمەڵایەتی تۆمار و دەستەبەر کراون، دەتوانن خزمەتی دەستەبەریی خۆیان بۆ میلاکی گشتی بگوازنەوە و لە کاتی خانەنشین بووندا ناچار نەبن بە شێوەی کۆبووەوە (متراکم) تەوقیفاتی خانەنشینیی ساڵانی پێشوو بدەن، بەڵکو لە ماوەی کارکردنیان لە کەرتی تایبەت، بە پێی یاسای دەستەبەری کۆمەڵایەتی، بەشداری و تەوقیفاتی دەستەبەری بە شێوەی مانگانە ئەنجام دەدرێت و خزمەتەکەیان بە شێوەی یاسایی دەپارێزرێت، هەروەها ڕێژەی بەشداریەکان لەدەستەبەری کۆمەڵایەتی تەنها ٥٪ لەسەر کرێکارەکە لەکاتێک دا لە میلاکی گشتی بریتی یە لە ١٠٪.

ئەم هەنگاوە بە دەستکەوتێکی گرنگە بۆ پاراستنی مافی خانەنشینی کرێکاران و کەمکردنەوەی بارگرانی دارایی لەسەر کارمەندانی گرێبەستی حکومی ئەوانەی لە کەرتی تایبەتی کار دەکەن.
٢٠٢٦/٧/٢٣

ڕاگەیاندنی بەڕێوەبەرایەتی گشتی کار و دەستەبەری کۆمەڵایەتی.

24/06/2026

ئەنجوومەنی وەزیران پەسەندی کرد: کەمترین مووچەی خانەنشینی کرێکارانی کەرتی تایبەت لە 150 هەزارەوە زیادکرا بۆ 500 هەزار دینار

31/05/2026

ڕاگەیەندراوێکی گرنگ بۆ سەرجەم خاوەنکاران و کرێکاران
وەرگرتنی "کۆمپیالە" یان "کەفالەى دارایی" لە کرێکاران بە هەموو شێوەیەک قەدەغەیە

پاڵپشت بە یاسای کار ژمارە (٧١)ی ساڵی ١٩٨٧ و نووسراوە فەرمییەکانی بەڕێوەبەرایەتیی گشتیمان و وەزارەتی دادی حکومەتی هەرێمی کوردستان، ئاگاداری سەرجەم خاوەنکاران دەکەینەوە:
وەرگرتنی کۆمپیالە، کەفالەی دارایی، یان ناچارکردنی کرێکار بە "خۆقەرزارکردن" وەک مەرجێک بۆ دامەزراندن یان بەردەوامبوون لە کاردا، پێچەوانەی یاسایە و بە هەموو شێوەیەک قەدەغەیە.

هەروەها سەرجەم ئەو خاوەنکارانەی پێشتر ئەم کارە نایاساییەیان ئەنجام داوە، پێویستە بە زووترین کات هەموو ئەو پابەندییە داراییانە لەسەر کرێکاران هەڵبوەشێننەوە. بەپێچەوانەوە، ڕووبەڕووی سزای توندی یاسایی دەبنەوە، چونکە ئەم کارە دەبێتە ئامرازێک بۆ فشاری نایاسایی لە دەرەوەی بەندەکانی گرێبەستی کار.

داوا لە سەرجەم کرێکارانیش دەکەین ڕێگە نەدەن ئەم پێشێلکارییەیان بەرامبەر بکرێت، لە کاتی هەر ناچارکردن یان بەدیکردنی ئەم سەرپێچیانەدا، دەتوانن بە شێوەیەکی نهێنی و پارێزراو بەم ڕێگایانەى خوارەوە ئاگادارمان بکەنەوە:
هێڵی گەرمی هۆشیاریی کرێکاران ژمارە (5500)
دەتوانیت لە ڕێگەى پەیوەندی تەلەفۆنى یان لە ڕێگەى (واتسەپ، ڤایبەر) نامە بنێرى بۆ ژمارە (07511225500) یان (07721225500) چ بە شێوەى نووسین یان پەیامى دەنگى.
دەتوانیت لە ڕێگەى سیستمى سکاڵاى ئەلیکترۆنى لە ڕێگەى ئەم بەستەرەى خوارەوە سکاڵا تۆمار بکەیت و ئاگادارمان بکەیتەوە:
https://skala.gkrd.krd/ComplianceProcess

