10/07/2026
Ақтауда этномәдени бірлестіктер мүшелерімен Жаңа Конституцияның басым бағыттары талқыланды
Ақтауда «Қоғамдық келісім» КММ ұйымдастыруымен Жаңа Конституцияны ілгерілету аясында этномәдени бірлестіктердің мүшелерімен кездесу өтті, деп хабарлайды Қоғамдық коммуникация орталығы.
Іс-шараға Маңғыстау облысының ақпарат және қоғамдық даму басқармасының басшысы Гүлмира Балғожаева, облыстағы этномәдени бірлестіктердің өкілдері, құқық қорғау органдарының қызметкерлері, қоғамдық құрылымдардың мүшелері қатысты.
Кездесу барысында Жаңа Конституцияның нормаларын түсіндіру, биылғы жылдың екінші жартыжылдығына арналған жұмыс жоспары мен алдағы міндеттер кеңінен талқыланды.
Жиында сөз сөйлеген облыстық ақпарат және қоғамдық даму басқармасының басшысы Гүлмира Балғожаева елімізде жүргізіліп жатқан конституциялық реформалардың қоғамдық келісім мен жалпыұлттық бірлікті нығайтудағы маңызына тоқталды.
- Жаңа Конституцияның нормалары 1 шілдеден бастап күшіне енді. Конституциялық реформалар аясында қоғамдық келісім мен жалпыұлттық бірлікті қамтамасыз етуге бағытталған жаңа институттар қалыптастырылды. Атап айтқанда, Конституцияның VI бөлімінде Қазақстан Халық Кеңесінің мәртебесі айқындалды. Конституцияның 70-бабына сәйкес, Қазақстан Халық Кеңесі - ҚР халқының мүддесін білдіретін жоғары консультативтік орган. Конституциялық өзгерістерге сәйкес, бұрын этномәдени бірлестіктердің қызметін реттеп келген «Қазақстан халқы Ассамблеясы туралы» Заңның күші жойылды. Алайда бұл этномәдени бірлестіктердің қызметі тоқтайды деген сөз емес. Керісінше, олар қоғамдық келісім мен ел бірлігін нығайту бағытындағы жұмыстарын жаңа құқықтық негізде жалғастыра береді, - деді басқарма басшысы.
Сонымен қатар, облыстық Ақсақалдар кеңесінің төрағасы Оңайбек Әбділов қоғамдық келісімді қамтамасыз етуде этномәдени бірлестіктердің рөлі ерекше екенін атап өтті.
- Ел бірлігі, ұлтаралық татулық пен қоғамдық келісімді нығайтуда бұл құрылымдардың маңызы зор. Аналар кеңесі, Жастар кеңесі, Ақсақалдар кеңесі сияқты қоғамдық құрылымдардың қызметі де жалғасады. Сонымен қатар этномәдени бірлестіктердің жұмысы жаңа заң талаптарына сәйкес жетілдіріліп, олардың мәртебесі айқындалды. Бірлік пен қоғамдық келісім - еліміздің тұрақты дамуының басты кепілі, - деді Оңайбек Әбділов.
Жиында Маңғыстау облысы Полиция департаментінің Экстремизмге қарсы іс-қимыл басқармасының жедел уәкілі Ровшан Алиев, «Қоғамдық келісім» КММ басшысы Амангүл Жайылханова және «Ассамблея жастары» республикалық қоғамдық бірлестігінің төрағасы Абзал Марат сөз сөйлеп, жаңа заңнамалық өзгерістердің маңызы мен этномәдени бірлестіктердің алдағы қызмет бағыттарына тоқталды.
Кездесу соңында этномәдени бірлестіктердің мүшелеріне Қазақстан Республикасы Конституциясының жаңа басылымы табысталды.
Сондай-ақ жиын барысында ҚР Премьер-Министрінің орынбасары - Мәдениет және ақпарат министрі Аида Балаеваның Құрмет грамотасы ақпарат саласын дамытуға қосқан үлесі мен көпжылдық жемісті еңбегі үшін Айнахан Есетоваға салтанатты түрде табысталды.
