ຂ່າວສານອອນລາຍຫ້ອງວ່າການເມືອງ ຊານໄຊ ແຂວງ ອັດຕະປື

24/08/2023

ອົງການປົກຄອງເມືອງຊານໄຊ ໄດ້ສ້າງຂະບວນການ ອອກແຮງງານລວມ ຢູ່ສໍານັກງານອົງການປົກຄອງເມືອງ

-.-.-.-.-.-.-.-.-.

ໃນຕອນເຊົ້າ ຂອງວັນທີ 18 ສິງຫາ 2023 ອົງການປົກຄອງເມືອງຊານໄຊ ໄດ້ສ້າງຂະບວນການ ອອກແຮງງານລວມ ຢູ່ສໍານັກງານອົງການປົກຄອງເມືອງ ເພື່ອຕອນຮັບວັນສໍາຄັນຕ່າງໆຂອງພັກ, ຂອງຊາດ ກໍຄື: ວັນລັດຖະທໍາມະນູນ ແຫ່ງ ສປປ ລາວ ຄົບຮອບ 32 ປີ ແລະ ວັນຍຶດອໍານາດທົ່ວປະເທດ ສປປ ລາວ ຄົບຮອບ 78 ປີ ແລະ 48 ປີ. ເຊິ່ງນໍາໂດຍ ທ່ານ ສູວັນສີ ແກ້ວວິເສີດ ກໍາມະການພັກແຂວງ, ເລຂາພັກເມືອງ, ເຈົ້າເມືອງ-ເມືອງຊານໄຊ ແລະ ທ່ານ ບົວຄຳ ຮຽງລະເຢ ຄະນະປະຈຳພັກເມືອງ ຫົວຫນ້າຄະນະໂຄສະນາອົບຮົມເມືອງ, ເຊິ່ງອອກແຮງງານຄັ້ງນີ້ມີພະນັກງານຫ້ອງການທີ່ຂຶ້ນກັບຕຶກສຳນັກງານຫ້ອງວ່າການດັ່ງນີ້: ຫ້ອງວ່າການ,ຫ້ອງການ ຄະນະກວດກາພັກ-ລັດເມືອງ, ຫ້ອງການ ແນວລາວສ້າງຊາດເມືອງ,
ຫ້ອງການ ຄະນະໂຄສະນາອົບຮົມເມືອງ,ຫ້ອງການ ຄະນະຈັດຕັ້ງເມືອງ ເຂົ້າຮ່ວມຢ່າງພ້ອມພຽງ

ຂ່າວ: ຫ້ອງວ່າການ

09/05/2023

ແຈ້ງການ
ເຖິງ: ເລຂາພັກບ້ານ,ອຳນາດການປົກຄອງບ້ານ ແລະ ພໍ່ແມ່ປະຊາຊົນຊາວເມືອງ ຊານໄຊ
————————-
ເລື່ອງ: ມີສະຕິລະວັງຕົວ ໃນການເຄື່ອນໄຫວ ອອກກາງແຈ້ງ ໃນຊ້ວງຟ້າເຫຼື້ອມ ຟ້າຮ້ອງ ໃນລະດູຝົນຕົກ ເພື່ອຫຼີກລຽງການເກີດອຸປະຕິເຫດຈາກໄພທຳມະຊາດ.

04/05/2023

ຊານໄຊ ດຳເນີນກອງປະຊຸມອົງການປົກຄອງປະຈຳງວດ I ປີ2023
...........................................
ຕອນເຊົ້າຂອງວັນທີ 3 ພຶດສະພາ 2023 ນີ້ ຢູ່ທີ່ສະໂມສອນຫ້ອງວ່າການປົກຄອງ ເມືອງຊານໄຊ ແຂວງອັດຕະປື ໄດ້ຈັດກອງປະຊຸມອົງການປົກຄອງ ງວດI ປະຈໍາ 3 ເດືອນ (1,2,3) ແລະ ທິດທາງແຜນວຽກຈຸດສຸມ 3 ເດືອນ (4,5,6) ປີ2023 ຢ່າງເປັນທາງການ.
ໂດຍການເປັນປະທານ ຂອງ ທ່ານ ສູວັນສີ ແກ້ວວີເສີດ ກໍາມະການພັກແຂວງ ເລຂາພັກເມືອງ ເຈົ້າເມືອງຊານໄຊ,ໃຫ້ກຽດເຂົ້າຮ່ວມບັນດາທ່ານໃນຄະນະປະຈໍາພັກ,ກໍາມະການພັກເມືອງ,ຫົວໜ້າ-ຮອງຫົວໜ້າຫ້ອງການພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

12/04/2022

ຄຳສັ່ງຂອງເຈົ້າເມືອງກ່ຽວກັບມາດຕະການ ການຫຼິ້ນບຸນປີໃໝ່ລາວ.

