Sri Yasodara Maha Vidyalaya

10/08/2026

පාසලේ ක්‍රීඩා පුහුණුවීම්වල නිරත වන දූ දරුවන්ගේ ශාරීරික යෝග්‍යතාවය වැඩිදියුණු කිරීම උදෙසා වටිනා බර ඉසිලීමේ කට්ටලයක් පරිත්‍යාග කළ ඉන්දුල ජයසේකර මහතාට විදුහල්පතිතුමා ඇතුළු විද්‍යාලීය ප්‍රජාවගේ ගෞරවනීය ස්තූතිය…🙏💐

09/08/2026

" දෑතක මහිම" අත්කම් වැඩ මුළුව

"සඳකඩ පහනේ...
රූ ..සිරු වරුණේ....
දුටුවෙමි ඔබ ප්‍රතිභා ප්‍රභා...
සිහල කලාකරුවාණනේ
සිහල කලාකරුවාණනේ.."

මේ අප කුඩා කල ගුවන්විදුලියේ නිතර ප්‍රචාරය වූ ගීයක් ..

එය සඳකඩ පහණ වැනි විශිෂ්ට කලා නිර්මාණයක් කළ පුද්ගලයෙකුට කරන ගීතමය උපහාරයක් ...

එතකොට සිහල කලාව තිබුණේ ගල් කැටයම්වල පමණද ...
සැබවින්ම නැහැ....

කළු ගලකින්...මැටි පිඩකින් වගේම පොල් කොළයෙන්... තල් කොළයෙන් ... පන් පඳුරකින් ..,වේවැලකින් ..කොහු ලණුවෙන් මවන ලද මනස්කාන්ත නිර්මාණ අප දැක තිබෙනවා..... විශේෂයෙන්ම අප කුඩා කල ග්‍රාමීය නිවාස ආශ්‍රිතව මෙවැනි කර්මාන්ත පැවතුණා. තවද ලන්දේසි ජාතිකයන්ගෙන් ලැබුණ දායාදයක් වූ අසිරිමත් බීරළු රේන්ද ගෙතීම දකුණු පළාතේ කාන්තාවන් ගේ විනෝදාංශයක් බවට පත් වුණා.
මේ ග්‍රාමීය කර්මාන්ත මගින් කාන්තාවන් ව්‍යවසායිකාවන් බවට පරිවර්තනය කලා.

එහෙත් විවෘත ආර්ථිකය පැමිණීමත් සමඟම මුදල් සහ වෙළඳපොළ කටයුතු සම්පූර්ණයෙන්ම වෙනස් වුනා.
එහි ප්‍රතිඵලයක් විදිහට මෙවැනි දේශීය නිෂ්පාදනයන්ට තිබුණු ඉල්ලුම අඩුවී ගියා.
විශේෂයෙන්ම ඉතා අඩු මුදලකට චීනය වගේ රටවල් වලින් විවිධ නිෂ්පාදන ආනයනය කිරීමත් සමග අපේ දේශීය කර්මාන්ත පැරදුණා.
එහි ප්‍රතිඵලයක් විදිහට වර්තමාන දරුවන්ට මෙවැනි දේ දැක ගැනීම ඉතා අසීරුය .

මේ කලා නිර්මාණ අනාගත පරපුරට රැක ගැනීමේ කාර්යයට අතගසා උඩුගම් බලා පිහිනන්නට ජාතික ශිල්ප සභාව පෙරමුණ ගෙන තිබීම ඉතාම කාලෝචිතය. අගය කළ යුතුමය.

කවදත් අලුත් දේ සිතන... හරවත් යමක් දරුවන්ට දෙන්නට නිරතුරුව වෙහෙස වෙන මාලබේ ශ්‍රී යසෝදරා මහා විද්‍යාලයේ විද්‍යාලයේ වර්තමාන විදුහල්පතිතුමා වන W.P . සුජීව කුමාර මහතා මෙන්න මේ දුර්වල නිලය අල්ලාගෙන වෙදකමක් කරන්නට පසුගිය දිනයක කටයුතු කලා.
සිය ගුරු මණ්ඩලය නිසි පරිදි මෙහෙයවීමෙන්ද...
ජාතික ශිල්ප සභාවේ පුහුණු නිලධාරීන් හා ඒ ඒ විෂයන්හි ප්‍රවීණයන්ගේ දායකත්වය ලබාගැනීමෙන් ද.. පාසල් සංවර්ධන සමිතිය හා දෙමාපියන්ගේ සහයෝගයෙන් ද ඒ සිහිනය සැබෑ කර ගත්තා.

