04/09/2026
බලහත්කාරයෙන් වැඩ ගැනීම වැළැක්වීම පිළිබඳ දැනුවත් කිරීමේ වැඩසටහන් මාලාවේ දෙවන වැඩසටහන ඇල්පිටියේ දී
කම්කරු අමාත්‍යාංශයේ සහ කම්කරු දෙපාර්තමේන්තුවේ සහයෝගීතාවය යටතේ දකුණු පළාත ආවරණය කරමින් පවත්වනු ලබන බලහත්කාරයෙන් වැඩ ගැනීම වැළැක්වීම පිළිබඳ දැනුවත් කිරීමේ වැඩසටහන් මාලාවේ දෙවන වැඩසටහන 2026.09.02 වන දින පැවැත්විණි.
මෙම වැඩසටහන සඳහා ඇල්පිටිය ප්‍රදේශයේ කුඩා හා මධ්‍ය පරිමාණ පෞද්ගලික තේ වතු හිමියන් ඇතුළු කළමනාකාරීත්වයේ සමාජිකයින් සහභාගී වූ අතර දකුණු පළාතේ කුඩා හා මධ්‍ය පරිමාණ තේ වතු ආශ්‍රිතව රැකියාවේ නියුතු වතු කම්කරුවන් වෙනුවෙන් සුනිසි ශ්‍රම නියාමනය, බලහත්කාර ශ්‍රමය යනු කුමක්ද හා ඊට අදාළ නීතිමය තත්ත්වය පිළිබඳව මෙහිදී දැනුවත් කෙරිණි. විශේෂයෙන්ම කුඩා හා මධ්‍යම පරිමාණ වතු කේෂ්ත්‍රය තුළ බලහත්කාර ශ්‍රමය ලෙස පැවැතිය හැකි සේවකයන්ගේ හැඳුනුම්පත් භාරයට ගෙන තබා ගැනීම, සේවකයන්ගේ මුල් සහතික රඳවා තබා ගැනීම, සේවකයන්ගේ ගමන් බිමන් සීමා කිරීම, බිය හෝ විකල්ප නොමැතිකම හේතුවෙන් සේවකයින්ට රැඳී සිටීමට බල කෙරෙන තත්වයක් රැකියාව තුළ නිර්මාණය කිරීම, වැඩකරන වේලාව අධික ලෙස දීර්ඝ කිරීම ආදී තත්ත්වයන් දැක්විය හැකිය.
ඊට අමතරව, ළමා ශ්‍රමය පිටු දැකීම, මූලික කම්කරු නීති පිලිබඳ දැනුම, සේවාස්ථානය තුල වෘත්තීය සුරක්ෂිතතාවය හා සෞඛ්‍යය යන ක්ෂේත්‍රයන් පිළිබඳවද දැනුවත් කිරීම් සිදු කරන ලදී.
මෙම වැඩසටහනේ සමාරම්භක අවස්ථාව සඳහා කම්කරු නියෝජ්‍ය අමාත්‍ය ගරු මහින්ද ජයසිංහ මහතා සහභාගී වූ අතර සභාව අමතමින් ඒ මහතා සඳහන් කලේ ශ්‍රී ලංකාව තුළ බලහත්කාරයෙන් වැඩ ගැනීම හා ළමා ශ්‍රමය තුරන් කරලීම සඳහා ශ්‍රී ලංකා රජය විසින් අවශ්‍ය සෑම පියවරක්ම ගනිමින් සිටින බවයි.
මෙම වැඩසටහන හා සම්බන්ධ වෙමින් ජාත්‍යන්තර කම්කරු සංවිධානයේ ශ්‍රි ලංකාව හා මාලදියින කාර්යාලයේ නේවාසික අධ්‍යක්ෂ ජෝනි සිම්සන් මහත්මිය විසින් බලහත්කාරයෙන් වැඩ ගැනීම හා ළමා ශ්‍රමය තුරන් කරලීම සම්බන්ධයෙන් ශ්‍රී ලංකාව අත්කරගෙන ඇති ප්‍රගතිය පැසසුමට ලක් කළාය.
මෙම අවස්ථාවට කම්කරු අමාත්‍යාංශයේ ලේකම් එස්.එම්.පියතිස්ස මහතා, කම්කරු කොමසාරිස් ජනරාල් එම්.ඩී.එන්.කේ වටලියද්ද මහත්මිය ඇතුළු කම්කරු දෙපාර්තමේන්තුවේ නිලධාරීන් සහභාගී විය.
මෙම දැනුවත් කිරීමේ වැඩසටහන් මගින් බලහත්කාරයෙන් වැඩ ගැනීමේ අවදානම් හඳුනා ගැනීම, වගකීම්සහගත රැකියා පිළිවෙත් අනුගමනය කිරීම සහ ප්‍රජාවන් තුළ බලහත්කාරී ශ්‍රමය වැළැක්වීම සඳහා දායක වීමට දිරිගැන්වීම අපේක්ෂා කරනු ලැබේ.