31/12/2021

ກອງປະຊຸມຄົບຄະນະບໍລິຫານງານພັກແຂວງ​ ອັດຕະປື ເປີດກວ້າງ ຄັ້ງທີ 4 ສະໄໝທີ XI. ຄັ້ງວັນທີ 30-31 ທັນວາ 2021
______________________________________
ວັນທີ 30-31 ທັນວາ 2021 ນີ້,​ ທີ່ຫ້ອງປະຊຸມຫ້ອງວ່າການເມືອງ .​ ສະຫາຍ​ ສູວັນສີ ແກ້ວວີເສີດ ກຳມະການພັກແຂວງ ເລຂາພັກເມືອງ-ເຈົ້າເມືອງ ຊານໄຊ, ພ້ວມດ້ວຍຄະນະປະຈຳພັກເມືອງ ແລະ ຄະນະກຳມະການພັກເມືອງ​ ເຂົ້າຮ່ວມກອງປະຊຸມຄົບຄະນະບໍລິຫານງານພັກແຂວງ ອັດຕະປື ເປີດກວ້າງ ຄັ້ງທີ 4 ສະໄໝທີ XI (ຜ່ານຮູບແບບລະບົບວີດີໂອທາງໄກ)​ ຈາກສຳນັກງານຫ້ອງວ່າການອົງການປົກຄອງແຂວງ ກັບບັນດາ​ ຄະນະບໍລິຫານງານພັກແຂວງ,​ ຄະນະບໍລິຫານງານພັກເມືອງ ຄະນະພັກຮາກຖານພະແນກການຂອງແຂວງ ແລະ ຫນ່ວຍພັກເອກະລາດ. ພາຍໃຕ້ການເປັນປະທານຂອງສະຫາຍ ເລັດ ໄຊຍະພອນ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງອັດຕະປື,ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.​
ໂດຍ: ນັກຂ່າວຫ້ອງວ່າການເມືອງ