2026.08.05 වැනි දිනය යශෝදරාවේ දී
" දෑතක මහිම" අත්කම් වැඩමුළුව පැවැත්වුණා.
සම්ප්‍රදායික නිර්මාණවලට අමතරව පරිගණක උපාංග හඳුන්වාදීම... බතික් කලාව...බොන්සායි වගාව... විසිතුරු හා වානිජ මල් වගාව... රිබන් මල් සැකසුම් ... විසිතුරු කඩදාසි බෑග් නිර්මාණය...රූපලාවන්‍ය ශිල්පය.. ආදිය පිළිබඳව අත්දැකීම් ලබා ගැනීමටත් දරුවන්ට හැකි වුණා. ඒ අතර අනාගත රැකියාවන් පිළිබඳ සිහින ද ඔවුන් තුළ ගොඩනැගෙන්නට ඇති .

එහි ප්‍රතිඵලය.....
වෙනදා විනාඩි කිහිපයක් වාඩිවී සිටීමට අකමැති දඟකාරයන් බොහෝ ඉවසිලිවන්තව නිර්මාණකරණයේ යෙදුණහ.. තමා ගෙතූ අත් පළඳනාවල්... කුඩා වට්ටි... සකසන ලද මල්... බොහෝ ආඩම්බරයෙන් ගෙදර ගෙන ගියහ.
රණ්ඩු සරුවල් ...නඩු හබ... අමතකය...!

දරුවෝ කවදාවත් නොදැක තිබූ අලුත් ලෝකයක විසිතුරු දකිමින් සතුටු වූහ.
ක්‍රියාවෙන් අවබෝධය ලැබූහ.

මේ තරගකාරී සමාජ ක්‍රමයේ සිරවී සිටින වැඩිහිටි අපටද මේ වැඩමුළුව නැවුම් බවක් ලබා දුන්නේය.
යශෝදරාවේ සාර්ථක දිනයක් එසේ නිමාවට පත් විය.

06/08/2026

අද දින සිසු අයිතියට පැවරුනු ක්‍රිකට් පුහුණු දැල.😇🏏

06/08/2026

ඊයේ දිනයේදී අප පාසලේ පවත්වන ලද දෑතක මහිම අත්කම් වැඩමුළුවේ සම්පූර්ණ වීඩියෝව පහත ලින්ක් එක ඔස්සේ ඔබට you tube හරහා දැන් නැරඹිය හැකියි.

ශ්‍රී යසෝදරා මහා විද්‍යාලය, මාලබේ - Dathaka Mahima - Athkam Wadamu...

05/08/2026

“දිරියෙන් ගොඩනැගෙන යසෝදරාව”
දරුවන්ට තිළිණ කරන තවත් එක් වටිනා දායාදයක් හෙට දින විවෘත වන වගයි…😇🥎🏏

