24/06/2026
முஹர்ரம் மாதத்தின் 9 மற்றும் 10 ஆகிய நாட்களில் நோற்கப்படும் நோன்புகள் (தாசூரா மற்றும் ஆஷூரா) இஸ்லாத்தில் மிகுந்த முக்கியத்துவமும் சிறப்பும் வாய்ந்தவை.
1. முஹர்ரம் மாதத்தின் பொதுவான சிறப்பு
முஹர்ரம் மாதம் என்பது அல்லாஹ்வினால் கண்ணியப்படுத்தப்பட்ட நான்கு புனித மாதங்களில் ஒன்றாகும்.
நபிகள் நாயகம் (ஸல்லல்லாஹு அலைஹி வஸல்லம்) அவர்கள் கூறினார்கள்:
"ரமலான் மாதத்திற்குப் பின் நோற்கப்படும் நோன்புகளில் மிகச் சிறந்தது அல்லாஹ்வின் மாதமாகிய முஹர்ரம் மாதத்தின் நோன்பாகும்." (நூல்: முஸ்லிம்)
2. ஆஷூரா (பிறை 10) நோன்பின் சிறப்பு
முஹர்ரம் 10-ம் நாள் 'ஆஷூரா' என்று அழைக்கப்படுகிறது. சரித்திர முக்கியத்துவம் வாய்ந்த இந்நாளில் தான் மூஸா (அலை) அவர்களையும் அவர்களது சமூகத்தினரையும் அல்லாஹ் ஃபிர்அவ்னிடமிருந்து காப்பாற்றினான்.
முந்தைய பாவங்கள் மன்னிக்கப்படுதல்: ஆஷூரா நாளில் நோன்பு நோற்பதால், அதற்கு முந்தைய ஓராண்டு பாவங்கள் மன்னிக்கப்படும் என நபிகளார் நன்மாராயம் கூறியுள்ளார்கள்.
நன்றியுணர்வு: மூஸா (அலை) அவர்கள் அல்லாஹ்வுக்கு நன்றி செலுத்தும் விதமாக இந்நாளில் நோன்பு நோற்றார்கள். அவர்களைப் பின்பற்றி நாமும் இந்நாளில் நோன்பு நோற்கிறோம்.
3. தாசூஆ (பிறை 9) நோன்பின் முக்கியத்துவம்
யூதர்களும் ஆஷூரா (பிறை 10) நாளில் நோன்பு நோற்பதைக் கண்ட நபிகள் நாயகம் (ஸல்லல்லாஹு அலைஹி வஸல்லம்) அவர்கள், அவர்களுக்கு மாறுசெய்யும் விதமாக மற்றொரு நோன்பையும் சேர்த்து நோற்க விரும்பினார்கள்.
நபிகள் நாயகம் (ஸல்லல்லாஹு அலைஹி வஸல்லம்) அவர்கள் கூறினார்கள்:
"நான் அடுத்த ஆண்டு உயிரோடு இருந்தால், நிச்சயமாக (முஹர்ரம்) ஒன்பதாவது நாளிலும் நோன்பு நோற்பேன்." (நூல்: முஸ்லிம்)
எனவே தான், யூதர்களின் கலாச்சாரத்திற்கு மாறுசெய்யும் விதமாக பிறை 9 மற்றும் பிறை 10 ஆகிய இரு நாட்களும் (வியாழன் மற்றும் வெள்ளி) சேர்த்து நோன்பு நோற்பது சுன்னத்தாகும். (இயலாதவர்கள் பிறை 10 மற்றும் 11 ஆகிய நாட்களிலும் நோற்கலாம்).