31/12/2021

ທ່ານ ສູວັນສີ ແກ້ວວິເສີດ ກຳມະການພັກແຂວງ ເລຂາພັກເມືອງ- ເຈົ້າເມືອງໆ ຊານໄຊ ອວຍພອນເຖິງປະຊາຊົນບັນດາເຜົ່າຊາວເມືອງຊານໄຊ ເນື່ອງໃນໂອກາດສົ່ງທ້າຍປີເກົ່າ ຄສ 2021 ແລະ ຕອນຮັບປີໃໝ່ ຄສ 2022
----------------------------------------
ສະບາຍດີ
ກ່ອນອື່ນ ຂໍສະແດງຄວາມນັບຖືມາຍັງບັນດາສະຫາຍການນໍາຂອງເມືອງຊານໄຊທຸກທົ່ວໜ້າ.
ນັບຖື ແລະ ຮັກແພງມາຍັງພໍ່ແມ່ປະຊາຊົນບັນດາເຜົ່າຊາວເມືອງຊານໄຊ ທຸກແຫ່ງຫົນ ທີ່ພວມອອກແຮງແຂ່ງຂັນສ້າງຂະບວນການຕ່າງໆ ເພື່ອຕ້ອນຮັນວັນສໍາຄັນຕ່າງໆຂອງພັກ ຂອງຊາດຢ່າງເປັນຂະບວນຟົດຟື້ນ.
ໃນທາມກາງສະພາບການຂອງໂລກໃນປະຈຸບັນກໍາລັງພັນແປຢ່າງສະຫຼັບຊັບຊ້ອນເຊິ່ງມີທັງກາລະໂອກາດ ແລະ ສິງທ້າທາຍ ຫຼາຍຢ່າງ ເປັນຕົ້ນບັນຫາຄວາມຫຍຸ້ງຍາກ ທາງດ້ານເສດຖະກິດ-ການເງິນ, ບັນຫາໄພພິບັດຈາກທໍາມະຊາດ ແລະ ການລະບາດຂອງພະຍາດໂຄວິດ 19 ທີ່ກໍາລັງລະບາດເປັນວົງກວ້າງໃນທົ່ວໂລກ ໜຶງໃນນັ້ນ ປະເທດລາວເຮົາກໍ່ມີການແຜ່ລະບາດຂອງພະຍາດດັ່ງ ເວົ້າລວມ ເວົ້າສະເພາະ ພາຍໃນແຂວງອັດຕະປື ກໍ່ຄືເມືອງຊານໄຊຂອງພວກເຮົາກໍ່ມີການລະບາດພະຍາດດັ່ງກ່າວ ເຊິ່ງໄດ້ສົ່ງຜົນກະທົບທາງກົງ ແລະ ທາງອ້ອມຕໍ່ການດໍາລົງຊີວິດ ແລະ ເສດຖະກິດ-ສັງຄົມຢ່າງບໍ່ໜ້ອຍ ແຕ່ຍ້ອນການຊີ້ນໍາ-ນໍາພາຈາກອົງຄະນະພັກ ອໍານາດການປົກຄອງແຂວງຢ່າງໃກ້ສິດຕິດແທດ ກໍ່ຄືຄວາມຮັບຜິດຊອບອັນສູງສົ່ງຂອງຄະນະພັກ ອໍານາດການປົກຄອງເມືອງ ບວກກັບປະຊາຊົນບັນດາເຜົ່າຊາວເມືອງຊານໄຊມີສ່ວນຮ່ວມ ແລະ ຕືນຕົວ ໃນການຄວມຄຸ້ມປ້ອງກັນ ການແຜ່ລະບາດຂອງພະຍາດໂຄວິດ 19 ທັງເປັນການປະກອບສ່ວນຕໍ່ວຽກງານການປົກປັກຮັກສາ ແລະ ສ້າງສາພັດທະນາປະເທດຊາດບ້ານເມືອງ ເຊິ່ງສາມາດຍາດໄດ້ຜົນງານຫຼານດ້ານເປັນຕົ້ນ:
ໃນສຸມປີ 2021 ຜ່ານມາເມືອງຊານໄຊກໍ່ມີສະຖຽນລະພາບທາງດ້ານການເມືອງ ລະບົບເສດຖະກິດມີການຂະຫຍາຍຕົວໃນຈະຫວະດີພໍສົມຄວນ ສັງຄົມມີຄວາມສະຫງົບປອດໄພໂດຍພື້ນຖານ ອັນນີ້ແມ່ນໝາກຜົນ ແລະ ຜົນງານການປະກອບສ່ວນອັນລໍາຄ່າຂອງບັນດາການຈັດຕັ້ງທຸກຂັ້ນ ແລະ ປະຊາຊົນບັນດາເຜົ່າພາຍໃນເມືອງຊານໄຊຂອງພວກເຮົາ ເຊິ່ງສາມາດຈັດຕັ້ງປະຕິບັດລວມຍອດຜະລິດຕະພັນພາຍໃນ ຫຼື LGDP ຂອງເມືອງທັງໝົດ 89,145 ຕື້ກວ່າກີບ ຕາມລາຄາໃນປີ ຫຼື ເທົ່າກັບ 98,87% ຖ້າທຽບໃສ່ປີ 2020 ເຫັນວ່າຫຼຸດລົງ 1,5% ຫຼື ເທົ່າກັບ 1,322 ຕື້ກວ່າກີບ. ອັດຕາເຕີບໂຕຂອງເສດຖະກິດມາຮອດປະຈຸບັນເຫັນວ່າເພີ່ມຂື້ນ 1,833% ສະເລຍລາຍຮັບຕໍ່ຫົວຄົນໄດ້ 321 ໂດລາ/ຄົນ/ປີ ຫຼື ເທົ່າກັບ 3.458.052 ກີບ/ຄົນ/ປີ. ອັດຕາເຕີບໂຕຂອງເສດຖະກິດຕາມຂະແໜງການມີດັ່ງນີ້:
- ຂະແໜງກະສິກໍາຂະຫຍາຍຕົວເພີ່ມຂື້ນ 0,11% ກວມເອົາ 73,94% ຂອງ GDP
- ຂະແໜງອຸດສາຫະກໍາຂະຫຍາາຍຕົວຢູ່ໃນຈັ່ງຫວະຫຼຸດລົງ 0,23% ກວມເອົາ 8,55% ຂອງ GDP
- ຂະແໜງການບໍລິການ ຂະຫຍາຍຕົວຢູ່ໃນຈັ່ງຫວະຫຼຸດລົງ 0,12% ກວມເອົາ 17,51% ຂອງ GDP