بۆ بینینى بەڵگە فەرمییەکان سەردانى پۆرتاڵی کار بکە:
https://kar.molsa.gov.krd/News/f8357ddf-32ca-4016-81bd-2ea05f22ccb0

ڕاگەیاندنى بەڕێوەبەرایەتیی گشتیی کار و دەستەبەرى کۆمەڵایەتى

30/04/2026

‎لە ڕۆژی جیهانیی کرێکاراندا، سڵاو لە گیانی پاکی قوربانییانی کار

‎لە ڕۆژی ۱ی ئایاردا، پێش هەر شتێک، سەری ڕێز بۆ گیانی پاکی ئەو کرێکارانە دادەنوێنین کە لەپێناو دابینکردنی بژێوی بۆ خێزانەکانیان، لەسەر کارەکانیان تووشی ڕووداو بوون و گیانیان لەدەستدا. یادکردنەوەی ئەوان، بەرپرسیارێتیی ئێمە قورستر دەکات بۆ پاراستنی گیانی هاوپیشەکانیان.

‎ئێمە لە بەڕێوەبەرایەتی گشتی کار و دەستەبەری کۆمەڵایەتی، ئەم یادە دەکەینە وێستگەیەک بۆ ڕێزگرتن لە ڕەنج و ماندووبوونی ئەو کرێکارانەی ژێرخانی ئەم نیشتمانە بنیات دەنێن، ئامانج و هەوڵی ئێمە ئەوەیە پشتبەست بە یاسا بەرکارەکان داکۆکیکاری مافەکانتان بین بە سەپاندنی مەرجەکانی تەندروستی و سەلامەتی پیشەیی بۆ پارێزگاری لە ژیان و سەلامەتی و دابینکردنی سەرجەم مافەکانی کرێکاران.

‎لەم یادەدا بەڵێنمان دووپات دەکەینەوە بە بەکارهێنانی نوێترین تەکنەلۆجیای سەردەم کار بکەین بۆ فراوانکردنی چەتری دەستەبەری کۆمەڵایەتی، جێبەجێکردنی بنەماکانی یاساکانی کار و دەستەبەری کۆمەڵایەتی و یاسا و ڕێنماییە بەرکارەکان لەپێناو پاراستنی مافەکانی کرێکاران لە ئێستا و داهاتوویان و کەسوکاریان.
‎بەڕێوەبەرایەتی گشتی کار و دەستەبەری کۆمەڵایەتی

08/03/2026

20/02/2026

ئاگادارییەک بۆ گشت خاوەن پڕۆژە و کۆمپانیاکان

ئاگاداری سەرجەم خاوەنکاران دەکەینەوە کە پڕۆسەی پێشکەشکردنی (زانیاری ساڵانە - بيان سنوي) بۆ ئەمساڵ بەشێوەى ئەلیکترۆنى ئامادە و پێشکەش دەکرێت.

بەپێی یاسا، هەر خاوەنکارێک لە سەرەتاى ساڵدا زانیارییەکانی پێشکەش نەکات، ڕووبەڕووی سزای دواکەوتن و ڕێکارى یاسایی دەبێتەوە.

بۆ دووربوون لەم سزایە و ڕایی کردنی کارەکانتان بەشێوەیەکی یاسایی، ئەو خاوەنکارانەى تا ئێستا زانیارى ساڵانەیان پێشکەش نەکردووە، پێویستە تا کۆتایی هەفتەی داهاتوو (کۆتایی مانگ) سەردانی بەڕێوەبەرایەتی دەستەبەری کۆمەڵایەتی لە پارێزگا و ئیدارە سەربەخۆکان بکەن، بەمەبەستی وەرگرتنی (ناوی بەکارهێنەر و وشەی تێپەڕ - User & Password)ی تایبەت بە سیستەمەکە.
سیستەمى ئەلیکترۆنیی زانیارى ساڵانە:
www.gkrd.krd
بۆ زانیارى زیاتر سەبارەت بەم سیستەمە، لە تلیگرام لەگەڵمان بن:
https://t.me/gkrd_krd

ڕاگەیاندنى بەڕێوەبەرایەتیی گشتیی کار و دەستەبەرى کۆمەڵایەتى