24/07/2026

13/07/2026

මෙවර පහ ශ්‍රේණිය ශිෂ්‍යත්ව විභාගයට පෙනී සිටින දරුවන්ගේ අධ්‍යාපන අභිවෘද්ධිය උදෙසා මාලඹේ ශ්‍රී රාහුල විද්‍යාලයේදී පසුගියදා සාර්ථකව පවත්වන ලද ශිෂ්‍යත්ව සම්මන්ත්‍රණය වෙනුවෙන් පූර්ණ අනුග්‍රාහකත්වය ලබා දුන් ලංකා බැංකුවේ ඉහළ කළමනාකාරීත්වයටත්, එම කටයුතු මනාව සම්බන්ධීකරණය කරමින් කැපවූ මාලඹේ ලංකා බැංකු ශාඛාවේ කළමනාකාරීතුමිය ඇතුළු සමස්ත කාර්ය මණ්ඩලයටත්, එමෙන්ම විද්‍යාලීය පරිශ්‍රය ඇතුළු අවශ්‍ය සියලුම පහසුකම් නොමඳව සපයමින් සුවිශේෂී සහයෝගයක් දැක්වූ රාහුල බාලිකා විද්‍යාලයේ වැඩ බලන විදුහල්පතිතුමිය සහ ප්‍රාථමික අංශ නියෝජ්‍ය විදුහල්පතිතුමිය ඇතුළු ආචාර්ය මණ්ඩලයටත් අපගේ හෘදයාංගම ප්‍රණාමය හා ගෞරවනීය ස්තූතිය මෙලෙස පුද කර සිටින අතර, මෙමඟින් ශක්තියක් ලැබූ අපේ දුවා දරුවන්ට මෙවර විභාගයෙන් ඉහළම ජයග්‍රහණ අත්කර ගැනීමට හැකිවේවායි ද ප්‍රාර්ථනා කරමු.

01/07/2026

යසෝ දම් ගී....2026

සම්බුදු පියාණනි....
අතීතයේ දවසක අපි ඔබ වහන්සේ දෑසින් දැක ගන්නට ඇති... දෙව්රම් වෙහෙරට යන්න එන්න ඇති.... ඔබ වහන්සේගේ බණ පදයක් අහන්නට ඇති.... ඔබ වහන්සේගේ පාමුල වැඳ වැටෙන්නට ඇති...

ඒත්.... සංසාරය පුරාවට අපි දැනුවත්ව හෝ නොදැනුවත්ව කොයි තරම් පව් පිරෙන්නට ඇත්ද....
එනිසා අපි තවමත් මග සලකුණු නොදැන …
සංසාර ගමනේ අතරමං වී සිටින්නෙමු...

මේ ආත්ම භාවයේ අප කළ ආංශු මාත්‍රික හෝ පින්කමක් වේ නම් ....මෙතේ බුදුන් දැක.... සසර දුක් නිමා කර .....උතුම් නිවන් සුව විඳ ගන්නට අපහට වරම් ලැබේවා...!

අනාගත පරපුරට බුද්ධාලම්බන ප්‍රීතිය ඇති කිරීම උදෙසාත්...
සුභාවිත ගීතයට හුරු කිරීම පිණිසත්... ශ්‍රී ලංකාවාසීන් මෝහාන්ධකාරයෙන් මිදුණු.. පින්බර පොසොන් පෝදා සිහිකරනු පිණිසත්....
2026.06.26 වැනිදා... යශෝදරාවේ වේදිකා මස්තකය... සිත නිවන භක්තිගීත රැසකින් නින්නාද විය.

ප්‍රාථමික සහ ද්විතීක අංශයේ සිසුන් රැසකට සිය සහජ ප්‍රතිභාව එළි දක්වන්නට මෙය මහඟු අවස්ථාවක් විය.

බෞද්ධ දර්ශනය... කලාව... මහින්දාගමනයේ වැදගත්කම... අපගේ සංස්කෘතිකාංග ..පිළිබඳව ධනාත්මක අදහසක් දරුවන්ගේ සිත් තුළ ඇති කිරීම විදුහල්පති W.P. සුජීව කුමාර මහතාගේ අදහස විය.
ඒ අදහසට පණ දීමට තවත් බොහෝ පිරිසක් එක්ව අත්වැල් බැඳ ගත්තේ සුපහන් හැඟීමෙනි.

දරුවන්ව කැපවීමෙන් පුරුදු පුහුණු කරමින්, මෙවැනි අගනා ප්‍රසංගයක් විද්‍යාලයට තිළිණ කිරීම වෙනුවෙන් ශක්තියක් වූ සැමට හෘදයාංගම ස්තූතිය පුද කරමු.💐💐💐

27/06/2026

“යසෝ දම් ගී”

07/06/2026

අපේ හුස්මෙන් පවා පරිසරය නිවේවා.....!