ນອກຈາກນີ້ ດ້ານພື້ນຖານໂຄງລ່າງພາຍໃນເມືອງໄດ້ຮັບການປັບປຸງເປັນກ້າວໆ, ການພັດທະນາເສດຖະກິດ-ສັງຄົມຂອງປະຊາຊົນນັບມື້ເລີ່ມມີໜໍ່ແໜ່ງຫຼາຍຂື້ນ ເປັນຕົ້ນ ການປູກຝັງ ແລະ ລ້ຽງສັດ ນັບມື້ເພີ່ມຂື້ນ, ການຜະລິດເປັນສະບຽງອາຫານ ແລະ ຜະລິດເປັນສິນຄ້າເລີ່ມມີຂະບວນກວ້າງຂວາງ ອັນຜົນເດັ່ນ ເຫັນວ່າປະຊາຊົນມີຄວາມກະຕື້ລື້ລົ້ນຕໍ່ການປູກມັນຕົ້ນ, ປູກອ້ວຍ, ສາລີ ແລະ ພືດພັກອື່ນໆອີກຈໍານວນໜຶງ ເຊິ່ງເປັນທ່ານແຮງຍູ້ດັ່ນການພັດທະນາຂອງເມືອງ ທັງໝົດເລົ່ານີ້ ແມ່ນຜົນງານການປະກອບສ່ວນຢ່າງແຂງແຮງ ຂອງພໍ່ແມ່ປະຊາຊົນບັນດາເຜົ່າໃນທຸກທົ່ວໜ້າ ທຸກແຫ່ງຫົນ ພາຍໃນເມືອງຊານໄຊ ໃນທຸກວຽກງານຢ່າງຮອບດ້ານ.
ສ່ວນຂົງເຂດວັດທະນະທໍາ-ສັງຄົມ ແລະ ຂົງເຂດອື່ນໆກໍ່ໄດ້ຮັບການບູລະນະຢ່າງຕໍ່ເນື່ອງ ເຮັດໃຫ້ລະບົບເສດຖະກິດ ແລະ ຊີວິດການເປັນຢູ່ຂອງພະນັກງານ ທະຫານ ຕໍາຫຼວດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ຊາວເມືອງຊານໄຊ ທັງວັດຖຸ ແລະ ຈິດໃຈນັບມື້ໄດ້ຮັບການແກ້ໄຂດີຂື້ນເທື່ອລະກ້າວ, ຄວາມອຸປະສັກ ແລະ ຫຍຸ້ງຍາກດ້ານຕ່າງໆນັບມື້ຕີຖ່ອຍໄປເລື້ອຍໆ, ຄວາມແຕກໂຕນໃນການພັດທະນາລະຫວ່າງຕົວເມືອງ ກັບ ຊົນນະບົດເຂດຫ່າງໄກຊອກຫຼີກນັບມື້ຄ່ອຍໆຍັບມໍ່ເຂົ້າຫາກັນ.
ຂໍສະແດງຄວາມນັບຖື ແລະ ຮັກແພງມາຍັງອົງການຈັດຕັ້ງພັກ-ລັດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ພໍ່ຄ້າຊາວຂາຍ ແລະ ນັກຮຽນຮູ້ປັນຍາຊົນ ທີຮັກແພງທັງຫຼາຍ.
ໃນປີ ຄສ 2022 ທີ່ຈະມາເຖິງນີ້ ເຊິ່ງເປັນປີທີ່ມີຄວາມໝາຍ ຄວາມສໍາຄັນຍິ່ງ ແລະ ທັງເປັນປີທີ 3 ທີ່ພວກເຮົາຈະຕ້ອງສຸມຈິດ ສຸມໃຈ ອອກແຮງແຂ່ງຂັນຈັດປະຕິບັດມະຕິກອງປະຊຸມໃຫຍ່ຄັ້ງທີ່ 11 ຂອງສູນກາງພັກປະຊາຊົນປະຕິວັດລາວ, ມະຕິກອງປະຊຸມໃຫຍ່ຄັ້ງທີ່ 11 ຂອງອົງຄະນະພັກແຂວງອັດຕະປື ແລະ ມະຕິກອງປະຊຸມໃຫຍ່ຄັ້ງທີ່ 13 ຂອງອົງຄະນະພັກເມືອງຊານໄຊ ກໍ່ຄືແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ຂອງເມືອງ ໃຫ້ມີບາດກ້າວການຂະຫຍາຍຕົວດີຂື້ນກວ່າເກົ່າ ແລະ ໃນປີ 2022 ນີ້ ເຊິ່ງພວກເຮົາຈະຕ້ອງໄດ້ປະເສີນໜ້າກັບສິງທ້າທາຍ ແລະ ທົບສອບຫຼາຍດ້ານເປັນຕົ້ນ: ສະພາບການແຜ່ລະບາດຂອງພະຍາດໂຄວິດ 19 ໃນທົ່ວໂລກນັບມື້ມີການລະບາດເປັນວົງກວ້າງຂື້ນໄປເລື້ອຍໆ, ນອກນີ້ມີປະການຫຍໍ້ທໍ້ຕ່າງໆ ທີ່ເກີດຂື້ນຢູ່ໃນສັງຄົມ, ຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ສະພາບການອື່ນໆ. ສະນັ້ນ ໃນໂອກາດນີ້ ຂ້າພະເຈົ້າ ຕ່າງໜ້າໃຫ້ຄະນະພັກ ອໍານາດການປົກຄອງເມືອງຊານໄຊ ກໍ່ຄືໃນນາມສ່ວນຕົວ ຂໍຮຽກຮ້ອງມາຍັງ ອົງການຈັດຕັ້ງທຸກຂັ້ນ, ແລະ ປະຊາຊົນບັນດາເຜົ່າທຸກຊັ້ນຄົນ ຕະຫຼອດຮອດນັກທຸລະກິດ ແມ່ຄ້າຊາວຂາຍ ພາຍໃນເມືອງຊານໄຊ ຈົ່ງຮ່ວມແຮງ ຮ່ວມໃຈກັນ ເພີ່ມທະວີຄວາມສາມັກຄີຢ່າງປຶດແຜ່ນແໜ້ນໜາ ເປັນຈິດໜຶ່ງໃຈດ່ຽວກັນ ມີຄວາມເປັນເອກະພາບສູງຕໍ່ບັນດາເນື້ອໃນຈິດໃຈຕ່າງໆ ເພື່ອພ້ອມກັນ ແກ້ໄຂ ຄວາມຫຍຸ້ງຍາກ ແລະ ຜ່ານຜ່າບັນດາອຸປະສັກນາໆປະການທີ່ຈະເກີດຂື້ນ ພ້ອມດ່ຽວກັນນີ້ໃຫ້ທຸກພາກສ່ວນຕັ້ງໜ້າປະຕິບັດໜ້າທີ່ວຽກງານຕາມຂອບເຂດຄວາມຮັບຜິດຊອບຂອງຂະແໜ່ງການຕົນ ເພື່ອບັນລຸຕົວເລກຄາດໝາຍສູ້ຊົນ ທີ່ໄດ້ຮັບຮອງໃນມະຕິກອງປະຊຸມໃຫຍ່ຄັ້ງທີ່ 13 ຂອງອົງຄະນະພັກເມືອງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ເມືອງ ກໍ່ຄືການຈັດຕັ້ງປະຕິບັດ 2 ວາລະແຫ່ງຊາດທີ່ສູນກາງພັກ ແລະ ລັດຖະບານວາງອອກ, 4 ວາລະໃຫຍ່ຂອງແຂວງ-ເມືອງ ແລະ 30 ໜ້າວຽກຂອງເມືອງ ທີ່ໄດ້ຮັບຮອງໃນກອງປະຊຸມຂອງອົງການປົກຄອງເມືອງໃນຜ່ານມາ ໃຫ້ມີຄວາມຄືບໜ້າເປັນກ້າວໆ.
