19/08/2026
! ໃນເຊົ້າວັນທີ 19 ສິງຫາ 2026 ທີ່ ຫ້ອງປະຊຸມທາງໄກ (ຊັ້ນ 3) ກະຊວງອຸດສາຫະກຳ ແລະ ການຄ້າ!.
ກົມການຄ້າພາຍໃນ(ກຄພນ), ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດກອງປະຊຸມຂຶ້ນ ໂດຍໄດ້ຮັບກຽດເປັນປະທານກອງປະຊຸມຄື: ທ່ານ ນາງ ວິໄລພອນ ຊິນດາວົງ, ຮອງຫົວໜ້າກົມການຄ້າພາຍໃນ, ມີບັນດາຜູ້ແທນຈາກຄະນະກົມ, ຫົວໜ້າພະແນກ, ຮອງຫົວໜ້າພະແນກ ຕາງໜ້າຈາກບັນດາກະຊວງ, ຂະແໜງການອ້ອມຂ້າງ, ຄະນະຮັບຜິດຊອບປັບປຸງກົດໝາຍ ແລະ ແຂກຜູ້ມີກຽດເຂົ້າຮ່ວມຢ່າງພ້ອມພຽງ. ໃນກອງປະຊຸມ ທ່ານປະທານກອງປະຊຸມ ໄດ້ຍົກໃຫ້ເຫັນເຖິງຄວາມຈຳເປັນຮີບດ່ວນ ໃນການທົບທວນ ແລະ ປັບປຸງກົດໝາຍ ວ່າດ້ວຍການປົກປ້ອງຜູ້ຊົມໃຊ້ ສະບັບເລກທີ 02/ສພຊ, ລົງວັນທີ 30 ມິຖຸນາ 2010 ເຊິ່ງໄດ້ຈັດຕັ້ງປະຕິບັດມາເປັນເວລາ 16 ປີ. ໃນໄລຍະຜ່ານມາ, ສະພາບເສດຖະກິດ-ສັງຄົມຂອງ ສປປ ລາວ ໄດ້ມີການຂະຫຍາຍຕົວຢ່າງໄວວາ, ໂດຍສະເພາະການເຕີບໂຕຂອງການຄ້າທາງເອເລັກໂຕຣນິກ (E-commerce), ທຸລະກຳດິຈິຕ໋ອນ ແລະ ການຄ້າຂ້າມແດນ. ເຖິງຢ່າງໃດກໍດີ, ກົດໝາຍສະບັບປັດຈຸບັນ ເຫັນວ່າຍັງບໍ່ທັນມີບົດບັນຍັດສະເພາະເພື່ອຄຸ້ມຄອງ ແລະ ປົກປ້ອງຜູ້ຊົມໃຊ້ໃນຂົງເຂດດັ່ງກ່າວໃຫ້ຄວບຄຸມ, ທັງຍັງຂາດກົນໄກທີ່ຊັດເຈນກ່ຽວກັບການປົກປ້ອງກຸ່ມຄົນບອບບາງ, ມາດຕະການປັບໃໝ, ການເອີ້ນຄືນສິນຄ້າ ແລະ ຄວາມປອດໄພຂອງຜະລິດຕະພັນ. ນອກຈາກນີ້, ປະທານກອງປະຊຸມ ຍັງໄດ້ເນັ້ນເຖິງສິ່ງທ້າທາຍ ແລະ ຄວາມສ່ຽງໃໝ່ໆ ໃນຍຸກດິຈິຕ໋ອນ ເປັນຕົ້ນແມ່ນ ການສໍ້ໂກງອອນລາຍ, ການໂຄສະນາຂາຍສິນຄ້າເກີນຄວາມຈິງ, ການຈຳໜ່າຍສິນຄ້າບໍ່ມີມາດຕະຖານ, ການລະເມີດຂໍ້ມູນສ່ວນບຸກຄົນ ເຊິ່ງບັນຫາເຫຼົ່ານີ້ ຮຽກຮ້ອງໃຫ້ຕ້ອງມີການປັບປຸງນິຕິກຳໃຫ້ສອດຄ່ອງກັບຄວາມເປັນຈິງ, ເປັນເອກະພາບກັບກົດໝາຍອື່ນໆ ແລະ ທັນກັບມາດຕະຖານຂອງອາຊຽນ ແລະ ສາກົນ. ການປັບປຸງກົດໝາຍຄັ້ງນີ້ ແມ່ນດຳເນີນຕາມແຜນການສ້າງ ແລະ ປັບປຸງກົດໝາຍ ໄລຍະ 2026-2030 ຂອງຄະນະປະຈຳສະພາແຫ່ງຊາດ ເພື່ອຮັບປະກັນໃຫ້ຮ່າງກົດໝາຍສະບັບໃໝ່ ມີຄວາມຮັດກຸມ, ຈະແຈ້ງ ແລະ ສາມາດສ້າງສະພາບແວດລ້ອມການຄ້າທີ່ເປັນທຳ, ສົ່ງເສີມການແຂ່ງຂັນທີ່ໂປ່ງໃສ, ພ້ອມທັງສ້າງຄວາມເຊື່ອໝັ້ນໃຫ້ແກ່ຜູ້ລົງທຶນ ແລະ ຜູ້ປະກອບການ. ເພື່ອໃຫ້ການປັບປຸງກົດໝາຍສອດຄ່ອງຕາມຫຼັກການການປະຕິບັດລະບຽບການທີ່ດີ (Good Regulatory Practice - GRP), ກອງປະຊຸມໄດ້ຄົ້ນຄວ້າ 3 ເນື້ອໃນຫຼັກ ເຊິ່ງປະກອບມີ:
1. ການສະເໜີ ບົດທົບທວນຄືນ ກົດໝາຍ ວ່າດ້ວຍ ການປົກປ້ອງຜູ້ຊົມໃຊ້ ຂອງ ສປປ ລາວ ແລະ ບົດຮຽນຂອງສາກົນ: ສະເໜີໂດຍ ທ່ານ ເອກຕິສັກ ອຸດົມຮັກ, ເຊິ່ງໄດ້ຍົກໃຫ້ເຫັນພາບລວມການຈັດຕັ້ງປະຕິບັດກົດໝາຍ ໂດຍນຳໃຊ້ເຄື່ອງມືການທົບທວນຄືນຫຼັງການຈັດຕັ້ງປະຕິບັດ, ພ້ອມທັງຖອດຖອນບົດຮຽນຈາກອົງການປົກປ້ອງຜູ້ຊົມໃຊ້ສາກົນ ເຊັ່ນ: ACCC ຂອງອົດສະຕຣາລີ ແລະ ASEAN_UK ໃນແຜນງານ Economic Integration Programme (EIP) ຂອງສະຫະລາຊະອານາຈັກ.
2. ການສະເໜີ ບົດປະເມີນຜົນກະທົບ ກົດໝາຍ ວ່າດ້ວຍການປົກປ້ອງຜູ້ຊົມໃຊ້ (Regulatory Impact Assessment - RIA): ສະເໜີໂດຍ ທ່ານ ແພງ ວິໄລສັກ, ຕາງຫນ້າພະແນກປົກປ້ອງຜູ້ຊົມໃຊ້, ເຊິ່ງໄດ້ວິເຄາະຜົນກະທົບທາງດ້ານເສດຖະກິດ, ສັງຄົມ ແລະ ການບັງຄັບໃຊ້ກົດໝາຍ ເພື່ອຊີ້ໃຫ້ເຫັນຊ່ອງວ່າງ ແລະ ປະເດັນສຳຄັນທີ່ຕ້ອງໄດ້ຮັບການປັບປຸງ.
3. ການສະເໜີ (ຮ່າງ) ແຜນວຽກໃນການຈັດຕັ້ງປະຕິບັດການປັບປຸງກົດໝາຍ: ສະເໜີໂດຍ ທ່ານ ນາງ ສຸກອາລຸນ ອິນທະວອນ, ຮອງຫົວໜ້າພະແນກປົກປ້ອງຜູ້ຊົມໃຊ້, ເຊິ່ງໄດ້ວາງກອບເວລາ, ຂັ້ນຕອນ ແລະ ກິດຈະກຳຈຸດສຸມ ເພື່ອໃຫ້ການດຳເນີນງານເປັນໄປຕາມຄາດໝາຍທີ່ວາງໄວ້.
ໃນຕອນທ້າຍ, ທ່ານ ປະທານກອງປະຊຸມ ໄດ້ຮຽກຮ້ອງໃຫ້ຜູ້ເຂົ້າຮ່ວມທຸກທ່ານ ສຸມໃສ່ປະກອບຄຳຄິດຄຳເຫັນຢ່າງກົງໄປກົງມາ ແລະ ສ້າງສັນ, ໂດຍສະເພາະການແກ້ໄຂອຸປະສັກໃນການບັງຄັບໃຊ້ກົດໝາຍ, ກົນໄກການແກ້ໄຂຄຳຮ້ອງຮຽນ, ການໄກ່ເກ່ຍຂໍ້ພິພາດທາງດິຈິຕ໋ອນ, ການເພີ່ມປະສິດທິພາບຂອງ ແອັບພລິເຄຊັນປົກປ້ອງຜູ້ຊົມໃຊ້ (Consumer Complaint App), ເພື່ອໃຫ້ທີມງານວິຊາການສັງລວມເອົາຂໍ້ສະເໜີແນະໄປປັບປຸງຮ່າງກົດໝາຍໃຫ້ມີຄວາມສົມບູນແບບ ແລະ ມາດຕະຖານສູງສຸດ.
