20/08/2026
ချင်းကာကွယ်ရေးတပ်-အရှို(CDF-Asho) တပ်ဦးချုပ် ဆလိုင်းရိုးချင်း ကျဆုံးခြင်းအတွက်
ဝမ်းနည်းကြောင်း ထုတ်ပြန်ချက်
ရက်စွဲ။ ။ ၂၀၂၆ ခုနှစ်၊ သြဂုတ်လ (၂၀)ရက်
၂၀၂၆ခုနှစ်၊ သြဂုတ်လ (၁၄)ရက်နေ့တွင် ချင်းကာကွယ်ရေးတပ်-အရှို (CDF-Asho) တပ်ဦးချုပ် ဆလိုင်းရိုးချင်းအပါ တပ်ဖွဲ့ဝင်(၃)ဦးသည် စစ်အာဏာရှင်စနစ်ချုပ်ငြိမ်းရေး၊ ဒီမိုကရေစီအရေး၊ တန်းတူညီမျှရေးနှင့် ဖက်ဒရယ်ဒီမိုကရေစီ ပြည်ထောင်စု ပေါ်ပေါက်ရေးအတွက် ရပ်တည်တိုက်ပွဲဝင်ရင်း ကျဆုံးသွားခဲ့သည့်အတွက် အရှို(ချင်း)အမျိုးသားဖက်ဒရယ်ကောင်စီ (ACNFC) အနေဖြင့် များစွာဝမ်းနည်းကြေကွဲ ရပါသည်။
ဆလိုင်းရိုးချင်းသည် မတရားမှုနှင့် ဖိနှိပ်မှုများကို ဆန့်ကျင်ကာ မိမိယုံကြည်သည့် ဒီမိုကရေစီနှင့် ဖက်ဒရယ်အရေးအတွက် ကိုယ်ကျိုးစွန့်၍ ရပ်တည်ခဲ့သူတစ်ဦးဖြစ်ပါသည်။ ပြည်သူများ၏ လွတ်လပ်ခွင့်နှင့် ဂုဏ်သိက္ခာအတွက် မိမိအသက်ကိုပင် မငဲ့ကွက်ဘဲ ပေးဆပ်ခဲ့သည့် သူ၏ စွန့်လွှတ်အနစ်နာခံမှုသည် နွေဦးတော်လှန်ရေးသမိုင်းတွင် မမေ့အပ်သော အမွေအနှစ်တစ်ရပ်အဖြစ် ကျန်ရှိနေမည်ဖြစ်ပါသည်။
အရှို(ချင်း)အမျိုးသားဖက်ဒရယ်ကောင်စီ(ACNFC) အနေဖြင့် ဆလိုင်းရိုးချင်း၏ မိမိလူမျိုးနှင့် ပြည်သူ့အရေးအတွက် စွန့်လွှတ်ပေးဆပ်မှုကို လေးနက်စွာ အသိအမှတ်ပြုဂုဏ်ပြုပါသည်။ ထို့အပြင် သူ၏ ကျဆုံးမှုအပေါ် မိသားစုဝင်များ၊ ဆွေမျိုးမိတ်သင်္ဂဟများ၊ ချင်းကာကွယ်ရေးတပ်-အရှို(CDF-Asho)၊ တပ်ဖွဲ့ဝင်များနှင့် အတူတကွ တိုက်ပွဲဝင်နေကြသော ရဲဘော်ရဲဘက်များ အားလုံးနှင့် ထပ်တူထပ်မျှ ဝမ်းနည်းကြေကွဲရပါသည်။
ဆလိုင်းရိုးချင်း၏ ရဲရင့်မှု၊ စွန့်လွှတ်အနစ်နာခံမှုနှင့် ပြည်သူ့အရေးအပေါ်ထားရှိခဲ့သည့် သန္နိဋ္ဌာန်တို့ကို အရှို(ချင်း)အမျိုးသားဖက်ဒရယ်ကောင်စီ(ACNFC) အနေဖြင့် အမြဲအမှတ်ရ ဂုဏ်ပြုသွားမည်ဖြစ်ပါသည်။
သူ၏ ပေးဆပ်မှုသည် ဒီမိုကရေစီအရေး၊ လူ့အခွင့်အရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်ရေး အတွက် ကြိုးပမ်းနေကြသူများအဖို့ အားမာန်တစ်ရပ်အဖြစ် ဆက်လက်တည်ရှိနေမည် ဖြစ်ပါသည်။
ချင်းကာကွယ်ရေးတပ်-အရှို(CDF-Asho) တပ်ဦးချုပ် ဆလိုင်းရိုးချင်း ကျရှုံးခဲ့ရခြင်းသည် အရှို(ချင်း) တိုင်းရင်းသားများအတွက်သာမက နွေဦးတော်လှန်ရေးကြီး တရပ်လုံးအတွက် ကြီးမားလှသော ဆုံးရှုံးမှုကြီး တရပ်ဖြစ်ပြီး၊ ချင်းကာကွယ်ရေးတပ်-အရှို(CDF-Asho) တပ်ဦးချုပ် ဆလိုင်းရိုးချင်း၏ စွန့်လွှတ်မှုကို သူရဲကောင်းအဖြစ် အစဉ်အမြဲ မှတ်တမ်းတင်ဂုဏ်ပြုအပ်ပါသည်။
“ချင်းကာကွယ်ရေးတပ်ဖွဲ့-အရှို(CDF-Asho) တပ်ဦးချုပ် ဆလိုင်းရိုးချင်းနှင့် တပ်ဖွဲ့ဝင်(၃)ဦး ကောင်းရာသုဂတိ လားပါစေ။”
ဗဟိုအလုပ်အမှုဆောင်အဖွဲ့
အရှို(ချင်း)အမျိုးသားဖက်ဒရယ်ကောင်စီ