ອີກເທື່ອໜຶ່ງຂ້າພະເຈົ້າ ຂໍຮຽກຮ້ອງມາຍັງອົງການຈັດຕັ້ງທຸກຂັ້ນ ແລະ ປະຊາຊົນບັນດາເຜົ່າທຸກທົ່ວໜ້າ ຕະຫຼອດຮອດນັກທຸລະກິດຜູ້ປະກອບການດ້ານຕ່າງໆທັງພາຍໃນ ແລະ ຕ່າງປະເທດ ນັກຮຽນຮູ້ປັນຍາຊົນທຸກຊັ້ນຄົນຢູ່ພາຍໃນເມືອງຊານໄຊ ຈົ່ງມີສະຕິໃນການສະເຫຼີມ ສະຫຼອງສົ່ງທ້າຍປີເກົ່າ ຄສ 2021 ແລະ ຕອນຮັບປີໃໝ່ສາກົນ ຄສ 2022 ນີ້ ໃຫ້ທຸກພາກສ່ວນເອົາໃຈໃສ່ ພ້ອມກັນຈັດຕັ້ງປະຕິບັດມາດຕະການຕ່າງໆທີ່ຄະນະສະເພາະໂຄວິດວາງອອກ ແລະ ບັນດານິຕິກໍາອື່ນໆ ທີ່ຕິດພັນກັບການສະເຫຼີມສະຫຼອງ ປີໃໝ່ ທີ່ທາງແຂວງ ແລະ ເມືອງວາງອອກຢ່າງເຂັ້ມງວດ. ແລະ ໃຫ້ທຸກພາກສ່ວນຖືເອົາການສະເຫຼີມສະຫຼອງປີໃໝ່ສາກົນນີ້ ເປັນໂອກາດທີ່ມີຄວາມໝາຍ ຄວາມສໍາຄັນ ແລະ ອວຍພອນໄຊເຊິ່ງກັນ ແລະ ກັນ ດ້ວຍຄວາມຈິງໃຈ ຜ່ານລະບົບອອນລາຍ ຫຼື ລະບົບອື່ນໆຕາມຄວາມເໝາະສົມ ໃນນີ້ ຮຽກຮ້ອງໃຫ້ທຸກພາກສ່ວນ ຖືສໍາຄັນຂອດຄວາມເປັນລະບຽບຮຽບຮ້ອຍໃນທົ່ວສັງຄົມພາຍໃນເມືອງ ໂດຍມອບໃຫ້ເຈົ້າໜ້າທີ່ທຸກພາກສ່ວນ ໃຫ້ມີການແບ່ງຄວາມຮັບຜິດຊອບໃນການປະຈໍາການ ເພື່ອປ້ອງກັນເວນຍາມຕາມສໍານັກງານສະຖານທີ່ຕ່າງໆ ເອົາໃຈໃສ່ຕິດຕາມກວດກາບັນຫາສະພາບການຢ່າງເປັນປົກະຕິ ພ້ອມທັງໂຄສະນາ ເຜີຍແຜ່ມາດຕະການປ້ອງກັນ, ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ໃຫ້ສັງຄົມທົ່ວເມືອງຊານໄຊໄດ້ຮັບຮູ້ເຂົ້າໃຈຢ່າງທົ່ວເຖິງ ເລິກເຊິ່ງ ເພື່ອຫຼີກລ້ຽງບໍ່ໃຫ້ພະຍາດດັ່ງກ່າວມີການແຜ່ລະບາດໃນຊ້ວງໄລຍະສະເຫຼີມ ສະຫຼອງປີໃໝ່ສາກົນນີ້.
ໃນໂອກາດສົ່ງທ້າຍປີເກົ່າ ຄສ 2021 ແລະ ຕອນຮັບປີໃໝ່ສາກົນ ຄສ 2022 ອີກເເທື່ອໜຶງ ຂ້າພະເຈົ້າຕ່າງໜ້າໃຫ້ຄະນະພັກ ອໍານາດການປົກຄອງເມືອງຊານໄຊ ກໍ່ຄືໃນນາມສ່ວນຕົວ ຂໍນໍາເອົາຄວາມຢືດຢາມຖາມຂ່າວອັນອົບອຸ່ນ, ຄວາມສາມັກຄີໄມຕີຈິດອັນສະໜິດສະໜົມ ແລະ ຄວາມເບີກບານມ່ວນຊື່ນອັນຄຶກຄືນຈາກການນໍາຂອງເມືອງມາຍັງອົງການຈັດຕັ້ງພັກ-ລັດ ແລະ ອົງການຈັດຕັ້ງສັງຄົມ ຕະຫຼອດຮອດພໍ່ແມ່ປະຊາຊົນບັນດາເຜົ່າຊາວເມືອງຊານໄຊໃນທຸກແຫ່ງຫົນ ໂດຍຜ່ານລະບົບອ່ອນລາຍນີ້ ແລະ ຂໍຖືໂອກາດນີ້ ສົ່ງສານອວຍພອນປີໃໝ່ສາກົນ ມາຍັງ ອົງການຈັດຕັ້ງພັກ-ລັດ ທຸກຂັ້ນ, ບັນດາທ່ານພະນັກງານລັດຖະກອນ ທະຫານ ຕໍາຫຼວດ ແພດໝໍ, ນັກຮຽນຮູ້ປັນຍາຊົນທຸກຊັ້ນຄົນ ຕະຫຼອດຮອດພະນັກງານອາວຸໂສບໍານານ ແລະ ພໍ່ແມ່ປະຊາຊົນບັນດາເຜົ່າທຸກທົ່ວໜ້າ, ບັນດາບໍລິສັດນັກທຸລະກິດ ທັງພາກລັດ ແລະ ເອກະຊົນທີ່ພວມດໍາເນີນກິດຈະການຕ່າງໆພາຍໃນເມືອງຊານໄຊ ສິງໃດທີ່ເກີດຂື້ນມາລະດ້ວຍວ່າຈາ ຫຼື ການທໍາ ໂດຍຕັ້ງໃຈ ແລະ ບໍ່ຕັ້ງໃຈ ຂອງຄະນະພັກ ອໍານາດການປົກຄອງ ຕະຫຼອດຮອດພະນັກງານ ຈະເປັນບຸກຄົນ ຫຼື ການຈັດຕັ້ງ, ຕໍ່ພໍ່ແມ່ປະຊາຊົນບັນດາເຜົ່າຊາວເມືອງຊານໄຊ ແລະ ຜູ້ປະກອບການທັງຫຼາຍ ໃນໄລຍະຜ່ານມາ ຂໍໃຫ້ຫຼົງໄຫຼໄປນໍາປີເກົ່າ ແລະ ຖືເປັນບົດຮຽນອັນລໍ່າຄ່າໃນປີໃໝ່ວຽນມາຮອດແລ້ວ ຂໍໃຫ້ທຸກພາກສ່ວນມີສຸຂະພາບເຂັ້ມແຂງ ແຮງກ້າ ພ້ອມກັນສ້າງສາພັດທະນາເມືອງຊານໄຊໃຫ້ຈະເລີນຮຸ່ງເຮືອງ ປີໃໝ່ ຟ້າໃໝ່ຂໍໃຫ້ທຸກຄົນໃຫ້ໄດ້ຮັບໄຊຊະນະອັນໃໝ່ຍິ່ງໃຫຍ່ກວ່າເກົ່າ ການສະເຫຼີມສະຫຼອງປີໃໝ່ຂໍໃຫ້ທຸກຄົນປອດໄພທຸກປະການເຖີ້ນ! ປີໃໝ່ສາກົນ ຄສ 2022 ໝັ້ນຍືນ! ປະຊົນບັນດາເຜົ່າຊາວເມືອງຊານໄຊ ໝັ້ນຍືນ
ຂໍຂອບໃຈ

