لا مسلم ولا مسيحي، لا سنّي ولا شيعي، كلنا لبنانية ولا للطائفية

من حقّك تعبّر عن حقّك ولكن بكل حضارة ، من وين ما كنت ومين ما كنت

وواجبنا تجاه بعضنا إنّو نسمع بعضنا بكل أخلاق تنتحاور بكل أدب

وتذكروا عطول إنّو بوحدتنا وطننا أقوى ونحنا أقوى ، وهيدا هدفنا الأوّل

والأخير ، فنحنا هالشباب اللبناني بنرفض التعصّب لدين أو لمذهب أو لحزب

أو لتيار أو لمنطقة أو لأي شي آخر سِوى حُبنا لبعضنا ولوطننا لبـــنـا ن

وبنرفض مفاهيم الكراهية بأعذار طائفية ومذهبية ، نحنا بدنا وحدِتنا

ومحبّتنا الدايمة لبعضنا البعض وعدم التعصب أوالكراهية أو الحقد لأي

سبب اللي كان ، الرحمة والمحبة والتسامح والوحدة هنّي عنواننا



نحنا فعليّا ً مع إلغاء الطائفية والمذهبية والتعصّب من النفوس أوّلا ً وما

بيمنع نطالب بإلغاءها من الدستور والقوانين المدنية وخصوصا ً بالصورة

السياسية الموجودة اليوم... وللتوضيح نحنا مش مع إلغاء الطوايف أو

المذاهب أبدا ً، ولا مع إلغاء دورهم ولا حتّى التعدّي عليهم بمصطلحات

الزواج المدني أو المطالبة بإسقاط الرموز السياسيين على سبيل المتال

أوما شابه أبدا ً... نحنا بس مع دمج الطوايف وتوحيدها وجمعها تحت الهدف

والشعار اللي انوجدت من أجلو وهوّي الوحدة والرّحمة والمحبّة والتسامُح

فيا أعضاء هل المجموعة ، أنتو هون "حركة تصحيحية بإسقاط الطائفية"



من وقت ما وعينا عهل الدني وبنسمع بالدستور اللبناني ، إنّو مقدّس، بس

لحد هل اللحظة مش فهمانين شو اللي قدّسو الزمان ، لا هو تورات ولا

هو إنجيل ولا هو قرآن ومنّو كتاب سماوي، اللي بدنا نقولوا ، أقدس من

دستور وملحقاتو ، نحنا الشباب ، كل الشباب من كل الإنتماءات ، نحنا

المقدّسين وحياتنا المقدّسة ، واللي بنشوف في مصلحة لإلنا وللأجيال

اللي جايي من بعدنا رح نساوي بإذن الله إيد بإيد ، نحنا بنرفض التمييز بين

اللبنانيين ، وبنرفض الطائفية اللي ورّثتنا تاريخ أسود مليان حروب

وظلم للجميع ، ونحنا بنرفض المذهبية ونارها ، نحنا بدنا نكون

لبنانية ، لبنانية وبس ، وكل مين يعبد ربّو بالطريقة اللي بشوفها

مناسبة ، ومش غلط نتحاور بالدين أبدا ً ولكن بحضارة وما ننسى المثل اللي

بقول ، كل مين عدينو الله يعينو ... نحنا شعب بدنا نعيش بمحبّة ، بدنا

نعيش برحمة ، بدنا نكون كلنا أهل وإخوة ، شعب واحد موحّد عزيز بوحدتو ،

بدنا نتخلص من الطائفية ومن المذهبية ومن التعصب الجاهل الأعمى ومن

الحقد والكراهية ، وهيدي المهمة الظاهر إنها ما رح تتحقّق غير بتصحيح

او تغيير النظام الطائفي ، نظام التفرقة بين اللبنانيين ، وين المشكل

إذا إجا الإيدمي وحكم ، أو استلم وزارة أو رئاسة أو أو...نحنا بدنا مين يشتغل

للشعب شو ما كان دينو وشو ما كان لونو ، وما يميّز بين اللبنانيّين ولا يفرّق...

بتمنى نوصل للوعي المطلوب ، كلنا كشباب لبنان ، ونجمع بعضنا إيد بإيد

تحت شعار ""وحدتنا مقدّسة"".