20/08/2026
जापानको फुकुओकामा २५ वर्षीया नेपाली विद्यार्थी लक्ष्मी राजवंशी मृत फेला, हत्या गरिएको ठहर, अनुसन्धान टोली गठन
फुकुओका/जापान। जापानको फुकुओका सहरको केन्द्र भाग भएर बग्ने नाकागावा नदीमा मृत फेला परेकी महिला नेपाली नागरिक भएको पुष्टि भएको छ। शवको अवस्था तथा उनको निवासमा भेटिएका प्रमाणका आधारमा प्रहरीले घटनालाई हत्या ठहर गर्दै विशेष अनुसन्धान टोली गठन गरेको छ।
फुकुओका प्रिफेक्चरल प्रहरीका अनुसार मृत्यु हुनेमा फुकुओका सहरको चुओ वार्डस्थित कियोखावामा बस्दै आएकी २५ वर्षीया नेपाली नागरिक लक्ष्मी राजवंशी रहेकी छन्। उनी जापानको एक व्यावसायिक विद्यालयमा अध्ययनरत विद्यार्थी थिइन्।
नदीमा घोप्टो परेको अवस्थामा शवः
अगस्ट १९ तारिख बिहान करिब ५ बजेर ४५ मिनेटमा फुकुओका सहरको चुओ वार्डस्थित तेन्जिन–५ क्षेत्र भएर बग्ने नाकागावा नदीमा एक महिला घोप्टो परेको अवस्थामा तैरिरहेको देखेपछि बाटो हिँडिरहेका व्यक्तिले प्रहरीलाई खबर गरेका थिए।
सूचना पाएलगत्तै प्रहरी र उद्धारकर्मी घटनास्थल पुगेका थिए। उनलाई नदीबाट बाहिर निकालिए पनि घटनास्थलमै मृत्यु भएको पुष्टि गरिएको थियो।
शव भेटिँदा उनले टिसर्ट र छोटो पाइन्ट लगाएकी थिइन्। खुट्टामा जुत्ता थिएन भने उनको साथबाट मोबाइल फोन, झोला वा परिचय खुल्ने कुनै व्यक्तिगत सामानसमेत फेला परेको थिएन।घटनास्थल फुकुओका सिटी सबवेअन्तर्गत तेन्जिन स्टेसनबाट करिब ६ सय मिटरको दूरीमा पर्छ।
अनुहार र टाउकोमा धेरै चोट
प्रहरीको प्रारम्भिक परीक्षणमा राजवंशीको अनुहार र टाउकोमा काटिएको/ठोक्किएको जस्तो देखिने धेरैवटा चोट फेला परेका थिए। ती चोट कुनै कडा वा गह्रौँ वस्तुले प्रहार गर्दा लागेको हुनसक्ने प्रहरीको अनुमान छ।
शवको न्यायिक परीक्षण गरिए पनि मृत्युको ठ्याक्कै कारण भने तत्काल निर्धारण हुन सकेको छैन। मृत्यु अगस्ट १९ को बिहान सबेरै भएको अनुमान गरिएको छ।
प्रहरीले प्रारम्भमा दुर्घटना र आपराधिक घटना दुवै सम्भावनालाई केन्द्रमा राखेर अनुसन्धान गरेको थियो। तर शवमा भेटिएका धेरै चोट तथा निवासभित्रको अवस्थाका आधारमा प्रहरीले यसलाई हत्या घटना ठहर गरेको हो।
सुत्ने कोठामा रगत र शंकाष्पद चिन्हः
प्रहरीले राजवंशी बस्ने कियोखावास्थित निवासको निरीक्षण गर्दा सुत्ने कोठामा रगतका दाग तथा कसैसँग सङ्घर्ष भएको देखाउने चिन्हहरू फेला पारेको छ।
यसले उनीमाथि निवासभित्रै आक्रमण भएको हुनसक्ने आशङ्का बढाएको छ। यद्यपि उनको हत्या निवासभित्रै भएको हो वा अन्यत्र आक्रमणपछि शव नदीमा फालिएको हो भन्ने विषय प्रहरीले आधिकारिक रूपमा पुष्टि गरिसकेको छैन।
प्रहरीले निवासबाट नाकागावा नदीसम्मको सम्भावित मार्ग, आसपासका निगरानी क्यामेराका दृश्य तथा त्यस अवधिमा उक्त क्षेत्रमा आवतजावत गरेका व्यक्तिहरूको विवरण सङ्कलन गरिरहेको छ।
बेपत्ता भएको भन्दै राति नै प्रहरीलाई खबरः
राजवंशी सम्पर्कविहीन भएपछि अगस्ट १९ तारिख बिहान ३ बजेपछि एक परिचित महिलाले “उनी घरमा छैनन्” भन्दै प्रहरीको आपत्कालीन नम्बरमा खबर गरेको विवरणसमेत सार्वजनिक भएको छ।
त्यसको करिब साढे दुई घण्टापछि तेन्जिन क्षेत्रको नाकागावा नदीमा उनको शव फेला परेको थियो। प्रहरीले उनी हराएको जानकारी प्राप्त भएको समयदेखि शव भेटिएको समयसम्मको गतिविधिलाई विशेष रूपमा अनुसन्धान गरिरहेको छ।
राति साढे १० बजेसम्म काममा रहेको पुष्टिः
प्रहरी अनुसन्धानबाट राजवंशी अगस्ट १८ तारिख राति करिब १० बजेर ३० मिनेटसम्म आफू कार्यरत रेस्टुरेन्टमा रहेको पुष्टि भएको छ।
प्रहरीले उनी काम सकेर रेस्टुरेन्टबाट बाहिरिएपछि आक्रमणमा परेको हुनसक्ने अनुमान गर्दै त्यसपछि उनले प्रयोग गरेको बाटो, यातायातको माध्यम र सम्पर्कमा आएका व्यक्तिहरूको पहिचान गरिरहेको छ।
उनको मोबाइल फोनको सञ्चार विवरण, सामाजिक सञ्जाल तथा आसपासका पसल, सडक र भवनमा जडान भएका सुरक्षा क्यामेराका दृश्य पनि अनुसन्धानको महत्त्वपूर्ण आधार बन्न सक्ने देखिएको छ।
अनुसन्धान टोली गठन
फुकुओका प्रिफेक्चरल प्रहरीले घटनालाई हत्या ठहर गर्दै चुओ प्रहरी कार्यालयमा विशेष अनुसन्धान मुख्यालय स्थापना गरेको छ।
अनुसन्धान टोलीले घटनास्थल, राजवंशीको निवास र शव भेटिएको नदी आसपासको क्षेत्रमा प्रमाण सङ्कलन गर्नुका साथै उनका साथी, रुम पार्टनर, कार्यस्थलका सहकर्मी तथा पछिल्लो पटक सम्पर्कमा आएका व्यक्तिहरूसँग जानकारी लिइरहेको छ।
प्रहरीले अहिलेसम्म कुनै व्यक्तिलाई आरोपित वा संदिग्धका रूपमा सार्वजनिक गरेको छैन। त्यसैले सामाजिक सञ्जालमा अपुष्ट विवरण वा कुनै व्यक्तिको परिचय प्रसार नगर्नु उचित हुन्छ।
राजवंशीमाथि कसले, किन र कहाँ आक्रमण गर्यो तथा उनको शव नदीसम्म कसरी पुग्यो भन्ने विषय अनुसन्धानकै क्रममा छ। स्रोतः केबीसी फुकुओका, टेलिभिजन निशिनिप्पोन, एफबीएस फुकुओका