ໂດຍ: ນັກຂ່າວຫ້ອງວ່າການເມືອງ ຊານໄຊ

28/12/2021

ທ່ານ ເຈົ້າເມືອງໆ ຊານໄຊ ແລະ ຂະແໜງການອ້ອມຂ້າງເມືອງ ເຂົ້າຮ່ວມກອງປະຊຸມ ອົງການປົກຄອງແຂວງ ປະຈໍາງວດ IV ປີ 2021.
---------------------
ວັນທີ 27-28 ທັນວາ 2021ນີ້, ແຂວງ ອັດຕະປືໄດ້ຈັດກອງປະຊຸມ ອົງການປົກຄອງແຂວງ ງວດທີ IV ປະຈຳປີ 2021 ( ຜ່ານລະບົບກອງປະຊຸມທາງໄກ ) ໂດຍການເປັນປະທານຂອງທານ ເລັດ ໄຊຍະພອນ ກຳມະການ ສູນກາງພັກ, ເລຂາພັກແຂວງ ເຈົ້າແຂວງໆ ອັດຕະປື, ມີບັນດາທ່ານສະມາຊິກອົງການ ປົກຄອງແຂວງ ແລະ ແຂກ ທີ່ຖືກເຊີນ ຈາກສະພາປະຊາຊົນ ແຂວງ, ພະແນກການ, ອົງການທຽບເທົ່າ ພະແນກການ, ຫ້ອງການ, ລັດວິສາຫະກິດ ອອ້ມຂ້າງແຂວງ ແລະ 5 ເມືອງ ເຂົ້າຮ່ວມ.
ກອງປະຊຸມດຳເນີນເປັນເວລາ 2​ ວັນ​ເຕັມ ເຊິ່ງຜູ້ເຂົ້າຮ່ວມຈະໄດ້ຮັບຟັງການສະຫຼຸບລາຍງານຫລາຍເອກະສານສໍາຄັນເຊັ່ນ: ລາຍງານຜົນຂອງການຈັດຕັ້ງປະຕິບັດມະຕິກອງປະຊຸມອົງການປົກຄອງແຂວງໃນໄລຍະ 1 ປີ 2021 ແລະ ທິດທາງແຜນປີ 2022. ບົດສະຫຼຸບການຈັດຕັ້ງການນພັດທະນເສດຖະກິດ-ສັງຄົມຂອງແຂວງປະຈຳປີ 2021 ແລະ ທິດທາງແຜນປີ 2022. ລາຍງານການຈັດຕັ້ງປະຕິບັດວຽກງານການຈັດເກັບລາຍຮັບ ແລະ ຄຸ້ມຄອງລາຍຈ່າຍງົບປະມານ ແລະ ລາຍງານການຈັດຕັ້ງປະຕິບັດການເກັບກູ້ໜີ້ສີນແກ່ຍາວ-ຄຸມເຄືອຂອງແຂວງ ປີ 2021 ແລະ ທິດທາງແຜນການປີ 2022. ລາຍງານການຈັດຕັ້ງປະຕິບັດວຽກງານສຳຫຼວດ, ຂື້ນສຳມະໂນຕອນດີນ, ອອກໃບຕາດີນ, ຈັດສັນທີ່ດີນ, ການວາງແຜນນຳໃຊ້ທີ່ດີນທົ່ວແຂວງ, ການວາງແຜນການນຳໄຊ້ທີ່ດີນເຂດໄຟພິບັດເມືອງສະໜາມໄຊ ແລະ ການຄຸ້ມຄອງ, ການກວດກາດ້ານສິ່ງແວດລ້ອມປະຈຳປີ 2021 ແລະ ທິດທາງແຜນການ ປີ 2022. ລາຍງານການຈັດຕັ້ງປະຕິບັດວຽກງານກະສີກຳ ( ການປູກ, ການລ້ຽງ ) ປະຈໍາປີ 2021 ແລະ ທິດທາງແຜນປີ 2022.ລາຍງານຮ່າງຂໍ້ຕົກລົງຂອງເຈົ້າແຂວງ 2 ສະບັບວ່າດ້ວຍການສ້າງຕັ້ງ ແລະ ກິດຈະການຟາມລ້ຽງສັດ ແລະ ຮ່າງຂໍ້ຕົກລົງຄຸ້ມຄອງການນຳໃຊ້ຢາປາບສັດຕູຟຶດ.ລາຍງານກ່ຽວກັບສະພາບການຄຸ້ມຄອງ, ການຕິດຕາມ ແລະ ການກວດກາດ້ານວຽກງານທໍລະນີສາດ ແລະ ບໍ່ແຮ່ ປະຈຳປີ 2021 ແລະ ທິດທາງແຜນການປີ 2022. ລາຍງານວຽກງານການຊູກຍູ້ສົ່ງເສີມການລົງທືນໃນດ້ານອຸດສະຫາກຳ ທີ່ມີທ່າແຮງ ແລະ ຕະຫຼາດຮອງຮັບຈາກພາຍໃນ ແລະ ຕ່າງປະເທດ. ລາຍງານການຈັດຕັ້ງປະຕິບັດວຽກງານການສ້າງກົນໄກໃນການຄຸ້ມຄອງລາຄາສີນຄ້າພາຍໃນແຂວງອັດຕະປື ປະຈຳປີ 2021 ແລະ ທິດທາງແຜນການປີ 2022.