2026 ලෝක පරිසර දිනය
දිනය-2026 ජූනි 5, සිකුරාදා
සත්කාරක රට: අසර්බයිජානය - බාකු නගරය

"Inspired by Nature. For Climate. For Our Future"
“ස්වභාවයෙන් ආභාෂය ලැබෙමු.. ...දේශගුණය වෙනුවෙන්. අපේ අනාගතය වෙනුවෙන්"

තේමාවේ අදහස

පෘථිවිය අපට එවන අනතුරු ඇඟවීම් සංඥා තේරුම් ගෙන අප විසින් ආපසු යවන සංඥා"

( Climate Action + Nature-based Solutions)

වනාන්තර, තෙත්බිම්, සාගර ඇතුළු ජල මූලාශ්‍ර වැනි ස්වභාවික පද්ධති ආරක්ෂා කර හෝ යළි ඇති කර ,
දේශගුණික විපර්යාස වලට පිළියම් සොයන්නේ කෙසේදැයි කටයුතු කිරීම මෙහි අදහසයි .


පරිසරය සුරැකීමේ වගකීමෙන් බොහෝ බරක් පැටවෙන්නේ මිනිසා මතයි.තම අවශ්‍යතා සඳහා පරිසරය වෙනස් කරන ප්‍රධාන සාධකය වන්නේ ද මිනිසාමය.

මාලබේ ශ්‍රී යසෝදරා මහා විද්‍යාලය ඉතාම සුන්දර පරිසරයක පිහිටා තිබේ. අර්ධ නාගරික වටපිටාවක් මැද වුවත් විවිධ ශාක විශේෂ ගණනාවක් පාසල් භූමියේ ඇත. ගම්මාලු , නා , අත්තික්කා, අඹ වැනි තුංග දේහ දරන ශාක ද , යකි නාරං වැනි ඒකදේශික ශාක ද ආසියානු කළු වඳුරා වැනි ඒක දේශික සතුන් ද විවිධාකාර පක්ෂීන් ද මේ බිම දැකගත හැක.
තවද උදෑසන ළා හිරු රැස් මැද ක්‍රීඩාපිටියේ නිල්වන් තණපලස මත දිදුලන පිණි කැට මවන්නේ මනහර දසුනකි.

එහෙත් අප පාසලේ ශිෂ්‍ය ප්‍රජාවෙන් වැඩි පිරිස වසරකට වරක් දෙකක් පහත් බිම් පුරවාලන කැලණි ගඟේ දැඩි ගං වතුර තත්ත්වයෙන් පීඩා විඳිති . සිය ගේ දොර දේපල...පොත් පත්... පමණක් නොව ඇස් පනාපිට ජීවිත පවා අහිමි වී ගිය දුක්බර කතන්දර ඔවුන් සතුව ඇත.
මේ නිසාම මෙවර ජගත් පරිසර දින තේමාව ඔවුන්ට වඩා සංවේදී විය. එබැවින් පරිසර දින වැඩසටහන් සඳහා දරුවන් මහත් උනන්දුවකින් කටයුතු කළ බව පෙනුණි.
උදෑසන දැනුවත් කිරීමේ වැඩසටහනෙන් පසුව අප පාසලේ රුක් රෝපණ වැඩසටහනක් ක්‍රියාත්මක විය. එසේම පාසල හා ප්‍රජාව දැනුවත් කරන බැනර් කීපයක්ද දරුවන් අතින් පාසල් බිමේ සවි කරන ලදී. පාසල් බිමේ ඇති ශාක විද්‍යාත්මකව නාමකරණය කිරීමේ මූලික පියවර ගනු ලැබිණි. තවද පාසල හා අවට ප්‍රදේශයන්හි අපරික්ෂාකාරී ලෙස ඉවත දමන ප්ලාස්ටික් බෝතල් එක් රැස්කර ප්‍රතිචක්‍රීකරණය කිරීමේ වැඩසටහක් පිළිබඳවද ළමුන් දැනුවත් කරන ලදී.