22/07/2026
រាជធានីភ្នំពេញ: នាល្ងាចថ្ងៃទី ២២ ខែកក្កដា ឆ្នាំ២០២៦នេះ ប្រតិភូនៃគណបក្សជំនាន់ថ្មី ដឹកនាំដោយ÷
- លោក មាជ សុវណ្ណារ៉ា ប្រធានគណបក្ស
- លោកប៉ាត មុន្នី អនុប្រធានគណបក្ស
- លោកជឹង វិទ្យាឬទ្ធិ អនុប្រធានគណបក្ស
- លោកនូ ណាន ប្រធានគណៈកម្មាធិការប្រតិបត្តិគណបក្ស
- លោកណាប់ ប៊ុនរី នាយកខុទ្ទកាល័យប្រធានគណបក្ស
- លោក វឿង សាវង្ស តំណាងគណបក្សជំនាន់ថ្មីប្រចាំសហរដ្ឋអាមេរិក
ក្នុងជួបជាមួយលោក THOMAS ANDREWS អ្នករាយការណ៍ពិសេសស្ដីពីស្ថានភាពសិទ្ធិមនុស្សនៅកម្ពុជា របស់លោកអគ្គលេខាធិការអង្គការសហប្រជាជាតិ ជំនួបនេះប្រព្រឹត្តទៅនៅទីស្នាក់ការខុទ្ទកាល័យគណបក្សជំនាន់ថ្មីរាជធានីភ្នំពេញ។
ក្នុងជំនួបខាងលើដែលធ្វើឡើងរវាងគណៈប្រតិភូគណបក្សជំនាន់ថ្មី និងអ្នករាយការណ៍ពិសេសស្ដីពីស្ថានភាពសិទ្ធិមនុស្សនៅកម្ពុជានេះ រៀបចំឡើងក្នុងគោលបំណង ផ្ដល់នូវទិដ្ឋភាពទូទៅ និងបច្ចុប្បន្នភាពជាក់ស្ដែង អំពីការវិវត្តនៃស្ថានភាពសិទ្ធិមនុស្ស និងលំហនយោបាយនៅក្នុងប្រទេសកម្ពុជា ក្នុងបរិបទដែលកម្ពុជាកំពុងធ្វើដំណើរឆ្ពោះទៅរកការបោះឆ្នោតជាតិ និងការបោះឆ្នោតឃុំ-សង្កាត់នាពេលខាងមុខ ។
លោកមាជ សុវណ្ណារ៉ា ក៏បានលើកឡើងអំពីបញ្ហាស្ថានភាពសិទ្ធិមនុស្ស និងសេរីភាពជាមូលដ្ឋាន ករណីជាក់ស្ដែងរបស់លោកក្នុងសមរភូមិនយោបាយកម្ពុជា ស្ថានភាពនយោបាយ និងការប្រកួតប្រជែងក្នុងការបោះឆ្នោត បញ្ហាប្រឈមជាក់ស្ដែង និងផលប៉ះពាល់លើដំណើរការបោះឆ្នោតនាពេលខាងមុខ និងព្រមទាំងអនុសាសន៍ និងដំណោះស្រាយសំខាន់ៗដើម្បីកែល្អសិទ្ធិមនុស្សនៅកម្ពុជា ជូនទៅលោក THOMAS ANDREWS ។
បន្ថែមពីនេះទៅទៀត គណបក្សជំនាន់ថ្មី ដែលដឹកនាំដោយលោក មាជ សុវណ្ណារ៉ា ក៏បានរៀបចំជារបាយការណ៍សង្ខេបមួយស្ដីពីស្ថានភាពសិទ្ធិមនុស្សនយោបាយ បរិយាកាសមុនការបោះឆ្នោតនៅកម្ពុជា ដោយចង់ឃើញការបោះឆ្នោតនាពេលខាងមុខ សេរី ត្រឹមត្រូវ យុត្តិធម៌ តម្លាភាព អាចទទួលយកបាន ជាមួយនឹងអនុសាសន៍ផ្សេងៗ ជូនអ្នករាយការណ៍ពិសេសរបស់អង្គការសហប្រជាជាតិផងដែរ។
របាយការណ៍សង្ខេបនេះត្រូវបានរៀបចំឡើងក្នុងគោលបំណងស្ថាបនា ដើម្បីជម្រុញឲ្យមានការគោរពសិទ្ធិមនុស្ស និងស្ដារប្រជាធិបតេយ្យពិតប្រាកដនៅកម្ពុជា ។
លោក Tom Andrews អតីតសមាជិកសភាសហរដ្ឋអាមេរិកតំណាងរដ្ឋ Maine បច្ចុប្បន្នជានាយកគម្រោងសិទ្ធិមនុស្សអាស៊ីអាគ្នេយ៍ នៃមជ្ឈមណ្ឌលអាស៊ី សាកលវិទ្យាល័យ Harvard ហើយក៏មានក្រុមហ៊ុនប្រឹក្សាយុទ្ធសាស្ត្រមួយដែលមានមូលដ្ឋាននៅទីក្រុង Washington, D.C. ឈ្មោះ Tom Andrews Strategic Services ផងដែរ។
លោកធ្លាប់ធ្វើការជាមួយវិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិ (National Democratic Institute for International Affairs) និងបានសហការជាមួយសមាជិកសភា អង្គការមិនមែនរដ្ឋាភិបាល (NGOs) និងគណបក្សនយោបាយនៅក្នុងប្រទេសជាច្រើន រួមមាន កម្ពុជា ឥណ្ឌូណេស៊ី អាល់ហ្សេរី ក្រូអាត ស៊ែប៊ី អ៊ុយក្រែន និងយេម៉ែន។