14/12/2021

ເມືອງຊານໄຊ ລະດົມທຶນຊ່ວຍສ້າງສະໂມສອນ ໂຮງຮຽນ ມສ ນ້ຳງອນ.
==================================
ໃນວັນທີ 10 ທັນວາ 2021 ເມືອງຊານໄຊ ແຂວງອັດຕະປື ໄດ້ຈັດພິທີລະດົມທຶນສົມທົບສ້າງສະໂມສອນໂຮງຮຽນ ມສ ນ້ຳງອນ ເຊິ່ງພິທີດັ່ງກ່າວໄດ້ຈັດຂຶ້ນຢູ່ໂຮງຮຽນ ມສ ນ້ຳງອນ, ໃຫ້ກຽດເຂົ້າຮ່ວມໂດຍ ທ່ານ ສູວັນສີ ແກ້ວວີເສີດ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງຊານໄຊ ພ້ອມດ້ວຍຄະນະປະຈຳພັກເມືອງ, ກຳມະການພັກເມືອງ, ພາກສ່ວນນັກທຸລະກິດຜູ້ປະກອບການ, ພະນັກງານລັດຖະກອນຫ້ອງວ່າການເມືອງ , ຄູອາຈານ ແລະ ນ້ອງນັກຮຽນ, ອົງການຈັດຕັ້ງຂັ້ນກຸ່ມບ້ານແລະບ້ານເຂົ້າຮ່ວມ, ການລະດົມທຶນຄັ້ງນີ້ກໍ່ແມ່ນອີງໃສ່ຄວາມເປັນເອກະພາບຂອງຄະນະພັກຄະນະປະຈຳ ແລະ ພາກສ່ວນກ່ຽວຂ້ອງ ເພື່ອເຮັດໃຫ້ການກໍ່ສ້າງສະໂມສອນດັ່ງກ່າວໄດ້ສືບຕໍ່ຈັດຕັ້ງປະຕິບັດ.
ທ່ານ ວັນທະລາ ໄຊຍະແສງ ເລຂາໜ່ວຍພັກ ອຳນວຍການໂຮງຮຽນ ມສ ນ້ຳງອນ ໄດ້ລາຍງານວ່າ: ສະໂມສອນໂຮງຮຽນ ມສ ນ້ຳງອນສ້າງຂຶ້ນໃນໄລຍະ ເດືອນເມສາ ປີ 2020 ເຊິ່ງເຮັດດ້ວຍໄມ້ ແລະ ມຸງດ້ວຍສັງກະສີ ເນື່ອງຈາກມີຄວາມຈຳເປັນແລະຂາດເຂີນສະຖານທີ່ໃນການໃຊ້ເປັນບ່ອນເຕົ້າໂຮມ ແລະ ຜັນຂະຫຍາຍເອກະສານໃນວັນສຳຄັນຕ່າງ ແຕ່ບໍ່ສຳເລັດເນື່ອງຈາກສ້າງມາໄດ້ໄລຍະໜຶ່ງໄດ້ເກີດພາຍຸພັດເຮັດໃຫ້ສະໂມສອນດັ່ງກ່າວເປ່ເພ ແລະ ຂາດເຂີນງົບປະມານໃນການສືບຕໍ່ກໍ່ສ້າງ.
ໃນພິທີ ຄະນະພັກຄະນະນຳຂອງເມືອງ, ນັກທຸລະກິດຜູ້ປະກອບການ, ພະນັກງານລັດຖະກອນ ແລະ ພາກສ່ວນກ່ຽວຂ້ອງໄດ້ຮ່ວມແຮງຮ່ວມໃຈ ມອບເງິນຊ່ວຍສົມທົບສ້າງ ແລະ ບ່ອນຕູ້ບໍລິຈາກ ເຊິ່ງສາມາດລະດົມທຶນໄດ້ທັງໝົດ ຈຳນວນ 13.300.000 ກີບ.
ທ່ານ ບົວລາ ພັນມີໄຊ ຄະນະປະຈຳພັກເມືອງ ຮອງເຈົ້າເມືອງ ຜູ້ຊີ້ນຳຂົງເຂດວັດທະນະທຳສັງຄົມ ໄດ້ກ່າວ ສະແດງຄວາມຂອບອົກຂອບໃຈມາຍັງຄະນະພັກ, ນັກທຸລະກິດຜູ້ປະກອບການ, ພະນັກງານລັດຖະກອນ ແລະ ພາກສ່ວນອື່ນໆ ທີ່ໄດ້ມີນ້ຳໃຈໃສສັດທາປະກອບສ່ວນສົມທົບທຶນຄັ້ງນີ້ ແລະ ເຊື່ອໝັ້ນວ່າການສົມທົບທຶນຄັ້ງນີ້ຈະເປັນການປະກອບສ່ວນອັນຍິ່ງໃຫຍ່ໃນການພັດທະນະວຽກງານການສຶກສາຂອງໂຮງຮຽນກໍ່ຄືຂອງເມືອງໃຫ້ດີຂຶ້ນກ່ວ່າເກົ່າ.
ພາບ-ຂ່າວໂດຍ: ກຸ່ມຂ່າວສານອອນລາຍຫ້ອງວ່າການເມືອງ.

