02/09/2026
බුද්ධශාසන සභාව රැස්වෙයි
ශ්රී ලංකාවේ සම්බුද්ධ ශාසනයේ සුරක්ෂිතතාව සහ උන්නතිය වෙනුවෙන්, සියලු නිකායන් නියෝජනය වන පරිදි පිහිටුවා ඇති “බුද්ධශාසන සභාව” සැප්තැම්බර් 01 දින බුද්ධශාසන අමාත්යාංශයේදී රැස්විය.
පූජනීය මහා සංඝරත්නයේ පූර්ණ මැදිහත්වීමෙන් පැවති මෙම හමුවේදී ශාසනික හා ජාතික වැදගත්කමකින් යුත් ප්රධාන කරුණු රැසක් පිළිබඳව අවධානය යොමු කෙරිණි.
බුද්ධශාසන, ආගමික සහ සංස්කෘතික කටයුතු අමාත්ය ආචාර්ය හිනිදුම සුනිල් සෙනෙවි මහතාගේ සහ අමාත්යාංශ ලේකම් ප්රින්ස් සේනාධිර මහතාගේ මූලිකත්වයෙන් පැවති මෙම හමුවේදී පසුගිය කාලය තුළ සිදුකළ කටයුතු සමාලෝචනය කිරීම සහ ඉදිරි වැඩකටයුතු පිළිබඳව සාකච්ඡා කිරීම සිදුකෙරිණි. අමාත්යවරයාගේ පෞද්ගලික ලේකම් අනිල් අබේගුණවර්ධන මහතා ද මෙම අවස්ථාවට එක්විය.
ජාතික නැකත් කමිටුව විසින් සම්පාදනය කරන ලද 2027 සිංහල අලුත් අවුරුදු නැකත් සීට්ටුව පූජනීය මහා සංඝරත්නය වෙත පිළිගැන්වීම පළමුවෙන්ම සිදුකෙරිණි.
එමෙන්ම, දිට්වා සුළි කුණාටුව හේතුවෙන් ආපදාවට ලක්වූ විහාරස්ථාන ප්රතිසංස්කරණය කිරීම සඳහා ක්රියාත්මක “අධිෂ්ඨානයේ සංහිඳ” ජාතික වැඩසටහනේ ප්රගතිය විමසා බැලීම සහ යතිවර මාපිය නිවහන වැඩසටහනේ ප්රගතිය සමාලෝචනය කිරීම ඇතුළු කරුණු රැසක් පිළිබඳව මෙහිදී සාකච්ඡා විය.
විශේෂයෙන්ම, බෞද්ධ කටයුතු දෙපාර්තමේන්තුවේ නිල වෙබ් අඩවිය යාවත්කාලීන කිරීම සහ භික්ෂූන් වහන්සේලා ලියාපදිංචි කිරීම සම්බන්ධයෙන් පැහැදිලි කිරීම් සිදුකෙරිණි.
තවද, දහසක් පුරාවිද්යා ස්ථාන සංරක්ෂණය කිරීම සඳහා ක්රියාත්මක “උරුමයට ජීවයක්” වැඩසටහන පිළිබඳව පැහැදිලි කිරීමක් ද සිදුකෙරිණි. උසස් ප්රමිතියකින් සහ විනයානුකූල ප්රතිපත්තිවලට අනුකූලව අටපිරිකර සැකසීම සම්බන්ධයෙන් අදහස් හා යෝජනා ඉදිරිපත් කිරීම ඇතුළු සුවිශේෂ කරුණු රැසක් ද මෙහිදී සාකච්ඡාවට බඳුන් විය.
ගෞරවනීය මහා සංඝරත්නය ඇතුළු සියලුම ආගමික පූජ්ය උතුමන් උදෙසා ක්රියාත්මක “දිවියට සුවයක් දහමට සවියක්” ජාතික වැඩසටහනේ ප්රගතිය පිළිබඳව ද මෙහිදී කරුණු ඉදිරිපත් කෙරිණි.
එමෙන්ම, මහා සංඝරත්නය මුහුණපාන කාලීන ගැටලු සහ විවිධ අභියෝග පිළිබඳව ගෞරවනීය මහා සංඝරත්නය විසින් කරුණු පෙන්වා දෙන ලදී. ඒ සම්බන්ධයෙන් ගත හැකි රාජ්ය මැදිහත්වීම් පිළිබඳව අමාත්යාංශ ලේකම්වරයා සහ අමාත්යවරයා විසින් පැහැදිලි කිරීම් සිදුකරන ලදී.