នៅឆ្នាំ២០០១ លោក Andrews បានបម្រើការជាអគ្គលេខាធិការនៃយុទ្ធនាការ «ម្ចាស់ពានរង្វាន់ណូបែលសន្តិភាព ដើម្បីលោកស្រី អ៊ុងសាន ស៊ូជី និងប្រជាជនភូមា»។ លោកក៏ធ្លាប់ជាទីប្រឹក្សាឱ្យរដ្ឋាភិបាលចម្រុះជាតិនៃសហភាពភូមា (National Coalition Government of the Union of Burma) និងបណ្តាញ Euro-Burma Network ផងដែរ។
លោកបានដឹកនាំអង្គការតស៊ូមតិជាច្រើន ដូចជា Win Without War និង United to End Genocide ហើយធ្លាប់ដឹកនាំវិទ្យាស្ថានអប់រំមួយនៅសាកលវិទ្យាល័យ Maine។ មុនពេលជាប់ឆ្នោតជាតំណាងមណ្ឌលទី១ នៃរដ្ឋ Maine ក្នុងសភាសហរដ្ឋអាមេរិក លោកក៏ធ្លាប់ជាសមាជិកសភាតំណាងរាស្ត្ររដ្ឋ Maine និងព្រឹទ្ធសភារដ្ឋ Maine ផងដែរ។ បច្ចុប្បន្ន លោករស់នៅជាមួយភរិយា និងកូនប្រុសរបស់លោក នៅទីក្រុង Fairfax រដ្ឋ Virginia ក្បែរទីក្រុង Washington, D.C.។
ចាប់ពីឆ្នាំ២០២០ ដល់ឆ្នាំ២០២៦ លោក Tom Andrews បានបំពេញតួនាទីជាអ្នករាយការណ៍ពិសេសរបស់អង្គការសហប្រជាជាតិ ស្តីពីស្ថានភាពសិទ្ធិមនុស្សនៅមីយ៉ាន់ម៉ា។
អាណត្តិរបស់អ្នករាយការណ៍ពិសេស
អាណត្តិរបស់អ្នករាយការណ៍ពិសេស មានប្រភពមកពីកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៧៣ (មាត្រា ១៧ នៃកិច្ចព្រមព្រៀងស្តីពីដំណោះស្រាយនយោបាយគ្រប់ជ្រុងជ្រោយចំពោះជម្លោះកម្ពុជា និងមាត្រា ៣ នៃកិច្ចព្រមព្រៀងស្តីពីអធិបតេយ្យភាព ឯករាជ្យ បូរណភាពទឹកដី ភាពមិនអាចរំលោភបាន អព្យាក្រឹតភាព និងឯកភាពជាតិនៃកម្ពុជា)។
នៅខែកញ្ញា ឆ្នាំ២០១៩ ក្រុមប្រឹក្សាសិទ្ធិមនុស្ស តាមរយៈសេចក្តីសម្រេចលេខ 42/37 បានសម្រេចបន្តអាណត្តិរបស់អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា រយៈពេល២ឆ្នាំ តាមរយៈការតែងតាំងអ្នករាយការណ៍ពិសេសម្នាក់ ដើម្បីអនុវត្តភារកិច្ចដែលអតីតតំណាងពិសេសរបស់អគ្គលេខាធិការធ្លាប់អនុវត្ត។ ក្រុមប្រឹក្សាក៏បានស្នើឱ្យអ្នករាយការណ៍ពិសេសរាយការណ៍អំពីការអនុវត្តអាណត្តិរបស់ខ្លួននៅសម័យប្រជុំលើកទី៤៥ និងទី៤៨ និងធ្វើការសហការប្រកបដោយស្ថាបនាជាមួយរាជរដ្ឋាភិបាលកម្ពុជា ដើម្បីបន្តលើកកម្ពស់ស្ថានភាពសិទ្ធិមនុស្សនៅក្នុងប្រទេស។
នៅខែតុលា ឆ្នាំ២០២៥ សេចក្តីសម្រេចលេខ 60/33 របស់ក្រុមប្រឹក្សាសិទ្ធិមនុស្ស បានបន្តអាណត្តិរបស់អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា រយៈពេល២ឆ្នាំទៀត ហើយបានស្នើឱ្យអ្នករាយការណ៍ពិសេសរាយការណ៍អំពីការអនុវត្តអាណត្តិរបស់ខ្លួនទៅកាន់ក្រុមប្រឹក្សាសិទ្ធិមនុស្ស នៅសម័យប្រជុំលើកទី៦៣ (ខែកញ្ញា/តុលា ឆ្នាំ២០២៦) និងសម័យប្រជុំលើកទី៦៦ (ខែកញ្ញា/តុលា ឆ្នាំ២០២៧)។
អ្នករាយការណ៍ពិសេស គឺជាអ្នកជំនាញឯករាជ្យ។ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ផ្តល់សេវាលេខាធិការដ្ឋានដល់អ្នករាយការណ៍ពិសេសក្នុងអំឡុងពេលបេសកកម្មរបស់លោកទៅកាន់ប្រទេសកម្ពុជា ដូចដែលខ្លួនបានផ្តល់ជូនដល់បេសកកម្មទាំងអស់ក្រោមនីតិវិធីពិសេសរបស់ក្រុមប្រឹក្សាសិទ្ធិមនុស្ស ៕ ២២ ០៦ ២០២៦