07/12/2021

ຮອງເຈົ້າເມືອງ ລົງຊຸກຍູ້ວຽກຂົງເຂດກະສິກຳແລະປ່າໄມ້............
ວັນທີ7 ທັນວາ 2021 ທ່ານ ສາຍທະລາ ໂສທິດາ ກຳມະການພັກເມືອງ ຮອງເຈົ້າເມືອງ ຜູ້ຊີ້ນຳຂົງເຂດເສດຖະກິດ ພ້ອມດ້ວຍຄະນະ ໄດ້ລົງຊຸກຍູ້ວຽກງານຢູ່ຫ້ອງການກະສິກຳແລະປ່າໄມ້, ການລົງຊຸກຍູ້ວຽກງານຄັ້ງນີ້ແມ່ນປະຕິບັດຕາມ ບົດບັນທຶກກອງປະຊຸມອົງການປົກຄອງເມືອງ ເຊິ່ງມີ 11 ໜ້າວຽກຫຼັກທີ່ຈະຊຸກຍູ້ຢູ່ຂົງເຂດກະສິກຳແລະປ່າໄມ້ ຄື:
1. ວຽກການເກັບກຳຂໍ້ມູນ ຕາມດຳລັດ348/ລບ.
2. ການຄຸ້ມຄອງແລະນ້ຳໃຊ້ເງິນກອງທຶນພັດທະຍາຊົນນະບົດ.
3. ການຄວບຄຸມແລະປ້ອງກັນພະຍາດສັດລ້ຽງຕາມລະດູການ.
4. ການສ້າງກົດລະບຽບແລະຄວບຄຸມການປ່ອຍສັດລ້ຽງແບບຊະຊາຍ.
5. ໂຄງການກໍ່ສ້າງຝາຍນ້ຳລົ້ນນ້ຳປາແຫ່ງທີ2.
6. ວຽກການຄຸ້ມຄອງການປະມົງ.
7. ການຄຸ້ມຄອງແລະສະກັດກັ້ນການໃຊ້ເຄື່ອງມືຫາກິນຜິດກົດໝາຍ.
8. ການກະກຽມການຜະລິດລະດູແລ້ວ.
9. ການສະກັດກັ້ນການການຖາງປ່າເຮັດໄຮ່.
10. ການຈັດຊື້ງົວໃຫ້ເຂດວັງຕັດ.
11.ການກະກຽມວຽກກ້າເບ້ຍໄມ້ປະດັບ.
ໃນກອງປະຊຸມ ທ່ານ ສົມປະສິດ ຍັບຖາວອນ ກຳມະການພັກ ຫົວໜ້າຫ້ອງການກະສິກຳແລະປ່າໄມ້ ໄດ້ລາຍງານການຈັດຕັ້ງປະຕິບັດວຽກງານໃນໄລຍະຜ່ານມາ ຫຼັງຈາກນັ້ນບັນພາກສ່ວນທີ່ກ່ຽວຂ້ອງກໍ່ໄດ້ຜັດປ່ຽນກັນປະກອບຄຳເຫັນ.
ຕອນທ້າຍກອງປະຊຸມ ທ່ານ ສາຍທະລາ ໂສທິດາ ກຳມະການພັກເມືອງ ຮອງເຈົ້າເມືອງ ໄດ້ເນັ້ນຕໍ່ກອງປະຊຸມຕື່ມອີກ: ເຊິ່ງທ່ານໄດ້ກ່າວຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ແລະໃຫ້ບັນດາສະຫາຍພາຍໃນຫ້ອງການຍົກສູງຄວາມສາມັກຄີ ແລະ ສ້າງຄວາມເຂັ້ມແຂງທາງດ້ານວິຊາສະເພາະເພີ່ມຂຶ້ນຕື່ມ.

02/12/2021

ຊົມເຊີຍວັນຊາດ ທີ2 ທັນວາ ຄົບຮອບ 46ປີ ໝັ້ນຢືນ

29/11/2021