20/10/2025
දකුණු පළාත තුළ අද (20) සිට Gov Pay හරහා රථවාහන දඩ මුදල් ගෙවීමේ අවස්ථාව සලසා දී තිබෙනවා.
රථවාහන දඩ මුදල් ගෙවීමේ පහසුකම මේ වන විට බස්නාහිර පළාත සහ දකුණු පළාත ආවරණය කර ඇති බව ශ්රී ලංකා තොරතුරු හා සන්නිවේදන තාක්ෂණ නියෝජිතායතනයේ (ICTA) අධ්යක්ෂ මණ්ඩල සාමාජික හර්ෂ පුරසිංහ අද පැවැති මාධ්ය හමුවේදී කියා සිටියා.
දකුණු පළාත ආවරණය කිරීමේදී එම පළාත තුළ පිහිටි පොලිස් ස්ථාන වෙත ජංගම දුරකථන 400කට අධික ප්රමාණයක් ලබා දී ඇති බවත් ඔහු සඳහන් කළා.
ඉදිරියේදී මෙම ක්රමය උතුරු පළාත තුළ ක්රියාත්මක කිරීමට මේ වන විට සැලසුම් කර ඇති බවත් මේ වසර අවසානයට පෙර ලංකාව පුරා පිහිටි සියලුම පළාත් තුළ අන්තර්ජාලය හරහා රථවාහන දඩ මුදල් ගෙවීමේ පහසුකම ආවරණය කිරීමට බලාපොරොත්තු වන බවද ඔහු සඳහන් කර සිටියා.
ඉන් අනතුරුව මෙහි දෙවැනි අදියර ක්රියාත්මක කරන බවත් ඒ අනුව අකුසලතා ක්රමවේද හඳුන්වාදීමට පියවර ගන්නා බවත් පැවසූ ඒ මහතා මෙම ක්රියාවලිය සඳහා තැපැල් දෙපාර්තමේන්තුව සහ රථවාහන දෙපාර්තමේන්තුවද මෙම ක්රමවේදය හරහා සම්බන්ධ කිරීමට බලාපොරොත්තු වන බවද පැවසීය.
එමෙන්ම මෙම රථවාහන දඩමුදල් Gov Pay හරහා ගෙවීමේ ක්රියාවලියේදී වැඩිම දඩ මුදල් ප්රමාණයක් බස්නාහිර පළාතෙන් අය වී ඇති බවත් මේ වන විට රථවාහන වැරදි 20,000කට ආසන්න ප්රමාණයකින් රථවාහන දඩ මුදල් ලෙස රුපියල් මිලියන 30කට ආසන්න ප්රමාණයක් එකතු වී ඇති බවත් හර්ෂ පුරසිංහ මහතා සඳහන් කළා.
එමෙන්ම මෙම ක්රියාවලිය ආරම්භ වූ පසුගිය පෙබරවාරි මාසයේ සිට මේ දක්වා කාලය තුළ ආයතන 170ක් සම්බන්ධ වී ඇති බවත් රුපියල් මිලියන 400කට අධික ගෙවීම් මෙම Gov Pay පද්ධතිය හරහා නොයෙකුත් රාජ්ය ආයතනයන් වෙත ගෙවීම් සිදුකර ඇති බවත් ඔහු වැඩිදුරටත් කියා සිටියා.
